Ukubombela Pamo Ne Bumba Litungulula Ilelo

“Akamusonta pa fyuma fyakwe fyonse.”—LUKA 12:44, “NW.”

1. Ni mu bufumu nshi umo Kristu atendeke ukuteka mu 33 C.E., kabili ukupitila muli cinshi?

PA PENTEKOSTE 33 C.E., Yesu Kristu, Umutwe wa cilonganino, atendeke ukuteka mu kucincila mu bufumu bwa basha bakwe abasubwa no mupashi. Shani fyo? Ukupitila mu mupashi wa mushilo, bamalaika, ne bumba litungulula ilimoneka. Nga fintu umutumwa Paulo alangilile, Lesa ‘apokolwele abasubwa ku lupaka lwa mfifi, no kubapilibwila mu bufumu bwa Mwana wakwe uwatemwikwa.’—Abena Kolose 1:13-18; Imilimo 2:33, 42; 15:2; Abena Galatia 2:1, 2; Ukusokolola 22:16.

2. Ni mu Bufumu nshi ubwacilapo bukulu umo Kristu atendeke ukuteka mu 1914?

² Pa mpela ya “nshita shasontwa isha nko,” Yehova aingilisheko ubulashi bwa cifumu ubwa kwa Kristu, ukubutanunwina bushilya bwa cilonganino ca Bwina Kristu. (Luka 21:24, NW) Ee, mu mwaka wa 1914, Lesa apeele Umwana wakwe ubulashi bwa cifumu pa “nko,” “ubufumu bwa pe sonde,” umutundu wa muntu onse.—Ilumbo 2:6-8; Ukusokolola 11:15.

Ukusonta “Pa Fyuma Fyakwe Fyonse”

3, 4. (a) Mu cilangililo ca kwa Yesu ica mondo, ni nani aimininweko no muntu mukankaala? (b) Fya kucitikako nshi ifya Bufumu fyaliko mu 1918 na 1919?

³ Icawaminwa ukumonwa pano cili cilangililo ca kwa Yesu ica muntu mukankaala. (Luka 19:11-27) Pa ntanshi ya kuya ku calo ca kutali ku kuimwena ubufumu, uyo muntu apeele abasha bakwe indalama (imondo) isha kubomba na sho. Ilyo abwelele, uyu muntu, uwimininako Kristu, aitile kuli wene “abasha balya abo apeele indalama, ukuti eshibe ico basandulwilemo.” (Luka 19:15) Ni shani fintu ici cabombele pa numa Yesu abe naimwena ubufumu?

⁴ Mu 1918 Imfumu Yesu Kristu uwabikwa pa cipuna asangile ibumba linono ilya Bena Kristu abo ku numa bashile amacalici ya Kristendomu kabili baali abapamfiwa ukusakamana amabuseko ya pe sonde aya kwa Shikulu wabo. Pa numa ya kubalopolola kwati ni ku mulilo, Yesu apeele abasha bakwe ubulashi bwaingilishiwako mu 1919. (Malaki 3:1-4; Luka 19:16-19) Abasontele “pa fyuma fyakwe fyonse.”—Luka 12:42-44.

“Ifilyo mu Nshita Iiyene”

5, 6. (a) Mulimo nshi uwakushiwa umulashi wa kwa Kristu apokelele? (b) Masesemo nshi ayali mupepi no kufikilishiwa pa numa ya 1914, kabili ni shani fintu ibumba lya mulashi lyali no kwakana mu kucincila mu kufikilishiwa kwa yako?

⁵ Imfumu Yesu Kristu iileteka apeele umulimo wakushiwa ku mulashi wakwe, nelyo maneja wa mu ŋanda, pe sonde. Abena Kristu basubwa baali no kube “nkombe” sha kwa Lesa ukubelako imfumu yafwikwe cilongwe uwapeelwa amaka ya kuteka pa bantu na bantu bonse aba pe sonde. (2 Abena Korinti 5:20, NW; Daniele 7:14) Icishingamo cabo ica bengi tacali no kuba na kabili ica kupeela fye ibumba lya kwa Kristu ilya bakapyunga basubwa “umulingo wa filyo mu nshita iiyene.” (Luka 12:42) Baali nomba no kubuulo lubali lwacincila mu kupwishishisha kwa masesemo ayali mupepi no kufikilishiwa pa numa ya kwimikwa kwa Bufumu mu 1914.

