7. Ubufumu bwa kwa Lesa bwalikwata amafunde ayasuma, ukucila amafunde ya mabuteko ya bantunse

Aba mu mabuteko bapanga amafunde ayo balemona ukutila kuti yawamina abantu no kubacingilila. Ubufumu bwa kwa Lesa nabo bwalikwata amafunde ayo abo buteka bafwile ukulakonka. Belengeni 1 Abena Korinti 6:9-11, lyena lanshanyeni aya mepusho:

• Bushe muletontonkanya ukuti mu calo mukaba shani ilyo abantunse bonse bakalakonka amafunde ya kwa Lesa?a

• Bushe muletontonkanya ukuti caliba fye bwino ifi Yehova enekela abakalatekwa no Bufumu bwakwe ukulakonka aya mafunde? Cinshi mwa-asukila ifyo?

• Finshi filanga ukuti no muntu uushikonka amafunde ya kwa Lesa kuti ayaluka?—Moneni icikomo 11.

Abantu abengi balomfwa insoni ukulanda pa lyashi lya kulaala pamo ukwa mwaume no mwanakashi. Nomba Baibo yalilanda pali ili lyashi mu kulungatika, kabili yalanda mu nshila iishingalenga twaumfwa insoni. Ifyo ilanda filatwafwa, pantu yafuma kuli Yehova uwatubumbile. Yehova alishiba bwino ifingatuwamina. Alitweba ifyo twingacita pa kuti tulecita ifingalenga alesekelela, ne fingalenga twaba ne nsansa umuyayaya.

1. Ifyo Yehova amona ukulaala pamo ukwa mwaume no mwanakashi.

Ukulaala pamo ukwa mwaume no mwanakashi bupe ubo Lesa apeela abantunse. Yehova alanda ukuti umwaume no mwanakashi abaupana e bafwile fye ukulaala pamo. Ukulaala pamo ukwa baupana takulenga fye bakwata abana, lelo kulalenga balanga no kuti balitemwana, kabili ici cilenga balasekelela. E mulandu wine Icebo ca kwa Lesa cilandila ukuti: “Sekelela pamo no mukashi uo waupile ninshi uli umulumendo.” (Amapinda 5:18, 19) Yehova afwaya Abena Kristu abaupana ukuba aba cishinka ku bena mwabo, pa kuti tabacitile ubucende.—Belengeni AbaHebere 13:4.

2. Bushe ubulalelale cinshi?

Baibo itila “Abacita ubulalelale . . . tabakapyane Ubufumu bwa kwa Lesa.” (1 Abena Korinti 6:9, 10) Ishiwi lya ciGriki ilyo bapilibula ukuti ubulalelale ni por·neiʹa. Muli ili ishiwi mwaba (1) ukulaala pamo ukwa mwaume no mwanakashi abashaupana,a (2) ukuulungana kwa baume beka beka nelyo abanakashi beka beka, na (3) ukuulungana ne nama. Nga ‘twataluka ku bulalelale’ Yehova alatemwa kabili ifintu filatuwamina.—1 Abena Tesalonika 4:3.

SAMBILILENI NA FIMBI

3. Fulumukeni ubulalelale

Yosefe ali uwa cishinka kabili alikeene ilyo umwanakashi amwebele ukuti alaale nankwe. Belengeni Ukutendeka 39:1-12, lyena lanshanyeni aya mepusho:

• Cinshi calengele Yosefe akaane ukucita ubulalelale? —Moneni icikomo 9.

• Bushe muletontonkanya ukuti Yosefe alicitile fye bwino? Cinshi mwa-asukila ifyo?

VIDIO: Fulumuka Ubulalelale (5:06)

Yehova tafwaya tulecita ubulalelale. Belengeni 1 Abena Korinti 6:18, lyena lanshanyeni aya mepusho:

• Finshi ifingalenga umuntu acita ubulalelale?

• Kuti mwacita shani pa kuti tamucitile ubulalelale?

4. Kuti mwafulumuka ubulalelale

VIDIO: Mulebelenga Baibolo pa Kucimfya Amatunko (3:02)

• Muli vidio twatamba, finshi munyinefwe acitile ilyo aishibe ukuti ifyo aletontonkanya ne fyo alecita kuti fyalenga acita ubucende?

Inshita shimo Abena Kristu ababombela Lesa ne cishinka nabo bene kuti cabakosela ukulatontonkanya fye pa fyasanguluka. Kuti mwacita shani pa kuti muleke ukutontonkanya pa fyabipa? Belengeni Abena Filipi 4:8, lyena lanshanyeni aya mepusho:

• Finshi tulingile ukulatontonkanyapo?

• Bushe ukubelenga Baibo no kubombesha mu mulimo wa kwa Yehova kuti kwatwafwa shani ukukanacita ulubembu?

