“Lesa Atemwa Umupe wa Nsansa”

YEHOVA e ca kumwenako cakulisha ica bukapekape. Cine cine e co Baibolo isosela ukuti e Kapeela wa “ca kupeelwa conse icisuma ne ca bupe conse icafikapo.” (Yakobo 1:17) Ku ca kumwenako, tontonkanyeni pa fintu Lesa abumba. Ifya kulya tafipangile ifyatalalila fye iyo, apangile ifyabamo mundowendowe; amaluba tayapangile ayashibantukila, lelo yalabalabata; ukuwa kwa kasuba takuleta fye mfifi, lelo kuba kashita kayemba. Fyonse fintu Yehova abumba kanshi filanga ukuti alitutemwa kabili ni kapekape. (Ilumbo 19:1, 2; 139:14) Ukulundapo, Yehova aba Umupe wa nsansa. Acankilwa mu kucite fisuma ku bamubombela.—Ilumbo 84:11; 149:4.

Abena Israele baebelwe ukupashanya bukapekape bwa kwa Lesa mu mikalile yonse iya mu luko lwabo. Mose abebele ukuti: “Mwiumika mitima yenu, nangu kufumbate minwe yenu kuli munyinenwe umubusu. Ukupeela mukamupeele, kabili mwileka mubipe mu mitima yenu pa ku mupeela.” (Amalango 15:7, 10) Apo baali no kupeela mu kuitemenwa, abena Israele baali no kucankilwa muli bukapekape.

Ukukonkomesha kwapalako e kwapeelwe na ku Bena Kristu. E mulandu wine Yesu asosele ukuti “mwaliba insansa ishafulilako mu kupeela.” (Imilimo 20:35, NW) Abasambi ba kwa Yesu baali ca kumwenako twingapashanya mu kupeela kwa nsansa. Ku ca kumwenako, Baibolo itushimikila ukuti abatetekele mu Yerusalemu “ifyuma fyabo ne fipe fyabo balashitamo indalama no kushakanya kuli bonse, ifyo umuntu no muntu akabiile.”—Imilimo 2:44, 45.

Nomba balya bakapekape abena Yudea pa numa baliponenwe no bupiina. Baibolo tayalanda mu kulungatika icalengele ubu bwafya. Abasoma bamo batila limbi icalengele cali cipowe cintu Imilimo 11:28, 29 yalandapo. Te mulandu ne calengele, cimoneka kwati Abena Kristu ba mu Yudea tabakwete na pa kuma ukuboko, kanshi Paulo alisakamene nga nshi ukuti ubu bwafya bubombelwepo. Kuti abombelapo shani?

Ukusangwila Abaali mu Kukabila

Paulo alombele ukwaafwa ukufuma ku filonganino fya kutali pamo nga ku Makedonia, kabili atantike imibombele pa kuti kube ukusangwila Abena Kristu ba mu Yudea abaponenwe no bupiina. Ku bena Korinti, Paulo alembele ukuti: “Ifyo naebele aba nkuta sha ku Galatia, e fyo na imwe mucite. Ku bwa ntanshi bwa mulungu no mulungu, bonse mupaatulepo fimo no kubika, umo mwingakwatila.”a—1 Abena Korinti 16:1, 2.

Paulo alefwaisha ukuti imisangulo bwangu bwangu bakaitwale kuli bamunyina mu Yerusalemu, lelo abena Korinti tabayangufyenye ukusangula. Mulandu nshi? Bushe tabapooseleko amano ku kucula kwa bamunyinabo aba ku Yudea? Iyo, pantu Paulo alishibe ukuti abena Korinti baali “abacisha muli fyonse, mu citetekelo, mu nsoso, mu kwishiba, kabili mu kucincila.” (2 Abena Korinti 8:7) Cimoneka kwati bapoosele amano ku kubombela pa mafya yacindama yantu Paulo abebelepo muli kalata wakwe uwa kubalilapo. Lelo nomba ukucula kwa bamunyinabo mu Yerusalemu kwalekabila ukubombelapo mu kampampa. E mulandu wine Paulo abebeele pali uyu mulandu muli kalata wa cibili uo abalembeele.

