ISAMBILILO 54
Umulimo “Umusha wa Cishinka Kabili Uwashilimuka” Abomba
Yesu e mutwe wa cilonganino ca Bwina Kristu. (Abena Efese 5:23) Nangu ca kuti pali ino nshita Yesu aba ku muulu, abomfya “umusha wa cishinka kabili uwashilimuka” pa kutungulula abamukonka. (Belengeni Mateo 24:45.) Yesu e wasontele uyu “umusha” no kumupeelako amaka yamo aya kupingula pa fintu fimo, na lyo line uyu musha alomfwila Kristu no kubombela bamunyina ba kwa Kristu. Bushe uyu umusha nani? Kabili bushe atusakamana shani?
1. Bushe “umusha wa cishinka kabili uwashilimuka” nani?
Yehova lyonse abomfya umuntu umo nelyo ibumba lya baume ilinono pa kutungulula abantu bakwe. (Malaki 2:7; AbaHebere 1:1) Ilyo Yesu afwile, abatumwa na bakalamba abali mu Yerusalemu e baletungulula. (Imilimo 15:2) Nga filya fine cali mu nshiku sha batumwa, na muno nshiku ibumba ilinono ilya baeluda, e kutila Ibumba Litungulula ilya Nte sha kwa Yehova, e lipekanya ifya kulya fya ku mupashi kabili e lyangalila umulimo wa kubila imbila nsuma. Ili ibumba e “musha wa cishinka kabili uwashilimuka uo [Yesu] asontele.” (Mateo 24:45a) Bonse aba mwi Bumba Litungulula Bena Kristu abasubwa no mupashi wa mushilo abakateka pamo na Kristu mu Bufumu bwakwe ubwa mu muulu nga bapwisha umulimo wabo pano isonde.
2. Fya kulya nshi ifya ku mupashi ifyo umusha wa cishinka apekanya?
Yesu alandile ukuti umusha wa cishinka “[akalapeela Abena Kristu banankwe] ifya kulya pa nshita yalinga.” (Mateo 24:45b) Nga filya fine ifya kulya filenga twaba no bumi ubusuma na maka, ifya kulya fya ku mupashi na fyo, e kutila ifyaba mu Cebo ca kwa Lesa, filatupeela amaka ayo tukabila pa kuti tutwalilile ukuba aba cishinka kuli Yehova na pa kuti tulebomba umulimo Yesu atupeela. (1 Timote 4:6) Tulapokelela ifi ifya kulya fya ku mupashi pa kulongana kwa pa cilonganino, ukwa muputule no kwa citungu, e lyo na mu mpapulo shilanda pali Baibo na mu mavidio ayatwafwa ukwishiba bwino ukufwaya kwa kwa Lesa kabili ayalenga tulekosha bucibusa bwesu na Yehova.
SAMBILILENI NA FIMBI
Sambilileni umulandu tulingile ukukwatila “umusha wa cishinka kabili uwashilimuka,” e kutila Ibumba Litungulula.
Ibumba Litungulula e lipekanya ifya kulya fya ku mupashi, kabili e litungulula no kwafwa Inte sha kwa Yehova mwi sonde lyonse
3. Abantu ba kwa Yehova bafwile ukuteyanishiwa bwino
Ibumba Litungulula e lyangalila umulimo wa Nte sha kwa Yehova kabili Yesu e ulitungulula. Ifi fine e fyo cali na ku Bena Kristu abaliko mu nshiku sha batumwa. Tambeni VIDIO.
Belengeni 1 Abena Korinti 14:33, 40, lyena lanshanyeni ici cipusho:
Bushe ili ilembo lilanga shani ukuti Yehova afwaya Inte shakwe ukuba abateyanishiwa?
4. Umusha wa cishinka e wangalila umulimo wesu uwa kubila imbila nsuma
Ukubila imbila nsuma e mulimo uwacindama sana uo Abena Kristu abaliko mu nshiku sha batumwa balebomba. Belengeni Imilimo 8:14, 25, lyena lanshanyeni aya mepusho:
Ni bani baleangalila umulimo wa kubila imbila nsuma mu nshiku sha batumwa?
