Konkeni ica Kumwenako ca kwa Yesu ica Kuipeelesha kwa Bukapepa

“Cikulu ica nkama ca [kuipeelesha kwa, NW] bukapepa: [Wene Yesu] e wamoneke mu mubili.”—1 TIMOTE 3:16.

1. (a) Cipusho nshi icishaaswikwe ukucila pa myaka 4,000? (b) Ni lilali kabili ni shani fintu icasuko capeelwe?

CALI cipusho icishaaswikwe ukucila pa myaka 4,000. Ukutula fye lintu umuntu wa kubalilapo, Adamu, afililwe ukusunga bumpomfu, icipusho cali ca kuti: Ni shani fintu ukuipeelesha kwa bukapepa kwingalangishiwa pa kati ka mutundu wa muntu? Mu kupelako, mu mwanda wa myaka uwa kubalilapo C.E., mu kuba no kwisa kwa Mwana wa kwa Lesa kwi sonde, icasuko calipeelwe. Mwi tontonkanyo ilili lyonse, icebo, ne ncitilo, Yesu Kristu alangilile ukwampana kwa pa lwakwe kuli Yehova. Muli fyo asokolwele ‘inkama yashila iya [kuipeelesha kwa, NW] bukapepa,’ ukulangilila inshila ku bantunse baipeela ukusungilila ukuipeelesha kwa musango yo.—1 Timote 3:16.

2. Mu kukonkelela ukuipeelesha kwa bukapepa, mulandu nshi tulingile ukulangulukila mu kupalamisha ica kumwenako ca kwa Yesu?

² Mu kukonkelela ukuipeelesha kwa bukapepa nga Bena Kristu baipeela, ababatishiwa, tucita bwino “ukulanguluka mu kupalamisha” ica kumwenako ca kwa Yesu. (AbaHebere 12:3, NW) Mulandu nshi? Pa milandu ibili. Uwa kubalilapo, ica kumwenako ca kwa Yesu kuti catwaafwa ukulundulula ukuipeelesha kwa bukapepa. Yesu alishibe Wishi mu kucilapo ukuwama ukucila pali onse umbi. (Yohane 1:18) Kabili e co mu kupalamisha Yesu apashenye inshila sha kwa Yehova ne mibele ica kuti aali na maka ya kusosa ukuti: “Uwamona ine, amona na Tata.” (Yohane 14:9) Ukupitila mu bumi no butumikishi bwa kwa Yesu, lyene, kuti twanonka ukutesekesha kwashika ku mibele yabondoka iya kwa Yehova, muli fyo ukukosha ukwampana kwa pa lwesu kuli Kabumba wesu uwakwato kutemwa. Uwa bubili, ica kumwenako ca kwa Yesu kuti catwaafwa ukulangisha ukuipeelesha kwa bukapepa. Aimike ica kumwenako capwililika ica myendele ukulangisha ukuipeelesha kwa bukapepa. Muli fyo na ifwe tucita bwino ukulanguluka ifyo pambi ‘twingafwala Kristu,’ uko e kuti, ukumona wene nge cipasho, ukupashanya ica kumwenako cakwe.—Abena Roma 13:14.

3. Cinshi cintu programu we sambililo lya pa lwesu uwa Baibolo ilingile ukusanshamo, kabili mulandu nshi?

³ Te conse cintu Yesu asosele no kucita icabakilwe mu musango walembwa. (Yohane 21:25) E ico, ifintu ifyalembelwe pe samba lya kupuutwamo filingile ukuba fya buseko bwaibela kuli ifwe. Programu we sambililo lya pa lwesu ilya Baibolo kanshi ilingile ukusanshamo ukubelenga kwa lyonse ukwa calembwa ca Malandwe ica bumi bwa kwa Yesu. Lelo nga ca kuti ukubelenga kwa musango yo kuli no kutwaafwa mu kukonkelela kwesu ukwa kuipeelesha kwa bukapepa, tufwile ukusendako inshita ukubelebesha mu kubamo ukutesekesha pa cintu tulebelenga. Tufwile na kabili ukuba abaibukila ukulolesha ukucila pa cilemoneka.

Ukupala Wishi, Ukupala Umwana

4. (a) Cinshi cilanga ukuti Yesu aali umuntu wa kuyumfwa kwa cikabilila kabili ukwashika? (b) Kuitendekelako nshi Yesu abuulile mu kubomba na bambi?

