Twapusukila ku Cikuuku ca Bupe fye, te ku Milimo Yeka

‘Mwapusukila mu citetekelo; . . . Tacafuma mu milimo iyo, pa kuti umuntu nangu umo eba na pa kuitakishisha.’—ABENA EFESE 2:8, 9.

1. Ilyo balebomba imilimo, Abena Kristu bapusana shani na bantu bambi, kabili mulandu nshi?

MUNO nshiku, abengi balayumfwa sana pa milimo babomba, kabili ilingi line balaitakishishapo. Abena Kristu bena te fyo baba. Tabafwaya kuilanga pa milimo babomba, nangu fye milimo ya mu kupepa kwa cine. Kwena balasekelela pa milimo yonse iyo abantu bonse aba kwa Yehova babombela pamo, lelo umuntu umo umo tailanga pa mulimo wakwe. Balishiba ukuti nangu umuntu acite fingi nelyo utunono, ico Yehova aacindika sana, mutima. Onse ukapokelela ubupe bwa mweo wa muyayaya, ni pa mulandu wa kuti akatwalilila ne citetekelo na pa mulandu wa cikuuku ca bupe fye ica kwa Lesa, te pa mulandu wa kutila alibombele imilimo iingi.—Luka 17:10; Yohane 3:16.

2, 3. Bushe Paulo aleitakishisha muli finshi, kabili mulandu nshi?

² Umutumwa Paulo alishibe bwino ico. Ilyo apepele imiku itatu kuli Lesa ukuti afumye “umuunga mu mubili” wakwe, Yehova atile: “Icikuuku candi ica bupe fye cakumana kuli iwe; pantu mu kunaka e mo amaka yandi yalelengwo kufikapo.” Paulo aali uwaiceefya, alisumine ifyo Yehova amwebele kabili atile: “E ico, ndeitakisho kucisha no kwanga mu fya kunaka fyandi, ukuti amaka ya kwa Kristu yekale pali ine ukupala ihema.” Kuti cawama sana nga twaiceefya nga filya Paulo aiceefeshe.—2 Abena Korinti 12:7-9.

³ Paulo alibombele imilimo ya buKristu iingi sana, na lyo line alishibe ukuti ico alebombela fyonse filya te kutila alicenjela ukucila ababiye. Mu kuiceefya, atile: “Kuli ine, umuntu uwacepa ku bacepesha pa ba mushilo bonse, kwapeelwe ici cikuuku ca bupe fye, ku kuyabila ku bena fyalo imbila nsuma pa bukankaala bushingapimwa ubwa kwa Kristu.” (Abena Efese 3:8) Muli aya mashiwi, cailanga fye ukuti Paulo tali ne cilumba kabili taleimona umulungami ukucila ababiye. “Lesa acincintila aba matutumuko, lelo apeela icikuuku ca bupe fye ku baiceefya.” (Yakobo 4:6; 1 Petro 5:5) Bushe na ifwe kuti twaba nga Paulo, no kuiceefya ica kuti tulemona uwacepesha pali bamunyinefwe ukuti na o wine alitucila?

“Mulemona Bambi Ukuti Balimucila”

4. Mulandu nshi limo cingatwafisha ukumona abanensu ukuti balitucila?

⁴ Umutumwa Paulo afundile Abena Kristu ukuti: “Mwicita icintu nangu cimo ku lubuli nelyo ku matutumuko, lelo mu bupete mulemona bambi ukuti balimucila.” (Abena Filipi 2:3) Ico kuti cayafyako kucita, sana sana nga twalipeelwako imilimo imo mu cilonganino. Nakalimo icingalenga sana ubwafya, kusongwa no mupashi useekele muli cino calo uwa kucimfyanya. Nakalimo ukufuma ku bwaice, twalibelesha ukucimfyanya, twalecimfyanya na bana banensu pa ng’anda, nelyo na balya twalesambilila na bo ku sukulu. Nakalimo bonse baletukoselesha ukuba kalapashi wa fyangalo ku sukulu nelyo ukucimfya isukulu lyonse pa mashindano. Kwena, tacabipa ukubombesha muli conse icisuma ico tulecita. Lelo, Abena Kristu tababombela ukuilanga ku bantu, babombela ukuti ico balecita cilondoloke, nakalimo no kwafwako na banabo abalekabila fimo. Lelo, lyonse fye ukufwaya ukuba aba ntanshi muli fyonse ifyo tulecita, kuti kwatuletelela. Kuti caba shani ifyo?