5. Amafunde ya kwa Yehova yalatucingilila

VIDIO: Ukukanapingula Bwino pa Fintu (9:31)

• Cinshi calengele umulumendo umo atunkwe ukucita ubulalelale?—Moneni Amapinda 7:8, 9.

• Baibo pa Amapinda 7:23, 26 itila, mu kucita ubulalelale mulafuma ifintu ifyabipa. Mafya nshi tushingakwata nga ca kuti imibele yesu ili iyasanguluka?

• Bushe ukuba abasanguluka mu mibele kuti kwalenga shani twaba ne nsansa umuyayaya?

Abantu batontonkanya ukuti ifyo Baibo ilanda pa baume abalaala na baume banabo, na banakashi abalaala na banakashi banabo tafyawama. Lelo Yehova ni Lesa uwaba no kutemwa, kabili afwaya abantu bonse baba ne nsansa umuyayaya. Pa kuti tukabe no mweo wa muyayaya tufwile ukulakonka amafunde ya kwa Lesa. Belengeni 1 Abena Korinti 6:9-11, lyena lanshanyeni ici cipusho:

• Bushe abaume abalaala na baume banabo na banakashi abalaala na banakashi banabo e bo Lesa amona fye ukuti balacita ifyabipa?

Pa kuti tulecita ifingalenga Lesa alesekelela, bonse fye tulingile ukwaluka muli fimo. Bushe mwaliba ubusuma mu kwaluka? Belengeni Amalumbo 19:8, 11, lyena lanshanyeni aya mepusho:

• Bushe muletontonkanya ukuti amafunde ya kwa Lesa ayalanda pa kuba ne mibele iisuma yaliba fye bwino? Cinshi mwa-asukila ifyo?

IFYO MUSAMBILILE

Ukulaala pamo ukwa mwaume no mwanakashi bupe ubo Yehova apeela abaupana pa kuti baleba ne nsansa.

Ukupitulukamo

• Bushe mu bulalelale mwaba na finshi?

• Finshi tufwile ukucita pa kuti tatucitile ubulalelale?

• Busuma nshi tusangamo nga tulekonka amafunde ya kwa Yehova ayalanda pa kuba ne mibele iisuma?

ISHIBILENIPO NA FIMBI

Moneni ico Lesa afwaila ukuti umwaume no mwanakashi baupana ilyo bashilatendeka ukwikala pamo.

“Finshi Baibolo Ilanda pa Mwaume no Mwanakashi Ukwikala Pamo Ukwabula Ukuupana Ukulingana ne Funde?” (Icipande ca pa jw.org)

Moneni ifi Baibo isambilisha ukuti abaume tabalingile ukulaala na baume banabo na banakashi tabalingile ukulaala na banakashi banabo, cishipilibwila ukuti tulingile ukupata aba bantu.

“Bushe Ukulaala Pamo Ukwa Baume Bekabeka Nelyo Abanakashi Bekabeka Lubembu?” (Icipande ca pa jw.org)

Sambilileni ifyo amafunde ya kwa Lesa ayalanda pa bulalelale bwa misango yonse yatucingilila.

“Bushe Ukufyompana Ifya Mfwalo Nako Bulalelale?” (Icipande ca pa jw.org)

Belengeni ilyashi ilileti “Balincindike” pa kuti mumone icalengele umwaume uwalelaala na baume banankwe aaluke no kutendeka ukucita ifyo Lesa atemwa.

“Baibolo Ilaalula Abantu” (Ulupungu lwa kwa Kalinda, April 1, 2011)

Nangu ca kuti mwalitemwa sana Yehova kabili mulesha na maka ukucita ifishingamukalifya, inshita shimo kuti mwalufyanya. Na lyo line imembu shimo shilaba ishikalamba ukucila shimbi. (1 Abena Korinti 6:9, 10) Nga mwacita ulubembu ulukalamba, muleibukisha ukuti Yehova acili alimutemwa, akamwelela kabili akalamwafwa.

1. Finshi tufwile ukucita pa kuti Yehova atwelele?

Abatemwa Yehova balomfwa sana ububi nga bacita ulubembu ulukalamba. Lelo ifyo Yehova alaile abantu bakwe filabasansamusha. Abalaile ukuti: “Imembu shenu nangu shakashika ce, shikabuuta tuutu kwati ni mfula ya bungululu bwa buuta.” (Esaya 1:18) Nga twalapila ukufuma panshi ya mutima, Yehova akatwelela. Finshi tulingile ukucita pa kulanga ukuti natulapila? Pa mulandu wa kuti tulomfwa sana ububi pa fyo twacitile, tufwile ukwesha na maka ukukanabwekeshapo ukucita ifyabipa ifyo twacitile, kabili tufwile no kulomba Yehova ukuti atwelele. Na kabili tulingile ukulaesha na maka ukukanatontonkanya nelyo ukucita ifyabipa ifyalengele tubembuke. Tulingile no kuibikilishako ukukanalacita ifyo Yehova apata.—Belengeni Esaya 55:6, 7.

