Bushe ‘Mulepanta pa fya Kusoswelako’?

MU NSHITA sha mu Baibolo, ica kusoswelako—inkonto iitali, ilingi line iyalekwata icela catwa pa mpela—calebomfiwa ku kutungulula inama shisenda ifipe fyafina. Nga ca kuti inama yakaaninina fye ndai ukumfwila ukusoosola no kuikusulula ku ca kusoswelako, cinshi calecitika? Ukucila ukusanga icisansamushi, yali no kuicena.

Yesu Kristu wabushiwa alandile pa fya kusoswelako ilyo amoneke ku muntu we shina lya Sauli, uwaleya ku kwikata abasambi bamo bamo aba kwa Yesu. Pa kati ka lubuuto lwabengeshima sana, Sauli aumfwile Yesu aletila: “Sauli, Sauli, mulandu nshi ulempakashila? Cakukosela ukulapanta pa fya kusoswelako.” Pa kucusha Abena Kristu, Sauli alelwishanya na Lesa, ukucita icintu cali no kumuletelela.—Imilimo 26:14.

Bushe napamo na ifwe mu kukanaishiba ‘tulepanta pa fya kusoswelako’? Baibolo yapalanya “ifyebo fya ba mano” ku fya kusoswelako ifitucincisha ukuya ku ntanshi ku ntunga yalungama. (Lukala Milandu 12:11) Ukufunda kwapuutwamo ukwaba mu Cebo ca kwa Lesa kuti kwatucincisha no kututungulula bwino—nga twasuminisha kwene. (2 Timote 3:16) Nga tulekaana ifyo Icebo ca kwa Lesa ciletucincisha kuti twailetelela.

Sauli alyumfwilile amashiwi ya kwa Yesu, no kwaluka, kabili aishileba Paulo umutumwa wa Bwina Kristu uwatemwikwa. Na ifwe nga tuleumfwila ukufunda kwa kwa Lesa tukapaalwa kuli pe na pe.—Amapinda 3:1-6.

[Abatusuminishe Ukubomfya Icikope pe bula 32]

L. Chapons/Illustrirte Familien-Bibel nach der deutschen Uebersetzung Dr. Martin Luthers