Ukubacincisha Ukuba Bakapekape

Paulo atendekeele pa kulanga abena Korinti ica kumwenako bengapashanya ica bena Makedonia, pantu bena balyankwileko mu kwangufyanya ku kusangwila bamunyinabo abalecula. Paulo alembele ukuti: “Mu kweshiwa ukwingi mu bucushi, ubwingi bwa kusekelela kwabo no bwa bubusu bwabo ubukalamba bwalengo bucindami bwa bupe bwabo bukule.” Abena Makedonia tabalelolela ukubacincisha pa kuti basangule. Lelo Paulo atile bena “balelomba no kupaapaata ukwingi ulwa bubile ubu no lwe senge lya kwafwa abashila.” Kuti twatesekesha bukapekape bwa bena Makedonia lintu twibukisha ukuti abene bene na bo baali mu ‘bubusu ubukalamba.’—2 Abena Korinti 8:2-4.

Pa kutasha abena Makedonia, bushe Paulo alekoselesha umupashi wa kucimfyanya mu cilonganino ca bena Korinti? Awe iyo, pantu alishibe ukuti umupashi wa kucimfyanya te nshila isuma iyo engabacincishishamo. (Abena Galatia 6:4) Ukulundapo, alishibe ukuti abena Korinti tabalekabila ukupeela umusangulo wabo ngo wa kusebulula insoni. Lelo alishibe fyo abena Korinti balitemenwe bamunyinabo abena Yudea kabili na bo bene balefwaisha ukuti basangwileko ku bwafya bwabo ubo baleculako. Abebele ukuti: ‘Mwali ba ntanshi umwaka wapwile ku kucita, kabili te ku kucita kweka iyo, lelo no kufwaya pamo.’ (2 Abena Korinti 8:10) Kanshi abena Korinti na bo baali ca kumwenako ca kupashanya mu mbali shimo isha kusangula ifyalekabilwa kuli bamunyinabo balecula. Paulo abebele ukuti: “Ninjishibo kupimpa kwenu, uko ndetakishisha pa mulandu wenu ku bena Makedonia, . . . Ukupimpa kwenu kwacincisha icinabwingi pali abo.” (2 Abena Korinti 9:2) Nomba abena Korinti balekabila ukulenga ukupimpa kwabo ukubasesha ukucitapo cimo.

E mulandu wine Paulo abebele ukuti: “Onse acite umo apangile mu mutima wakwe; te kupeela no mutimako nangu mu kupatikishiwa, pantu Lesa atemwo mupe wa nsansa.” (2 Abena Korinti 9:7) Ico Paulo alefwaya kanshi tacali kupatikisha abena Korinti, pantu takwaba umupe wa nsansa uo bengapatikisha. Paulo alishibe ukuti kale kale balikwete umupashi wa kupeela, alishibe ukuti onse alipangile ukupeela. Ukulundapo, Paulo abebele ukuti: “Pantu ukupimpa nga kwabako, kwasekelelwa umo umuntu akwatila, te umo ashakwatila.” (2 Abena Korinti 8:12) Cine cine umuntu nga alipimpa, nga alakuntwa no kutemwa, ifyo apeela fikapokelelwa kuli Lesa, te mulandu ne fyo twingamoneka kwati tunono.—Linganyeniko Luka 21:1-4.

Abape ba Nsansa Pali Lelo

Imisangulo yapeelwe ukwafwilisha Abena Kristu balecula aba mu Yudea, itulanga ica kumwenako cawamisha ica kupashanya ilelo. Inte sha kwa Yehova shalimya lulu wa kushimikila mwi sonde lyonse, ukutwala ifya kulya ku mamilioni ababa ne cipowe ca ku mupashi. (Esaya 65:13, 14) Babombo yu mulimo ukukonka ikambisho lya kwa Yesu ilya kuti: ‘E co kabiyeni, kalengeni aba nko shonse ukuba abasambi, mulebabatisha . . . mulebasambilisha ukubaka fyonse ifyo namwebele.’—Mateo 28:19, 20.