5. Ni kwi umupashi wa kucimfyanya wingafisha umuntu nga tacenjele?

⁵ Umuntu nga tacenjele, umupashi wa kucimfyanya kabili uwa kuyumfwa kuti walenga atendeka ukusaalula abanankwe no kuibililika. Kuti atendeka ukufimbila abanankwe pa fyo bakampuka na pa milimo bapeelwa. Amapinda 28:22 yatila: “Umuntu wa menso ya lunkumbwa apamfiwa ku kumone fyuma; taishibo kuti ukubulwa kukamwishila.” Cilumba cilumba kuti atendeka no kufwaya ukubomba imilimo iyo ashapeelwa. Pa kuti cimoneke kwati talelufyanya, kuti atendeka ukuilishanya no kulengulula bambi, imisango iyo Abena Kristu baebwa ukutalukako. (Yakobo 3:14-16) Kanshi uwa musango yo kuti atendeka ukuba no mutima wa bukaitemwe.

6. Bushe Baibolo itusoka shani ukutaluka ku mupashi wa kucimfyanya?

⁶ E ico kanshi, Baibolo ikoselesha Abena Kristu ukuti: “Twiba na matutumuko, twilaisongelekanya ku kucimfyanya, twilafimbilana.” (Abena Galatia 5:26) Umutumwa Yohane alandile pa Mwina Kristu munankwe uo cimoneka kwati aali na matutumuko. Yohane atile: “Nalembele fimo ku cilonganino, lelo Diotrefe, uwatemwa ukuba uwa ntanshi pali bene, tapokelela no mucinshi conse icifuma kuli ifwe. E ico, nga naisa, nkebukisha imilimo yakwe iyo atwalilila ukucita, pa kutubwabwatila ifyebo fya bubifi.” Awe mwandini ca bulanda ku Mwina Kristu ukucita icintu ca musango yo!—3 Yohane 9, 10.

7. Cinshi Umwina Kristu afwile ukucenjela na co muli cino calo umo abantu batemwa ukucimfyanya mu ncito babomba?

⁷ Kwena, ukulanda fye icishinka, mu milimo imo iyo Umwina Kristu engabomba, kuti mwaba ukucimfyanyako na bantu bambi. Ica kumwenako fye, limbi kuti Umwina Kristu abomba incito ya kupanga ifintu nelyo iya kubombela abantu imilimo imo. Nakalimo na bambi balapanga ifintu fimo fine ifyo na o apangako, nelyo na bo babomba incito imo ine na ilya abomba. Na mu fintu fya musango yo mwine, Umwina Kristu afwile ukubomba no mucinshi, ukutemwa no kulangulukilako. Tafwile kuipoosa mu misango yabindwa ku buteko nelyo iishili ya Bwina Kristu. Tafwile apange shina lya kuti aiminina pa kucimfya abanankwe, fyonse kano ni o. Tafwile kumona kwati ukucimfya abanankwe e cacindama sana. Kanshi apo Umwina Kristu tafwile kucishamo ukucimfyanya na banankwe mu milimo ya buntunse fye, pali bufi ku milimo ya bukapepa!

“Te Kuilinganya ku Muntu Umbi Iyo”

8, 9. (a) Mulandu nshi baeluda tabacimfyanishanya? (b) Cinshi twingalandilo kuti ilembo lya 1 Petro 4:10 libomba ku babomfi ba kwa Yehova bonse fye?

