Lesa Alakusakamana

MARY, umwanakashi wa Bwina Kristu mu myaka yakwe iya kulekelesha iya ba 40, alicula nga nshi mu bumi bwakwe. Ubucende bwa mulume wakwe bwalengele ukuti balekane myaka yapitapo ukucila pali 10. Pa numa, Mary alishombweke ku kusunsa icishingamo cakwe ngo mufyashi aba eka pa bana bakwe bane. Lelo acili aba eka, kabili pa nshita shimo ukutalalilwa kwakwe kumoneka ukushingashipikishiwa. Mary alalanguluka ati, ‘Bushe ici cilepilibula ukuti Lesa tansakamana nelyo ukusakamana abana bandi ababulwa wishi?’

Nampo nga walikumanyapo ukucula kwapalako nelyo iyo, mu kushininkisha kuti waumfwila Mary inkumbu. Ifwe bonse twalishipikishapo imibele ya kwesha, kabili nakalimo twalitwishika fye na lintu Yehova akabomba mu kutwimininako ne nshila akabombelamo. Fimo ifya ifi fya kukumanya filabako pa mulandu wa ca kufumamo ca mu kulungatika ica kumfwila amafunde ya kwa Lesa. (Mateo 10:16-18; Imilimo 5:29) Fimo fyaba fya kufumamo fya kuba kwesu abantunse bashapwililika abekala mu calo citekwa na Satana. (1 Yohane 5:19) Umutumwa Paulo alembele ukuti: “Ifibumbwa fyonse filetetela no kukomenwe fumo capamo.”—Abena Roma 8:22.

Nangu cibe fyo, icishinka ca kuti ulalolenkana no bwesho bwatapata tacipilibula ukuti Yehova alikulekelesha nelyo ukuti taba uwasekelela mu mikalile yobe. Bushe kuti washininkisha shani ici? Cinshi cilangisha ukuti Lesa alakusakamana?

Ica Kumwenapo ca pa Kale

Baibolo ipayanya ubushinino bwalengama ubwa fyo Yehova asakamene abantu umo umo. Languluka Davidi. Yehova alikwete ubuseko muli uyu kacema wacaice, amumwene ukuba ‘umuntu uwaba ngo mutima wakwe.’ (1 Samwele 13:14) Pa numa, lintu Davidi atekele nge mfumu, Yehova amulaile ukuti: ‘Nkaba nobe monse umo ukeenda.’—2 Samwele 7:9.

Bushe ici cilepilibula ukuti Davidi alebomfya “ifipuuta” pa kuti engaba uwalubukako ku bucushi ubuli bonse? Iyo, Davidi alolenkene ne fya kwesha fyatapata ilyo aali talaba imfumu na lintu aleteka. Pa myaka yafulilako ilyo Davidi talaba imfumu, Imfumu Shauli iya bukomi yamusupile mu kuba no lunkonena. Mu kati ka iyi nshita iya bumi bwakwe, Davidi alembele ukuti: ‘Umweo wandi uli mu kati ka nkalamo . . . abana ba bantu . . . ameno yabo mafumo kabili mifwi.’—Ilumbo 57:4.

Nalyo line, ukupulinkana ubu bucushi Davidi alishininwe pa lwa kusakamana kwa kwa Yehova pali wene. Davidi abilishe mwi pepo kuli Yehova ati: “Imwe mwapenda ukuuluba kwandi.” Ee, kuli Davidi cali kwati Yehova alilembele ukushikitika kwakwe konse. Lyene Davidi alundilepo ukuti: “Bikeni ifilamba fyandi mu nyambi yenu—bushe tafyalembwa mwi buuku lyenu?”a (Ilumbo 56:8) Mu kuba ne ci cilangililo, Davidi alumbulwile ukucetekela kwa kuti Yehova aali uwaibukila pa lwa mibele yakwe no kukuntukilwa kwakwe.