Bushe Petro na Yohane balecita shani nga ca kuti abatumwa banabo abaletungulula babeba ifya kucita?
Ukubila imbila nsuma e mulimo uwacindamisha uo Ibumba Litungulula lyangalila. Tambeni VIDIO.
Yesu alilandile ifyo umulimo wa kubila imbila nsuma wacindama. Belengeni Marko 13:10, lyena lanshanyeni aya mepusho:
Mulandu nshi Ibumba Litungulula lyacindikila sana umulimo wa kubila imbila nsuma?
Mulandu nshi tulingile ukukwatila “umusha wa cishinka kabili uwashilimuka” uwa kwangalila umulimo wa kubila imbila nsuma mwi sonde lyonse?
5. Umusha wa cishinka e ututungulula
Ibumba Litungulula e lyeba Abena Kristu mwi sonde lyonse ifya kucita. Bacita shani pa kuti beshibe ifyo balabeba? Moneni ifyo ibumba litungulula ilyaliko mu nshiku sha batumwa lyalecita. Belengeni Imilimo 15:1, 2, lyena lanshanyeni aya mepusho:
Finshi Abena Kristu bamo abaliko mu nshiku sha batumwa bakansaninepo?
Ni kuli bani Paulo, Barnaba na bambi baile pa kuti bapwishe ubu bwafya?
Belengeni Imilimo 15:12-18, 23-29, lyena lanshanyeni ici cipusho:
Ilyo abali mwi bumba litungulula ilyaliko mu nshiku sha batumwa bashilapingula pa fintu, finshi balecita pa kuti bapingule ukulingana ne fyo Lesa alefwaya?—Moneni ifikomo 12, 15, na 28.
Belengeni Imilimo 15:30, 31 na 16:4, 5, lyena lanshanyeni aya mepusho:
Bushe Abena Kristu abaliko mu nshiku sha batumwa balecita shani nga ca kuti ibumba litungulula lyabeba ifya kucita?
Bushe Yehova abapaalile shani pa fyo bali ne cumfwila?
Belengeni 2 Timote 3:16 na Yakobo 1:5, lyena lanshanyeni ici cipusho:
Bushe muno nshiku, ni kwi Ibumba Litungulula lifumya amano ilyo lilepingula pa fintu?
ABANTU BAMO BATILA: “Nga uleumfwila Ibumba Litungulula ninshi ulekonkelela fye abantu.”
Finshi fyalenga mushininkishe ukuti Yesu e utungulula Ibumba Litungulula?
IFYO MUSAMBILILE
Ibumba Litungulula e “musha wa cishinka kabili uwashilimuka” uo Kristu asonta. E lipekanya ifya kulya fya ku mupashi no kutungulula Abena Kristu bonse mwi sonde lyonse.
Ukupitulukamo
Nani wasontele “umusha wa cishinka kabili uwashilimuka”?
Bushe Ibumba Litungulula litusakamana shani muno nshiku?
Bushe namushininkisha ukuti Ibumba Litungulula e “musha wa cishinka kabili uwashilimuka”?
ISHIBILENIPO NA FIMBI
Moneni ifyo aba mwi Bumba Litungulula bateyanishiwa ku kubomba umulimo wabo.
“Bushe Ibumba Litungulula Ilya Nte sha kwa Yehova ni Cinshi?” (Icipande ca pa jw.org)
Moneni ifyo Ibumba Litungulula licita pa kuti lishininkishe ukuti ifya kulya fya ku mupashi ifyo lilepekanya fya cine.
Bushe ababa mwi Bumba Litungulula bomfwa shani pa mulimo Yesu abapeela?
Bushe ukulongana kwa pa cilonganino, ukwa muputule no kwa citungu kulanga shani ukuti Yehova e utungulula Ibumba Litungulula?