⁸ Mu kupepa kwabo, Abena Kristu bafwile ukuba ne mibele yalandwapo mu mashiwi yapuutwamo ayatila: “Lelo umo na umo ashininkishe umulimo wakwe wine, e lyo akaba na pa kwangila ku mwine eka, te kuilinganya ku muntu umbi iyo.” (Abena Galatia 6:4) Baeluda mu cilonganino, balishiba ukuti tabafwile kucimfyanya na baeluda banabo, balikatana kabili babombela pamo nga filya umubili waba. Balicindika imilimo iyo umo umo uwa mwi bumba lyabo abomba pa kuti icilonganino conse cimwenemo. Kanshi baeluda tabacimfyanya, baba e ca kumwenako cisuma ica kwikatana kuli bonse mu cilonganino.

⁹ Baeluda bamo kuti babomba bwino sana imilimo imo ukucila bambi pa mulandu wa kuti nakalimo bakalambako mu myaka, nangu balikokola muli bueluda ukucila bambi, nelyo balikampuka fye icifyalilwa, e lyo napamo balicenjela sana ukwishiba ifintu. E mulandu wine baeluda bapeelelwa imilimo yalekanalekana mu kuteyanya kwa kwa Yehova. Tabailinganya ku banabo, lelo bebukisha ukufunda kwa mu Baibolo ukwa kuti: “Ifyo umo na umo apokelela ica bupe, fibomfyeni ku kupyungilana nga bakangalila basuma aba cikuuku ca bupe fye ica kwa Lesa ica misango misango.” (1 Petro 4:10) Na kuba, ili lembo libomba ku babomfi ba kwa Yehova bonse fye, pantu bonse twalipeelwako ica bupe ca kwishiba bwino bwino ifya mu Baibolo ne shuko lya kubombako umulimo wa Bena Kristu uwa kushimikila.

10. Cinshi cingalenga ukuti Yehova apokelele umulimo wesu uwashila?

¹⁰ Pa kuti Yehova ateemunwe ku mulimo wesu uwashila, kano tulebombela umulandu wa kuti twalimutemwa kabili twali-ipeelesha kuli wena, te kubombela ukuti tucimfye bambi. Kanshi tufwile ukwishiba bwino bwino ico tubombela imilimo ya kutwala pa ntanshi ukupepa kwa cine. Kwena, takwaba umuntu nangu umo uwingeshiba bwino bwino ifili mu mutima wesu ilyo tulebomba, “lelo Yehova amona mu mutima.” (1 Samwele 16:7; Amapinda 24:12) Kanshi, limo natuleipusha atuti, ‘Cinshi cilenga ukuti ndebomba imilimo ya bukapepa?’—Amalumbo 24:3, 4; Mateo 5:8.

Ukwishiba Bwino Bwino Ifyo Tufwile Ukumona Imilimo ya Bukapepa

11. Mepusho nshi ayasuma umuntu engepusha pa mulimo wesu uwa kushimikila?

¹¹ Nga ca kutila umutima e wacindama pa kuteemuna Yehova, ninshi tufwile ukumona shani imilimo ya bukapepa? Nga tulebomba umulimo wa kushimikila no mutima onse, bushe calicindama ukulemba lipoti no kusunga ifyo twabombele? Aya mepusho yasuma, pantu tatulefwaya cilemoneka kwati impendwa nelyo amanambala fyalicindama ukucila imilimo tubomba, nelyo cilemoneka kwati ukutuma lipoti umusuma e co fye Umwina Kristu afwile ukubikako amano yakwe yonse ilyo alebombela Lesa.

12, 13. (a) Finshi fimo fimo ifilenga tuletuma lipoti wa mulimo wesu uwa mwi bala? (b) Busuma nshi bwaba mu kumona lipoti wa mwi sonde lyonse uwa mulimo wesu uwa kushimikila?

