Icipandwa 4
Uo Bakasesema Bonse Bashimike
1. Cinshi ifyebo filanda pa lwa kubapo kwa kwa Yesu ilyo ashilabo muntunse filanga pa lwa bucibusa akwete na Yehova?
“WISHI atemwo Mwana, kabili amulanga fyonse ifyo umwine acita.” (Yohane 5:20) Awe mwandini uyu Mwana aipakishe bucibusa bwawamisha na Wishi, Yehova! Ukutemwana muli ubu bucibusa kwatendeke pa nshita abumbilwe, ninshi kwali kucili imintapendwa ya myaka ilyo ashilafyalwa mu buntunse. Ali Mwana wa kwa Lesa uwafyalwa eka, uo Yehova umwine abumbile mu kulungatika fye. Ifyashala fyonse mu muulu na pe sonde fyabumbilwe ukupitila muli ulya Mwana watemwikwa ibeli. (Abena Kolose 1:15, 16) Kabili e wali Cebo ca kwa Lesa, nelyo Uwa kumulandilako, Umo ukufwaya kwa kwa Lesa kwalengelwe ukwishibikwa kuli bambi. Uyu wine, Umwana uo Lesa atemwishishe, e waishileba umuntu Yesu Kristu.—Amapinda 8:22-30; Yohane 1:14, 18; 12:49, 50.
2. Bushe kusesema kunga ukwa mu Baibolo ukulanda pali Yesu?
2 Ilyo Umwana wa kwa Lesa ibeli ashilaimitwa mu buntunse mu cipesha amano, ukusesema ukwingi ukwapuutwamo kwalilembelwe pa lwa wene. Umutumwa Petro ashimikile ubunte kuli Korneli ukuti: “E o bakasesema bonse bashimika.” (Imilimo 10:43) Umulimo wa kwa Yesu walilembelwe muli Baibolo ica kuti malaika aebele umutumwa Yohane ukuti: “Ukushimika ubunte bwa kwa Yesu e kupuutamo ukusesema.” (Ukusokolola 19:10, NW) Uko kusesema kwalangile apabuuta ukuti ni Mesia. Kwalandile pa milimo yalekanalekana iyo aali no kubomba mu kufishapo ubufwayo bwa kwa Lesa bonse. Tufwile ukufwaisha ukwishiba ifi fyonse pali lelo.
Ico Ukusesema Konse Kwasokolwele
3. (a) Mu kusesema kwaba pa Ukutendeka 3:15, nani uo insoka, “umwanakashi,” no ‘bufyashi bwa nsoka’ fimininako? (b) Mulandu nshi uku ‘kulasa insoka ku mutwe’ kwingabela cintu ico ababomfi ba kwa Yehova bengafwaisha ukwishiba?
3 Ukusesema kwa kubalilapo pali uku kwalandilwe pa numa ya kupondoka ukwacitike mu Edene. Yehova asosele ku nsoka ati: “Ndebika no bulwani pa kati ka iwe no mwanakashi, kabili pa kati ka bufyashi bobe no bufyashi bwakwe: bwene bwakulakulasa ku mutwe, nobe wakulabulasa ku citende.” (Ukutendeka 3:15) Kulya kusesema ukwabula no kutwishika kwalungatikwe kuli Satana, uo insoka imininako. “Umwanakashi” kuteyanya kwa kwa Yehova umwine ukwa ku muulu ukwa bucishinka, ukwaba ngo mukashi wakwe uwa bucishinka. ‘Ubufyashi bwa nsoka’ busanshamo bamalaika bonse na bantunse abalanga imibele ya kwa Satana, abalwisha Yehova na bantu Bakwe. ‘Ukulasa insoka ku mutwe,’ bonaushi bwa kupelako ubwa kwa Satana cipondoka, uwaseebenye Yehova no kuletelela abantu ubulanda bwine bwine. Lelo nani wapulilemo muli ubu “bufyashi” uwali no kulasa ubufyashi bwa nsoka? Pa nshita ntali, ico cali ni “nkama.”—Abena Roma 16:20, 25, 26.
