Bushe Shibo Ni Abrahamu Nangu Ni Satana Kaseebanya?

Yesu alikonkenyepo ukusambilisha abantu amasambililo yacindama pali Lesa ninshi acili mu Yerusalemu, ku Mutebeto wa Nsakwe. AbaYuda bamo abalipo bamwebele abati: “Tuli bana ba kwa Abrahamu kabili tatwatala atuba abasha.” Yesu abaswike ati: “Nalishiba ukuti muli bana ba kwa Abrahamu; lelo mulefwaya ukunjipaya, pantu tamumfwila ifyo nsambilisha nakalya. Ifyo namona kuli Tata, e fyo nanda; e ico na imwe citeni ifyo mwaumfwa kuli shinwe.”—Yohane 8:33, 37, 38.

Ico Yesu alebeba apa ca kuti: Wishi te wali shibo. Apo tabaumfwile umo Yesu aloseshe, abaYuda balibwekeshepo ukusosa abati: “Shifwe ni Abrahamu.” (Yohane 8:39; Esaya 41:8) Ca cine batuntwike kuli Abrahamu, e calengele balemona kwati balikwete icitetekelo ico Abrahamu, cibusa wa kwa Lesa akweteko.

Lelo ifyo Yesu abaswike fyalibapapwishe sana. Atile: “Nga muli bana ba kwa Abrahamu, citeni imilimo ya kwa Abrahamu.” Na cine, umwana alapashanya bawishi. Yesu abebele no kuti: “Lelo nomba mulefwaya ukunjipaya, ne muntu uwamweba icine ico naumfwile kuli Lesa. Abrahamu tacitile ifi iyo.” Lyena Yesu abebele amashiwi ayabapapwishe. Atile: “Imwe mucita imilimo ya kwa shinwe.”—Yohane 8:39-41.

AbaYuda na kabili balifililwe ukwishiba uo Yesu alelandapo. E ico batile: “Tatwafyalilwe mu bulalelale; tuli na Shifwe umo, ni Lesa.” Lelo bushe ca cine Lesa ali ni Shibo? Yesu abebele ukuti: “Lesa nga ni Shinwe, nga mwalintemwa, pantu nafuma kuli Lesa no kwisa pano calo. Nshaitendekele ukwisa, lelo ena E wantumine.” Lyena Yesu aipwishe icipusho ico ayaswike umwine. Atile: “Nga cinshi mushishibile ifyo ndelanda? Pantu te kuti mumfwe amashiwi yandi.”—Yohane 8:41-43.

Yesu alyeseshe ukubalanga ukuti nga bamukaana ninshi bana ba kwa Kaseebanya. E ico tapitile na mu mbali, abebele ati: “Imwe shinwe ni Satana Kaseebanya, kabili mufwaya ukucita ifya lunkumbwa fya kwa shinwe.” Bushe shibo aba shani? Yesu alimulondolwele bwino ati: “Ulya ali ni kepaya wa bantu ilyo atendeke, kabili tatwalilile mu cine.” Yesu alandile no kuti: “Uwa kwa Lesa, omfwa amashiwi ya kwa Lesa. E mulandu wine tamumfwila, pantu tamuli ba kwa Lesa.”—Yohane 8:44, 47.

Ifyo Yesu alandile fyalikalifye sana abaYuda. E ico bamwaswike abati: “Bushe tatulungika ilyo tutila, ‘Iwe uli mwina Samaria, kabili uli ne cibanda’?” Ilyo baitile Yesu ukuti “umwina Samaria,” balefwaya ukumukalifya. Lelo Yesu tabikileko amano ku fyo balemusaalula, abaswike ati: “Nshili ne cibanda, lelo ncindika Tata, na imwe mulensaalula.” Pa kubalanga ifyo cacindama ukumumfwila, Yesu abebele amashiwi ayabapapwishe. Atile: “Umuntu nga aleumfwila amashiwi yandi, takafwe iyo.” Yesu talelanda ukuti abatumwa bakwe na bantu bambi abalemukonka tabakafwe iyo. Lelo alelanda ukuti tabakafwe “imfwa ya cibili,” e kuti tabakonaulwe umuyayaya, pantu nangu bafwa bakabuushiwa.—Yohane 8:48-51; Ukusokolola 21:8.

Lelo abaYuda tabaishibe umwalolele amashiwi Yesu abebele. Bamwaswike abati: “Nomba twaishiba ukuti uli ne cibanda. Abrahamu alifwa, na bakasesema na bo balifwa; lelo iwe uletila, ‘Umuntu nga aumfwila amashiwi yandi, takafwe iyo.’ Bushe uli mukalamba pali shifwe Abrahamu uwafwa? . . . Iwe uleti ni wani?”—Yohane 8:52, 53.

Yesu afwile alefwaya beshibe ukuti e wali Mesia. Lelo mu nshita ya kubaasuka fye ukuti e wali Mesia, Yesu atile: “Nga naicindamika, ubucindami bwandi bwa fye. Ni Tata e uncindamika, uo imwe mutila e Lesa wenu; lelo tamwamwishiba. Nomba ine nalimwishiba. Kabili nga natila nshamwishiba kuti naba uwa bufi nga imwe.”—Yohane 8:54, 55.

Yesu atendeke ukubeba pa muntu uwakwete icitetekelo uwali icikolwe cabo. Atile: “Abrahamu shinwe alisekelele nga nshi ukuti amone ubushiku bwandi, kabili alibumwene no kusekelela.” Apo Abrahamu alicetekele ifyo Lesa alaile, alefwaisha ukuti Mesia akese. AbaYuda balifililwe ukusumina ifyo abebele. E ico bamwipwishe abati: “Iwe ucili taulaba ne myaka 50, nga wamwene shani Abrahamu?” Yesu abaswike ati: “Ndemweba icine cine, nati, ilyo Abrahamu talabako, ninshi ine e ko naba.” Yesu alelanda ukuti ali ni malaika ku muulu ilyo ashilaisa pano calo.—Yohane 8:56-58.

Ilyo Yesu abebele ukuti eko ali lintu Abrahamu talabako, abaYuda balikalipe icine cine, bafwaile ukumupoola amabwe, lelo balifililwe pantu alifuminepo.