Ni Bani Bafyalwa Libili?

BUSHE abantu basuma bonse balaya ku mulu? Abengi e fintu batontonkanya, lelo Yesu Kristu tasumine. Ukulanda kuli kateka wa ciYuda Nikodemo, uwaishile kuli wene mu bumfisolo ubushiku, Yesu asosele ukuti: “Takuli muntu uwanina aya mu muulu.”—Yohane 3:13.

Nalyo line, Yesu alangilile kuli Nikodemo ukuti inshita yali no kwisa ilintu abantu bamo baali no kukwata ishuko lya mu nshita ilya kwingila mu Bufumu bwa mu mulu. Ku lwa aba Yesu atile: “Ngo muntu tafyelwe ku menshi na ku Mupashi, te kuti engile mu bufumu bwa kwa Lesa. Icafyalwa ku mubili mubili; ne cafyalwa ku Mupashi mupashi. Wipapa ico ntile kuli iwe, Uli no kufyalwa [libili, NW].” Lelo Nikodemo alisungwike ifyo umo engafyalwa libili.—Yohane 3:1-9.

Nakalimo na iwe wine ulasunguka cintu Yesu apilibwile. Bushe amashiwi yakwe kuti yabomba ku fya kukumanya fya kwalulwa kwa mu kupumikisha ifitungwa ku bengi abo abayumfwa ukuti balisulamo umupashi wa mushilo uwa kwa Lesa?

Inkuntu no Muntontonkanya

Bamo basoso kuti mu kupima nampo ngo muntu alifyalwa libili, icakatama kumfwa amaka ya mupashi. Lelo, umutima wesu no muntontonkanya kuti fyatulufya, ukucilisha nga ca kuti fyasongwa ne nkuntu shakosa.—Yeremia 17:9.

William Sargant, kasapika mu kusonga kwa nkuntu pa muntontonkanya, alosha ku kukabila kwa “kuba abapempwila ku fisumino finonkwa mu mibele ya kucincimuka kwa mu nkuntu lintu babongobongo besu pambi bengalatufutuka.” Ukulingana na Sargant, ica kumwenako cimo caba kusonga kwa kushimikila kwa kubukululo buseko ukwa bakabila ne fintiinya fya kukanda kwa mulilo wa helo. Ni ani ashingafwaya ukufyalwa libili pa kuya ku mulu nga ca kuti umwa kusengulwila fye mweka kucula ukulunguluka kwa ciyayaya? Sargant asosa ukuti pe samba lya kukanshika kwa mu nkuntu ukwa musango yo, “ukupelulula balakutamisha pa mbali, kompyuta ya lyonse iya bongobongo ilaleko kubomba pa kashita kanono, kabili imfundo shipya ne fisumino filapokelelwa ukwabula ukulengulula.”—The Mind Possessed.

E co, lyene, ni shani fintu umo engeshiba nga ca kuti icisumino pa mulandu wa kufyalwa libili ‘capokelelwe ukwabula ukulengulula’? Inshila ya mano ya cine ili no kutungululwa na conse ico umupashi wa mushilo wa kwa Lesa walengele bakalemba ba Baibolo ukulemba. Abena Kristu balikoseleshiwa ukupepa Lesa ‘mu kuba na maka yabo aya kupelulula’ no kukabila ukushininkisha ukuti cintu basuminamo ca cine.—Abena Roma 12:1, 2, NW; 1 Abena Tesalonika 5:21.

Ukufyalwa libili kwisula limo ilya mashuko yakulisha ayabala ayatambululwa ku bantunse. Kwasuntinkanishiwa no kulunduluka kukalamba ukwa cine cine mu mibombele ya mifwaile ya kwa Lesa. Ilintu ici conse ca cine, ifipusho ifyapala ifi filemako: Ni bani bafyalwa libili? Ni shani fintu ici cicitika? Filolelo nshi fyaimikwa pa ntanshi ya bantu ba musango yo? Kabili bushe bene beka fye e bakapusuka?

[Icikope pe bula 3]

Nikodemo alisungwike ifyo umo engafyalwa libili