4. Bushe umutande Yesu afyalilwemo wayafwile shani ukumwishiba ukuti e Bufyashi bwalaiwe?
4 Ilyo papitile imyaka nalimo 2,000 ukutula apo umuntu abeleleko, Yehova apekenye ubulondoloshi na bumbi. Asokolwele ukuti ubu Bufyashi bwali no kumoneka mu mutande wa lupwa lwa kwa Abrahamu. (Ukutendeka 22:15-18) Lelo, umutande umwali no kufuma ubu Bufyashi tawali na kushintilila pa ntuntuko sha cifyalilwa, lelo pa o Lesa ali no kusala. Nangu Abrahamu atemenwe umwana wakwe umwaume Ishmaele, uo afyele muli Hagari, Yehova atile: “Icipingo candi nkacipampamika kuli Isaki, uo Sara akakufyalila.” (Ukutendeka 17:18-21) Pa numa cilya cipingo calandilwe ku mwana mwaume wa kwa Isaki, Yakobo, umwatuntwike imikowa 12 iya kwa Israele, te kuli Esau umwana mwaume wakwe ibeli. (Ukutendeka 28:10-14) Mu kupita kwa nshita, caishilesokololwa ukuti ubu Bufyashi bwali no kwishila mu mukowa wa kwa Yuda, mu mutande wa kwa Davidi.—Ukutendeka 49:10; 1 Imilandu 17:3, 4, 11-14.
5. Ilyo Yesu atendeke ubutumikishi bwakwe pe sonde, cinshi calangile ukuti ali ni Mesia?
5 Fyebo nshi fimbi fyapeelwe ifyayafwile mu kwishiba uwali no kuba ubu Bufyashi? Ilyo kwali kucili imyaka ukucila pali 700, Baibolo yalilumbwile Betlehemu ukuti e cifulo umo uwali no kuba ubu Bufyashi bwalaiwe ali no kufyalilwa mu buntunse. Yasokolwele no kuti uyu uwali ubu Bufyashi e ko aali ku kale ku “nshiku sha muyayaya,” ukutula apo abumbiilwe mu muulu. (Mika 5:2) Inshita ya kulungatika ilyo ali no kumoneka pe sonde nga Mesia na yo yalisobelwe, muli kasesema Daniele. (Daniele 9:24-26) Kabili ilyo Yesu asubilwe no mupashi wa mushilo, no kusanguka Uwasubwa wa kwa Yehova, ishiwi lya kwa Lesa umwine ukufuma mu muulu lyamulondolwele bwino ukuti Mwana Wakwe. (Mateo 3:16, 17) Nomba ubu Bufyashi bwalisokolwelwe! E mulandu wine, Filipi alandile ukwabulo kutwishika ati: “Natusanga untu Mose alembele mu Malango, na bakasesema na bo, ni Yesu.”—Yohane 1:45.
6. (a) Ukulingana na Luka 24:27, cinshi abakonshi ba kwa Yesu bailwike? (b) Nani wapulamo muli ubu ‘bufyashi bwa mwanakashi,’ kabili ukulasa akalasa iyi nsoka ku mutwe kwalola mwi?
6 Pa numa, abakonshi ba kwa Yesu baishileiluka ukuti kanshi kwali ukusesema ukwingi ukwalandile pali wene ukwasanshiiwe mu Malembo yapuutwamo. (Luka 24:27) E lyo caishibikwe bwino ukuti Yesu e wapulilemo muli ubu ‘bufyashi bwa mwanakashi,’ no kuti e ukalasa insoka ku mutwe, akonaula Satana ica kuti takabeko na kabili. Muli Yesu, e mo amalayo yonse ayo Lesa alaya abantu, e kutila fyonse ifyo tufulukisha, fikafishiwa.—2 Abena Korinti 1:20.