⁴ Langulukeni ica kumwenako. Yesu aali mwaume wa kuyumfwa kwa cikabilila kabili ukwashika. Moneni ukufuma muli Marko 10:1, 10, 13, 17, na 35 ukuti abantu ba mishinku yonse ne fikulilo bamumwene ngo uutununukwa. Ukucila pa kashita kamo, abuulile abana mu maboko yakwe. (Marko 9:36; 10:16) Mulandu nshi abantu, nangu fye abana, bayumfwilile abakakuka nga nshi mu kuba na Yesu? Pa mulandu wa buseko bwakwe bwafumaluka, ubwa cine cine muli bene. (Marko 1:40, 41) Ici calimonekeshe mu kuti libili libili abuulile ukuitendekelako ku kutununuka bambi abali mu kukabila kwa kwaafwa. Muli fyo, tubelengo kuti “amwene” (NW) mukamfwilwa uwa ku Naini uo umwana wakwe ali nasendwa. Lyene “ayako” no kubuusha umulumendo, kabili palya ukulumbulwa takwacitwa ukuti uuli onse alimwipwishe ukucite fyo. (Luka 7:13-15) Na kabili, ukwabulo kwipushiwa ukucite fyo, aitendekeleko ukundapa umwanakashi walemana no mwaume uwakwete ulusuku.—Luka 13:11-13; 14:1-4.

5. Cinshi ifi fyalembwa fya butumikishi bwa kwa Yesu fitusambilisha pa lwa mibele ya kwa Yehova ne nshila?

⁵ Ilyo ulebelenga pa lwa fya kucitika fya musango yo, iminina no kuipusha we mwine ukuti: ‘Apo Yesu mu kupwililika apashenye Wishi, cinshi ifi fyalembwa filenjeba pa lwa mibele ya kwa Yehova ne nshila?’ Filingile ukutwebekesha ukuti Yehova ni Lesa wa kuyumfwa kwa cikabilila kabili ukwashika. Ubukulu bwa buseko bwakwe butwalilila mu lupwa lwa mutundu wa muntu bwalimusesha ku kucita ukuitendekelako mu kubomba na bene. Tali na kupatikishiwa mu kupeela Umwana kwakwe “icilubula ca pa bengi.” (Mateo 20:28; Yohane 3:16) Alolesha ku mashuko ya mu nshita ku “kukondeela” abo aba kamubombela pa mulandu wa kutemwa. (Amalango 10:15, NW) Nga fintu Baibolo isosa ukuti: “Amenso ya kwa Yehova yalolo ku no ku yalabebeta mu calo conse ku kuilango kuti wa maka ku kwafwa ababa ne mitima ya mpomfu kuli wene.”—2 Imilandu 16:9.

6. Finshi fingafumamo lintu twabelebesha pa kuyumfwa kwa cikabilila kabili ukwashika ukwa kwa Yehova nga fintu kwalangililwe no Mwana wakwe?

⁶ Ukubelebesha muli iyi nshila pa kuyumfwa kwa cikabilila kabili ukwashika ukwa kwa Yehova, nga fintu kwalangililwe no Mwana wakwe, kukekata umutima obe, ukuwisusha no kutesekesha kukalamba ku mibele Yakwe iyabondoka kabili iipukisha. Ici, mu kukonkapo, cikakupalamika kuli wene. Ukaseshiwa ku kutununuka wene mu kukakuka mwi pepo pa nshita shonse kabili pe samba lya mibele iili yonse. (Ilumbo 65:2) Kukakosha ukwampana kwa pa lobe kuli wene.

7. Pa numa ya kubelebesha pa kuyumfwa kwa cikabilila kabili ukwashika ukwa kwa Yehova, cinshi ulingile ukuipusha we mwine, kabili mulandu nshi?

⁷ Ibukisheni, nangula ni fyo, ukuti ukuipeelesha kwa bukapepa kubimbamo ifyacila pa kuyumfwa fye kwa kupepa. Nga fintu uwasambilila Baibolo R. Lenski amona, “kusanshamo ukushinshimuna kwesu konse, imibele ya kupepa ne ncitilo ishifuma kuli kwene.” (Utulembo tunono twesu.) E co pa numa ya kubelebesha pa kuyumfwa kwa cikabilila kabili ukwashika ukwa kwa Yehova nga fintu kwalangililwe na Yesu, ipushe we mwine ukuti: ‘Ni shani fintu ningaba uwacilapo ukupala Yehova muli ulu lubali? Bushe bambi balamona uwingatununukwa?’ Nga ca kuti uli mufyashi, ufwile ukuba uutununukwa ku bana bobe. Kabili nga uli eluda wa mu cilonganino, mu kushininkisha ulingile ukuba uutununukwa. Cinshi, lyene, cikakulenga ukucilapo ukutununukwa? Ukuyumfwa kwa cikabilila kabili ukwashika. Ufwile ukulundulula ubuseko bwafumaluka, ubwa cine cine muli bambi. Ilintu mu cituntulu wasakamana pa lwa bambi kabili waitemenwa ukuipeela we mwine pa lubali lwabo, bakamona ici kabili bakapalamina kuli iwe.