⁶ Cinshi ici capilibwile mu kubomba kwine kwine? Capilibwile ukutanununa ukushimikila kwa ‘mbila nsuma iyi ya bufumu kwi sonde lyonse ilyaikalwamo.’ (Mateo 24:14) Ukulundapo, capilibwile ukusabankanya ubukombe bwa maka ubwa bupingushi bwa kulwisha imicitile ya kwa Satana na bakafwilisha ba iko. Ici cakwete ica kufumamo ca ‘kuntenshe nko.’ Muli fyo, “ifisuma,” “impaanga shimbi” isha kwa Kristu, fyatendeke ukwisamo. (Hagai 2:7; Yohane 10:16) Ukufuma mu 1935 ukuya ku ntanshi, “ibumba likalamba” lyatendeke ukukonkolokela mu kuteyanya kwa kwa Yehova mu kusalala kwa calo. (Ukusokolola 7:9, 10) Ici caitileko ukuwamya kwa kulundulukilako mu kuteyanya. Ukulandila mu mampalanya, amabwe yanono yali no kupyanikwapo ne cela, ifimuti no butale, icela na silfere, no butale na golde. (Esaya 60:17) Ici conse calicitika ukutula 1919 pe samba lya butungulushi bwacincila kabili ubwapalamisha ubwa kwa Yesu Kristu, uwapeela amabuseko yakwe aya pe sonde aya Bufumu, nelyo ifyuma, kwi bumba lyakwe ilya musha wa cishinka ne Bumba Litungulula lyakwe.

7. Cinshi ifishingamo fyaingilishiwako ifya mulashi fyabimbilemo?

⁷ Kuti twaumfwikisha mu kwanguka ukuti icisendo caingilishiwako ica cishingamo ukubikwa pa musha, umulashi, nelyo maneja wa mu ŋanda uwa kwa Shikulu cabimbilemo imibombele ikalamba iya kulemba ne ya kulonganike fyebo. Ukupayanya kwa ca kulya ca ku mupashi kwali no kusabankanishiwa lyonse mu nshita yalinga mu Ulupungu lwa kwa Kalinda. Mu 1919 The Golden Age (magazini inankwe iyali no kuba Consolation pa numa, kabili lyene Loleni!) yatendeke ukusabankanishiwa ku kubimbula ubuseko bwa cintubwingi, ukulunda ku kukuulilila “aba mu ŋanda.” (Mateo 24:45) Imiina ya fitabo, ututabo, na matrakiti na fyo fine fyalipulintwa pa myaka.

Ukulopololwa Kwatwalilila

8. Ni mu kuba na cinshi ifilundwa fye Bumba Litungulula fyaishibikwe ntanshi, kabili bulondoloshi nshi The Watchtower yacitile mu 1944?

⁸ Ukulolesha ku numa muli iyi “nshita ya ku mpela,” tatuli abapapushiwa pa kuti ifilundwa fye Bumba Litungulula fyaishibikwe ntanshi mu kupalamisha ne bumba lya bakabomba ba kulemba aba Watch Tower Society. (Daniele 12:4) Icipande “The Theocratic Alignment Today” (Ukutantika kwa Teokratiki Ilelo), icasabankanishiwe muli The Watchtower iya November 1, 1944, catile: “Mu kubamo kupelulula, abo abaseekeshiwe no kusabankanishiwa kwa cine ca Baibolo icasokololwa bamwenwe nge bumba litungulula ilyasalwa na Shikulu ku kutungulula bonse abo abalefwaisha ukupepa Lesa mu mupashi na mu cine no kumubombela mu kwikatana mu kwananya ici cine casokololwa kuli bambi abali ne nsala ne cilaka.”

9. Ni mu kuba na cinshi Ibumba Litungulula pa numa lyaishileishibikwa mu kupalamisha, kabili mulandu nshi?

⁹ Kwaliko ififwaikwa fya mwi funde ifyabimbilwemo ku kusabankanya bamagazini ne fya kwafwilisha fimbi ifye sambililo lya Baibolo. E ico, Watch Tower Bible and Tract Society yalimikwe no kulembeshiwa mu citungu ca Pennsylvania, U.S.A. Pa myaka, Ibumba Litungulula ilimoneka lyaishibikwe ne bumba lya bangalila aba uku kulembeshiwa ukwaimikwe ku kusabankanya ifya kwafwilisha isambililo lya Baibolo ifikabilwa kabili ifibomfiwa na bantu ba kwa Shikulu mu kusalala kwe sonde.