7. Ukulunda pa kwishiba Uo ukusesema kwalelandapo, cinshi cimbi cabe cacindama ukukutuluka?
7 Bushe ukwishiba ici kufwile ukutukuma shani? Baibolo itweba ulwa kwa mutungwi umwina Etiopia uwabelengele ukusesema kumo pali uku ukwalelanda pa kwisa kwa kwa Kalubula kabili Mesia. Ico afililwe ukumfwa, aipwishe Filipi kabila wa mbila nsuma ati: “Nani uo kasesema asoseele ci?” Lelo ilyo bamwaswike uyu mutungwi tatile capwa naishiba. Pa numa ya kukutikisha ku fyo Filipi amulondolwelele, uyu mwaume akutulwike ukuti ukumfwikisha no kutasha pali uku kusesema ukwafikilishiwe kwalekabila wene ukucitapo fimo. Ailwike ukuti alekabila ukubatishiwa. (Imilimo 8:32-38; Esaya 53:3-9) Bushe na ifwe e fyo twankulako?
8. (a) Bushe filya Abrahamu apene atuule Isaki ilambo caleimininako nshi? (b) Cinshi Yehova aebeele Abrahamu ukuti inko shonse shikaifwailo kupaalwa muli ubu Bufyashi, kabili ici catukuma shani pali lelo?
8 Bebeteni ne lyashi lya kucincimusha ililanda pa fyo Abrahamu apene atuule Isaki ilambo, umwana wakwe umwaume umo fye mpo untu Sara amufyalile. (Ukutendeka 22:1-18) Ico caiminineko ico Yehova aali no kucita—ukutuula Umwana wakwe uwafyalwa eka: “Lesa atemenwe aba pano isonde ukutemwa kwa kuti apeele Umwana wakwe uwafyalwa eka, ukuti onse uumutetekela eonaika, lelo abe no mweo wa muyayaya.” (Yohane 3:16) Ici citulenga ukucetekela ukuti filya fine Yehova apeele Umwana wakwe uwafyalwa eka ukuti afishepo ubufwayo Bwakwe, e fyo “ku cikuuku akatupeela ne fintu fyonse fimbi.” (Abena Roma 8:32, NW) Nga ifwe cinshi tukabila ukucita? Nga filya calembwa pa Ukutendeka 22:18, Yehova aebele Abrahamu ukuti inko shonse shikaifwailo kupaalwa muli ubu Bufyashi, “pa kuti [Abrahamu aumfwile kwi] shiwi [lya kwa Lesa].” Na ifwe bene tukabila ukumfwa kuli Yehova na ku Mwana wakwe: “Uutetekelo Mwana aba no mweo wa muyayaya; uushumfwa Mwana takamone umweo, lelo icipyu ca kwa Lesa caikala pali wene.”—Yohane 3:36.
9. Nga tulatasha pe subilo lya bumi bwa muyayaya ilyo ilambo lya kwa Yesu lyalenga ukuti libeko, cinshi tukacita?
9 Nga tulatasha pe subilo lya bumi bwa muyayaya ilyo ilambo lya kwa Yesu lyalenga ukuti libeko, kuti twafwaya ukulacite fintu ifyo Yehova aatweba ukupitila muli Yesu. Ifi fyebo filanda sana pa kutemwa Lesa na banensu. (Mateo 22:37-39) Yesu alangile ukuti ukutemwa twatemwa Yehova kukatulenga ukusambilisha bambi “ukubaka fyonse ifyo [Yesu atweba].” (Mateo 28:19, 20) Kabili tulefwaya ukulango ko kutemwa ku babomfi banensu aba kwa Yehova ukupitila mu “kulongana” na bo lyonse. (AbaHebere 10:25; Abena Galatia 6:10) E lyo kabili, ilyo tuleumfwa kuli Lesa no Mwana wakwe, tatufwile ukutontonkanya ukuti bafwaya ifwe ukucite fyapwililika. AbaHebere 4:15 basosa ukuti Yesu, Shimapepo wesu Umukalamba, kuti ‘atusakamana ku kunaka kwesu.’ Cine cine ayo mashiwi yalatusansamusha, maka maka ilyo twapepa kuli Lesa ukupitila muli Kristu ukuti atwafwe ukucimfya ukunakuka kwesu!—Mateo 6:12.