¹² Icitabo ca Abaiteyanya Ukucita Ukufwaya kwa kwa Yehova citila: “Abakonshi ba kwa Yesu Kristu aba pa kubala balipooseleko sana amano ku malipoti pa fyo umulimo wa kubila walelunduluka. (Marko 6:30) Ibuuku lya mu Baibolo ilya Imilimo lishimika ukuti kwali abantu mupepi na 120 ilyo umupashi wa mushilo waikile pa basambi pa Pentekoste. Lyene mu kwangufyanya impendwa ya basambi yafikile 3,000 lyene mu kwangufyanya abasambi bafikile 5,000. . . . (Imilimo 1:15; 2:5-11, 41, 47; 4:4; 6:7) Ilyashi pali uku kulunduluka lifwile lyakoseshe nga nshi abasambi!” E mulandu wine Inte sha kwa Yehova pali lelo babikilako amano ku kulemba bwino bwino amalipoti ya mulimo wabo uwa kushimikila uwa mwi sonde lyonse ilyo balecita filya Yesu asosele ilyo atile: “Ne mbila nsuma iyi ya bufumu ikashimikilwa pano isonde ponse ku kubo bunte ku nko shonse; e lyo ne mpela ikesa.” (Mateo 24:14) Amalipoti yalalenga twaishiba bwino bwino ifyo umulimo ulebombwa mwi sonde lyonse. Yalatulanga ukulekabilwa abantu na bambi aba kubomba, umusango wa mpapulo ne mpendwa ifilekabilwa pa kuti umulimo wa kushimikila uleya pa ntanshi.

¹³ E ico kanshi, ukutuma amalipoti kulalenga twabomba bwino umulimo twatumwa uwa kushimikila abantu imbila nsuma ya Bufumu. Na kabili, tulakoseleshiwa ukumfwa ifyo bamunyinefwe mu fyalo fimbi balebomba. Tulatemwa ukumfwa ukuti bamunyinefwe mwi sonde lyonse nabafula, cilalenga na ifwe twabombesha, pantu tulamona ukuti kanshi Yehova alepaala umulimo wesu. Awe mwandini cilomfwika bwino sana no kwishiba fye ukuti lipoti wenu na o nasanshiwamo muli lipoti wa mwi sonde lyonse! Lipoti wesu fweka munono sana nga kulinganya kuli lipoti onse pamo uwa mwi sonde lyonse, lelo Yehova alamona umulimo wesu. (Marko 12:42, 43) Mwilaba no kuti nga tamutumine lipoti wenu, ninshi mwalenga lipoti wa mwi sonde lyonse ukubulila.

14. Ukulunda pa kushimikila no kusambilisha, finshi na fimbi tufwile ukucita muli bukapepa bwesu kuli Yehova?

¹⁴ Ca cine ukuti ifingi ifyo umuntu abomba pa kuti atwalilile ukube Nte yaipeela iya kwa Yehova tafilembwa na pali lipoti. Ica kumwenako fye, pali lipoti tapaba isambililo lya Baibolo ilya pa lwakwe ilya lyonse, tapaba inshita asangwa ku kulongana kwa Bwina Kristu no kwasukapo, imilimo abomba iya mu cilonganino, ifyo afwa abasumina banankwe abali mu kukabila, imisangulo apeela ku mulimo wa Bufumu uwa mwi sonde lyonse, na fimbi fye fingi. Kanshi, nangu line lipoti wesu uwa mulimo wa mwi bala alicindama kabili alatwafwa no kutwalilila ukubombesha mu mulimo no kukanaba abanang’ani, tufwile ukwishiba ukuti kwaliba na fimbi ifyacindama. Tatufwile ukumona kwati lipoti wesu ni lasenshi wa ku mupashi, nelyo kwati e citupa ca kupokelapo ubumi bwa muyayaya.

“Abapimpilile Milimo Isuma”

15. Nangu ca kutila imilimo yeka fye te kuti itupusushe, cinshi yacindamina?

¹⁵ Ukwabula no kutwishika, nangu ca kutila imilimo yeka fye te kuti itupusushe, ukucindama kwena yalicindama. E mulandu wine Abena Kristu betilwa “abantu bakwe abaibela, abapimpilile milimo isuma,” kabili e co bakoseleshiwilwa no “kucincishanya ku kutemwa kabili ku kubombe milimo isuma.” (Tito 2:14; AbaHebere 10:24) Na kabili, ukwabula ukulamba, kalemba wa Baibolo na umbi, Yakobo, atila: “Filya fine umubili uwabula umupashi wafwa, e fyo ne citetekelo icabula imilimo na co ninshi califwa.”—Yakobo 2:26.

