Ukutemwa kwa Cine Kulalambula

“Lesa tali uushalungama; takalabe umulimo wenu, no kutemwa uko mwalangile kwi shina lyakwe.”—ABAHEBERE 6:10.

1, 2. Mulandu nshi ukutemwa kwa cine kwabela ukwa kulambula kuli ifwe pa lwesu?

UKUTEMWA kwabula akaso e mibele yacilishapo ubukulu, iya mucinshi, iyacilapo kuumo mutengo iyo twingalumbulula. Uku kutemwa (iciGreek, a·gaʹpe) mu kukonkesha kwipusha ifyafula kuli ifwe. Lelo pa mulandu wa kuti twabumbwa na Lesa wa bulungi no wa kutemwa, tusanga ukuti ukutemwa kwabula akaso mu cine cine kulalambula. Mulandu nshi cabele fyo?

² Umulandu umo uwa kuti ukutemwa kwa cine kulalambula ubimbamo icishinte ca fyonse fibili ica mu muntontonkanya na mu nkuntu, ukwambukilwa kwa matontonkanyo ne nkuntu pa mibili yesu. Ubulashi bumo pa lwa kupopomenwa bwasosele ukuti: “‘Uletemwa umwina mupalamano obe’ e nshila ya kupanda amano imo iya fya cipatala iyabamo ukucingilila iyabala aipeelwa.” Ee, “umuntu wa luse ateteso mweo wakwe.” (Amapinda 11:17) Icacindama capalako mashiwi ya kuti: “Umutima we paalo uupeela ukeniwa, no unwensha akanwenshiwa umwine.”—Amapinda 11:25; linganyeniko Luka 6:38.

3. Ni shani Lesa abomba ku kulenga ukutemwa kwa cine ukuba ukwa kulambula?

³ Ukutemwa na kabili kulalambula pa mulandu wa kuti Lesa alalambula ukwabula akaso. Tubelenga ukuti: “Uukumbusuko mulanda aashima Yehova, [Lesa] e ukabweseshapo kuli wene ica kutetesa cakwe.” (Amapinda 19:17) Inte sha kwa Yehova babomba mu kumfwana na ya mashiwi lintu balebilisha imbila nsuma iya Bufumu bwa kwa Lesa. Balishiba ukuti ‘Lesa taba uushalungama pa kuti alabe umulimo wabo no kutemwa uko balanga kwi shina lyakwe.’—AbaHebere 6:10.

Ica Kumwenako Cesu Icawamisha

4. Ni ani apayanya ica kumwenako cawamisha ica kuti ukutemwa kwa cine kulalambula, kabili ni shani acite fyo?

⁴ Ni ani apayanya ica kumwenako cawamisha ica kuti ukutemwa kwa cine kulalambula? Kwena, kwalangishiwa te kuli umbi ukucila pali Lesa mwine! “Atemenwe aba pano isonde [lya mutundu wa muntu] ukutemwa kwa kuti apeele Umwana wakwe uwafyalwa eka.” (Yohane 3:16) Ukupeela Umwana wakwe pa kuti abo abapokelela ilyo ilambo lya cilubula bakwate ubumi bwa muyayaya mu kushininkisha casendele Yehova umutengo ukalamba, kabili calangishiwe mu kumonekesha ukuti ponse pabili alikwata ukutemwa no kulangulukilako. Ici calangwa mu kulundapo ku cishinka ca kuti ‘mu kati ka kucula konse ukwa kwa Israele mu Egupti, caali ica kucululusha kuli wene.’ (Esaya 63:9) Ifyo caali icacilapo kucululusha kuli Yehova ukumona Umwana wakwe ukucula pa cimuti ca kucushiwilwapo no kuumfwa ukulila kwakwe ukwa kuti: “Lesa wandi, Lesa wandi, cinshi ico mwandekelesesha?”—Mateo 27:46.

5. Cinshi cacitika pa mulandu wa kuti Lesa alitemenwe umutundu wa muntu apakalamba ica kuti apeele Umwana wakwe pamo nge lambo?