Cetekeleni Kristu
10. Mulandu nshi kushabela ipusukilo muli umbi kano muli Yesu Kristu?
10 Pa numa ya kulondolwela aba mu cilye cikalamba ica baYuda mu Yerusalemu ukuti ukusesema kwa mu Baibolo kwafishiwepo muli Yesu, umutumwa Petro alandile amashiwi ya kusondwelela na maka ati: “Ipusukilo talili muli umbi nakalya, nangu lishina limbi takuli mwi samba lya muulu ilyapeelwa mu bantu, umo tuli no kupusukila.” (Imilimo 4:12) Apo bonse abafuma mu bufyashi bwa kwa Adamu babembu, imfwa yabo tayakwata mutengo uwingabomfiwa ku kube cilubula ca muntu onse. Lelo Yesu alipwililike, kabili ubumi bwakwe bwalikwete umutengo wa kucite lambo. (Amalumbo 49:6-9; AbaHebere 2:9) Apeele icilubula kuli Lesa ico umutengo wa ciko walingene bwino no bumi bwapwililika ubo Adamu alufishe. (1 Timote 2:5, 6) Ici catupeele ishuko lya kwisanonka ubumi bwa muyayaya mu calo cipya ica kwa Lesa.
11. Londololeni ifyo ilambo lya kwa Yesu lingatunonsha apakalamba.
11 Icilubula catupeele ne shuko lya kupokelela amapaalo yambi, na pali nomba line. Ku ca kumwenako, nangu ca kuti tuli babembu, ilambo lya kwa Yesu litulenga ukuba na kampingu wasanguluka pa mulandu wa kulekelelwe membu. Uku kulekelelwa kwalicilapo nga nshi pa kulekelelwa konse uko abena Israele balelekelelwa ukupitila mu malambo ya nama ayalekabilwa ukulingana ne Funde lya kwa Mose. (Imilimo 13:38, 39; AbaHebere 9:13, 14; 10:22) Lelo, pa kuti tulekelelwe muli uyo musango tukabila ukusumina mu bufumacumi ukuti cine cine tulakabila ilambo lya kwa Kristu: “Nga tutila, Tatuli na lubembu, tulaibepa, ne cine muli ifwe tamuli. Nga tuyebelele membu shesu, wene wa cishinka kabili mulungami ukuti atulekelele imembu, no kutusangulula ku kuulungana konse.”—1 Yohane 1:8, 9.
12. Mulandu nshi ukubatishiwa mu menshi kwacindamina ku kwafwa umo ukuba na kampingu musuma kuli Lesa?
12 Bushe ababembu kuti bakwata shani icitetekelo muli Kristu na mwi lambo lyakwe? Ilyo abantu ba mu mwanda wa myaka uwa kubalilapo batetekele, balekele icitetekelo cabo cimoneke ku cintubwingi. Camoneke shani? Balibatishiwe. Mulandu nshi babatishiwilwe? Pantu Yesu afumishe icipope ca kuti abasambi bakwe bonse babatishiwe. (Mateo 28:19, 20; Imilimo 8:12; 18:8) Umuntu takalekepo fye ukwabula kucitapo cimo ilyo ica bupe ca kutemwa ico Yehova atupeela muli Yesu camufika pa mutima. Akabombesha ukulungika imibele yakwe, kabili akaipeela kuli Lesa mwi pepo, no kulango kuipeela kwakwe pa kubatishiwa mu menshi. Kupitila mu kuba ne citetekelo muli iyi nshila e mo umo ‘alombela kampingu musuma kuli Lesa.’—1 Petro 3:21.