10, 11. Kulopolola nshi kwacitike mu 1944, kabili kulandapo nshi kwacitilwe pa lwa ici muli The Watchtower?

¹⁰ Abangalila cinelubali aba Sosaite baali Bena Kristu ba busumino. Lelo ulubali lwabo mu kulembeshiwa kwa mwi funde kuti pambi kwatubulwile ifyo bakwete ififulo fyabo mwi Bumba Litungulula pa mulandu wa kusalwa kwabo ne filundwa fya mwi funde ifya Watch Tower Society. Ukulundako, ukulingana ne funde bucilundwa bwa musango uyo na mashuko ya buko aya kusala mu kutendekelako fyasuminishiwe kuli bamo bamo fye abacitile misangulo ku Sosaite. Uku kutantika kwakabile ukwalulwa. Ici calicitilwe pa kukumana kwa pa mwaka ukwa kulembeshiwa kwa Pennsylvania ukwa Watch Tower Society ukwacitilwe pa October 2, 1944. Amafunde ya Sosaite yalyalwilwe ica kuti bucilundwa tabwali na kabili no kushintilila pa ndalama. Ifilundwa fyali no kusalwa ukufuma pa kati ka babomfi ba busumino aba kwa Yehova, kabili aba baisa ku kusanshamo abengi abalebomba inshita yonse pa cishinte cikalamba ica Sosaite mu Brooklyn, New York ne misambo ya iko ukupulinkane calo.

¹¹ Ukucita lipoti pali uku kuwamyako, The Watchtower iya November 1, 1944, yalondolwele ukuti: “Indalama, nga fintu shimininwako mu misangulo ya fya ndalama, tashilingile ukukwata ishiwi lya kupiminako, na kuba tashilingile ukukwata icili conse ica kucita no kwisusha ibumba litungulula ilya nte sha kwa Yehova pe sonde. . . . Umupashi wa mushilo, amaka yabomba ayatentemuka ukufuma kuli Yehova Lesa ukupitila muli Kristu Yesu, e ulingile ukupima no kutungulula muli uyu mulandu.”

Ilyapusana Ukufuma kwi Bumba lya Bangalila

12. Cinshi cilango kuti Yehova apaalile ukulopolola pe samba lya butungulushi bwe Bumba Litungulula?

¹² Ukulunduluka kwa mulimo wa kushimikila mu kati ka makumi ya myaka iyakonkelepo kushininkisho kuti Yehova apaalile ukulopolola kulandilwepo mu kumfwikisha kwe Bumba Litungulula. (Amapinda 10:22) Pantu, impendwa ya bakabilisha ba Bufumu ukupulinkane sonde lyonse yacilwike ukufuma ku kucepako panono pali 130,000 mu 1944 ukufika kuli 1,483,430 mu 1970! Lelo ukuwamya kwalundwako kwali kucili no kwisa.

13. (a) Ukufika mu 1971, yali mibele nshi ukulosha kwi Bumba Litungulula? (b) Cinshi cacitike pa kukumana kwa pa mwaka ukwa Sosaite mu 1971?

¹³ Ukufika mu 1971 abo abe Bumba Litungulula bali bacili nabeshibikwa ne filundwa cinelubali ifye bumba lya bangalila aba Watch Tower Bible and Tract Society of Pennsylvania. Presidenti wa Sosaite asendele icisendo cikalamba ica cishingamo mu kucito kupingulapo ukwaleambukila imibombele ya misambo ya Sosaite ukupulinkane calo conse. Lelo amalyashi yakatama yalipeelwe pa kukumana kwa pa mwaka ukwacitilwe pa October 1, 1971. Presidenti wa Sosaite alandile pa mutwe wa lyashi uwa kuti “Ukuleta Icifulo ca Mushilo mu Kulungikwa,” kabili presidenti wa cibili pa lyashi lya kuti “Ibumba Litungulula Ifyo Lyapusana ku Kulembesha kwa Mwi Funde.” Kupusana nshi kwabapo pa kati ke Bumba Litungulula no kulembesha kwa mwi funde?

