ISAMBILILO 56
Twalilileni Ukucita Ifingalenga mu Cilonganino Mwaba Umutende
Nga tuli pamo na Bena Kristu banensu tumfwa nge fyo Imfumu Davidi yaumfwile, iyatile: “Aba bwananyina nga bali pamo kabili baleumfwana, cilawama nga nshi kabili balaba ne nsansa!” (Amalumbo 133:1) Uyu umutende tawisa fye nga meno ya mu kanwa. Bonse fye kwaliba ifyo tufwile ukulacita pa kuti mu cilonganino mutwalilile ukuba umutende.
1. Finshi ifyalenga abantu ba kwa Lesa bekatane?
Nga ca kuti muli ku calo cimbi e lyo mwaya mu kulongana, nalimo te kuti mumfwe ifyo balelanda pa kulongana. Na lyo line kuti muleumfwa fye kwati kale mwaishibana na ba bwananyina. Cinshi cingalenga muleumfwa ifi? Pantu mwi sonde fye lyonse tubomfya impapulo shimo shine ilyo tulesambilila Baibo. Kabili tulesha na maka ukulanga aba bwananyina ukuti twalibatemwa. Te mulandu no ko twikala, bonse ‘tulilila kwi shina lya kwa Yehova, pa kuti tulemupepela pamo.’—Sefania 3:9, futunoti.
2. Finshi mwingacita pa kuti aba mu cilonganino batwalilile ukwikatana?
“Muletemwana nga nshi ne mitima yenu yonse.” (1 Petro 1:22) Kuti mwabomfya shani ifyaba pali ili ilembo? Mu cifulo ca kubika fye amano ku fyo aba bwananyina bamulufyanya pa mulandu no kukanapwililika, mufwile ukubika amano ku mibele yabo iisuma. Na kabili, mu cifulo ca kulaba fye pamo na ba bwananyina abatemwa ifyo mwatemwa, muleishibako bamunyinefwe na bankashi ababa ne nkulilo iyapusana ne yenu. Cimbi ico twingacita, kwesha apo twingapesha ukukanaba na kapaatulula.—Belengeni 1 Petro 2:17.a
3. Mukacita shani nga mwapusana no Mwina Kristu munenu?
Nangu ca kuti twalikatana, ukupwililika kwena tatwapwililika. Inshita shimo tulacita ifikalifya abanensu. E co ne Cebo ca kwa Lesa citwebela ukuti: “Twalilileni . . . kuitemenwa ukubelelana uluse.” Citweba no kuti: “Nga filya fine Yehova aitemenwa ukumubelela uluse, e fyo na imwe mulecita.” (Belengeni Abena Kolose 3:13.) Tulakalifya Yehova imiku iingi, lelo alatubelela uluse. Kanshi enekela ukuti na ifwe tulebelela bamunyinefwe uluse. E ico nga mwaishiba ukuti namukalifya uwa bwananyina, mufwile ukuitendekelako ukuyalanshanya nankwe pa kuti mutendeke ukumfwana na kabili.—Belengeni Mateo 5:23, 24.b
SAMBILILENI NA FIMBI
Sambilileni ifyo mwingacita pa kulenga mu cilonganino mwaba ukwikatana no mutende.
Finshi mufwile ukucita pa kuti mutendeke ukumfwana no wa bwananyina na kabili?
4. Mwilaba na kapaatulula
Tulafwaya ukutemwa aba bwananyina bonse. Lelo nalimo kuti catukosela ukutemwa umuntu pa mulandu ne nkulilo, intambi akonka, nelyo icalo afumako. Cinshi cingatwafwa ukukanaba na kapaatulula? Belengeni Imilimo 10:34, 35, lyena lanshanyeni aya mepusho:
Yehova afwaya abantu ba misango yonse baba Inte shakwe. Bushe ukwishiba ifyo Yehova amona abantu kufwile ukutulenga twalamona shani abantu abafuma ku fyalo fimbi abo twapusana nabo inkulilo nelyo intambi?
Finshi abantu bacita ku ncende mwikala ifilanga ukuti baliba na kapaatulula?
