Yesu Muntu Walinga Sana Ukupashanya

BUSHE mulafwaya ukuba umuntu umusuma kabili uwa nsansa? Umutumwa Petro alitulondolwela ifyo tufwile ukucita pa kuti tube ifi. Alembele ukuti: “Ni mwe Kristu aculiile, kabili amushilile ne cilangililo pa kuti mulekonka sana mu ntampulo shakwe.” (1 Petro 2:21) Ca cine, Yesu Kristu ali muntu umusuma nga nshi, kanshi kuti twasambililako ifingi kuli ena. Nga twasambilila ifyo Yesu ali no kumupashanya, ukwabula no kutwishika kuti twaba abantu abasuma kabili aba nsansa. Natulandeko pa mibele imo iyo uyu muntu akwete, tumone ne fyo twingasambililako kuli ena.

Yesu alishibe bwino ifya kucita. Nangu ca kuti Yesu atile ‘takwete na pa kusaisha umutwe,’ alefwaya ukulaikala bwino no kulasangalala kabili talekaanya abantu ukulacita ifi. (Mateo 8:20) Alesangwa ku mitebeto. (Luka 5:29) Icipapwa abalilepo ukucita, ica kwalula amenshi ukuba umwangashi pa mutebeto wa bwinga, cilanga ukuti Yesu tali uwaifinya nelyo uushalefwaya ukusangalala. (Yohane 2:1-11) Lelo Yesu alilandile bwino pa co acindamike sana. Atile: “Ica kulya candi kucita ukufwaya kwa wantumine no kupwisha umulimo wakwe.”—Yohane 4:34.

□ Bushe mwalitontonkanya pa fyo imikalile yenu yaba pa kuti mwishibe ifyo mulingile ukucita pa kuti mulekwata ne nshita ya kucita ifya kwa Lesa?

Yesu tali uwaifinya. Baibolo ilanda ukuti Yesu ali muntu umusuma kabili uushaifinya. Talefulwa abantu nga bayamweba amafya bakwete nelyo nga bamwipusha amepusho yabakoseele. Inshita imo ilyo ibumba lyamushingulwike, umwanakashi uwalwele pa myaka 12 akumishe ku ca kufwala cakwe, pa kuti engapola. Yesu takalipiile ulya mwanakashi pa kucita ico abantu balemona kuti kukaanaicefya, amwebele fye mu mutembo ukuti: “We mwana, icitetekelo cobe nacikuposha.” (Marko 5:25-34) Abana abanono nabo baletemwa ukuba nankwe, tabalemutiina. (Marko 10:13-16) Ilyo aleba na basambi bakwe, taleifinya, alelanshanya fye nabo bwino. Tacalebakosela ukumupalama.—Marko 6:30-32.

□ Bushe abantu balesa kuli imwe ukwabula ukumutiina?

Ali wa cikuuku kabili uulangulukila. Pa mibele ikalamba Yesu akwete, pali no kumfwila abantu balecula uluse, aleumfwa kwati na o alecula nga balya bene, icalelenga no kuti alebafwa. Umutumwa Yohane alembele ukuti ilyo Yesu amwene Maria aleloosha ndume yakwe Lasaro, “aumfwile ubulanda nga nshi, kabili alyumfwile ububi” kabili “aponeshe ifilamba.” Abalemonako balimwene apabuuta ifyo Yesu atemwishishe lulya lupwa ica kuti tafishile ifyo aumfwile ububi. Kabili filya abuushishe cibusa wakwe ku bafwa, calangile ifyo alelangulukilako bambi!—Yohane 11:33-44.

Pa nshita imbi, umuntu uwalwele ubulwele bwabipisha ubwa fibashi ubwalelenga aletaluka abantu, apapeete Yesu ukuti: “Mwe Shikulu, nga mwatemwa, kuti mwamposha.” Yesu amwaswike mutembo mutembo, pantu Baibolo itila: “Atambalike ukuboko kwakwe, amukumya, e lyo atila: ‘Nintemwa. Pola.’” (Mateo 8:2, 3) Yesu taleundapa abantu pa kuti fye afikilishe ukusesema. Alefwaya ukusansamusha abantu. Muli fyonse ifyo alecita, alekonka amashiwi alandile ayo twibukisha lyonse aya kuti: “Ifyo mufwaya abantu bamucitile, e fyo na imwe mulebacitila.”—Luka 6:31.