14. Kupusana nshi ukwabako pa kati ka kulembesha kwa mwi funde ne Bumba Litungulula?

¹⁴ Nga fintu cilumbwilwe kale, Watch Tower Bible and Tract Society of Pennsylvania yalikwata ibumba lya bangalila ilyapeleshiwa ku filundwa cinelubali. Aba baume baipeela aba Bwina Kristu balasalwa pa ciputulwa ca myaka itatu ne filundwa fya kulembesha abafika ku bwingi bonse te kucila pali 500, abo ubwingi bwabo te Bena Kristu basubwa. Ukulundako, apantu ukubako kwa kulembesha kwaba mu cine cine kwa mwi funde, mu kuba ne cishinte cikalamba ica cifulo ca mpanga icapampamikwa, kuti kwatobololwa na Kaisare, uko e kuti, Ubuteko. (Marko 12:17) Nangu cibe fyo, Ibumba Litungulula talili cibombelo ca mwi funde. Ifilundwa fya liko tafisalwa. Filasontwa ukupitila mu mupashi wa mushilo pe samba lya butungulushi bwa kwa Yehova Lesa na Yesu Kristu. (Linganyeniko Imilimo 20:28.) Ukulundako, abo abapanga Ibumba Litungulula baume basubwa no mupashi ukwabula icifulo ca mpanga ca kukakililwako icapampamikwa nelyo icishinte cikalamba.

15. Bulondoloshi nshi pa lwa kuteyanya bwacitilwe mu Ulupungu lwa kwa Kalinda ulwa May 15, 1972, kabili cinshi cingasoswa pa lwe Bumba Litungulula ilya mu kasuba ka lelo?

¹⁵ Ukukuma ku kulopolola kwa musango yo mu kumfwikisha, Ulupungu lwa kwa Kalinda ulwa May 15, 1972, lwatile: “Mu kutasha inte sha Bwina Kristu isha kwa Yehova balishiba no kubilisha mu kukosa ifyo uku takwaba kuteyanya kwa butotelo ukwa muntu umo, lelo ifyo kwalikwata ibumba litungulula ilya Bena Kristu basubwa no mupashi.” Ibumba Litungulula ilye bumba lya musha wasubwa ne lya mamilioni ya banabo pa kati ka mpaanga shimbi lyalipangashiwa mu kulundulukilako pa kusakamana icifulo ca liko ica bwanganshi.

16. Ni shani fintu ifyuma fya kwa Kristu ifya pe sonde fyaingilishiwako ukutula mu 1971, kabili ni fili kwi fimo ifya ifi ifyo apeela ku kusakamana kwa musha wa cishinka kabili uwashilimuka, uwaimininwako ne Bumba Litungulula lyakwe?

¹⁶ Ifyuma fya pe sonde ilya Mfumu Yesu Kristu fyalikula mu kutwalilila. Ukutula mu 1971 impendwa ya Nte yaliciluka ukufuma pe samba lya 1,600,000 ukufika ku cipimo ca pa mulu ica kucila pali 3,700,000 mu 1989. We bushininkisho bwe paalo lya kwa Lesa! (Esaya 60:22) Uku kukula kwalita pa kutanununwa kwa fibombelo pa cishinte cikalamba ica Sosaite na mu misambo ya iko, pamo pene no kwalula kwa nshila ukulingana na shino nshiku isha mibombele no kwananishiwa. Kwalifumamo ukukuulwa kwa Mayanda ya Bufumu ayengi na Mayanda ya Kulonganinamo ukupulinkane sonde lyonse. Iyi yonse nshita, Ibumba Litungulula lyalitwalilila na kabili ukusenda icishingamo ca kwangalila umulimo wa kushimikila, ukupulinta ifyebo fya kusambilila Baibolo, no kusonta bakangalila mu misambo, ifitungu, imiputule, ne filonganino. Aya mabuseko ya Bufumu yantu Kristu apeela ku kusakamana kwa musha wa cishinka kabili uwashilimuka, uwaimininwako ne Bumba Litungulula lyakwe.