8. (a) Cinshi ulingile ukusunga mu muntontonkanya ilintu ulebelenga ifyalembwa fya mu Baibolo pa lwa kwa Yesu? (b) Cinshi tusambilila pa lwa kwa Yehova ukufuma ku fyalembwa filangililwe muli futunoti?

⁸ E co ilyo ulebelenga ifyalembwa fya mu Baibolo pa lwa kwa Yesu, sunga mu muntontonkanya ukuti kuti wasambilila ifingi pa lwa kwa Yehova pamo ngo muntu ukufuma ku fintu Yesu asosele no kucita.a Kabili lintu ukutesekesha kobe ku mibele ya kwa Lesa, nga fintu yabelebeshiwa na Yesu, kwakusesha ku kwesha ukuba uwacilapo ukupala Wene, ulepeela ubushininkisho bwa kuipeelesha kobe ukwa bukapepa.

Ukubelesha Ukuipeelesha kwa Bukapepa Ukulola ku Filundwa fya Lupwa

9, 10. (a) Ni shani fintu ukutemwa kwa kwa Yesu no kwangwako kuli nyina, Maria, kwalangishiwe pa kashita pa ntanshi fye ya kufwa kwakwe? (b) Mulandu nshi, mu kumonekesha, untu Yesu aseekeshe ukusakamanwa kwa kwa Maria ku mutumwa Yohane kabili te kuli umo uwa bamunyina bakwe aba ku mubili?

⁹ Ubumi no butumikishi bwa kwa Yesu Kristu fisokolola ifingi pa lwa fintu ukuipeelesha kwa bukapepa kulingile ukulangishiwa. Ica kumwenako ca kukafyo mutima calembwa pali Yohane 19:25-27, apo tubelenga ukuti: “Ku [cimuti ca kucushiwilwapo, NW] ca kwa Yesu kwaiminine nyina, ne nkashi mbiye ya kwa nyina, Maria muka Klopa, na Maria umwina Magadala. E ico Yesu pa kumona nyina no musambi [Yohane] uo atemenwe nabeminina, atile kuli nyina, Mukwai, mono mwana obe! E lyo atile na ku musambi, Mona, noko! Kabili pa nshita ilya umusambi ulya alimubuulile, bali nankwe ku mwabo.”

¹⁰ Elenganye co! Inshita fye inono pa ntanshi talaleka ubumi bwakwe ubwa pe sonde, ukutemwa kwa kwa Yesu no kwangwako kwamuseseshe ku kuseekesha ukusakamanwa kwa kwa nyina, Maria, (mu kumonkesha pali nomba mukamfwilwa) ku mutumwa watemwikwa Yohane. Lelo mulandu nshi kuli Yohane kabili te kuli umo uwa muli bamunyina ba ku mubili? Pantu Yesu aali uwayangwako te ku kukabila fye kwa ku mubili, lelo ukucilishapo mu kuba no busuma bwakwe ubwa ku mupashi. Kabili umutumwa Yohane (nakalimo umufyala wa kwa Yesu) alishininkishe icitetekelo cakwe, ilyo takwaba icilangililo ca kuti bamunyina ba kwa Yesu aba ku mubili, ukufike lyo, bali abasumina.—Mateo 12:46-50; Yohane 7:5.

11. (a) Ukulingana na Paulo, ni shani fintu pambi Umwina Kristu engabelesha ukuipeelesha kwa bukapepa mu ŋanda yakwe ine? (b) Mulandu nshi Umwina Kristu wa cine cine acitila ukupayanya ku bafyashi bakoloci?