Ilyo aali mupepi no kufwa, Davidi alembele ukufuma ku ca kukumanya cakwe ati: “Amatampulo ya muntu yapampamikwa kuli Yehova, kabili abekelwa ku kwenda kwakwe; nangu awa takapooswe fye, pantu Yehova amutungilila ku kuboko kwakwe.” (Ilumbo 37:23, 24) Na iwe kuti waba uwacetekela ukuti nelyo amesho yobe yengatwalilila fye, Yehova alamona kabili alakatamika ukushipikisha kobe. Paulo alembele ukuti: “Lesa tali uushalungama; takalabe umulimo wenu, no kutemwa uko mwalangile kwi shina lyakwe, apo mwalepyungila aba mushilo, kabili mucili mulebapyungila.”—AbaHebere 6:10.

Mu kulundapo, Yehova kuti akwimininako pa kukupeela amaka ya kushipikisha icipindami icili conse icabikwa pa ntanshi yobe. Davidi alembele ukuti: “Ifibi ifiponeno walungama fingi, lelo kuli ifyo fyonse Yehova alamupokolola.” (Ilumbo 34:19) Ca cine, Baibolo itweba ukuti amenso ya kwa Yehova “yalolo ku no ku yalabebeta mu calo conse ku kuilango kuti wa maka ku kwafwa ababa ne mitima ya mpomfu kuli wene.”—2 Imilandu 16:9.

Yehova Aalikukula

Ubushinino bwalundwapo ubwa kusakamana kwine ukwa kwa Lesa kuti bwasangwa mu mashiwi ya kwa Yesu. Asosele ati: “Takuli uwingesa kuli ine, kano Tata uwantumine amukula.” (Yohane 6:44) Ee, Yehova afwa abantu umo umo ukumwenamo mwi lambo lya kwa Kristu. Mu nshila nshi? Libomba apakalamba ukupitila mu mulimo wa kushimikila Ubufumu. Ca cine, uyu mulimo ubomba “ku kubo bunte ku nko shonse,” lelo ufika pa bantu umo umo. Icishinka ca kuti ulekutika no kwankulako ku bukombe bwa mbila nsuma buli bushinino bwa kwangwako kwa kwa Yehova pa lwakwe kuli iwe.—Mateo 24:14.

Pa kubomfya umupashi wa mushilo, Yehova na kabili alakulila abantu ku Mwana wakwe ne subilo lya bumi bwa ciyayaya. Uyu wafwilisha umo umo ukutesekesha no kubomfya icine ca ku mupashi te mulandu no kupelebela ukuli konse ukwapyanwa no kukanapwililika. Mu cine cine, umo te kuti omfwikishe imifwaile ya kwa Lesa ukwabula ukwaafwiwa no mupashi wa kwa Lesa. (1 Abena Korinti 2:11, 12) Nge fyo Paulo alembele ku bena Tesalonika, “tabali na citetekelo bonse.” (2 Abena Tesalonika 3:2) Yehova apayanya umupashi wakwe kuli abo fye beka baitemenwa ukukulilwa kuli wene.

Yehova alakula abantu pa mulandu wa kuti alibatemwa ngo muntu umo umo kabili afwaya ukuti bapokelele ipusukilo. Mwandi bushinino bwakosa ubwa kusakamana kwine ukwa kwa Yehova! Yesu atile: “Te kufwaya kwa kwa Shinwe uuli mu muulu ukuti kamo pali utu tunono konaike.” (Mateo 18:14) Ee, mu menso ya kwa Lesa umo umo alicindama ngo muntu waibela. Uyo e mulandu Paulo engalembela ukuti: “Wene akapeelo muntu no muntu ifyo imilimo yakwe yaba.” (Abena Roma 2:6) Kabili umutumwa Petro atile: “Lesa taba na kapaatulula ka bantu, lelo uwa mu luko lonse [umuntu umo umo] uwamutiina no kubombo kulungama asekelelwa kuli wene.”—Imilimo 10:34, 35.

