Imimwene ya Baibolo

Bushe Ukwikatana kwa Bwina Kristu Kuti Kwabamo Ukupusanapusana?

UKWIKATANA kwalicindama mu cilonganino ca Bwina Kristu. Ukukanaikatana mu fisumino kuti kwaleta ifikansa fyakaluka, amalekano, no lupato fye. (Imilimo 23:6-10) Baibolo isoso kuti “Lesa te wa cimfulumfulu, lelo wa muyano.” (1 Abena Korinti 14:33) E co, Abena Kristu bakambishiwa ukusosa akanwa kamo kene no kuba abaikatana mu mucetekanya umo wine na mu matontonkanyo.—1 Abena Korinti 1:10.

Bushe aya mashiwi ne fikomo fyapalako mu Baibolo yalekoselesha Abena Kristu ukupalana mu fintu fyonse mu nshila yaumina kumo? (Yohane 17:20-23; Abena Galatia 3:28) Bushe Ubwina Kristu bwa cine ubwalondololwa mu Baibolo tabukoselesha ukupusanapusana kwa buntu? Bushe Abena Kristu bonse benekelwa ukuba cimo cine fye mu nshila yaumina kumo?

Lesa Alatupalamika Umo Umo

Abantu bamo basumino kuti Baibolo yaba cibombelo fye na cimbi ica kulaminako abantu bubi bubi. Ca cine, ifyakaniko fimo fyaliibomfya bubi bubi. Nangu cibe fyo, Yesu alondolwele imimwene yapusanako pa lwa Malembo na Katendeka wa yako, Lesa. Alondolwele Lesa pamo ngo wakwato buseko sana mu fibumbwa fyakwe cimo na cimo.

Yesu alondolwele pali Yohane 6:44 ukuti: “Takuli uwingesa kuli ine, kano Tata uwantumine amukula.” Verbu yabomfiwa pano taitubulule fyo Lesa alapatikisha abantu ukucita ico bashitemenwe. Mu cifulo ca ico, Lesa alabapalamika mu nshila yanakilila, pa kubimbula umutima. Nga fintu uwasoma ifya Baibolo alandile ukuti, ‘Lesa alasonga umuntontonkanya ukuti utetekele.’ Kabumba tamona ulupwa lwa buntunse nga ibumba fye lya bantu. Alalingulula umo umo no kupalamika kuli wene aba mitima iyalola ku bulungami.—Ilumbo 11:5; Amapinda 21:2; Imilimo 13:48.

Moneni fintu umutumwa Paulo aali uuteuluka. Alishibe ukukabila kwaibela ukwa muntu umo umo kabili alisumine ukuti imimwene imo yali iyaseeka mu fyalo fimo nelyo kuba fikulilo fimo. Lyene aliteulwike ukulingana ne mibele. Alembele ukuti: “Ku baYuda naishileba ngo muYuda, ukuti ngwikishe abaYuda . . . ku banaka naishileba uwanaka, ukuti ngwikishe abanaka. Nimba fyonse kuli bonse, ukuti mu misango yonse mpusushishemo bamo.”—1 Abena Korinti 9:20-22.

Cili icamonekesha ukuti, Paulo tapatikishe abantu bonse ukuba cimo cine nelyo ukubasunga mu nshila imo ine. Abakoseleshe ukuti: “Ilyashi lyenu libe pe ilya kusenamina, ilyalungwamo umucele, ukuti mwishibe ifyo mufwile ukwasuko muntu no muntu.” (Abena Kolose 4:6) Paulo na Bena Kristu bambi bakabile ukwishiba no kucindiko muntu umo umo ngo waibela pa kumwaafwa.

Imifwaile ya kwa Lesa iya pa Kutendeka

Ukucindika umuntu ngo waibela kulatwalilila na lintu fye aisa mu cilonganino ca Bwina Kristu. Abantu ba kwa Lesa tabaipanga ukuba cimo cine no kukonkelesha fye fyonse ifyo abaletungulula batemwa. Ukucila, paba ukupusanapusana kwa buntu kabili bakwata amaka, imibele, ne mimwene yapusanapusana. Ubuntu bwaibela ubwa muntu umo umo tabumonwa nga kalusha buci. Bwaba lubali lwa mifwaile ya pa kutendeka iya kwa Lesa.