¹¹ Nomba, ni shani ici cali kulangisha kwa kuipeelesha kwa bukapepa? Umutumwa Paulo alondolola ukuti: “Cindika bamukamfwilwa abali bamukamfwilwa bene bene. Lelo nga mukamfwilwa akwata abana atemwa beshikulu, basambilile ukuti ica kubalilapo kucita aba ŋanda yabo iine umwabela [kuipeelesha kwa, NW] bukapepa, kabili ukubweseshapo ubufubo ku bafyashi babo; pantu ici casekelelwa ku cinso ca kwa Lesa.” (1 Timote 5:3, 4) Ukucindika umufyashi wa umo pa kupayanya ukwafwilisha kwa ku mubili lintu ico cakabilwa caba, nga fintu Paulo asosa, ni numbwilo ya kuipeelesha kwa bukapepa. Shani ifyo? Yehova, Katendeka wa kutantika kwa lupwa, akambisha abana ukucindika abafyashi babo. (Abena Efese 3:14, 15; 6:1-3) E co, Umwina Kristu wa cine cine aleshiba ukuti ukusakamana ku cishingamo ca musango yo ica lupwa takulanga fye ukutemwa ku bafyashi ba umo lelo na kabili kulangilila ukushinshimuna kuli Lesa ne cumfwila ku mafunde yakwe.—Linganyeniko Abena Kolose 3:20.

12. Ni shani fintu wingabelesha ukuipeelesha kwa bukapepa ukulola ku bafyashi bakoloci, kabili cinshi cilingile ukuba e kukuntwa?

¹² Ni shani, lyene, wingabelesha ukuipeelesha kwa bukapepa ku filundwa fya lupwa? Ici kuti mu kushininkisha cabimbamo ukutantika ukusakamana ukukabila kwa ku mupashi no kwa ku mubili ukwa bafyashi bakoloci, nga fintu Yesu acitile. Ukufilwa ukucite fyo kuti kwasokolola ukubulisha ukuipeelesha kwa bukapepa. (Linganyeniko 2 Timote 3:2, 3, 5.) Umwina Kristu waipeela alapayanishisha ku bafyashi bali mu kukabila te kufuma ku nkumbu nelyo umulimo lelo pa mulandu wa kuti alitemwa ulupwa lwakwe, kabili aleshiba ukwangwako kwasumbuka Yehova abika pa kusakamana kwa cishingamo ca musango yo. Muli fyo, ukusakamana abafyashi bakwe abakoloci yaba ni numbwilo ya kuipeelesha kwa bukapepa.b

13. Ni shani fintu pambi wishi wa Bwina Kristu engabelesha ukuipeelesha kwa bukapepa ukulola ku lupwa lwakwe?

¹³ Ukuipeelesha kwa bukapepa kuti pambi kwabeleshiwa mu ŋanda mu nshila shimbi. Ku ca kumwenako, wishi wa Bwina Kristu alikwata icishingamo ku kupayanishisha ulupwa lwakwe lwa ku mubili, mu nkuntu, na lwa ku mupashi. E ico, mu kulunda ku kupayanya ukwafwilisha kwa ku mubili, mu kubamo ukutemwa atantikila ulupwa isambililo lya Baibolo ilya lyonse. Atantika inshita ku kwakana mu butumikishi bwa mwi bala pamo no lupwa lwakwe. Alibo uwashikatala, ukwishiba ukukabila kwabo ku kutusha no kukokoloka na ko. Kabili emika mano mano ifiise ntanshi, ukukanalenga imibombele ya cilonganino ukumulenga ukulekelesha ulupwa lwakwe. (1 Timote 3:5, 12) Mulandu nshi acitila conse ici? Te pa mulandu wa kuyumfwa ukufwaya ukubomba lelo ukufuma ku kutemwa kwa ku lupwa lwakwe. Aleshiba ukucindama uko Yehova abika pa kusakamana kwa lupwa lwa umo. Pa kufikilisha muli fyo icishingamo cakwe ngo mulume kabili wishi, alebelesha ukuipeelesha kwa bukapepa.