2. Bushe Yehova abomfya shani baeluda ukutwafwa nga twabembuka?

Yehova atweba ukuti nga twacita ulubembu ulukalamba, tufwile “[ukwita] baeluda ba mu cilonganino.” (Belengeni Yakobo 5:14, 15.) Baeluda balitemwa Yehova ne mpaanga shakwe. Balibasambilisha ifya kutwafwa pa kuti tube ifibusa fya kwa Yehova na kabili.—Abena Galatia 6:1.

Bushe baeluda batwafwa shani nga twacita ulubembu ulukalamba? Baeluda babili nelyo batatu kuti batulungika ukubomfya Amalembo. Na kabili kuti batweba ifyo tulingile ukucita no kutukoselesha pa kuti tatubembwike na kabili. Nga ca kuti umuntu nacita ulubembu ulukalamba kabili talefwaya ukulapila, baeluda balamufumya mu cilonganino pa kuti bacingilile icilonganino.

SAMBILILENI NA FIMBI

3. Nga twayebelela ulubembu tucitile tulaba ifibusa fya kwa Yehova na kabili

Ulubembu lonse ulo twacita lulakalifya Yehova, kanshi tulingile ukumweba. Belengeni Amalumbo 32:1-5, lyena lanshanyeni ici cipusho:

• Mulandu nshi cacindamina ukuyebelela kuli Yehova ulubembu tucitile, ukucila ukufisa?

VIDIO: “Abo Yehova Atemwa Alabasalapula” (3:01)

• Muli vidio twatamba, bushe baeluda ba-afwile shani ba Canon ukubwelela kuli Yehova?

Tatufwile ukulatiina baeluda kabili tufwile ukubeba ifishinka fyonse pantu babelako ukutwafwa. Belengeni Yakobo 5:16, lyena lanshanyeni ici cipusho:

• Bushe ukweba baeluda ifishinka fyonse kuti kwalenga shani cabangukila ukutwafwa?

4. Yehova alabelela uluse abacita imembu

Nga ca kuti umuntu acita ulubembu ulukalamba kabili akaana ukukonka amafunde ya kwa Yehova, balamufumya mu cilonganino, kabili tatulingile ukula-ampana nankwe. Belengeni 1 Abena Korinti 5:6, 11, lyena lanshanyeni ici cipusho:

• Bushe filya icitutumushi cilenga umufuba watutumuka, fyalingana shani ne fyo ukwampana no muntu uushifwaya ukulapila kwingalenga aba mu cilonganino baba ne mibele yabipa?

Bushe ifyo Yehova acita umuntu nga abembuka filanga shani ukuti taumina kumo, wa luse kabili alitemwa abantu?

5. Yehova alatwelela nga twalapila

Yesu alilandile icilangililo icilenga twaishiba bwino ifyo Yehova omfwa umuntu nga alapila. Belengeni Luka 15:1-7, lyena lanshanyeni ici cipusho:

• Bushe ifili pali ili ilembo filemusambilisha finshi pali Yehova?

Belengeni Esekiele 33:11, lyena lanshanyeni ici cipusho:

• Cinshi icacindama ico tulingile ukucita pa kuti tulange ukutila natulapila?

IFYO MUSAMBILILE

Nga twacita ulubembu ulukalamba e lyo twalapila ukufuma panshi ya mutima kabili tatubwekeshepo ukucita ifyabipa, Yehova akatubelela uluse.

Ukupitulukamo

• Cinshi cawamina ukuyebelela kuli Yehova nga twacita ulubembu?

• Finshi tufwile ukucita pa kuti Yehova atwelele?

• Nga twacita ulubembu ulukalamba, mulandu nshi tulingile ukwebela baeluda ukuti batwafwe?

ISHIBILENIPO NA FIMBI

Moneni ifyo Yehova aelelele umwaume umo nga fintu Baibo ilanda pali Esaya 1:18.

Nalishininkisha Ukuti Yehova wa Luse (5:02)

Bushe baeluda bafwa shani abacita imembu ishikalamba?

“Ifyo Baeluda Balanga Ukutemwa no Luse ku Ucitile Ulubembu” (Ulupungu lwa kwa Kalinda, August 2024)

Moneni ifyo abacita imembu abashilapila babalanga ukutemwa ne fyo babomfwila uluse.

“Ifyo Baeluda Bengafwa abo Bafumya mu Cilonganino” (Ulupungu lwa kwa Kalinda, August 2024)

Belengeni ilyashi ilitila “Nalingile Ukubwelela Kuli Yehova,” pa kuti mumone icalengele umwaume umo uwafumine mu cine eshibe ukuti Yehova alefwaya abwelele kuli ena.

“Baibolo Ilaalula Abantu” (Ulupungu lwa kwa Kalinda, April 1, 2012)