⁵ Bushe Yehova alisangile ukulumbulula kwakwe kwine ukwa kutemwa kwa cine ukuba ukwa kulambula? Mu kucilapo ukushininkisha alicitile. Icapulamo, we casuko Lesa apoosele pa cinso ca kwa Ciwa pa mulandu wa kuti Yesu ashininkishiwe uwa busumino te mulandu na conse ico Satana aali no kucita kuli wene! (Amapinda 27:11) Na kuba, conse ico Ubufumu bwa kwa Lesa bukapwishishisha mu kufumyapo umuseebanya pe shina lya kwa Yehova, ukubwesha Paradise kuli ili sonde, no kupeela ubumi bwa muyayaya ku mamilioni kukacitikako pa mulandu Lesa atemenwe apakalamba umutundu wa muntu ica kuti apeele icuma catemwikwa nga nshi ica mutima wakwe pamo nge lambo.

Yesu ica Kumwenako Cawama

6. Ukutemwa kwakuntile Yesu ukucita cinshi?

⁶ Ica kumwenako na cimbi icawama icishinina ukuti ukutemwa kwa cine kulalambula ni co ica Mwana wa kwa Lesa, Yesu Kristu. Alitemwa Wishi wa mu mulu, kabili ukuti ukutemwa kwalisesha Yesu ukucita ukufwaya kwa kwa Yehova pa mutengo uuli onse. (Yohane 14:31; Abena Filipi 2:5-8) Yesu atwalilile ukulanga ukutemwa kwakwe kuli Lesa nangu fye ico pa nshita shimo capilibwile ukuti aali no kupaapaata Wishi “no kukuuta kwa kalanda ne filamba.”—AbaHebere 5:7.

7. Ni mu nshila nshi Yesu asanga ukutemwa kwa cine ukuba ukwa kulambula?

⁷ Bushe Yesu alilambwilwe ku kutemwa kwa musango yo ukwa kuipeele ilambo? Mu cine cine alilambwilwe! Tontonkanya ulwa buseko akwete ukufuma ku fisuma fyonse acitile mu kati ka butumikishi bwakwe ubwa myaka itatu na citika. Fintu aafwile apakalamba abantu lwa ku mupashi na lwa ku mubili! Pa mulu wa conse, pa kulangilila ukuti umuntu wapwililika kuti mu kupwililika asungilila bumpomfu kuli Lesa te mulandu ne co Satana engaleta ukulwisha wene, Yesu alikwete ukwikushiwa kwa kushinina Ciwa ukuba uwa bufi. Mu kulundapo, pamo ngo mubomfi wa kwa Lesa uwa busumino, Yesu apokelele icilambu cikalamba ica bumunshifwa pa kubuushiwa kwakwe ku bumi bwa ku mulu. (Abena Roma 6:9; Abena Filipi 2:9-11; 1 Timote 6:15, 16; AbaHebere 1:3, 4) Kabili we mashuko ya kupapusha ayalalilila pa ntanshi yakwe pa Armagedone na mu kati ka Kuteka kwakwe ukwa Myaka Ikana Limo, lintu Paradise ikabweshiwa kwi sonde na makana ya mamilioni bakabuushiwa ukufuma ku bafwa! (Luka 23:43) Takwabako kutwishika kwa kuti Yesu alisanga ukutemwa kwa cine ukuba ukwa kulambula.

Ica Kumwenako ca kwa Paulo

8. Cinshi caali icakukumanya ca kwa Paulo pa mulandu wakwe uwa kutemwa kwa cine ukwa kuli Lesa no muntu munankwe?

⁸ Umutumwa Petro limo aipwishe Yesu ukuti: “Moneni, ifwe twashile fyonse, no kumukonka. Nga kanshi ifwe tukakwata nshi?” Mu lubali, Yesu ayaswike ukuti: “Onse uwasha bamunyina, nangu ni nkashi, nangu ni wishi, nangu ni nyina, . . . nangu bana, nangu cilime, . . . pa mulandu we shina lyandi, akapokelela ifya miku umwanda, no kukwata umweo wa muyayaya.” (Mateo 19:27-29) Twalikwata ica kumwenako ca kucincimusha ica ici mu mutumwa Paulo, uwaipakishe amapaalo ayengi, nga fintu yalembwa ukucilisha na Luka mwi buku lya Imilimo. Ukutemwa kwa cine ukwa kuli Lesa na ku bantu banankwe kwalengele Paulo ukuleka umulimo wakwe pamo ngo muFarise wacindikwa. Tontonkanya, na kabili, ulwa cintu Paulo ashipikishe mu nshila ya mpumo, ukushiwa impondo, amasanso, no kubikwa eka mu cifungo—fyonse pa mulandu wa kutemwa kwa cine ukwa kuli Lesa no mulimo Wakwe washila.—2 Abena Korinti 11:23-27.