14. Ni shani fintu umukashi wa Bwina Kristu pambi engalangisha ukuipeelesha kwa bukapepa pa ŋanda?

¹⁴ Abakashi ba Bwina Kristu na bo balikwate cishingamo ku kubelesha ukuipeelesha kwa bukapepa pa ŋanda. Shani? Baibolo isosa ukuti umukashi alingile ‘ukunakila’ ku mulume wakwe kabili alingile ukukwata “akatiina” kuli wene. (Abena Efese 5:22, 33) Nangu fye nga ca kuti umulume wakwe tali uushatetekela, ali no ‘kunakila’ kuli wene. (1 Petro 3:1) Umwanakashi wa Bwina Kristu alangisha ukunakila kwa musango yo ukwa bukashi pa kwafwilisha umulume wakwe mu kupingulapo acita cikulu uku takulepilikana na mafunde ya kwa Lesa. (Imilimo 5:29) Kabili mulandu nshi apokelela ulu lubali? Te pa mulandu wa kuti alitemwa umulume wakwe lelo ukucilisha pantu aleshiba ukuti “ciyene muli Shikulu”—uko e kuti, caba kutantika kwa kwa Lesa ukwa lupwa. (Abena Kolose 3:18) Ukufwaya kwakwe ukunakila ku mulume wakwe kwaba muli fyo ni numbwilo ya kuipeelesha kwa bukapepa.

“Pantu E Co Mfumiine”

15. Ni mu nshila nshi iyapulamo umo Yesu alangishe ukuipeelesha kwa bukapepa?

¹⁵ Imo iya nshila shapulamo iyo Yesu alangishemo ukuipeelsha kwa bukapepa yali ‘kubilisha imbila nsuma iya bufumu bwa kwa Lesa.’ (Luka 4:43) Ukukonka pa lubatisho lwakwe mu Yordani mu 29 C.E., Yesu apoosele imyaka itatu na citika iyakonkelepo uwapamfiwa apakalamba mu kuba no yu mulimo wacindamisha. “Pantu e co mfumiine,” e fintu alondolwele. (Marko 1:38; Yohane 18:37) Ni shani fintu ici cali kulangisha ukuipeelesha kwa bukapepa?

16, 17. (a) Cinshi cakuntile Yesu ku kupimpa apakalamba mu kushimikila no kusambilisha? (b) Mulandu nshi ubutumikishi bwa kwa Yesu ubwa kushimikila bwabelele kulangisha kwa kuipeelesha kwakwe ukwa bukapepa?

¹⁶ Ibukisheni ukuti ukuipeelesha kwa bukapepa kubimbamo ukwikala inshila iyo iisekesha Lesa pantu walimutemwa no kutesekesha mu kushika imibele yakwe iyawamisha. Cinshi, lyene, cakuntile Yesu ku kupoosa imyaka yakwe iya kupelako pe sonde mu kupimpa apakalamba mu kushimikila no kusambilisha? Ukwibukila fye kwa mulimo nelyo ukukakililwako? Takwaba kutwishika kwa kuti alikwete ukwangwako ku bantu. (Mateo 9:35, 36) Kabili alishibe mu kukumanina ukuti ukusubwa kwakwe no mupashi wa mushilo kwamusontele no kumutuma ku kubomba ubutumikishi bwakwe. (Luka 4:16-21) Nalyo line, inkuntu shakwe shalishikile nga nshi.

¹⁷ “Natemwa Tata,” e fyo Yesu aebele abatumwa bakwe mu kumfwika pa bushiku bwa kulekeleshako ubwa bumi bwakwe pe sonde. (Yohane 14:31) Uko kutemwa kwashimpilwe pa kwishiba kwabamo isenge, ukwa mibele ya kwa Yehova. (Luka 10:22) Ukukuntwa ku mutima wacincimushiwa no kutesekesha kwashika, Yesu asangile ukusekelela mu kucita ukufwaya kwa kwa Lesa. (Ilumbo 40:8) Cali e “ca kulya” cakwe—icakabilwa nga nshi ku bumi, icatemwikwa apakalamba. (Yohane 4:34) Aimike ica kumwenako capwililika ica “kufwaya intanshi ubufumu” mu cifulo cakuibika umwine pa ntanshi. (Mateo 6:33, NW) E co tacili fye cintu acitile nelyo bukulu bwaba shani abombele lelo umulandu acitile uwalengele ubutumikishi bwakwe ubwa kushimikila no kusambilisha ukuba inumbwilo ya kuipeelesha kwakwe ukwa bukapepa.