Muli fyo, mu calo cipya icalaiwa ku balungami mu Baibolo, abantunse bapwililika bakaba abapusanapusana. (2 Petro 3:13) Pe samba lya ka mutwe “Ukupwililika,” encyclopedia ya Baibolo, Insight on the Scripturesa ilandapo mu kulinga ukuti: “Nangu cibe fyo, ukupwililika, tacipilibula ukuti e mpela ya kupusanapusana nge fyo abantu batunganya. Ubwina nama, ubwaba bubumbo bwa ‘micitile ya mpomfu’ iya kwa Yehova (Ukute[ndeka] 1:20-24; Amala[ngo] 32:4), bwaliba ubwapusanapusana nga nshi.”

Insight ilundapo ukuti: “Ukupwililika kwe Sonde na ko takupilibula ukuti takwakabe ukupusanapusana, ukwaluka, nelyo ukucilana; mukaba ifintu fyaanguka ne fyapikana, ifyaundalila ne fyabalabata, ifyasasamina ne fyalowa, ifya kalabana ne fyatelela, inika ne mitengo, impili ne mipokapoka. Mukaba ukupembesula kwa kucincimusha ukwa mu kutampa kwa shinde, ne cikabilila ca mu lusuba no muulu wa lusuba uwacelebuka, ubusuma bwa kubalabata kwa mibundo, ukuyemba kwine kwine ukwa mfula yabuuta. (Ukute[ndeka] 8:22) Muli fyo, abantunse bapwililika tabakwata ubuntu bumo bwine, ukulamuka, na maka.”

Ukulangulukilako Bambi

Ubwina Kristu bwa cine, nangula cibe fyo, tabukoselesha ukukanalangulukilako bambi muli bukaitemwe. Umutumwa Paulo aali uwayangwako pa lwa conse alecita mu bumi bwakwe na mu myendele pa kuti epunwisha bambi. Muli kalata wakwe ku cilonganino ku Korinti atile: “Tatubika ca kupunwisha nangu cimo, ukuti bukapyunga bwesu bwitungwa kabi.” (2 Abena Korinti 6:3) Inshita shimo tufwile ukulama ukufwaya kwesu no kuleka ukukabila kwa bambi ukuba ukwa ntanshi mu cifulo ca fintu twatemwa. Ku ca kumwenako, Paulo alembeele Abena Kristu ku Roma ukuti: “Cisuma ukuleko kulye nama, nangu kunwo mwangashi, nangu kucite cintu conse ico munonko aipunwinamo.”—Abena Roma 14:21.

Mu kupalako ilelo, umo kuti pambi asengauka ukunwa ubwalwa nga pali umo uwakwata ubwafya bwa kulama iminwene yakwe. (1 Abena Korinti 10:23, 24) Te mu kupatikishiwa umo acitile fi, lelo yaba ni ncitilo yawamisha iya cikuuku no kutemwa. “Pantu na Kristu wine taitemwine.” Yesu aali muntu waibela, lelo tapampamine pa kucita ifyo atemenwe ukwabulo kulangulukilako bambi.—Abena Roma 15:3.

Nalyo line, cimo ica kupembesula nga nshi mu buKristu bwa cine caba kucindika ubuntungwa bwa muntu na fintu atemwa cikulu fye filomfwana ne fya kutungulula fya Baibolo. Citusambilisha ukuti Lesa atupangile ukuba abapusanako kabili abaibela. Pali 1 Abena Korinti 2:11 tubelengapo ukuti: “Pantu muntu nshi aishibe fya muntunse, kano umupashi wa uyu muntunse uwaba muli wene?” Tulesha apo twingapesha ukumfwikisha bambi. Lelo ici cikomo citubulula ukuti uwaumfwikisha ukuibela kwesu umo umo ni fwe bene na Kabumba wesu. Twalikwato “muntu uwabelama uwa mu mutima” uyo tusokolola mu nshila tutemenwe.—1 Petro 3:4.