9. Ni shani Paulo alambwilwe pa kulangisha ukutemwa kwa cine?

⁹ Bushe Yehova alilambwile Paulo pa kuba ica kumwenako ca musango yo icawama mu kulangisha ukutemwa kwa cine? Cisuma, tontonkanya pa fyo ubutumikishi bwa kwa Paulo ubwa kufumamo fisabo bwali. Aali na maka ya kwimika icilonganino ca Bwina Kristu cimo pa numa ya cinankwe. Kabili we fisungusho Lesa amulengele ukuba na maka ya kucita! (Imilimo 19:11, 12) Paulo na kabili alikwete ishuko ku kupokelela ifimonwa fyacila pa maka ya buntunse no kulemba amakalata 14 ayo nomba ayaba ulubali lwa Malembo ya Bwina Kristu aya ciGreek. Ku kulunda pali conse ci, icilambu ca bumunshifwa mu myulu calipeelwa kuli wene. (1 Abena Korinti 15:53, 54; 2 Abena Korinti 12:1-7; 2 Timote 4:7, 8) Paulo mu kushininkisha asangile ukuti Lesa alalambula ukutemwa kwa cine.

Ukutemwa kwa Cine Kulalambula mu Kasuba Kesu

10. Cinshi pambi cingaba ukupenda umutengo pa kuba umusambi wa kwa Yesu no kulumbulula ukutemwa kwesu ukwa kuli Yehova?

¹⁰ Inte sha kwa Yehova ilelo mu kupalako balisanga ukuti ukutemwa kwa cine kulalambula. Ukulumbulula ukutemwa kwesu kuli Yehova pa kubuula ukwiminina kwesu pa lubali lwakwe no kusanguka abasambi ba kwa Yesu kuti pambi kwatusendela fye no bumi bwesu pamo nga bakasunga ba bumpomfu. (Linganyeniko Ukusokolola 2:10.) Uyo e mulandu Yesu asosele ukuti tulingile ukupenda umutengo. Lelo tatucite fyo ku kupima nampo nga ukuba umusambi kulalambula nelyo iyo. Ukucila, tucite fyo ku kuipekanya fwe bene ukulipila icingaba umutengo wa kuba umusambi.—Luka 14:28.

11. Mulandu nshi bamo bafililwa ukuipeela abene kuli Lesa?

¹¹ Ilelo, abengi—ukwabulo kutwishiba amamilioni—balasumina ubukombe Inte sha kwa Yehova batwala kuli bene ukufuma mu Cebo ca kwe Lesa. Lelo balakwinda ukufuma ku kuipeela abene kuli Lesa no kubatishiwa. Bushe ici pambi kuti caba ni pa mulandu wa kubulisha ukutemwa kwa cine ukwa kuli Lesa uko bambi bakwata? Abengi balafilwa ukubuula intampulo sha kuipeela no lubatisho pa mulandu wa kuti bafwaya ukwikala mu kusenaminwa kwa banabo ba mu cupo abashasumina. Bambi tabapalamina kuli Lesa pa mulandu wa kuti bakwata imibele ya kwa shimakwebo umo uwaebele Nte ukuti: “Nalitemwa ulubembu.” Ukwabulo kutwishika, abantu umo umo aba musango yo tabatesekesha conse ico Lesa na Kristu bacita kuli bene.

