Umutwala

Ubulondoloshi: “Ukulingana ne cisambilisho ce Calici [lya ciRoma Katolika], imibele, icifulo, nelyo incende mu calo cikakonkapo . . . umo imyeo ya abo abafwa mu mibele ya neema, lelo abashilati babe abantungwa ukufuma ku kukanapwililika konse, bacita ukufuta ku membu shishaelelwa ishingelelwa nelyo ku kukandwa kwa pa nshita inono pa mulandu wa membu shingelelwa kabili ishakulenge mfwa isho kale kale shaelelwa kabili, mu kucite fyo, basangululwa pa ntanshi tabalaingila mu mulu.” (New Catholic Encyclopedia, 1967, Vol. XI, ibu. 1034) Te cisambilisho ca mu Baibolo.

Ni pa cinshi icisambilisho ca mutwala cashimpwa?

Pa numa ya kupituluka mu cintu bakalemba ba ciKatolika basosa ukukuma ku fyalembwa fya musango yo pamo nga 2 Makabe 12:39-45, Mateo 12:32, na 1 Abena Korinti 3:10-15, New Catholic Encyclopedia (1967, Vol. XI, ibu. 1034) isumino kuti: “Mu kubebeta kwa kupelako, icifundisho ca ciKatolika pa lwa mutwala cashimpwa pa cishilano, te pa Malembo Yashila.”

“Icalici lyashintilila pa cishilano ku kwafwilisha icifulo ca pa kati pa kati ka mulu na helo.”—U.S. Catholic, March 1981, ibu. 7.

Ukukuma ku musango wa mutwala, cinshi cintu abakulandilako aba ciKatolika basosa?

“Abengi batontonkanya ukuti ukucula kwa mupwilapo ukwa mu mutwala kwishibikilwa pamo no kwibukila kwa kusesesha ku ntanshi ukwa cimonwa ca cimwemwe, nelyo cingatila imimwene yacilapo kuseeka itunga ukuti, mu kulunda kuli ici, kwabako ukukandwa kwashininkishiwa . . . Mwi Calici lya ciLatin calisuminwa mu cinkumbawile ukuti uku kukalipwa kupeelwa ukupitila mu mulilo wa cine cine. Ici, nangu cibe fyo, tacaba icafwaikwa ku kusumina mu mutwala. No kushininkishiwa tacashininkishiwa. . . . Nelyo fye nga ca kuti umo asobolapo, mu kuba na basambilile fya bulesa aba ku Kabanga, ukukaana imfundo ya kucula kuletwako no mulilo, umo alingile ukuba uwasakamana ukukanasansha ukucula konse ukwashininkishiwa ukufuma mu mutwala. Kwabako na nomba ukucula kwine kwine, ubulanda, ukukalifiwa, ukulengwe nsoni kwa kampingu, no bulanda bumbi ubwa ku mupashi ubwaba na maka ya kuleta ukukalipwa kwa cine pa mweo. . . . Umo alingile ukwibukisha, pa cipimo icili conse, ukuti mu kati ka kucula kwabo iyi myeo na kabili ikumanya ubuseko bukalamba pa kushininkishiwa kwe pusukilo.”—New Catholic Encyclopedia (1967), Vol. XI, ibu. 1036, 1037.

“Icicitika mu mutwala caba kutunganya kwa uuli onse.”—U.S. Catholic, March 1981, ibu. 9.

Bushe umweo ulapusuka imfwa ya mubili?

Esek. 18:4, Uwa ciKatolika uwa 1971: “Umweo [ciHebere, neʹphesh; “umuntu,” JB; “umo,” NAB, “umweo,” Kx] uwabifya e ukafwa.”

Yako. 5:20: “Pa kubwesho mubembu mu kuluba kwa mibele yakwe, akapususho mweo ku mfwa, no kufimba pa membu ishingi.” (Utulembo tunono natulundwako.) (Mona ukuti ici cilelanda ulwa mfwa ya mweo.)

Ku fyebo fyalundwako, mona imitwe ya “Imfwa” na “Umweo.”

Bushe ukukandwa na kumbi pa lubembu kulacitwa pa numa ya mfwa ya umo?

Rom. 6:7, NAB: “Umuntu uwafwa nalubulwa ukufuma ku lubembu.” (Kx; “Ukuba no mulandu takwisa na kabili pa muntu uufwile.”)

Bushe abafwa baba na maka ya kukumanya ukusekelela pa mulandu wa kucetekela mu cilolelo ce pusukilo?

Kf. 9:5, Uwa ciKatolika uwa 1971: “Abomi baliishibo kuti bakafwa, nomba abafwa tabaishiba ne cimo.”

Esa. 38:18, Uwa ciKatolika uwa 1971: “Aba ku mbo tabakutasha, na bafwa tabakulumba; abaya ku mbo tabasubila icishinka cobe.” (E co ni shani fintu uuli onse uwa bene “engakumanya ukusekelela kukalamba pa kushininkishiwa kwe pusukilo”?)

Ukulingana na Baibolo, ni mu nshila nshi ukusangululwa ukufuma kupwishishiwa?

1 Yoh. 1:7, 9: “Lelo nga twenda mu lubuuto, ifyo wene [ali mu lubuuto], tuli ne senge umo umo no mubiye, no mulopa wa kwa Yesu Umwana wakwe utusangulula ku lubembu lonse. . . . Nga tuyebelele membu shesu, wene wa cishinka kabili mulungami ukuti atulekelele imembu, no kutusangulula ku kuulungana konse [“incitilo shesu shonse ishabipa shilalopololwa,” Kx].”

Ukus. 1:5: “Yesu Kristu . . . uwatutemwa, uwatukakwilile na mu membu shesu ku mulopa wakwe.”