Ukuyemba uko Kushibonsa

“UKUYEMBA kulabonsa; ukuyemba kulapita,” e fyasosele kalemba wa nshintu Walter De la Mare. Ici mu cituntulu e fintu caba ku maluba ya cactus ayayembesha ayalangililwe pano. Ubukata bwa yako mu kwangufyanya bulabonsa.

Umusambi wa Bwina Kristu Yakobo alembele ukuti: “Akapita [uwa fyuma] nge luba lya cani. Pantu akasuba katulila pamo ne cikabilila, no kuumye cani; iluba lya ciko lilalukuta, no kuyemba kwa kumoneka kwa liko kwaonaika: e fyo no wa fyuma akalokota mu mibele yakwe.”—Yakobo 1:10, 11.

Muli cino calo cishashikatala, icuma mu cituntulu kuti caluba mu bushiku bumo. Mu kulundapo, uwa fyuma—ukupala uuli onse umbi—‘wa nshiku shinono, nge luba.’ (Yobo 14:1, 2) Yesu alandile umulumbe uwa muntu uwali uwapamfiwa mu kutuulika icuma pa kuti engekala no kucibondola. Lelo lintu atontonkenye ukuti alikwete conse ico alekabila ku bumi bwa maliila, alifwile. Yesu asokele ukuti: “E fyo cili ku uleibikilo mwine ifyuma, no kukanaba uwacindama kuli Lesa.”—Luka 12:16-21.

“Uwacindama kuli Lesa.” Cinshi Yesu apilibwile kuli co? Umuntu wacindama muli iyi nshila akwata “ifyuma mu muulu”—ishina lisuma na Lesa. Icuma ca musango yo tacibonsa. (Mateo 6:20; AbaHebere 6:10) Mu cifulo ca kuba nge luba ilyo ilibonsa, umuntu wa musango yo muli Baibolo alinganishiwa ku cimuti, ico amabula ya ciko tayalokota. Kabili, twaebekeshiwa ukuti, “conse ico acita cikalengwo kushuka.”—Ilumbo 1:1-3, 6.