12. Cinshi uyu magazini asosele ico icebekesha ifilambu fya kwishiba ukutupalamika kuli Lesa mu kutemwa kwa cine?

¹² Nga ca kuti twalikwata ukutesekesha kwa cine cine kuli conse ico Yehova Lesa na Yesu Kristu bacita kuli ifwe, tukalanga ici pa kupeelako mu kuitemenwa icingaba umutengo ku kubombela Shifwe wa mu mulu no kuba umo uwa basambi ba kwa Yesu. Pa mulandu wa kutemwa kwa cine ukwa kuli Lesa, abaume na banakashi mu nyendelo shonse isha bumi—bashimakwebo batunguluka, abantu ba fyangalo abalumbuka, na bambipo—balikabusha incito sha kuifwaila kwa pa lwabo ukuya ku butumikishi bwa Bwina Kristu, nge fyacitile umutumwa Paulo. Kabili tabakabuule icili conse no kucibika mu cifulo ca filambu ifya kwishiba no kubombela Lesa. Muli uku kuloshako, The Watch Tower limo yasosele ukuti: “Inshita shimo twaipwishe ukuti, Ni bamunyina banga bakaba aba kuitemenwa ukubuula amakana ya madola mu cifulo ca cintu baishiba pa lwa Cine? Takwali nangu kumo ukuboko ukwamoneke! Ni ani uwingabuula amakana ya makumi aya madola? Takwali nangu umo! Ni ani uwingabuula amamilioni ya madola? Ni ani uwingabuula icalo conse mu kukabusha na cintu aishiba pa lwa musango wa Bulesa no Kupanga kwa Bulesa? Nangu umo! Lyene twasosele ukuti, Tamwaba ibumba ilishaba ilyaikushiwa apakalamba, mwe fibusa fyatemwikwa. Nga ca kuti mwayumfwa abacindama nga nshi ukuti tamwakabuule icintu icili conse mu kukabusha no kwishiba kwenu ukwa kwa Lesa, lyene muyumfwa fye abacindama nga fintu tuyumfwa.” (December 15, 1914, ibula 377) Ee, ukwishiba kwalungikwa ukwa kwa Lesa ne mifwaile yakwe kutupalamika kuli wene mu kutemwa kwa cine uko ukulambula mu cine cine.

13. Ni shani tulingile ukumona isambililo lya pa lwesu?

¹³ Nga ca kuti twatemwa Lesa, tukatukusha ukwishiba no kucita ukufwaya kwakwe. (1 Yohane 5:3) Tukabuula imimwene yacindama iye sambililo lya pa lwesu, ipepo, no kusangwa ku kulongana kwa Bwina Kristu. Conse ici cifwaya ukuipeele lambo, pantu iyi mibombele ibimbamo ukupooswa kwa nshita, amaka, no bukumu bumbi. Kuti pambi twasalapo pa kati ka kutamba programu ya pa televisioni no kuibimba mwi sambililo lya pa lwesu ilya Baibolo. Lelo fintu tuba abakosa lwa ku mupashi, fintu twingacilapo ukuba na maka ya kucitilo bunte kuli bambi, fintu twingaba abacilapo ukukwata ifyafula ukufuma mu kulongana kwa Bwina Kristu lintu tulebuula isambililo lya musango yo mu kukatama no kubika pa mbali inshita kuli lyene!—Ilumbo 1:1-3.

14. Fyacindama shani ipepo no kwampana kusuma na Yehova Lesa?

¹⁴ Bushe lyonse tulaipakisha ukulanda kuli Shifwe wa mu mulu pa ‘kupepa mu mukoosha’? (Abena Roma 12:12) Nelyo twaba lyonse abapamfiwa nga nshi ku kucita ubulungi kuli ili shuko lyaumo mutengo? ‘Ukupepa mu kukanaleka’ ni nshila yacindama ku kukosha ukwampana kwesu na Yehova Lesa. (1 Abena Tesalonika 5:17) Kabili takwaba icili conse icapala ukwampana kusuma na Yehova ku kutwaafwa lintu twalolenkana na matunko. Cinshi calengele Yosefe ukuba na maka ya kucincintila lintu atunkilwe ku mukashi wa kwa Potifari? Kabili mulandu nshi Daniele talekele ukupepa lintu ifunde lya bena Medai na bena Persia lyamubindile ukupepa kuli Yehova? (Ukutendeka 39:7-16; Daniele 6:4-11) Ca cine, ukwampana kusuma na Lesa e kwaafwile abo baume ukucimfya, nga fintu ku katwaafwa ukucite fyo!

15. Ni shani tulingile ukumona ukulongana kwa Bwina Kristu, kabili mulandu nshi?

¹⁵ Lyene, ni shani fintu twakatamika ukusangwa pa kulongana kwesu kusano ukwa cila mulungu? Bushe tulasuminisha ukunaka, imibele yalubana inono iya ku mubili, nelyo imiceele inono iyabipa ukupumfyanya ukukakililwako kwesu ukwa kukanaleko kulongana na basumina banensu? (AbaHebere 10:24, 25) Uwaishibisha ukulungisha bamashini uulipilwa bwino umwina America amwene ukuti incito yakwe mu kubwekeshabwekeshapo yalepumfyanya ukubapo kwakwe pa kulongana kwa Bwina Kristu. E co ayalwile incito yakwe, ukubuula ukulufya kwa mu fya ndalama pa kuti abe na maka ya kusangwa ku kulongana kwa cilonganino lyonse. Ukulongana kwesu kutulenga ukuba na maka ya kuipakisha ukukabushanya ukukoselesha no kukosha icitetekelo ca umo no munankwe. (Abena Roma 1:11, 12) Muli iyi milandu yonse, bushe tatusanga ukuti “uutanda alefusha, akaseepe fyafula”? (2 Abena Korinti 9:6) Ee, ukulangisha ukutemwa kwa cine mu nshila sha musango yo kwaliba ukwa kulambula nga nshi.