18. Mulandu nshi ukukwato kwakanako kumo mu butumikishi mu kukabilwa tacili kulangisha ukuipeelesha kwa bukapepa?

¹⁸ Ni shani fintu twingakonka ica kumwenako ca “cipasho,” Yesu, muli uku kuloshako? (1 Petro 2:21, NW) Bonse abankula ku bwite bwa kwa Yesu ubwa “wise unkonke” balikwata umulimo wa bulesa ku kushimikila imbila nsuma iya Bufumu no kupanga abasambi. (Luka 18:22; Mateo 24:14; 28:19, 20) Bushe ici cipilibula ukuti pa kukwata bamo ukwakanamo mu kubilishe imbila nsuma, tulekonkelela ukuipeelesha kwa bukapepa? Kwena te ifyo. Nga ca kuti twali no kuibimba mu butumikishi mu nshila ya cifwanikisho nelyo iya kabepekesho, nelyo pa kuti fye tusekeshe ifilundwa fya lupwa nelyo bambi, te kuti cilangulukwe nakalya ukuba ‘incitilo ya kuipeelesha kwa bukapepa.’—2 Petro 3:11, NW.

19. (a) Cinshi cifwile ukuba e mulandu wa kubalilapo uwa cintu tucita mu butumikishi? (b) Cinshi cifumamo lintu twakuntwa no kutemwa kwashika ukwa kuli Lesa?

¹⁹ Nga fintu cali kuli Yesu, inkuntu shesu shifwile ukushikisha. Yesu atile: “Uletemwa [Yehova, NW] Lesa obe ku mutima obe onse [inkuntu, ukufwaisha, no kuyumfwa kwa muntu wa lwa nkati], na ku mweo obe onse [ubumi bobe no kubako konse], na ku mano yobe yonse [ukulingulula kobe ukwalamuka], na ku maka yobe yonse.” Kuli ici, kalemba washilimuka alundileko ukuti: “Kabili . . . kwacilako kuli fyonse ifyaocewa fya musuma na malambo.” (Marko 12:30, 33, 34) E co tacili fye cintu tucita e caba e mulandu lelo na kabili umulandu tucicitila. Ukutemwa kwacilapo kushika kuli Lesa uko ukubimbamo ubukose bwesu ubuli bonse kufwile ukuba e mulandu wa kubalilapo ku cintu tucita mu butumikishi. Ilyo ico cili e mulandu, tatwakekushiwe fye mu kuba no kwakanamo kwa cifwanikisho, lelo tukakuntwa ku kulangilila ukushika kwesu kwa kuipeelesha kwa bukapepa pa kucita apo twingapela. (2 Timote 2:15) Pa nshita imo ine, lintu ukutemwa kwa kuli Lesa kwaba e nkuntu yesu, tatwakabe aba kulengulula, ukulinganya ubutumikishi bwesu kuli ubo ubwa bambi.—Abena Galatia 6:4, NW.

20. Ni shani fintu twingamwenamo mu kukumanina ukufuma ku ca kumwenako ca kwa Yesu ica kukonkelela ukuipeelesha kwa bukapepa?

²⁰ Ifyo twingaba aba kutasha ukuti Yehova alisokolola kuli ifwe inkama yashila iya kuipeelesha kwa bukapepa! Pa kusambilila mu kusakamanishisha ifintu ifyo Yesu asosele no kucita na pa kutukusha ukupashanya wene, tukafwiwa ponse pabili ku kulundulula no kulangisha ukuipeelesha kwa bukapepa ku cipimo cakumanina. Yehova akatupaala mu kufumba nga twakonka ica kumwenako ca kwa Yesu mu kukonkelela ukuipeelesha kwa bukapepa nga Bena Kristu baipeela, ababatishiwa.—1 Timote 4:7, 8.

[Amafutunoti]

Bushe Uleibukisha

◻ Mu kukonkelela ukuipeelesha kwa bukapepa, mulandu nshi tulingile ukulangulukila ica kumwenako ca kwa Yesu?

◻ Cinshi tusambilila pa lwa kuyumfwa kwa cikabilila kabili ukwashika ukwa kwa Yehova ukwalangililwe na Yesu?

◻ Ni shani fintu pambi twingalangisha ukuipeelesha kwa bukapepa ukulola ku filundwa fya lupwa?

◻ Cinshi cifwile ukuba e nkuntu yesu pa kuti ubutumikishi bwesu bube kulumbulula kwa kuipeelesha kwa bukapepa?

[Icikope pe bula 21]

Wishi wa Bwina Kristu alishingamwa ku kupayanishisha ulupwa lwakwe lwa ku mubili, mu nkuntu, na lwa ku mupashi

[Icikope pe bula 23]

“Lelo nga mukamfwilwa akwata abana atemwa beshikulu, basambilile . . . ukubweseshapo ubufubo ku bafyashi babo.”