Baacitile Ukufwaya kwa kwa Yehova

Ukumfwila Amashiwi ya Kushalikapo aya kwa Yesu

PA CUNGULO bushiku ca Nisani 14, 33 C.E., Yesu Kristu na batumwa bakwe aba busumino 11 bakuweme pe tebulo mu muputule wa pa muulu mu Yerusalemu. Pa kwishibo kuti imfwa yakwe yali naisungamina, abebele ukuti: “Ncili na imwe inshita inono.” (Yohane 13:33) Na kuba, Yuda Iskariote aali kale kale mu nshila ku kuyaumana akapi na babifi abalefwaya ukuti Yesu epaiwe.

Tapali nangu umo muli ulya muputule wa pa muulu uwaibukile ukucila pali Yesu fintu imibele yali iye pamfya. Alishibe bwino bwino ifyo aali mupepi no kucula. Yesu na kabili alishibe ukuti abatumwa bakwe bali no kumubutuka pali bulya bwine bushiku. (Mateo 26:31; Sekaria 13:7) Apantu ili lyali lishuko lya kulekelesha ilyo Yesu aali no kulanda na batumwa bakwe ilyo talafwa, kuti twashininkishe fyo amashiwi yakwe aya kushalikapo yatontele pa milandu iyali iyacindama nga nshi.

“Citeni Ici ku Kunjibukisha”

Mu kuba na batumwa bakwe aba busumino, Yesu aimike ukusefya kupya ukwali no kupyana Ica kucilila ca ciYuda. Umutumwa Paulo aitile kwene “umulalilo wa kwa Shikulu.” (1 Abena Korinti 11:20) Ukubuula umukate ushatutumuka, Yesu alipepele. Lyene amokawile umukate no kupeela abatumwa bakwe. Atile, “buuleni, mulye; uyu mubili wandi.” Lyene abuulile ulukombo lwa mwangashi, alipepele ipepo lya kutootela no kupeela abatumwa, ati: “Nwenimo bonse; pantu ulu mulopa wandi uwa cipingo cipya, uulesuumina abengi ku kulekelelwe membu.”—Mateo 26:26-28.

Cinshi cali ubupilibulo bwa ici calecitika? Nga fintu Yesu alangilile, umukate waiminineko umubili wakwe uwabulo lubembu. (AbaHebere 7:26; 1 Petro 2:22, 24) Umwangashi waiminineko umulopa wa kwa Yesu uwasuumiwa, uwali no kulenga ukuti kubeko ukulekelelwa kwa membu. Umulopa wakwe uwe lambo na kabili wali no kwikasha icipingo cipya pa kati ka kwa Yehova Lesa na bantunse 144,000, abo mu kupelako bali no kuteka na Yesu mu muulu. (AbaHebere 9:14; 12:22-24; Ukusokolola 14:1) Ukupitila mu kulaalikako abasambi bakwe ukulyako kuli ici ca kulya, Yesu alelangililo kuti baali no kuba na wene mu Bufumu bwa mu muulu.

Ukukuma kuli ici ca kulya icali no kulaibukishiwa, Yesu akambishe ukuti: “Citeni ici ku kunjibukisha.” (Luka 22:19) Ee, Umulalilo wa kwa Shikulu wali no kulacitika pa mwaka, kwati fye fintu Ica kucilila calecitwa pa mwaka. Ilintu Ica kucilila caleibukisha ukulubulwa kwa bena Israele ukufuma mu busha bwa mu Egupti, Umulalilo wa kwa Shikulu wali no kutontomesha pa kulubula kwakulilako—ukwa mutundu wa muntu uwingalubulwa ukufuma mu busha ku lubembu ne mfwa. (1 Abena Korinti 5:7; Abena Efese 1:7) Ukulundapo, abalyako umukate wa cimpashanya no mwangashi baali no kulacinkulwako ulwa mashuko yabo aya ku ntanshi aya kube shamfumu kabili bashimapepo mu Bufumu bwa kwa Lesa ubwa mu muulu.—Ukusokolola 20:6.