Ukubombelapo pali uku kutumwa takwayanguka. Kwaba ukuwamya amayanda ya bamishonari na maofesi ya Sosaite ukucila pali 100 mwi sonde lyonse. Kabili kufwile ukuba ukukuula Amayanda ya Bufumu ne Fiyanda fya Kulonganinamo ukulongana kukalamba, pa kuti bakapepa ba kwa Yehova bengakwata umwa kulonganina umusuma ku kukoseleshanya. (AbaHebere 10:24, 25) Inshita shimo lintu bamunyinabo balecula pa mulandu wa tuyofi tulengwa ne fyabumbwa, Inte sha kwa Yehova balasangwilako ifilekabilwa.

Tontonkanyeni na pa ndalama ubwingi ishipooswa pa kupulinta. Nga kwakanya pali fyonse bamagazini ba Ulupungu lwa kwa Kalinda ukucila pali 22,000,000 e lyo na Loleni! mupepi na 20,000,000 e bapulintwa cila mulungu. Ukulunda pali uku kupayanya kwa lyonse ukwa ca kulya ca ku mupashi, amamilioni ya fitabo, amabroshuwa, amatepu, na mavidio filapangwa cila mwaka.

Bushe indalama sha kubomfya pa kubomba fyonse fi shifuma kwi? Mu misangulo ya kuitemenwa. Abasangula tabaituntumba nelyo ukufwayo kulumbuka ku bantu, lelo bafwayo kulundululo kupepa kwa cine. E mulandu wine ukupeela kwa musango yo kuletela insansa ne paalo lya kwa Lesa ku balepeela. (Malaki 3:10; Mateo 6:1-4) Nangu fye bana banono aba Nte sha Yehova ni bakapekape ba nsansa. Ku ca kumwenako, pa numa ya kumfwa ukuti icikuuku ca mwela nacibongolola amayanda no konaula ifipe icabipisha mu ncende imo ku United States, Allison uwa myaka ine asangwile badola babili no kulembo kuti: “Ishi e ndalama shonse shintu nasungile mu kacipao kandi, ninjishiba amabuuku, utudoli ne fya kwangasha fya baice banandi fyalionaika. Napamo kuti mwabomfya ishi ndalama ukushitamo ibuuku lya mukashana munono uulingene na ine.” Umwaice umbi uwa myaka 8, Maclean, alembele ukuti alitemenwe nga nshi apo takwafwile munyina nelyo umo mu cikuuku ca mwela. Alundilepo kuti: “Nasangile indalama amadola ya ku Amerika 17 lintu twaleshitisha ifyela fya kufyantika ku mawilo ya bamotoka na batata. E ko fyali ifyo nalefwaya ukushitamo muli ishi ndalama ne mwine, nomba nalangulukilako bamunyina.”—Moneni no mukululo.

Cine cine umutima wa kwa Yehova ulasamwa lintu amona abakalamba kumo na baice baletangishako Ubufumu ukupitila mu ‘kumucindika ku fyuma fyabo.’ (Amapinda 3:9, 10) Ukuba kwena takwaba uwingapeela Yehova ifyuma pantu kale kale fyonse fyakwe. (1 Imilandu 29:14-17) Lelo ukusangwilako ku mulimo lishuko ililenga kapepa ukulanga ukuti alitemwa Yehova. Tuletasha nga nshi kuli bonse abo imitima yabo ibalenga ukusangwilako.

[Futunoti]

[Akabokoshi pe bula 26, 27]

Inshila Bamo Babomfya pa Kusangwilako ku Mulimo wa mwi Sonde Lyonse

Abengi balapaatulapo, nelyo ukupekanyapo, indalama isho babika mu tubokoshi twa misangulo utwalembwapo ati: “Imisangulo ya Mulimo wa mwi Sonde Lyonse uwa Sosaite—Mateo 24:14.” Cila mweshi ifilonganino fituma ishi ndalama ku maofesi yakalamba aya calo conse ku Brooklyn, New York, nelyo ku maofesi yabela mupepi.