Ukutemwa kwa Cine no Butumikishi Bwesu

16. Cinshi pambi cingafumamo lintu ukutemwa kwatukuntila ku kucitilo bunte bwa mu lyashi?

¹⁶ Ukutemwa kulatukunta ku kushimikila imbila nsuma pamo nga bantu ba kwa Yehova. Ku ca kumwenako, kulatusesha ku kuibimba mu kucitilo bunte bwa mu lyashi. Kuti pambi twashingashinga ku kucitilo bunte bwa mu lyashi, lelo ukutemwa kukatucincisha ku kulanda. Mu cine cine, ukutemwa kukatulenga ukutontonkanya ulwa nshila shalamuka ku kukwata ukulanshanya ukutendekwa kabili lyene ukutungulula ku Bufumu. Ukulangilila: Uwaninine mu ndeke, eluda wa Bwina Kristu limo aisangile umwine ekele mupepi na shimapepo wa ciRoma Katolika. Pa kubalilapo, eluda apayanishishe shimapepo mu kuba ne fipusho fishili fya kukalifya. Ukufika pa nshita shimapepo alefuma mu ndeke, nangu cibe fyo, ubuseko bwakwe bwalimuseseshe ku kupoka ifitabo fyesu fibili. We ca kufumamo cisuma we ica kucitilo bunte bwa mu lyashi!

17, 18. Ukutemwa kukatucincisha ku kucita cinshi mu kulosha ku butumikishi bwa Bwina Kristu?

¹⁷ Ukutemwa kwa cine na kabili kutucincisha ukwakana lyonse mu mulimo wa kushimkila ku ŋanda ne ŋanda ne misango imbi iya butumikishi bwa Bwina Kristu. Ukufika ku cipimo uko tuli na maka ya kukwata ukulanshanya kwa Baibolo, tukaleta umucinshi kuli Yehova Lesa kabili tukaafwa abapale mpaanga ukuba pa musebo wa ku bumi bwa muyayaya. (Linganyeniko Mateo 7:13, 14.) Nangu fye nga ca kuti tatuli na maka ya kukwata ukulanshanya kwa Baibolo, ukubombesha kwesu takwakabe ukwa fye. Ukubapo kwesu kwine pa mayanda ya bantu kubomba ngo bunte, kabili fwe bene tulamwenamo ukufuma ku butumikishi, pantu te kuti tubilishe icine ca Baibolo ukwabula ukukosha icitetekelo cesu. Ca cine, cisendako ukuicefya ukuya ukufuma ku ŋanda ne ŋanda, ‘ukucite ifintu fyonse pa mulandu wa mbila nsuma, pa kuti twingaba abakana yene na bambi.’ (1 Abena Korinti 9:19-23) Lelo pa mulandu wa kutemwa kwa kuli Lesa na bantunse banensu, mu kuicefya tulabikako ukubombesha kwalundwako kabili tulalambulwa mu kuba na mapaalo yafumba.—Amapinda 10:22.

¹⁸ Na kabili cisendako ukutemwa kwa cine ku babomfi ba kwa Yehova ukuba abasakamanishisha pa lwa kucite fipempu fya kubwelelamo pa bantu balesekelela mu cine ca Baibolo. Ukutungulula amasambililo ya Baibolo cila mulungu kabili umweshi pa numa ya mweshi kwaba ni numbwilo ya kutemwa kwa kuli Lesa no mwina mupalamano, pantu uyu mulimo ufwaya ukupoosa inshita, ukubombesha, no bukumu bwa ku mubili. (Marko 12:28-31) Nalyo line, lintu twamona umo uwa basambi ba Baibolo abatishiwa kabili nakalimo no kwingila fye mu butumikishi bwa nshita yonse, bushe tatushininwa ukuti ukutemwa kwa cine kulalambula?—Linganyeniko 2 Abena Korinti 3:1-3.

