Ifyo Mwingacita pa Kuti Mukengile mu Calo Cipya

Mu fipande fifumineko, natusambilila ukuti Lesa akonaula cino calo cabipa kabili akafumyapo amafya yonse ayabamo. Twalishininkisha ukuti ifi fikacitika. Cinshi calenga tushininkishe? Ni co Lesa alitulaya mu Cebo cakwe Baibolo ukuti:

“Cino calo cileya.”—1 YOHANE 2:17.

Twalishininkisha ukuti kukaba abakapusuka pantu ilembo limo line lilanda no kuti:

“Uucita ukufwaya kwa kwa Lesa akekalilila umuyayaya.”

Kanshi pa kuti tukapusuke, tufwile ukulacita ukufwaya kwa kwa Lesa. Kuti twaishiba ifyo Lesa afwaya nga twamwishiba bwino.

PA KUTI TUKAPUSUKE ILYO ICALO CIKAPWA ‘KANO TWAISHIBA’ LESA

Ifikope: 1. Nasi nasakamikwa sana ica kuti asunsumene fye mu cipatala. 2. Lilya aya mu kutuusha amona uo abomba nankwe ali ne nsansa kabili alebelenga magazini. 3. Uo abomba nankwe amubelengelako ilembo kabili amupeela ka kardi apaba webusaiti ya jw.org.

Yesu atile: “Nomba pa kuti babe no mweo wa muyayaya, kano baishiba imwe mwe Lesa wa cine mweka.” (Yohane 17:3) Kanshi pa kuti tukapusuke ilyo icalo cikapwa no kwikala umuyayaya, ‘kano twaishiba’ Lesa. Ukwishiba Lesa te kwishiba fye ukuti e ko aba nelyo ukwishibako ifishinka ifinono pali ena. Tulingile ukuba ifibusa fyakwe. Nga tulefwaya bucibusa twakwata no muntu ukukosa, tulingile ukulakwatako inshita iya kuba nankwe. Ifi fine e fyo caba na kuli bucibusa bwesu na Lesa. Natulandeko pali fimo ifyo tusambilila muli Baibolo ifitwafwa ukukosha bucibusa bwesu na Lesa.

Icine Ico Tusambilila Muli Baibolo

Tulasambilila ukuti Lesa alefwaya tuleikala mu Paradaise.

Ilyo abumbile abantu ba kubalilapo, e kutila Adamu na Efa, alibabikile mwi bala lya Edeni, incende iyalemoneka bwino nga nshi. Bali abapwililika, kabili Lesa alibapeele fyonse ifyo balekabila pa kuti baleba ne nsansa. Bali no kwikala umuyayaya. Abatwalilila ukuba ifibusa fya kwa Lesa, nga tabafwile. Lelo basalilepo ukukanaumfwila ifunde ilya-anguka ilyo Lesa abapeele.

Tulasambilila icalenga tulecula.

Ilyo umuntu wa kubalilapo Adamu akeene ukumfwila Lesa, alipanishe ishuko lya kwikala umuyayaya kabili alilengele na fwe bantu bonse twilaikala umuyayaya. Baibolo itila: “Ulubembu lwaingilile mu muntu umo pano calo ne mfwa yaingilile mu lubembu, e fyo ne mfwa yasalanganine ku bantu bonse.” (Abena Roma 5:12) Filya fine umwana engambula ubulwele ku bafyashi bakwe, e fyo na bantu bonse ba-ambula ukukanapwililika kuli Adamu. Ici e calenga tulekota no kufwa.

Tulasambilila pa fyo Lesa acita pa kuti tukalubuke ku lubembu ne mfwa.

Baibolo itila: “Lesa atemenwe nga nshi aba pano calo ica kuti apeele Umwana wakwe uwafyalwa eka, ukuti onse uumutetekela ekonaika lelo akabe no mweo wa muyayaya.” (Yohane 3:16) Lesa atumine Umwana wakwe Yesu pano calo ukwisatufwila. Ilyo ba Prabhakar, bashikulubantu abena India abali ne myaka 86 balelanda pali ifi Lesa atucitila, batile: “Filanga ukuti Yehovaa alintemwa sana. Ifi Lesa antemwa, fyalilenga nakwata isubilo lya kwikala umuyayaya.”

Tulasambilila ifyo twingalanga ukuti tulatasha pa fyo Lesa atucitila.

Baibolo itila kuti twalanga ukuti tulatasha pa fyo Lesa atucitila nga ‘tulekonka amafunde yakwe.’ (1 Yohane 2:3) Yehova Lesa alatulanga ne fyo twingacita pa kuti tuleba ne nsansa na pali ino nshita. (Esaya 48:17, 18) Lesa tafwaya tulecula. E ico alitulaya ukuti nga tulemumfwila, tukalaba ne nsansa pali ino nshita kabili tukesakwata umweo wa muyayaya.

MULEBELENGA ICEBO CA KWA LESA BAIBOLO CILA BUSHIKU

Nasi alolesha ku muulu pa numa ya kubelenga Baibolo pa nshita ya kutuusha. — Kuti mwaba pa bantu abakapusuka ilyo cino calo cikonaulwa nga ca kuti mulecita ukufwaya kwa kwa Lesa no kulapepa kuli ena ukuti alemwafwa

Tulalya ifya kulya cila bushiku pa kuti twifwa. Na lyo line Yesu atile: “Te ku fya kulya fyeka umuntu ekalila no mweo, lelo na ku mashiwi yonse ayafuma mu kanwa ka kwa Yehova.”—Mateo 4:4.

Pali ino nshita, amashiwi ya kwa Yehova yaba muli Baibolo. Nga mulesambilila Baibolo, mukasambilila pa fyo Lesa acitile ku numa, ifyo alecita pali ino nshita, e lyo ne fyo akacita ku ntanshi.

MULEPEPA KULI LESA PA KUTI ALEMWAFWA

Nomba kuti mwacita shani nga ca kuti mulafwaya ukulakonka amafunde ya kwa Lesa nomba cilamukosela ukuleka ukucita ifyo Lesa atweba ukuti fyalibipa? Ukwishiba Lesa e kwingamwafwa ukuleka ukucita ifyabipa.

Natulande pa banakashi abo twalaita ukuti ba Sakura, abalecita sana ubulalelale. Ilyo batendeke ukusambilila Baibolo, balisambilile pe funde lya kwa Lesa ilitila, “fulumuka ubulalelale.” (1 Abena Korinti 6:18) Ba Sakura balipepele kuli Lesa kabili Lesa alibafwile ukuleka ukucita ubulalelale. Na lyo line, balatunkwa ukucita ubulalelale na kabili. Ba Sakura batile: “Nga natontonkanya pa kucita ubulalelale, ndapepa kuli Yehova ukuti angafwe pantu nalishiba ukuti te kuti ncimfye ili tunko ku maka yandi. Ipepo lyalilenga bucibusa bwandi na Yehova ukukosa sana.” Nga filya cali kuli ba Sakura, abantu abengi nga nshi balisambilila pali Lesa. Na kabili Lesa alabafwa ukuleka ukucita ifyabipa no kutendeka ukucita ifyo afwaya.—Abena Filipi 4:13.

Nga mwaishiba bwino Lesa, ‘mukeshibikwa’ kuli ena ukuti muli fibusa fyakwe. (Abena Galatia 4:9; Amalumbo 25:14) Ne ci cikalenga mukapusuke no kwingila mu calo cipya ica kwa Lesa. Nomba finshi fikaba mu calo cipya? Icipande cikonkelepo cala-asuka ici cipusho.

a Baibolo itila Yehova e shina lya kwa Lesa.