Ifipesha Amano fya kwa Yesu

Ubuseko bwa kwa Lesa pa bantu umo umo ubwa kufuma ku mutima bwalilangililwe mu fipesha amano fyacitilwe no Mwana wakwe, Yesu. Uku kundapa kwaendele pamo no kuyumfwa kwashika. (Marko 1:40, 41) Apantu Yesu “te kuti acite kantu eka, kano ico amona Wishi acita,” inkumbu shakwe shilangilila icikope cishaiwamina pa lwa kwangwako kwa kwa Yehova pa babomfi bakwe umo umo.—Yohane 5:19.

Languluka icalembwa ca cipesha amano cacitilwe na Yesu, icalembwa pali Marko 7:31-37. Pano Yesu aposeshe umwaume uwali nkomamatwi kabili uwali cibulubuusa. Baibolo ishimika ukuti, ‘Pa kumufumya pe bumba baile ku mbali.’ Lyene, “pa kulolesha mu muulu aishishe icefu, no kutila kuli wene, Efata (e kutila, Komokesha).”

Mulandu nshi Yesu afumishe uyu mwaume pe bumba? Kwena, kuti napamo caba ifyo umuntu uwakoma amatwi uushingalanda kuti akuntukilwa pa menso ya baletambako. Yesu afwile alimwene ukubipilwa kwa uyu mwaume kabili e mulandu wine asalilepo ukumundapa eka pa mbali. Uwasoma Baibolo umo atile, “Ilyashi lyonse litulangilila mu kumonekesha nga nshi ukuti Yesu talangulwike fye umwaume ngo mulwele; amulangulwike ngo muntu. Umwaume alikwete ukukabila kwaibela no bwafya ubwaibela, kabili mu kuba no kulangulukilako kwabondoka nga nshi Yesu alimusakamene mu nshila iya musebulwileko insoni kabili mu nshila iyo aumfwikishe.”

Ici calembwa cilanga ukuti Yesu aleangwa abantu. Kuti washininkisha ukuti alasekelela na muli iwe pa lobe. Ca cine, imfwa yakwe iya bulilambo yali kulumbulula kwa kutemwa ukwa calo conse ica mutundu wa muntu uwingalubulwa. Nalyo line, kuti waibika muli ico cifulo pa lobe, nge fyacitile Paulo, uwalembele ukuti: ‘Umwana wa kwa Lesa, uwantemenwe no kuipeela pa mulandu wa ine.’ (Abena Galatia 2:20) Kabili apantu Yesu asosele ukuti ‘uwamumona ninshi amona na Wishi,’ kuti twaba abashininwa ukuti Yehova alikwata ubuseko bumo bwine mu babomfi bakwe umo umo.—Yohane 14:9.

Yehova Aba Kalambula

Ukwishiba Lesa kubimbamo ukwishiba ulubali ululi lonse lumo lumo ulwa buntu bwakwe nge fyo bwasokololwa muli Baibolo. Ishina line Yehova lipilibula ukuti “Alenga Ukubako,” ukutubulula ifyo Yehova kuti aba icili conse ico asala ukuba pa kuti abombe imifwaile yakwe. Ukupulinkana mu lyashi lyonse ilya buntunse, alibuula ififulo fyalekanalekana, ukusanshako ifyo ifya kuba Kabumba, Wishi, Shikulu Mulopwe, Kacema, Yehova wa milalo, Komfwa we pepo, Kapingula, Kasambilisha Wakulisha, kabili Umupusushi.b

Pa kutesekesha ubupilibulo bwakumanina ubwe shina lya kwa Lesa, tufwile na kabili ukwishiba Yehova pamo nga Kalambula. Paulo alembele ukuti: “Ukwabulo kutetekela te kuti kube ukutemuna, pantu uupalamina kuli Lesa ali no kutetekelo kuti e ko ali, no kuti aba kalambula wa bamufwayafwaya.”—AbaHebere 11:6.

Yehova alilaya umweo wa muyayaya pe sonde lya paradise kuli abo ilelo abasala ukumubombela no mutima onse. Tacaba kaso ukwenekela ukufikilishiwa kwa ubo bulayo bukalamba, kabili tacaba kuituntumba ukuyelenganya ukwikala mulya. Mose “atontomeshe amenso ku cilambu.” (AbaHebere 11:26) Paulo mu kupalako aenekele mu kuswatuka ukufikilishiwa kwa bulayo bwa kwa Lesa ukukuma ku Bena Kristu basubwa aba citetekelo. Alembele ati: “Nkonkelela ukulola ku buyo, ku mwaala wa bwite bwa mu muulu bwa kwa Lesa muli Kristu Yesu.”—Abena Filipi 3:14.