□ Bushe ifyo mucita filenga abantu bamona ukuti mwaliba ne cikuuku?

Yesu aleishiba bwino ifintu kabili aleiluka. Nangu ca kuti Yesu tabalile alufyanyapo, tale-enekela bambi ukukanalufyanya kabili taleimona uwacindamisha ukubacila; nelyo ukucita icintu ukwabula ukutontonkanya bwino pa cilengele ifintu ukuba ifyo fili. Inshita imo, umwanakashi “uwaishibikwe mu musumba ukuti mubembu” alangile icitetekelo akwete no kutasha pa kusamba amakasa ya kwa Yesu ku filamba fyakwe. Yesu alimulekele ukucita ifyo alefwaya, kabili umwine wa ng’anda uwalesuusha uyu mwanakashi alipapile sana. Apo Yesu alishibe icali mu mutima wa uyu mwanakashi, tamusuushishe pa membu alecita. Lelo amwebele ati: “Icitetekelo cobe nacikupususha; kabiye umutende.” Pa mulandu ne fyo Yesu acitile, ulya mwanakashi afwile alilekele imibele yakwe iyabipa.—Luka 7:37-50.

□ Bushe bamwishiba ukuti mwalitemwa ukutasha abantu ukucila ukubasuusha?

Alicindike abantu kabili tali na kapaatulula. Yesu alitemenwe sana umusambi wakwe Yohane, no mulandu nalimo wa kuti balipaleneko imibele nangu nalimo ni co ali ni lupwa lwakwe.a Lelo tabikile fye amano kuli Yohane, nelyo ukumutemwisha ukucila abasambi bakwe bambi. (Yohane 13:23) Na kuba, ilyo Yohane na munyina Yakobo baipwishe Yesu pa kukwata ififulo mu Bufumu bwa kwa Lesa, Yesu abaswike ati: “Ukwikala ku kulyo kwandi nelyo ku kuso kwandi te ine mpeela.”—Marko 10:35-40.

Yesu lyonse alecindika abantu. Tali na kapaatulula ka bantu nge fyo bambi mu nshiku shakwe bali. Icilanga cimo ni ci ica kuti kale, abantu balisuulile sana abanakashi. Lelo Yesu ena alibacindike. Yesu aisokolwele apabuuta umuku wa kubalilapo ukuti ni Mesia ku mwanakashi, na o umwina Samaria uushali muYuda, kabili abaYuda balipatile sana abena Samaria kabili tabalebaposha na kubaposha. (Yohane 4:7-26) Kabili apeele abanakashi ishuko lya kuba inte sha kubalilapo ukumumona ilyo fye abuushiwe.—Mateo 28:9, 10.

□ Bushe tamucita musobolola nga muli na bantu abafuma ku fyalo fimbi, abapusana inkanda, ululimi, nelyo pantu baume nelyo banakashi?

Aleyafwa balupwa lwakwe. Cimoneka kwati Yosefe, wishi umuleshi uwa kwa Yesu afwile ninshi Yesu acili umwaice. Yesu afwile alesunga banyina na baice bakwe abaume na banakashi pa kulabomba umulimo wa kupala imbao. (Marko 6:3) Ilyo kwashele inshita iinono ukuti afwe, Yesu aebele umusambi wakwe Yohane ukulasakamana banyina.—Yohane 19:26, 27.

□ Bushe kuti mwapashanya Yesu pa kulasakamana balupwa lwenu nge fyo acitile?

Yesu ali ni cibusa wa cishinka. Bucibusa bwa kwa Yesu bwali-ibelele. Cinshi twalandile fyo? Pantu Yesu talepata ifibusa fyakwe nangu balufyanye, nelyo bacite ifilubo fimo fine imiku ne miku. Te lyonse abasambi bakwe balecita ifyo alefwaya. Lelo alelanga ukuti bali banankwe, pantu aposele amano ku fintu ifisuma ifyo balecita ukucila ukulabamona fye kwati babi. (Marko 9:33-35; Luka 22:24-27) Yesu talepatikisha abasambi bakwe ukusumina ifyo alefwaya ukuti basumine, lelo alebepusha pa kuti abene bailandila.—Mateo 16:13-15.

Icikalamba ca kuti Yesu alitemenwe ifibusa fyakwe. (Yohane 13:1) Bushe abatemenwe shani? Atile: “Takuli uwaba no kutemwa ukwacila pali uku, ukwa kuti umuntu atuulile abanankwe umweo wakwe.” (Yohane 15:13) Bushe kuti kwaba uwingapeela abanankwe icacindama ukucila pa mweo wakwe?

