Kuti Wasanga Ifyuma fya Mutengo Wacila Golde!

ICINE muli Baibolo kuti capashanishiwa kuli golde, silfere, nelyo ifyuma fyashikama. Nangu cingati tawabala aupanse mpanga ya golde wa cine cine nelyo silfere, mu kupalishako umwensekesha ukuti ukucite fyo cifwaya ukubombesha kwa maka no mukoosha. Kabili ilingi line uulepanse mpanga akumanya ukulengwe nsoni.

Nangu cibe fyo, ukulengwe nsoni kwa musango yo takwisako lintu wafwaya ifyuma fyashikama muli Baibolo. Mona ici ica kwikasha ca kukoselesha ukuti: “Nga wafisokota nga silfere, no kufifwimfwinta nge fyuma ifyashikama; e lyo uleiluka akatiina ka kuli Yehova, no kwishiba Lesa ukakusanga.” (Amapinda 2:4, 5) Lelo ufwile ukufwaya.

“Fwaya, no Kumona”

“Fwaya, no kumona ukuti mu Galili tamwima kasesema.” Uku kwali kupanda amana uko abaFarise ba ciYuda aba mu mwanda wa myaka uwa kubalilapo bapeele kuli Nikodemo, na o uwali umuFarise. “Fwaya, no kumona.” Kupanda amano kusuma, mu cine cine. Caali icishingacitika ukufwaya no kusange cine—icintu cimo icacilapo kucindama ukucila pali golde.

Muli ulya mulandu, nangu cibe fyo, abo abapeele ukupanda amano ya ‘kufwaya no kumona’ bafililwe ukubomba mu kulinganako. Shani ifyo?

Bashimapepo bakalamba na baFarise baali nabatuma bamushika ku kwikata Yesu Kristu. Ukwebekeshiwa apakalamba ku kusambilisha kwakwe, bamushika babwelele iminwenkutwa. Mu kukonkapo, abaFarise balibepwishe ukuti: “Bushe na imwe namulufiwa?” Nikodemo asosele ukuti: “Bushe Amafunde yesu yapingulo muntu nga tayalamuumfwa no kwishibe co acita?” Aya mashiwi yacincishe ukupanda amano kwa ‘kufwaya no kumona.’—Yohane 7:32, 45-52.

Ni shani fintu bashimapepo na baFarise bafililwe? Tabaishibe nelyo ukusumina ukuti nangu cingati Yesu akushiwe mu Galili, afyalilwe mu Betlehemu. Kasesema Mika aali nasobela ukuti: “Muli iwe [Betlehemu] e mukafuma uukaba kateka muli Israele.” (Mika 5:2) E co abo baletungulula bafililwe ukufwaya no kumona ubushinino bwalembwa ubwa kwa Yesu nga kasesema, umo uwali no kuba kateka mu Israele. Ici catungulwile ku fya kufumamo fyabamo akayofi, kabili cilangilila ifyo cabe cacindama ukufwaya no kukwata icine conse pa lwa milandu. Lelo ni shani icine cimonwa ilingi line?

Icine Casanguka Icasunduka

“Icine casanguluka, ukupala golde yasanguluka, casangwa ukuba icishalinga ku kwananishiwa, pa mulandu wa kuti abantu balisango kuti caliba icacilapo kulinga ukusundule cine ukucila ukuilopolola,” e fyasosele kalemba wa mu mwanda wa myaka uwalenga 19. Fintu aya mashiwi yacili aya kulungatika ukulosha kwi bala lya butotelo bwa calo! Ku numa ya fisebele fya uku kusundula kwa cine kwaba “wishi wa [bufi, NW],” Satana Ciwa. (Yohane 8:44; Ukusokolola 12:9) Abomfya ubutotelo bwa bufi ku kusundula ifisambilisho fya cine pa fipusho fya musango yu ifyacindama pamo nge fi: Lesa nani? Kwampana nshi ukwa kwa Yesu kuli wene? Cinshi caba ubuyo bwe sonde no mutundu wa muntu?

Bashimapepo na baFarise nga balifwaile no kusange cine. Nga basangile ifyuma fya mutengo wacila golde. Ee, nga balipokelele icine conse pa lwa kwa Yesu pa ‘kuumfwa kuli wene no kwishiba cintu alecita,’ nga fintu Nikodemo atubulwile. Nga ca kuti baali abafumaluka mu kucite ci, ukwabulo kutwishika Yesu nga alilondolwele ifintu kuli bene, nga fintu acitile ku basambi bakwe. (Marko 4:34) Lelo ni kwi twingasanga icine casanguluka ilelo? Mu cine cine, bushe kwalibako ica kwikasha ca kuti kuti twafwaya mu kutunguluka no kukwata icine conse?

[Icikope pe bula 4]

Intungulushi sha butotelo nga balipokelele icine conse pa lwa kwa Yesu pa ‘kuumfwa kuli wene’