Belengeni 2 Abena Korinti 6:11-13, lyena lanshanyeni ici cipusho:
Kuti mwacita shani pa kuti muletemwa aba bwananyina bonse?
5. Muleitemenwa ukwelela abantu kabili mulecita ifingalenga mwalaumfwana bwino nabo
Yehova alaitemenwa ukutwelela nangu ca kuti ena talufyanya. Belengeni Amalumbo 86:5, lyena lanshanyeni aya mepusho:
Bushe Yehova atwelela shani?
Cinshi calenga muletasha pa fyo Yehova atwelela?
Finshi fingalenga catukosela ukulaumfwana na ba bwananyina?
Kuti twapashanya shani Yehova no kutwalilila ukwikatana na bamunyinefwe na bankashi? Belengeni Amapinda 19:11, lyena lanshanyeni ici cipusho:
Nga ca kuti umuntu acita ifyamukalifya, finshi mwingacita pa kuti mutwalilile ukumfwana?
Inshita shimo tulakalifya abanensu. Finshi tulingile ukucita nga ca kuti twakalifya abanensu? Tambeni VIDIO, lyena lanshanyeni icipusho cakonkapo.
Muli vidio twatamba, finshi nkashi acitile pa kuti atwalilile ukumfwana na nkashi apusene nankwe?
6. Mulebika amano ku fisuma ifyo aba bwananyina bacita
Nga twaishiba bwino aba bwananyina, tuleshiba ifyo bacitamo bwino, ne fyo bashicitamo bwino. Nomba kuti twacita shani pa kuti tulebika amano ku fyo bacitamo bwino? Tambeni VIDIO, lyena lanshanyeni icipusho cakonkapo.
Finshi fingamwafwa ukulamona ifisuma mu ba bwananyina?
Yehova abika sana amano ku mibele yesu iisuma. Belengeni 2 Imilandu 16:9a, lyena lanshanyeni ici cipusho:
Bushe ukwishiba ukuti Yehova abika sana amano ku mibele yenu iisuma kwalenga mwaumfwa shani?
Nangu fye libwe lya daimondi lilakwatamo tumo utushiba bwino, lelo tacipilibula ukuti ninshi te lya mutengo. Ifi fine e fyo caba na kuli bamunyinefwe na bankashi. Tabapwililika, lelo tacipilibula ukuti tabacindama kuli Yehova
ABANTU BAMO BATILA: “Pa kuti njelele umuntu, kano akosapo fye ukulomba ubwelelo.”
Cinshi tulingile ukuitemenwa ukwelela abantu?
IFYO MUSAMBILILE
Nga mule-elela aba bwananyina bonse kabili nga mulebalanga ukuti mwalibatemwa, mukalenga mu cilonganino mukabe umutende no kwikatana.
Ukupitulukamo
Cinshi mufwile ukucita pa kuti mwilaba na kapaatulula?
Mukacita shani nga mwapusana no Mwina Kristu munenu?
Cinshi mulefwaila ukulaelela abantu nga filya Yehova atwelela?
ISHIBILENIPO NA FIMBI
Moneni ifyo icilangililo ico Yesu alandile cingatwafwa ukukanapingula abantu bambi.
Bushe tulingile ukulomba ubwelelo nangu tulemona kwati tapali ico tulufyenye?
“Ukulomba Ubwelelo—Kulaleta Umutende” (Ulupungu lwa kwa Kalinda, November 1, 2002)
Tambeni vidio pa kuti mumone ifyo cali pa kuti abaume babili abakuliile ukwali akapaatulula ka nkanda batendeke ukumfwana.
Moneni ifyo mwingacita nga mwapusana no wa bwananyina, pa kuti mu cilonganino mutwalilile ukuba umutende.
“Mulelanga Ukutemwa Ilyo Mulewikishanya” (Ulupungu lwa kwa Kalinda, May 2016)
a Moneni Ifyebo na Fimbi pa 6 pa kuti mumone ifyo ukutemwa kulenga Abena Kristu ukukanacita ifingalenga ba-ambukishako bambi amalwele ayambukila.
b Moneni Ifyebo na Fimbi pa 7 pa kuti mumone ifyo mwingacita nga mwapusana no muntu mucita nankwe amakwebo nelyo nga kwaba imilandu.