□ Bushe mulatwalilila ukuba icibusa nangu ca kuti bambi bamukalifya nelyo ukumubala?

Ali mwaume washipa. Yesu ali muntu washipa, tali nga filya abalenga ifikope bamulenga. Mu mabuuku yane ayalanda pa bumi bwa kwa Yesu, batweba ukuti ali mwaume washipa nga nshi. Imiku ibili, Yesu alitamfishe bashimakwebo ne fipe bakwete mwi tempele. (Marko 11:15-17; Yohane 2:14-17) Ilyo ibumba lyaile mu kwikata “Yesu umwina Nasarete,” alishipile, aiminine na pa ntanshi pa kuti bamwishibe kabili pa kuti apokolole abasambi bakwe, kabili aebele na baile mu kumwikata ati: “Nine. E ico nga nine mulefwaya, lekeni aba baleya.” (Yohane 18:4-9) E mulandu wine ilyo Ponti Pilato amwene ifyo Yesu ashipile ilyo bamwikete na lintu balemucusha, alandiile ukuti: “Moneni! Umwaume!”—Yohane 19:4, 5.

□ Bushe mulashipa no kucita bwangu ifyo mufwile ukucita nga ca kuti namwishiba ifyo mulingile ukucita?

Iyi mibele twalandapo e lyo na imbi iikalamba, e yalenga Yesu ukuba uwalinga sana ukupashanya. Nga twapashanya imibele yakwe, tukaba abantu abasuma kabili tukaba ne nsansa. E mulandu wine umutumwa Petro akoseleseshe Abena Kristu ukulapashanya Yesu. Bushe mulesha sana ukupashanya Yesu?

Te Cilangililo fye Atushiliile

Yesu tatushiilile fye icilangililo ca kuti tulemukonka, kwaliba na cimbi. Atile: “Nine nshila ne cine no mweo. Takuli uwisa kuli Tata kano aishila muli ine.” (Yohane 14:6) Yesu aleshimikila abantu icine ca kwa Lesa icingalenga abantu bapalama kuli Lesa, kabili alipekenye ne nshila ya kulengelamo abantu ba citetekelo ukukwata ubumi.—Yohane 3:16.

Pa co aishile pa calo, Yesu atile: “Umwana wa muntu taishile ukuti balemubombela, lelo aishile mu kubombela abantu no kupeela umweo wakwe icilubula pa kuti alubule abengi.” (Mateo 20:28) Filya Yesu apeele ubumi bwakwe nge lambo, apekanishishe abantu ukwikala ubumi bwa muyayaya. Cinshi tulingile ukucita pa lwesu pa kuti tukakwate ubu bumi? Yesu alondolwele ukuti: “Nomba pa kuti babe no mweo wa muyayaya, kano baishiba imwe mwe Lesa wa cine mweka, na Yesu Kristu uo mwatumine.”—Yohane 17:3.

Ukwishiba Yesu, ukupashanya ifyo ali no kukwata icitetekelo mu mfwa yakwe iyaba nge lambo, e kufwaikwa pa kuti tukakwate ubumi bwa muyayaya. Tulemukoselesha ukuti mulesambilila Baibolo, umwaba ifi fyonse, kabili mule-esha na maka ukulacita ifyo ilanda nga filya fiine na Yesu alecita.b

Ifyo Yesu ali fitusambilisha ifyo na ifwe tufwile ukuba. Imfwa yakwe iyali nge lambo kuti yatulubula ku lubembu ne mfwa lwaleta. (Abena Roma 6:23) Ifyo cingabipa nga ca kuti ifyo Yesu Kristu ali tafiletusambilisha nangu cimo! Mwilaleka ifintu fya mu calo na masakamika ukumupusula ishuko lya kulatontonkanya no kulapashanya umuntu wacindamisha Yesu Kristu.

[Amafutunoti]

[Akabokoshi ne Fikope pe bula 7]

◼ Yesu tali na kapatulula kabili alicindike abantu bonse

◼ Ali ni cibusa musuma ukufika na ku mpela

◼ Ali uwashipa

Bushe Mulesha na maka ukupashanya ifyo Yesu ali?

[Ifikope pe bula 5]

Yesu alesangwa na ku menga . . .

tali uwaifinya . . .

ali ne cikuuku