Ici Te Kuti Cicitike!

“CAYANGUKA ingamali ukupula mu linso lya nshindano ukucilo wa fyuma ukwingila mu bufumu bwa kwa Lesa.” (Mateo 19:24) Yesu Kristu asosele ici ku kufunda abasambi bakwe isambililo. Kateka umukankaala uwacaice e lintu fye akeene ubwite ku kuba umukonshi wa kwa Yesu no kwakana amashuko ya mu nshita aya ku mupashi ayawamisha ayengi. Uyu mwaume asalilepo ukwikatilila ku fikwatwa fyakwe ifingi ukucila ukukonka Mesia.

Yesu talesosa ukuti tacingacitikako umupwilapo ku muntu wa fyuma ukunonka ubumi bwa muyayaya mu mitantikile ya Bufumu, pantu abantu bamo aba fyuma balisangwike abakonshi bakwe. (Mateo 27:57; Luka 19:2, 9) Nangu cibe fyo, ici te kuti cicitike ku muntu uuli onse uwa fyuma uwakwatisho kutemwa ku fikwatwa fyakwe ukucila ku fintu fya ku mupashi. Ni pa kuba fye uwaibukila ulwa kukabila kwakwe ukwa ku mupashi no kufwaya ukwaafwa kwa bulesa e lintu umuntu wa musango yo engapokelela ipusukilo lyapeelwa na Lesa.—Mateo 5:3; 19:16-26.

Icilangililo ca ngamali ne linso lya nshindano tacili no kusendwa mu kukonke shiwi. Yesu alebomfya ukukukumya ku kukomaila pa bwafya bwalolenkana na bantu ba fyuma abesha ukutemuna Lesa ilintu balesungilila umusango wa bumi uwa bukankaala, uwa kutemwe fimoneka.—1 Timote 6:17-19.

Bamo basoso kuti ilinso lya nshindano yali ni mpongolo inono mu cibumba ca musumba apo ingamali yali no kupula mu kuba no bwafya nga ca kuti yatuulilwe icipe ca iko. Lelo ishiwi lya ciGreek rha·phisʹ, ilyapilibulwa “inshindano” pali Mateo 19:24 na Marko 10:25, lyafuma kuli verbu ipilibula “bila.” Pali Luka 18:25 inumbwilo be·loʹne ipilibula inshindano ya kubilila, kabili palya New World Translation ibelengwo kuti: “Caliba icayangukisha, na kuba, ku ngamali ukupula mu linso lya nshindano ya kubililako ukucila umuntu wa fyuma ukwingila mu bufumu bwa kwa Lesa.” Amabulashi ayengi yalafwilisha uku kupilibula. W. E. Vine asoso kuti: “Imfundo ya kubomfya ‘ilinso lya nshindano’ ku mpongolo shinono imoneka ukuba iya muno nshiku; takwaba ukulonshiwa kwa iko ukwa pa kale.”—An Expository Dictionary of New Testament Words.

Ingamali ikalamba iileesha ukupula mu linso lya nshindano ya kubilila iinono “kuwaminisha kwa kukukumya kwa ku Kabanga,” e fisosa icitabo cimo ica kuloshako. Kabili ukulosha kuli bamo abaali incenjeshi nga nshi ica kuti bamoneke ukucita icishingacitwa, The Babylonian Talmud isoso kuti: “Balenga insofu ukwingila mu linso lya nshindano.” Yesu abomfeshe ukukukumya kwine kwine no kucilanya kwalengama ku kukomaila pa cishingacitika. Te kuti cicitike ku ngamali, nelyo insofu, ukupula mu linso lya nshindano ya kubilila. Mu kuba no kwaafwa kwa bulesa, nangu cibe fyo, umuntu wa fyuma kuti asha imimwene ya kutemwe fimoneka no kufwaya mu cine cine ubumi bwa muyayaya. E fingacita na bonse abakwata ukufwaisha kwa kufuma ku mutima ku kusambilila ukucita ukufwaya kwa kwa Lesa Wapulishamo, Yehova.