Imisangulo ya kuitemenwa iya ndalama na kabili kuti pambi yatumwa mu kulungatika ku Treasurer’s Office, Watch Tower Bible and Tract Society of Pennsylvania, Akabokoshi 33459 Lusaka 10101. Ifibeekobeeko nelyo ifikwatwa fimbi kuti fyasangwilwako na fyo fiine. Kalata umwipi uulelondolola ukuti uyu musangulo bupe bwa mu kulungatika, alingile ukutuminwa pamo ne yi misangulo.

Ukutantika kwa Musangulo wa Cipangano

Indalama kuti shapeelwa ku Watch Tower Society ukupitila mu kutantika kwaibela ukwa kuti, uulepeela nga aalakabilapo fimo, shikabweshiwa kuli wene. Nga mulefwaya ukumfwilapo na fimbi, kuti mwalembela ku Treasurer’s Office, Watch Tower Bible and Tract Society of Pennsylvania, Box 33459, Lusaka 10101.

Ukupeela Kwapekanishiwa

Ukusansha pa kupeele ndalama ukwa kulungatika ne misangulo ya cipangano iya ndalama, kwaliba inshila na shimbi isha kupeelelamo ku kwafwilisha umulimo wa Bufumu mwi sonde lyonse. Pali isho nshila paba:

Inshuwalansi: Watch Tower Society kuti yalumbulwa nga kapokelela wa ndalama mu mitantikile ya inshuwalansi wa bumi nelyo mu mapange ya kuleke ncito nelyo ukupoka penshoni.

Amaakaunti ya ku Banki: Amaakaunti ya ku Banki, amasetifiketi ya ndalama shili ku Banki, nelyo cila akaunti ya kulekelapo incito, kuti yabikwa mu kuseekeshiwa nelyo ukulipilwa ilyo umwine afwa ku Watch Tower Society, ukulingana ne fyo ibanki abikishako indalama lifwaya.

AmaStock na maBond: Amastock na mabond kuti fyasangulwa ku Watch Tower Society ngo bupe bwa mu kulungatika nelyo ukupitila mu kutantika kwa kuti indalama sha malipilo shatwalilila ukulipilwa ku ulesangula.

Icikwatwa ca Mpanga ne Fikuulwa: Icikwatwa ca mpanga ne fikuulwa ifingashitishiwa kuti pambi fyasangulwa ku Watch Tower Society ukupitila mu bupe bwa mu kulungatika nelyo ukwikatila impanga ya ulepeela, uwingatwalilila ukwikalamo ilyo acili umumi. Umo alingile ukwipusha Sosaite ilyo talalembesha ifipepala fya nsambu sha mwi funde isha kupeelelapo icikwatwa icili conse ca mpanga ku Sosaite.

Ifya Cishale no Kuseekesha: Ifipe nelyo indalama kuti fyashiilwa Watch Tower Society mu nshila ya cishale iya mwi funde, nelyo Sosaite kuti yalumbulwa nga kapokelela wa kusuminishanya kwa kuseekesha. Ukuseekesha ukuleafwilisha ukuteyanya kwa mipepele inshita shimo kulapusushako imisonko imo imo.

Ukulingana no mwalola ishiwi lya kuti “ukupeela kwapekanishiwa” uulepeela ukubomfye shi nshila alekabila ukupekanishisha kabela. Pa kwafwilishako abo bengatemwa ukupeela Sosaite ukubomfya inshila sha kupeela kwapekanishiwa, Sosaite yalilembako broshuwa wa mu ciNgeleshi uwa mutwe wa kuti Planned Giving to Benefit Kingdom Service Worldwide. Uyu broshuwa alembelwe ukwasuka amepusho ayengi ayo Sosaite yapokelela pa lwa bupe bwa ku Sosaite, na pa lwa kupeela kwa fipe fya cishale no kuseekesha ku Sosaite. Na kabili mwaba ifyebo fya kwaafwa nga nshi pa lwa kupeela nelyo kuseekesha kwa mpanga ne fikuulwa, ukupeela kwa ndalama, ne fya kubombela pa misonko. Na kabili yalembelwe ku kwaafwa aba ku United States, abalefwaya ukupeela Sosaite ifya bupe fyaibela pali ino ine nshita, nelyo ukuti fikashalile Sosaite lintu bakafwa. Broshuwa alalondolola bwino ifyo bengapekanya nga kukaba ukushiilako abana na balupwa, ne mitantikile yacilapo kuwama pa kuti takwishileba ukulufya ifikwatwa.