17. Kuwamyako nshi ukwalundwako mu bwangalishi ukwacitilwe mu 1971, 1974, na 1976?

¹⁷ Ibumba litungulula ilya mu mwanda wa myaka uwa kubalilapo lyalikushiwe ku kusanshamo abengi ukucila pa batumwa ba kwa Yesu. Lintu ifikansa fya kusembululwa fyapingwilwepo, lilye bumba mu kushininkisha lyasanshishemo “abatumwa na bakalamba ku Yerusalemu.” (Imilimo 15:1, 2) Mu kulinganishiwako, Ibumba Litungulula lyalikushiwe mu 1971 kabili na mu 1974. Pa kwangusha umulimo wabo uwa bwangalishi, Ibumba Litungulula lyatantike bakomiti basano ukutendeka ukubomba pa January 1, 1976. Komiti imo imo yabamo ifilundwa ukufuma pali fitatu ukufika kuli mutanda, bonse bene abakwata amaka ayalingana mu milandu iilelangulukwapo. Ceyamani wa komiti imo imo abomba pa mwaka umo, kabili ifilundwa ngo muntu umo umo ifye Bumba Litungulula fibomba muli imo nelyo ukucilapo iya aya makomiti. Imo imo iya aya makomiti ipeela ukusakamana kwaibela ku lubali lwa mu kulungatika ulwa fyuma fya pe sonde ifya kwa Kristu. Komiti yalenga mutanda—Komiti ya kwa Ceyamani, intu bucilundwa bwa iko bulashinguluka umwaka umo umo, ibomba pa mpika she pamfya.

Ukubombela Pamo Kwacincila Ne Bumba Litungulula

18. Ni shani fintu Ibumba Litungulula libomba, kabili ni nshila nshi imo iyo twingabelebeseshamo ukubombela pamo kwesu na lyene?

¹⁸ Amamikoti ye Bumba Litungulula yalakwata ukukumana kwa cila mulungu ukupituluka mu milandu yacindama, ukucito kupingulapo pa numa ya kulanguluka kwabamo ipepo, no kutantika imibombele ya teokratiki iya nshita ya ku ntanshi. Nga fintu cimwenwe mu kubangililako, Imilimo icipandwa 15 ilango kuti icipusho cayafya icalekabila ukusuminishanya kwakosa caloshiwe kwi bumba litungulula ilya mu mwanda wa myaka wa kubalilapo ku kusakamanwa. Mu musango umo wine ilelo, ifipusho fyacindama filaloshiwa kwi Bumba Litungulula lyonse, ilikumana cila mulungu nelyo ukucilapo ilingi line lintu cakabilwa. Ifilundwa fye Bumba Litungulula, pali ino nshita 12 mu mpendwa, balafwaya ubutungulushi bwa kwa Yehova Lesa ukupitila mu Malembo no kupitila mwi pepo. Inshila imo intu tubelebeseshamo ukubombela pamo kwesu ne Bumba Litungulula ili kupitila mu kulaibukisha ukucilisha aba abasontwa mu mapepo yesu aya cila bushiku.—Abena Roma 12:12.

19. Ni shani fintu amakambisho ye Bumba Litungulula yafika ku filonganino?

¹⁹ Ni shani fintu amakambisho no kupingulapo ifye Bumba Litungulula fifika ku filonganino? Pa numa lintu ifilundwa fye bumba litungulula ilya mu mwanda wa myaka wa kubalilapo bafikile pa kupingulapo kwabo mu kuba no kwaafwa kwa mupashi wa kwa Lesa, batumine kalata ku filonganino. (Imilimo 15:22-29) Nangu cibe fyo, inshila ikalamba ilelo ili kupitila mu mpapulo sha Bwina Kristu.

20. (a) Kulopolola nshi ukwalundwako ukwa mu kuteyanya kwacitilwe mu 1976? (b) Ni shani fintu Amakomiti ya Misambo yabombela pamo ne Bumba Litungulula?

²⁰ Ukutula pa February 1, 1976, umo umo uwa misambo ya Watch Tower Society walikwata Komiti ya Musambo iyapangwa na baume bakampuka abasontwa ne Bumba Litungulula. Pamo nga beminishi be Bumba Litungulula mu calo nelyo ifyalo ifyaba pe samba lya kwangalila kwa musambo wabo, aba bamunyina bafwile ukuba abaume ba busumino, aba cishinka. Ici citwibukisha ulwa baume bakampuka, abatiina Lesa, abacetekelwa abaafwilishe Mose ukupingula abantu muli Israele wa pa kale. (Ukufuma 18:17-26) Ifilundwa fya Komiti ya Musambo fibomfya amakambisho ayapokelelwa ukupitila mu fitabo fya Sosaite na bamagazini na Ubutumikishi Bwesu Ubwa Bufumu, pamo pene na mu makalata ya cinkumbawile na makalata yaibela ayalebomba ne mpika sha cikaya. Amakomiti ya Misambo yeshibisha Ibumba Litungulula fyonse ifilecitika ukulingana ne nshita pa kulunduluka kwa mulimo mu calo cimo cimo ne mpika isho ishingemako. Amalipoti ya musango yo ukufuma mu calo conse yalafwilisha Ibumba Litungulula ukupingulapo mitwe nshi iya malyashi ilingile ukulangulukwapo mu mpapulo sha Sosaite.

