Yesu Asambilisha Abantu Ilyo Aleya Ku Yerusalemu

Yesu alibombeele mu Galili pa nshita iikalamba umo abantu balekutika sana ku fyo alesambilisha ukucila aba mu Yudea. Ilyo aundepe umwaume pe Sabata mu Yerusalemu, “abaYuda balefwaisha ukumwipaya.”—Yohane 5:18; 7:1.

Natulande pa cacitike muli ba September mu 32 C.E., ninshi Umutebeto wa Nsakwe uli mupepi no kubako. Uyu mutebeto baleusefya pa nshiku 7, e lyo pa bushiku bwalenga 8, kwaleba ukulongana kwacindama. Uyu mutebeto walebako nga balobolola ifyo balimine kabili yaleba ni nshita ya kusekelela ukukalamba e lyo no kutasha Lesa.

Yakobo, Simone, Yosefe na Yuda, bamunyina ba kwa Yesu, baebele Yesu abati: “Fuma kuno, kabiye ku Yudea.” Ku Yerusalemu e ko abantu baleya mu kupepela. Pa mitebeto itatu iyalebako cila mwaka, muli uyu musumba mwaleba abantu abengi. Bamunyina ba kwa Yesu batile: “Takwaba umuntu ucita ifintu mu bumfisolo ilyo alefwaya abantu bamwishibe. Apo iwe ulacita ifi fintu, uilange ku ba pano calo.”—Yohane 7:3, 4.

Na kuba, aba bamunyina ba kwa Yesu bane ‘tabamutetekeele’ ukuti ni Mesia. Lelo balefwaya abantu abaalongene bamone Yesu acita ifipesha amano. Apo Yesu alishibe ukutila abalwani bakwe kuti bayamwipaya, aebele bamunyina ati: “Icalo te kuti cimupate, lelo ine calimpata, pantu ine ndacishinina ukuti imilimo ya ciko yalibipa. Kabiyeni ku mutebeto; ine nshileya nomba ku mutebeto, pantu inshita yandi tailafika.”—Yohane 7:5-8.

Ilyo bamunyina ba kwa Yesu baimiine ukuya ku Yerusalemu ne bumba lya bantu, palipitile inshiku shinono pa kuti Yesu na basambi bakwe beme no kuya ku Yerusalemu mu bumfisolo. Tabapitile mupepi no Mumana wa Yordani, umwapitile abantu abengi, lelo bapitile inshila iipi iyapitile mu Samaria. Yesu na basambi bakwe balefwaya ukwa kulaala mu Samaria, e ico atumine aba kuyapekanya ukwa kufikila. Abantu mu cifulo cimo balikeene ukubapokelela nelyo ukubacitilako fimo ifyo balecitila abeni, pantu Yesu aleya ku Yerusalemu ku mutebeto wa baYuda. Yakobo na Yohane balifulilwe sana, e ico baipwishe Yesu abati: “Mwe Shikulu, bushe mulefwaya twebe umulilo wike ukufuma ku muulu no kuboca?” (Luka 9:54) Yesu alibakalipile pa fyo bamwebele. Awe balikonkenyepo ubulendo.

Ilyo baleya mu nshila, kalemba umo aebele Yesu ati: “Mwe Kasambilisha, ndemukonka konse uko muleya.” Lelo Yesu amwebele ati: “Bamumbwe balikwata ifilindi umo bekala ne fyuni fya mu muulu fyalikwata ifisansala, lelo Umwana wa muntu takwata na pa kusaisha umutwe.” (Mateo 8:19, 20) Ico Yesu alelandapo ca kuti imikalile ya kwa kalemba yali no kwafya nga ca kuti atendeka ukukonka Yesu. E lyo kabili ulya kalemba afwile ali ne cilumba sana ica kuti nga tafwaile ukulaikala nge fyo Yesu aleikala. Kanshi ifwe bonse tufwile ukuyipusha ukuti, ‘Bushe kuti naipeelesha ukulakonka Yesu?’

Yesu aebele umwaume umbi ati: “Nkonka, ube umusambi wandi.” Na o atile: “Lekeni ntale njeshiika batata.” Apo Yesu alishibe ico uyu mwaume asoseele ifyo, amwebele ati: “Leka abafwa bashiike abafwa babo abene, lelo iwe kabiye ulebila konse konse Ubufumu bwa kwa Lesa.” (Luka 9:59, 60) Bawishi bafwile bali abomi. Nga ca kuti balifwile, uyu mwaume nga taile ukwali Yesu. Uyu umwaume taipekenye ukutangisha Ubufumu bwa kwa Lesa mu bumi bwakwe.

Ilyo baleya ku Yerusalemu, umwaume umbi aebele Yesu ati: “Nakulamukonka, mwe Shikulu; lelo lekeni ntale njeshalikapo aba mu ng’anda yandi.” Yesu amwebele ati: “Takuli uwikata kuli plao no kulolesha ku fya ku numa uwalinga ukwingila mu Bufumu bwa kwa Lesa.”—Luka 9:61, 62.

Abafwaya ukuba abasambi ba kwa Yesu aba cine balingile ukubika amano ku mulimo wa Bufumu. Uwikete kuli plao nga talelolesha ku ntanshi, imikolwa te kuti ibe iyaololoka. Nga alekela kuli plao pa kuti amone ifilecitika ku numa, ninshi imilimo kuti yalaala. E ico no muntu nga alelolekesha ku fyo asha muli cino calo, kuti afuma mu nshila iitwala ku mweo wa muyayaya.