Pa numa ya kubelenga broshuwa nelyo ukulembela kwi Desiki lya Kupeela Kwapekanishiwa (Planned Giving Desk), abengi balipeela Sosaite ukubomfye inshila sha kupusushako nga nshi icuma ku misonko yaluma. Bonse abengalembesha ifipepala ku buteko ifilelanga insambu sha mwi funde isha kupeela kwapekanishiwa ku Sosaite, bafwile ukwishibishe Desiki lya Kupeela Kwapekanishiwa pa lwa mitantikile yonse. Bonse abengafwaya broshuwa nelyo abengafwaya ukupeela ukubomfya inshila sha kupeela kwapekanishiwa bafwile ukulembela nelyo ukutumina lamya kwi Desiki lya Kupeela Kwapekanishiwa pa keyala kali pe samba.

The Treasurer’s Office

Watch Tower Bible and Tract Society of Pennsylvania

Box 33459

Lusaka 10101

[Akabokoshi pe bula 28]

Abana Banono na bo ni Bakapekape ba Nsansa!

Pamela uwa myaka 7 alembele ukuti: “Natemwa nga nshi ukumutumina ishi ndalama pa kuti mukatwalilile ukutulembela ifitabo. Lintu twalebomba na batata e lyo nalesunga isho balempako. Namutasha nga nshi pa mulimo wa kuipeelesha untu mulebomba.”

Selena uwa myaka 6 alembele ukuti: “Namutumina amadola ya ku Amerika 6.85, ukuti mukabomfye ku kukuula Amayanda ya Bufumu. Naisangile mu lusuba lintu naleshitisha utwa kunwa twatalala uto nalepanga ukubomfye ndimu.”

Umwaice uwa myaka 8 Thierry alembele ukuti: “Nalitekele inkoko iikota, lintu yatootele no kukusha abana, pakulile mukolwe no musolo. Umusolo naupeele kuli Yehova. Walisukile watoota no kukusha ishikota shitatu, e sho nashitishe no kusangamo ishi ndalama namutumina. Mukashibomfye mu mulimo wa kwa Yehova.”

Sarah uwa myaka 10 alembele ukuti: “Amadola ya ku Amerika 21 ayo namutumina e yo nkwete fye. Napaapaata bomfyeni bwino ishi ndalama. Calyafishe nga nshi pa kushisanga.”

Amber wa myaka mupepi na 12 uuli mu gredi 6 alembele ukuti: “Nalicimfishe abana be sukulu banandi bonse mu kucimfyanya kwaliko ku sukulu, e lyo bansendele ku kuyaimininako isukulu ku kucimfyanya kwa masukulu ukufuma mu maboma, na ko kwine nalilecimfya bonse. Lyene nailefuma uwa cibili mu kucimfyanya kwa masukulu ya mu fitungu. Ifilambu nalepoka monse umo ni ndalama. Napingulapo ukutuma shimo uko ku Sosaite. Nsangile ukuti icalengele ukucimfya ifilambu fyonse fi, ni pa kuti nalibelesha ukulanda amalyashi mu Sukulu lya Butumikishi bwa Teokrasi. Nshaletutuma pa kulanda ku balashi balolekesha pa kusala abalecimfya.”

Karen uwa myaka 6 alembele ukuti: “Namutumina ishi ndalama pa kuti mushipeele kuli Yehova. Mukamwipushe akamwebe ifyo mufwile ukushibomfya. Alishiba fyonse.”

[Ifikope pe bula 25]

Indalama ne fipe fyonse ifyo Inte sha kwa Yehova babomfya mu mibombele yabo fifuma mu misangulo ya kuitemenwa