Imbila Nsuma ku Mutundu wa Muntu Onse!
“NAMWENE malaika umbi alepupuka mu kati ka muulu, akwete imbila nsuma ya muyayaya [ku kubila nge lyashi lya kusekelela, NW] ku baikala pe sonde, na ku luko lonse no mukowa no lulimi na bantu.” (Ukusokolola 14:6) Mu kuba na ayo mashiwi, umutumwa wa cikoloci Yohane alondolwele icimonwa cakwe ica mu busesemo icapuutwamo, icimonwa icilefikilishiwa mu kasuba kesu kene. We kwilulukwa ukwishibo kuti kuliko imbila nsuma muli iyi nkulo ya misoka ilenininako, ukukowesha, ukululunkanya, inkondo, no kukanashininkisha kwaanana ukwa fya bunonshi! Lelo ni mbila nshi iingabe yawamishe fyo ica kuti yakabila malaika ukuibilisha? Lyashi nshi lingabe lya kusekelela mu kulinga ukuwamina ukubilishiwa ku luko lonse no mukowa no lulimi na bantu?
Kuti twayasuke co nga ca kuti twatontonkanya ukubwelelako ku numa ku kashita kambi lintu malaika pa lwakwe abilishe mbila nsuma. Ici cali lintu umwanda wa myaka uwa kubalilapo B.C.E. waleisa ku mpela, mupepi ne myaka umwanda umo pa ntanshi Yohane talamone cimonwa cakwe. Bakacema bali mu mpanga ne mikuni yabo mu mabala mupepi na Betlehemu, kabili malaika amoneke ku kubilisha ukufyalwa kwa kwa Yesu, ukusoso kuti: “Moneni, ndebila kuli imwe imbila nsuma ya kusekelela kukalamba ukukaba ku Bantu bonse: pantu mu mushi wa kwa Davidi mufyalilwe imwe lelo Umupusushi, uyo ni Kristu Shikulu.”—Luka 2:10, 11.
Ukufyalwa kwa kwa Yesu mu cine cine kwali ni “mbila nsuma ya kusekelela kukalamba.” Akulile ku kuba Kristu walaiwe kabili Umupusushi, umo uwapeele ubumi bwakwe bwa buntunse ubwapwililika pa kuti abantunse batetekela aba mutima walungama bengaba no mweo. Ukucila pali ico, aali no kube Mfumu ya Bufumu bwa kwa Lesa, “Cilolo wa mutende,” untu pe samba lya kuteka kwakwe ubulungi no mutende mu kupelako fyali no kwisa ku mutundu wa muntu. (Esaya 9:6; Luka 1:33) Mu cine cine, ukufyalwa kwakwe kwali ni mbila nsuma iyawaminwe ukubilishiwa kuli malaika!
Yesu Ni Mfumu
Ku numa mu mwanda wa myaka wa kubalilapo, Yesu afikilishe imifwaile iingi iya kwa Lesa kuli wene, lilya aali talaba Imfumu iya Bufumu bwa kwa Lesa. Nga fintu iyi magazini yasontako libili libili, ico tacacitike ukufikila mu 1914. Nga fintu ukufikilishiwa kwa busesemo kulangisha mu kulengama, muli ulya mwaka Ubufumu bwa kwa Lesa bwalimikwe mu myulu. (Ukusokolola 12:10, 12) Nangu cingati kwaliko imbila yabipa nga nshi mu 1914—ukubalamuka kwa Nkondo ya Calo iya I—ukufyalwa kwa Bufumu bwa kwa Lesa kwali ni mbila yawamisha pali shonse. Uyo e mulandu wine Yesu asesemene ku kasuba kesu ukuti: “Imbila nsuma iyi ya bufumu ikabilwa ku fyalo fyonse ku kubo bunte ku nko shonse.”—Mateo 24:14.
Bushe ubusesemo bwa kwa Yesu bwalifikilishiwa? Icasuko cili ca kuti ee! Kabili icimonwa ca mu busesemo ica kwa Yohane na co cine califikilishiwa. Ca cine, te kuti tumone malaika ushimoneka untu Yohane amwene. Lelo Inte sha kwa Yehova balimoneka nga nshi ilyo balebilisha imbila nsuma iya kwa malaika “ku luko lonse no mukowa no lulimi na bantu.” Mu fyalo 212 ne fishi fya bemba, amashiwi yabo yalyumfwika. Kabili bacinkupiti baleyankulako. Ifyakukumanya fya bamo aba muli aba fikalanga fintu fye mu cituntulu imbila pa lwa Bufumu bwa kwa Lesa yawama.