Ifipusho Ukufuma ku Babelenga
Bushe calola mwi ukupepa Yehova “mu mupashi”?
Ilyo aleshimikila umwanakashi umwina Samaria uwaile mu kutapa amenshi pa cishima ca kwa Yakobo mupepi no musumba wa Sukari, Yesu Kristu atile: “Lesa Mupashi, na bamupepa bali no kumupepela mu Mupashi na mu cine.” (Yohane 4:24) Bakapepa ba cine bafwile ukupepela “mu cine,” e kuti ukupepa kwabo kufwile ukulingana na fintu Yehova Lesa asokolola muli Baibolo pa mwine no bufwayo bwakwe. Tufwile ukubombela Lesa umulimo wesu na maka, nelyo no kupimpa, no kucincishiwa no mutima waisulamo ukutemwa ne citetekelo. (Tito 2:14) Nalyo line, ico Yesu alelandapo mu mashiwi yakwe pa lwa ‘kupepa Lesa mu mupashi’ te mibele fye iya mutima iyitucincisha ukubombela Yehova.
Yesu talelanda pa kupimpa nelyo pa kukanapimpa mu kupepa ilyo ali no mwanakashi pa cishima. Pantu na bakapepa wa bufi balipimpa mu kupepa. Lelo, pa numa ya kusoso kuti Wishi tali na kupepelwa pa lupili mu Samaria nelyo mwi tempele mu Yerusalemu—incende shonse shibili ishimoneka—Yesu alandile pa nshila ipya iya kupepelamo iyashimpwa pa mibele ya cine cine iya kwa Lesa. (Yohane 4:21) Atile: “Lesa wa Bumupashi.” (Yohane 4:24, Charles B. Williams) Lesa Takwata umubili uo twingamona nelyo kutonya. E co ukumupepa takubela fye mwi tempele nelyo pa lupili ifimoneka. E co, Yesu alelanda pa kupepa ukushimoneka.
Pa kuti Lesa asuminishe ukupepa kwesu, tufwile ukumupepela mu cine no kutungululwa no mupashi wa mushilo—amaka ya kwa Lesa ayashimoneka. Umutumwa Paulo alembele ati: “Umupashi [wa mushilo] upenenga fyonse, ne fyashika fya kwa Lesa.” Asosele no kuti “ifwe te mupashi wa pano isonde twapokelele, lelo Umupashi uwafuma kuli Lesa, ukuti twishibe ifyo tupeelwo bupe kuli Lesa.” (1 Abena Korinti 2:8-12) Pa kupepa Lesa mu nshila asuminisha, tufwile ukukwata umupashi wakwe no kutungululwa na wene. Na kabili calikatama ukuti umupashi wesu nelyo imibele yesu iya mutima, fyumfwane no mupashi wakwe ukupitila mu kusambilila no kukonka Icebo cakwe.
[Icikope pe bula 28]
Pepeni Lesa “mu mupashi na mu cine”