Imfwa ya kwa Yesu Kristu mu cine cine yali e ca kucitika cakatamisha mu fyacitika fyonse apo umuntunse abela pe sonde. Abo abatasha cintu Yesu acitile balomfwila ikambisho lyakwe ukukuma ku Mulalilo wa kwa Shikulu ilya kuti: “Citeni ici ku kunjibukisha.” Inte sha kwa Yehova bebukisha imfwa ya kwa Yesu cila mwaka pa bushiku ubulingana na Nisani 14. Mu 1996 ubu bushiku bukaba ni pa April 2, pa numa ya kuwa kwa kasuba. Ulelaalikwa mu kukaba ukusangwa ku Ŋanda ya Bufumu iyaba ku ncende wikalila.

‘Namupeela Ifunde Lipya’

Ukulunda ku kwimika Umulalilo wa kwa Shikulu, Yesu alikwete ukufunda kwa kushalikapo ukwa kupeela abatumwa bakwe. Te mulandu no kukanshiwa kwabo ukushaiwamina, kwali ifingi ifyo aba baume baali no kusambilila. Tabakutulwike mu kukumanina imifwaile Lesa akwatile Yesu, iyo abakwatile, nelyo iyo akwatile inshita ya ku ntanshi. Lelo Yesu taeseshe ukukolobonda muli iyi milandu yonse pali iyi nshita. (Yohane 14:26; 16:12, 13) Mu cifulo ca ico, alandile pa cintu cimo icacilapo ukucindama. Atile, “Ifunde lipya ndemupeela, lya kuti muletemwana: ifyo namutemenwe, na imwe mutemwane. Muli ici e mo bonse bakeshibilo kuti muli basambi bandi, nga mwaba no kutemwana.”—Yohane 13:34, 35.

Ni mu nshila nshi ili lyabelele “ifunde lipya”? Cisuma, Ifunde lya kwa Mose lyakambishe ukuti: “Uletemwo mubiyo nga we mwine.” (Ubwina Lebi 19:18) Nangu cibe fyo, Yesu alombele abakonshi bakwe ukulangisha ukutemwa kwa kuipeela bulilambo uko kwali no kufika fye na ku kupeela ubumi bwa umo pa mulandu wa Bena Kristu banankwe. Kwena, ‘ifunde lya kutemwa’ lyali no kubomba na mu mibele iishakakala sana. Mu mibele yonse umukonshi wa kwa Yesu Kristu ali no kuitendekelako ukulangisha ukutemwa ukupitila mu kwaafwa bambi lwa ku mupashi na mu nshila shimbi.—Abena Galatia 6:10.

Pali ubu bushiku bwa kulekelesha ubwa bumi bwa kwa Yesu pe sonde, ukutemwa kwakuntile Yesu ukupepelako abasambi bakwe kuli Yehova Lesa. Cimo ico apepeele ca kuti: “Bali pano isonde; na ine ndeisa kuli imwe. Mwe Tata wa mushilo, babakileni mwi shina lyenu ilyo mwampeela, ukuti babe bamo ifyo ifwe twaba bamo.” (Yohane 17:11) Cili icamonekesha ukuti mu kupaapaata kwakwe kuli Wishi, Yesu apepele ukuti pabe ukwikatana kwa kutemwa pa kati ka bakonshi bakwe. (Yohane 17:20-23) Balekabila ‘ukutemwana nge fyo Yesu abatemenwe.’—Yohane 15:12.

Abatumwa ba busumino balyumfwilile amashiwi ya kwa Yesu aya kushalikapo. Na ifwe bene tulingile ukunakila ku makambisho yakwe. Muli shino “nshiku sha kulekelesha” ishayafya, ukutemwa no kwikatana pa kati ka bakapepa ba cine kwaliba ukwacindama nga nshi ukucila pali kale lyonse. (2 Timote 3:1) Mu cituntulu, Abena Kristu ba cine balomfwila amakambisho ya kwa Yesu kabili balalangisha ukutemwa kwa bumunyina. Ici cisanshamo ukumfwila ikambisho lya kusefya Umulalilo wa kwa Shikulu.