Ukwikatana no Kupusanapusana—Ukushikatala Kukabila Ukushilimuka

Umutumwa Paulo aali ca kumwenako cishaiwamina mu kushikatala kwa Bwina Kristu. Nangu ca kuti aali no bulashi ngo mutumwa wa kwa Kristu, mu kusakamanishisha tapatikishe bambi ukusuminisha imimwene yakwe.

Ku ca kumwenako, Paulo akwete imimwene yakosa pa lwa busuma bwa bushimbe muli ci calo cishapwililika. Na kuba umwine aali mushimbe lintu alembele ukuti: “Awe ababe fi [abaupa] bakaba no kupamfiwa mu mubili,” kabili atile “alishuka [mukamfwilwa] ukucilamo nga aikala fye ifyo ali, e kupanda amano kwandi.” Apo amashiwi yakwe emo yaba mu Cebo capuutwamo ica kwa Lesa ninshi tapali icalubene ne mimwene yakwe. Nalyo line, alondolwele no kuti: “Lelo nelyo uupe, taubembwike.”—1 Abena Korinti 7:28, 40.

Mu kushininkisha, ubwingi bwa batumwa balyupile, nga fintu Paulo asuminishe ukuti: “Bushe tatukwete buntungwa bwa kwenda na bakashi ba mu bwananyina, ificita abatumwa banensu, na bamunyina Shikulu, na Kefa?” (1 Abena Korinti 9:5) Abena Kristu balishibe ukuti baali no kuisalila pali ci mu kupusanako na Paulo kabili nalyo line aali no kubacindika.

Lyonse bakapepa ba kwa Lesa baliba abantungwa ukulumbulula icitetekelo cabo ukulingana no buntu bwabo ubwaibela. Na kuba, nangu fye ni Lesa alisuminishe fye na bakalemba ba Baibolo ukulemba imilembele intu umo umo atemenwe. Ku ca kumwenako, Nehemia mu kuicefya aleilumbula pa kulemba. (Nehemia 5:6, 19) Lubali lumbi, umutumwa Yohane mu bufuuke tabalile abomfya ishina lyakwe mwi Landwe lyakwe kabili te lingi aleilandapo umwine. Lesa alisuminishe imilembele yonse ibili no kuisungilila mu Baibolo.

Ifya kumwenako fyapalako ifya kuba abashikatala na bateuluka filasangwa mu Malembo. Cili icamonekesha ukuti mu kwikatana kwa Bwina Kristu kuti mwaba ukupusanapusana. Kwena, ifikulilo fyapusanapusana ne mimwene kuti fyafumamo ukukanaikatana nga ca kuti tapali imibele ya ku mupashi. (Abena Roma 16:17, 18) Lelo lintu ‘twafwalo kutemwa, ukwaba e kukakila fyonse pamo mu kwitabana,’ tusambilila ukupokelela no kuipakisha ubuntu bwaibela ubwa bambi.—Abena Kolose 3:14.

Baibolo isoso kuti: “E ico mulesekelelana, ifyo na Kristu asekelele imwe, ku kuleka kupeelwe umucinshi kuli Lesa.” (Abena Roma 15:7) Abena Kristu kuti bakwata ukushikatala kukabila ukushilimuka mu kusungilila ukwikatana no kuipakisha ukupusanapusana kwa buntu bwaibela mu cilonganino mu kuba no kwaafwa kwa mupashi wa kwa Lesa.

[Futunoti]

[Amashiwi pe bula 14]

Kabumba tamona ulupwa lwa buntunse nga ibumba fye lya bantu

[Amashiwi pe bula 15]

Uwaumfwikisha ukuibela kwesu umo umo ni fwe bene na Kabumba wesu