16. Cinshi icacindama ukucila ne milimo, lelo cinshi tufwile ukucenjelako?

¹⁶ Nangu ca kutila imilimo isuma yalicindama, umutima tuba na o ilyo tulebomba walicilapo ukucindama. Kanshi, cisuma limo ukuceeceeta umutima wesu. Kwena, takwaba nangu umo uwingeshiba bwino bwino ifili mu mutima wa munankwe, e co, tucenjele pa kuti twilapingula abanensu. Baibolo itwipusha ukuti: “Ni wani pa kuti ulepingula umubomfi wa mu ng’anda uwa umbi?” Icasuko citila: “Ni kuli shikulu wakwe wine eminina atemwa ukuwa.” (Abena Roma 14:4) Yehova, Shikulu wa bonse, na Kapingula wakwe uwasontwa Kristu Yesu, e bakatupingula, tabakatupingwile ku milimo yeka, bakamona na mu mutima, icilenga ukuti tulebomba iyo milimo, amashuko twapeelwa, ukutemwa kwesu kuli bene no kuipeelesha kwesu. Ni Yehova fye eka na Kristu Yesu e bengamona bwino bwino nga tulacita ifyo Abena Kristu bakonkomeshiwa mu mashiwi ya mutumwa Paulo aya kuti: “Uibikilisheko ukuipeela kuli Lesa ngo wasuminishiwa, umubomfi uushingaba na ca kukwatilapo insoni, uulungika bwino icebo ca cine.”—2 Timote 2:15; 2 Petro 1:10; 3:14.

17. Ilyo tuleibikilishako, mulandu nshi tufwile ukwibukishisha Yakobo 3:17?

¹⁷ Yehova tapinda ukuti tucite ifyo tushingakumamo. Yakobo 3:17 atila, pa fingi ifyo “amano ayafuma mu muulu,” yaba, cimo ca kuti “yalinakilila.” Nga twapashanya Yehova muli iyi mibele, awe ninshi tuli ba mano kabili twabomba icikankaala nga nshi! Tatwakaipatikishe ukuti tucite ifyo tushingakumamo, kabili tatwakenekele ifingi sana kuli bamunyinefwe ukucila apapela amaka yabo.

18. Cinshi tukaba na co nga twaishiba bwino bwino ifyo tufwile ukumona imilimo ya bukapepa ne cikuuku ca bupe fye ica kwa Yehova?

¹⁸ Nga twaishiba bwino bwino ifyo tufwile ukumona imilimo yesu iya bukapepa ne fyaba icikuuku ca bupe fye ica kwa Yehova, tukaba no kusekelela ukwaba e cishibilo ca babomfi ba cine aba kwa Yehova. (Esaya 65:13, 14) Nangu tubombe ifingi nelyo utunono, tukasekelela ukuti Yehova alefumfumwina amapaalo pe bumba lya bakapepa bakwe aba mwi sonde lyonse. Tukatwalilila ‘ukupepa no kupaapaata pamo no kutootela,’ ukulomba kuli Lesa ukuti aletwafwa ukuibikilishako. Lyena, ukwabula no kutwishika, ‘umutende wa kwa Lesa uwacila amatontonkanyo yonse ukalinda imitima [yesu] na matontonkanyo [yesu] muli Kristu Yesu.’ (Abena Filipi 4:4-7) Awe mwandini, kanshi kuti twasansamuka no kukoseleshiwa ukwishiba ukuti icikatupususha, te milimo yeka, lelo cikuuku ca bupe fye ica kwa Yehova!

Bushe Kuti Mwalondolola Umulandu Abena Kristu

• bashiyumfwila pa milimo yabo?

• basengaukila umupashi wa kucimfyanya?

• batumina lipoti wa mulimo wabo uwa Bwina Kristu uwa kushimikila?

• bashipingwila Abena Kristu banabo?

[Icikope pe bula 15]

“Icikuuku candi ica bupe fye cakumana kuli iwe”

[Ifikope pe bula 16, 17]

Eluda umo umo alasekelela pa mulimo abombako ukuti icilonganino conse cimwenemo

[Ifikope pe bula 18, 19]

Nga tamutumine lipoti wenu, ninshi mwalenga lipoti wa mwi sonde lyonse ukubulila