19. Kwampana nshi kwabako pa kati ka kutemwa no mulimo wa nshita yonse?

¹⁹ Ukutemwa kwabula akaso kulatukunta ku kupeela ilambo lya fya ku mubili pa mulandu wa mulimo wa nshita yonse nga ca kuti cingacitika kuli ifwe ukwakana mu mibombele ya musango yo. Amakana pa makana aya Nte kuti bacitilo bunte ukuti ukulumbulula kwa kutemwa kwabo ukufika kuli ico cipimo kwaliba ukwacilapo ukuba ukwa kulambula. Nga ca kuti imibele ya kusuminisha ukwakana mu butumikishi bwa nshita yonse lelo tauleshukila yene, tawaishiba fye amapaalo yantu ulepusa.—Linganyeniko Marko 10:29, 30.

Kulalambula mu Nshila Shimbi

20. Ni shani ukutemwa kutwaafwa ukuba abeleela?

²⁰ Inshila na imbi umo ukutemwa kwa cine kulambwila ya kuti kulatwaafwa ukuba abeleela. Ee, ukutemwa “takulinga cabipa.” Na kuba, “ukutemwa kufimba pa membu ishingi.” (1 Abena Korinti 13:5; 1 Petro 4:8) “Ishingi” cipilibula imembu ishafulisha, bushe te ifyo fine? Kabili fintu caba ica kulambula ukuba uweleela! Lintu waeleela, ici cikulenga na umo uukubembukile ukuyumfwa uwacilapo kuwama. Lelo icacindamisha caba cishinka ca kuti kano nga kale kale twalyeleela abo abatubembukila, te kuti twenekele Yehova ukutweleela.—Mateo 6:12; 18:23-35.

21. Ni shani ukutemwa kwa cine kutwaafwa ukuba abanakila?

²¹ Mu kulundapo, ukutemwa kwa cine kulalambula mu kuti kulatwaafwa ukuba abanakila. Nga ca kuti twalitemwa Yehova, tukainashisha pe samba lya kuboko kwakwe ukwa maka. (1 Petro 5:6) Ukutemwa kwa kuli wene na kabili kukatusesha ku kunakila ku cibombelo cakwe casalwa, “umusha wa cishinka kabili uwashilimuka.” Ici cisanshamo ukuba abanakila kuli abo abalebuula ubutungulushi mu cilonganino. Ici calibe ica kulambula pantu ukufilwa ukucite fyo kuti kwaba ‘ukwa konaula’ kuli ifwe. (Mateo 24:45-47; AbaHebere 13:17) Kwena, ici cishinte ca kuba abanakila na kabili cibomba na mu kati na nkati ka cinshingwa-ŋanda ca lupwa. Inshila ya musango yo yalibe iya kulambula pantu isumbula ubuseko bwa lupwa, umutende, no kumfwana ilintu kuletupeela ukwikushiwa uko ukufuma ku kwishiba ukuti tulesekesha Lesa.—Abena Efese 5:22; 6:1-3.

22. Ni shani twingaba mu mu cine cine aba nsansa?

²² Mu kulengama, lyene, imibele yapulishamo iyo twingalundulula yaba ni a·gaʹpe, iyabula akaso, umusango wa kutemwa kwa cishinte. Kabili te kuti kubeko ukutwishika kwa kuti ukutemwa kwa cine kulalambula. E ico, tukaba aba nsansa mu cine cine nga ca kuti twalundulula no kulumbulula iyi mibele mu cipimo cakulisha icingafikwapo ku bukata bwa kwa Lesa wesu uwakwata ukutemwa, Yehova.

Kuti Waankulako Shani?

◻ Ni mu nshila nshi Yehova Lesa alangishamo ukutemwa kwa cine?

◻ Ni shani ukutemwa kwalangwa na Yesu Kristu?

◻ Ca kumwenako nshi umutumwa Paulo aimike mu kulangisha ukutemwa kwa cine?

◻ Ni shani Inte sha kwa Yehova balangisha ukutemwa?

◻ Mulandu nshi wingasosela ukuti ukutemwa kwa cine kulalambula?

[Icikope pe bula 16]

Ukutemwa kwa kwa Yehova ku mutundu wa muntu kwamuseseshe ku kupeela Umwana wakwe pa kuti twinganonka ubumi bwa muyayaya. Bushe ulatesekesha ukutemwa kwa cine ukwa musango yo?

[Icikope pe bula 18]

Ukutemwa kwa cine ukwa kuli Yehova kukatusesha ‘ukupepa mu kukanaleka’