Muli “Ca Kutamba”!
1 Umutumwa Paulo alembele ukuti: “Twalengwe ca kutamba ku ba pano isonde, kuli bamalaika na ku bantu.” (1 Kor. 4:9) Bushe ico calola mwi, kabili cifwile ukutukuma shani mu butumikishi bwesu ilelo?
2 Ku bena Korinti, amashiwi ya kuti “ca kutamba” yafwile yabalengele ukwibukisha icalecitika pa mpela ya lubuli lwa kulenga imfwa ulwa bena Roma, lintu abo bapingwile ukwipaiwa baletantamikwa pa ntanshi ye bumba likalamba no kwipaiwa bunkalwe bunkalwe. E fyo cali na ku Bena Kristu ba mu mwanda wa myaka uwa kubalilapo, ibumba likalamba ilya bamalaika na bantu, baalemona ifyo baalecula pa mulandu wa kucitilo bunte ku Bufumu. (Heb. 10:32, 33) Abengi balimwene bumpomfu bwabo, nga fintu bamona umupampamina wesu pali lelo. Ni bani batutamba?
3 Ku ba Pano Isonde na ku Bantu: Limo abasabankanya amalyashi balalanda pa mulimo wa bantu ba kwa Yehova. Kwena ca cine tulatasha nga balemba amalyashi yamo aya cine kabili ayalungama pa mulimo wesu, lelo tulenekela no kuti limo abafwaya ukutupumfyanya kuti basabankanya amalyashi ya bufi. Nalyo line, tufwile ukutwalilila ukuishininkisha ukuti ni fwe bakapyunga ba kwa Lesa lyonse ilyo kuli ‘ulwambo na malumbo.’ (2 Kor. 6:4, 8) Ababa ne mitima yafumaluka baleshiba bwino ukuti tuli basambi bene bene aba kwa Yesu Kristu.
4 Kuli Bamalaika: Ifibumbwa fya mupashi na fyo filatutamba. Kaseebanya ne fibanda fyakwe na bo balatutamba, lelo batamba “ne cipyu cikalamba,” ukufwaya ukuti baleshe umulimo wa “kukwato bunte bwa kwa Yesu.” (Ukus. 12:9, 12, 17) Bamalaika ba cishinka aba kwa Lesa balatamba no kusekelela na lintu fye umubembu umo alapila. (Luka 15:10) Tufwile ukukoseleshiwa ilyo twaishiba ukuti bamalaika bamona ubutumikishi bwesu ukuti pa milimo yonse pano calo e mulimo fye uufwile ukubombwa mu kampampa kabili e wingaleta ukumwenamo ukucila imilimo yonse iyaba pe sonde ilelo!—Ukus. 14:6, 7.
5 Nga kwaba bamo abalemucusha nelyo nga mwatontonkanya ukuti umulimo wenu uwa kushimikila tauletwala ifisabo, ibukisheni ukuti muli ca kutamba ku fibumbwa fyonse. Ukushipikisha kwenu ukwa cishinka kulanga ukuti muli ba mpomfu. Na pa kulekelesha, ‘ukupilikita kwenu ukusuma ukwa citetekelo’ kukamulenga ‘ukwikata ku mweo wa muyayaya.’—1 Tim. 6:12.