Na iwe wine kuti watinamina icilambu ico Yehova alaya abo abashipikisha. Ukwenekela ico cilambu lubali lukalamba ulwa kwishiba kobe Lesa no kushipikisha kobe mu mulimo wakwe. E co etetula cila bushiku pa mapaalo ayo Yehova akubikila. Mary, uulumbwilwe pa kutendeka, alibombesha ku kucite ci. Asoso kuti, “Pa muku wa kubalilapo mu bumi bwandi nalicisumine nomba line ukuti icilubula ce lambo lya kwa Yesu cibomba na pali ine. Nintendeka ukuyumfwa ukuti Yehova alansakamana ngo muntu. Nalibo Mwina Kristu pa myaka ukucila 20, lelo ni nomba line fye natendeke ukusumine ci.”

Ukupitila mu kusambilila Baibolo no kwetetula kwa kufuma ku mutima pali yene, Mary, capamo na mamilioni bambi, nafika pa kwishiba ukuti Yehova alasakamana abantu bakwe te pamo fye nge bumba lelo na kabili pamo ngo muntu umo umo. Umutumwa Petro alishininwe nga nshi pa lwa ici ica kuti alembele ati: “Amasakamika yenu yonse bikeni pali [Lesa], pa kuti asakamana imwe.” (1 Petro 5:7) Ee, Lesa alakusakamana!

[Amafutunoti]

[Akabokoshi pe bula 6]

Ukubuuka—Ubushinino bwa Kuti Lesa Alasakamana

UBUSHININO bwakosa ubwa kuti Lesa alibo wasekelela mu muntu umo umo bulasangwa muli Baibolo pali Yohane 5:28, 29 apatila: “Inshita ileisa, iyo bonse aba mu nshishi [sha cibukisho, NW] bakomfwamo ishiwi [lya kwa Yesu], no kufumamo.”

Ku ca kusekesha, ishiwi lya ciGriki mne·meiʹon (inshishi sha cibukisho) lyalibomfiwa pano mu cifulo ca taʹphos (inshishi fye). Ishiwi taʹphos lipeela fye itontonkanyo lya kushiika. Lelo mne·meiʹon litubulula ukuti imibombele ya muntu uwafwa ilebukishiwa.

Muli kuno kuloshako, elenganya fye pa fyo Yehova Lesa akacita pa kubuusha. Pa kubwesha umo ku bumi, alingile ukwishiba icili conse pa lwa uyo muntu—ukusanshako imibele yakwe iyapyanwa ne cibukisho cakwe icapwililila. E lintu fye uyo muntu engabweshiwa ne fishibilo fimo fine.

Kwena, ukufuma ku mimwene ya muntu ici te kuti cicitike, lelo “fyonse fingacitwa kuli Lesa.” (Marko 10:27) Kuti aishiba fye ne cili mu mutima wa muntu. Nangu cingati umuntu alifwa pa myanda ya myaka iingi, icibukisho ca kwa Lesa pali wene te kuti cifilwe; tacifutika. (Yobo 14:13-15) Muli ifyo, lintu alelumbula Abrahamu, Isaki, na Yakobo, Yesu asosele pa myanda ya myaka pa numa babe nabafwa ukuti Yehova ‘tali Lesa wa bafwa, lelo wa ba mweo; pantu bonse baba aba mweo kuli wene.’—Luka 20:38.

Muli ifyo, amabilioni abafwa baba mu cibukisho ca kwa Yehova Lesa mu kukumanina nga nshi. We bushinino bwa kupapusha ubwa kuti Lesa alasakamana pa lwa bantu umo umo!

[Icikope pe bula 7]

Yesu alikwete ubuseko muli abo aundepe