Yohane 14:6—“Ni ‵Ne Nshila ne Cine no Mweo”

“Yesu amwaswike ati: “Nine nshila ne cine no mweo. Takuli uwisa kuli Tata kano aishila muli ine.”—Yohane 14:6, Amalembo ya Calo Cipya.

“Yesu atile kuli wene, Ni ‵ne nshila ne cine no mweo: takuli uwisa kuli Tata, nako aishila muli ine.”—Yohane 14:6, Baibele wa Mushilo.

Umwalola Amashiwi Yaba Pali Yohane 14:6

Umuntu uufwaya ukupepa Wishi, Yehovaa Lesa, alingile ukwishiba umulimo uwacindama uo Yesu abomba.

“Nine nshila.” Yesu e “nshila” tulingile ukubomfya pa kuti Lesa apokelele ukupepa kwesu. Ku ca kumwenako, bonse abapepa kuli Lesa balingile ukupitila mwi shina lya kwa Yesu. (Yohane 16:23, 24) Imfwa ya kwa Yesu yalilenga abantu bakwata ishuko lya kubwelela kuli Lesa nelyo ukutemwikwa kuli Lesa. (Abena Roma 5:8-11) Na kabili Yesu alilanga abantu abafwaya ukucita ifyo Lesa atemwa ifyo balingile ukulacita.—Yohane 13:15.

“Nine . . . Cine.” Yesu lyonse alelanda icine ukufuma kuli Lesa kabili alecita ifyo alelanda. (1 Petro 2:22) Umuntu nga alekutika kuli Yesu kuti asambilila icine pali Lesa. (Yohane 8:31, 32) Na kabili Yesu ali e “cine” pantu alifikilishe amasesemo ya mu Baibolo. Kanshi alifikilishe ifyo Lesa alaile.—Yohane 1:17; 2 Abena Korinti 1:19, 20; Abena Kolose 2:16, 17.

“Nine . . . Mweo.” Yesu alipeele ubumi bwakwe pa kuti bonse abamutetekela bakabe no mweo wa muyayaya. (Yohane 3:16, 36) Yesu na kabili ni “mweo” kuli bonse abafwa, pantu akababusha.—Yohane 5:28, 29; 11:25.

“Takuli uwisa kuli Tata kano aishila muli ine.” Bonse abafwaya ukuba ifibusa fya kwa Lesa balingile ukwishiba no kusumina umulimo Yesu abomba. Nga balebomfya ishina lyakwe ilyo balepepa kuli Lesa, balanga ukuti nabasumina icifulo Yesu Kristu akwata. (Yohane 15:16) Na kabili baleshiba ukuti ipusukilo likeshila fye muli Yesu.—Imilimo 4:12; Abena Filipi 2:8-11.

Amashiwi Yambi Ayaba pa Fikomo Fimbi Muli Yohane Icipandwa 14

Mu cipandwa 13 ukufika ku cipandwa 17 mwi buuku lya kwa Yohane mwaba amashiwi Yesu alandile pa kufunda abatumwa bakwe 11 aba cishinka. Alandile aya mashiwi mu nshita ya bushiku pa bushiku alefwa. Mu cipandwa 14, Yesu alekoselesha abasambi bakwe ukumucetekela no kucetekela Wishi e lyo no kubatemwa no kulabomfwila. (Yohane 14:1, 12, 15-17, 21, 23, 24) Alilandile na pali bucibusa akwete na Wishi. (Yohane 14:10, 20, 28, 31) Nangu ca kuti ali mu kubwelela ku muulu, Yesu alikoseleshe abasambi bakwe ukuti tali na kubasha nelyo ukubalekelesha. (Yohane 14:18) Na kabili alibalaile ukuti akabatumina “kaafwa,” abebele ukuti uyu kaafwa wali “mupashi wa mushilo, uo Wishi” ali no kubatumina ‘mwi shina lyakwe.’ (Yohane 14:25-27) Ifi abebele e fyalengele Yesu apekanishishe abasambi bakwe ku mafya bali no kukwata ku ntanshi.