13. Nga twakutuluka ukuti natucita ulubembu, cinshi tufwile ukucita, kabili mulandu nshi?
13 Kwena, na pa numa ya kubatishiwa, utumisango twa kuba ababembu twena tukalamoneka. Cinshi twingacita nga cabe fyo? Umutumwa Yohane atile: “Ndelembe fi fintu kuli imwe ukuti mwibembuka; lelo ngo muntu acita ulubembu, [natukwata kaafwa, NW] kuli Shifwe, Yesu Kristu umulungami: kabili wene e cikonsolwelo ca pa membu shesu.” (1 Yohane 2:1, 2) Bushe ici cilolele mu kuti nangu twacite cili shani, nga twapepa fye kuli Lesa ukuti atulekelele, akatulekelela? Awe te umo cilolele. Icikalamba icilenga ukulekelelwa kulapila kwine kwine. Kuti twafwayo kwafwiwa na ku bakalamba abaishiba ifingi mu cilonganino ca Bwina Kristu. Tufwile ukusumina no kumfwikisha ifyo ico twacitile cabipile no kumfwo bulanda bwine bwine pali ico pa kuti tukabombeshe ukukanacicita na kabili. (Imilimo 3:19; Yakobo 5:13-16) Nga twacite fyo, kuti twacetekela ukuti Yesu akatwafwa no kuti Yehova akatusenamina na kabili.
14. (a) Londololeni inshila yacindama umo ilambo lya kwa Yesu lyatunonsesha. (b) Nga cine cine twalikwata icitetekelo, cinshi tukacita?
14 Ilambo lya kwa Yesu lyalipeela ishuko ku “mukuni unono,” uwaba ulubali lwa cibili ulwa bufyashi bwalumbulwa pa Ukutendeka 3:15 ilya kuba no bumi bwa muyayaya mu muulu. (Luka 12:32; Abena Galatia 3:26-29) Kabili lyapeela ishuko ku mintapendwa ya bantu bambi ilya kuba no bumi bwa muyayaya muli paradise wa pe sonde. (Amalumbo 37:29; Ukusokolola 20:11, 12; 21:3, 4) Umweo wa muyayaya e “ca bupe ca kwa Lesa . . . muli Yesu Kristu Shikulwifwe.” (Abena Roma 6:23; Abena Efese 2:8-10) Nga twalicetekela muli cilya ca bupe no kutasha pa musango capeelelwemo kuli ifwe, tukalangisha uko kucetekela no kutasha. Ukwiluka ifyo Yehova abomfya Yesu mu nshila yawamisha ku kupwilikisha ukufwaya Kwakwe ne fyo cacindama ukuti ifwe bonse tukonke mu makasa ya kwa Yesu bwino, e kutulenga ukulamona ubutumikishi bwesu ubwa Bwina Kristu ukuti mulimo umo pa milimo yacindamisha mu mikalile yesu. Icitetekelo cesu cikamonekela mu kukanatwishika kwesu ilyo tuleebako bambi pa lwa ici ca bupe cawamisha Lesa atupeela.—Imilimo 20:24.
15. Bushe ukuba ne citetekelo muli Yesu Kristu kwatulenga shani ukwikatana?
15 Mwandini icitetekelo ca musango yo cilatwikatanya bwino nga nshi! Citetekelo, e citulenga ukupalama kuli Yehova, ku Mwana wakwe, na kuli umo na umo mu cilonganino ca Bwina Kristu. (1 Yohane 3:23, 24) Cilatulenga ukusekelela ukuti Yehova ku luse lwakwe alipeela Umwana wakwe “ishina ilyacila amashina yonse [ukufumyako fye ishina lya kwa Lesa]; ukuti kwi shina lya kwa Yesu ikufi lyonse likafukame, ilya mu muulu ne lya pano nse ne lya pa nshi ya calo, no lulimi lonse lukasose, ukuti, Yesu Kristu e Shikulu; kube ubukata kuli Lesa Shifwe.”—Abena Filipi 2:9-11.
Ukulanshanya kwa Kupitulukamo
• Ilyo Mesia amoneke, mulandu nshi abasumine icine cine mu Cebo ca kwa Lesa bashasangile ubwafya ukumwishiba?
• Fintu nshi fimo tufwile ukucita pa kulango kuti tulatasha pe lambo lya kwa Yesu?
• Ni mu nshila nshi ilambo lya kwa Yesu kale kale lyatunonsesha? Bushe ici citwafwa shani ilyo twapepa kuli Yehova ukuti atulekelele imembu?
[Icikope pe bula 36]
Yesu aebele abakonshi bakwe ukuti bafwile ukusambilisha bambi ukubaka amafunde ya kwa Lesa