“Shaishibe Shiwi Lyakwe”

“YEHOVA e mucemi wandi.” Aya e mashiwi ya kwiswila aya Ilumbo 23. Amalembo na kabili yalinganya Yehova Lesa ku mucemi mu busesemo bwa kwa Esaya, ubutila: “Ngo mucemi e fyo alisho mukuni wakwe, ku kuboko kwakwe aulonganya, asendela pa cifuba cakwe abana ba mpaanga, ne shonsha ashitungulula bwino bwino.”—Esaya 40:11.

Mu kupalako, Yesu Kristu apashanishiwa ku mucemi. Atile: “Ni ’ne mucemi musuma; umucemi musuma atuulile mpaanga umweo wakwe.” (Yohane 10:11) Yesu atile “impaanga shakwe shiine [umucemi] aita iyi ishina lya iko ne yi ishina lya iko, kabili ashitungulwila ku nse.” Alundileko ukuti “impaanga shilamukonka [umucemi] ico shaishibe shiwi lyakwe. Lelo umbi umbi te kuti shimukonke, kano ukumufulumuka; pantu tashaishibe shiwi lya bambi bambi.”—Yohane 10:2-5.

Bonse babili Yehova Lesa no Mwana wakwe, Yesu Kristu, baikalila ku cipasho calangililwa mu malembo yatangilileko. Basunga impaanga shabo isha cimpashanya mu kuba no kubondoka no kusakamana kwabamo kutemwa. Pamo nge ca kufumamo, abapale mpaanga bayumfwa abatemwikwa, aba mutelelwe, kabili abacingililwa.

Uku kwampana kwalipashanishiwa mu kulinga kuli kulya ukwa mpaanga sha cine cine no mucemi wa shiko. Ku numa mu 1831, John Hartley alembele pa lwa kubebeta kwakwe muli kuno kuloshako. Alandile ukuti mu Greece cali ca cikaya ku bacemi ukupeela amashina ku mpaanga shabo. Lintu shaitwa kwi shina, impaanga shaleankulako kwi shiwi lya mucemi. Mupepi ne myaka 51 pa numa, mu 1882, J. L. Porter acitile ukubebeta kwapalako. Umwine wine aliimwenene umucemi “ukufumya . . . ukwita kwaibela ukwa kupyeta” kuntu impaanga shali no kwankula pa kukonka abacemi mu cumfwila. Uyo mwaka umo wine William M. Thomson alembele pa lwa kwesha kwabwekeshiwabwekeshiwapo uko kwashininkishe ukuti impaanga kuti shasambilishiwa ukukonka umucemi wa shiko no kwishiba ishiwi lyakwe.

Bushe uku kwampana kwaibela pa kati ka bacemi ne mpaanga shabo kwalimonwa mu nshita sha nomba line? Ee. Mu wafumine mu September 1993 uwa National Geographic, uwenda mu kupanse mpanga Robyn Davidson alembele ifyakonkapo pa lwa bamululumba bakwate fitekwa aba ciRabari mu India wa pa kati ka kapinda ka kuso na masamba ukuti: “Umucemi umo umo alikwata ukwita kwapusanako panono, ukupusanako mu mibele. Kwalibako ukwita kwa lucelo ukwa kuteuka, ukwita kwa kulete mpaanga ku menshi, na kumbipo. Umuntu umo umo alishiba impaanga shakwe shine na sho shalimwishiba, kabili umukuni wakwe ulaisoobolola uwine ukufuma mu mukuni ukalambako no kumukonka ulucelo.”

Ukwabulo kutwishika, Yesu alimwene icalondololwa na aba balendo baciba balumbwilwe. Ukubebeta kwakwe kwine kwasanshisheko bucine ku cilangililo cakwe ica mpaanga ukwishiba ishiwi lyakwe. Bushe uli umo uwa mpaanga sha kwa Yesu? Bushe uleshibe shiwi lyakwe no kukutika kuli lyene? Nga ca kuti uleshiba no kupokelela ukusambilisha kwakwe nge cine kabili nga ca kuti ulomfwila amafunde yakwe no kukonka ubutungulushi bwakwe mu kupepa Yehova, kuti wakumanya ubucemi bwabamo kutemwa kabili ubwabondoka ubwa kwa Yehova Lesa no Mwana wakwe, Yesu Kristu.—Yohane 15:10.