21. Ni shani fintu bakangalila benda basontwa, kabili cinshi imilimo yabo isanshamo?

²¹ Pe samba lya butungulushi bwa mupashi wa mushilo, Amakomiti ya Misambo yalatasha abaume bakosoka, aba bumupashi ku kubomba nga bakangalila ba miputule na ba fitungu. Pa numa ya kusontwa mu kulungatika ne Bumba Litungulula, balabomba nga bakangalila benda. Aba bamunyina balatandalila imiputule ne filonganino pa kufikuulilila lwa ku mupashi no kufyafwilisha ukubomfya amakambisho ayapokelelwa ukufuma kwi Bumba Litungulula. (Linganyeniko Imilimo 16:4; Abena Roma 1:11, 12.) Bakangalila benda balatuma amalipoti kwi ofesi lya musambo. Mu kuba no kwaafwa kwa mupashi wa mushilo na Malembo yapuutwamo, balakana na baeluda ba cikaya mu kutasha bamunyina balinga ku kusontwa nga babomfi batumikila na baeluda kwi Bumba Litungulula nelyo ku beminishi ba liko.—Abena Filipi 1:1; Tito 1:5; linganyeniko 1 Timote 3:1-13; 4:14.

22. (a) Ni shani fintu baeluda ba mu filonganino babombela pamo ne Bumba Litungulula? (b) Cinshi cishininkisha ukuti Yehova alepaala uku kutantika kwa teokratiki?

²² Mu kukonkapo, abo abapanga amabumba ya baeluda ‘balapeelako kusakamana ku bene na ku mukuni onse, pa kati ka untu umupashi wa mushilo wabasonta bakangalila.’ (Imilimo 20:28, NW) Aba bakangalila mu busumino balafwaya ukubomfya amakambisho ayapokelelwa ukufuma kuli Yehova Lesa na Yesu Kristu ukupitila mu musha wa cishinka kabili uwashilimuka ne Bumba Litungulula lyakwe. Yehova alepaala uku kutantika kwa teokratiki, pantu ‘ifilonganino fitwalilila ukukoshiwa mu citetekelo no kusanduluka mu mpendwa ubushiku no bushiku.’—Imilimo 16:5, NW.

23. Ukulosha kwi Bumba Litungulula, tulingile ukusuminishanya mu kukosa ukucita cinshi?

²³ Fintu cili icawama pa kuti ukupitila mwi Bumba Litungulula, Yehova Lesa na Shikulu, Yesu Kristu, balelangisha ukwaafwa kwa bantu ba kwa Lesa! (Ilumbo 94:14) Pamo ngo lubali lwa kuteyanya kwa kwa Yehova, ifwe ngo muntu umo umo tulamwenamo ukufuma ku kwaafwa kwa musango yo. (Ilumbo 145:14) Ici cilingile ukukosha ukupingulapo kwesu ukwakosa ku kubombela pamo no kutantika kwa kwa Lesa. Mu cine cine, shi natusangwe lyonse ababombela pamo ne Bumba Litungulula ilya Nte sha kwa Yehova ilyo tuleselela ku ntanshi ku nshita lintu “icalo cikesulamo ukwishiba Yehova, ifyo amenshi yafimba pali bemba.”—Esaya 11:9.

Ifishinka Fikalamba ifya Kwibukisha

◻ Fishingamo nshi ifyaingilishiwako ibumba lya mulashi lyapokelele mu 1919?

◻ Pa myaka iingi, ni mu kuba na cinshi Ibumba Litungulula ilimoneka lyaishibikwe?

◻ Kulopolola nshi ukwa kulundulukilako kwacitilwe mu kusontwa kwa filundwa fye Bumba Litungulula?

◻ Finshi fimo ifya fyuma fya kwa Kristu ifya pe sonde ifyo apeela kwi bumba lya musha ne Bumba Litungulula lyakwe?

◻ Ni shani fintu twingabombela pamo ne Bumba Litungulula?

[Ifikope pe bula 16, 17]

Ukufuma ku cishinte cikalamba ica calo ica liko mu Brooklyn, New York, Ibumba Litungulula lyangalila umulimo wa kusabankanya no kushimikila uwa Nte sha kwa Yehova mu misambo 93 iya Watch Tower Society

Germany

Japan

South Africa

Brazil