Finshi Filenga ‘Mulesansamuka’?
1. Finshi filenga tulesansamuka lyonse pa mpela ya mweshi?
1 Finshi filenga ‘mulesansamuka’ nga bamweba ukutuma lipoti ya mulimo wa mwi bala pa mpela ya mweshi? (Gal. 6:4) Nga ni mwe bapainiya baibela abatuma ama-awala 130 nelyo bakasabankanya abasuminishiwa ukutuma amamineti 15, 30 nelyo 45 bonse tulingile ukusekelela pantu tulabombela Yehova no mweo onse.—Amalu. 100:2.
2. Mulandu nshi tulingile ukulabombesha mu mulimo wa kwa Yehova?
2 Apo Yehova ni Shikulu Mulopwe uwabumba ifintu fyonse, tulingile ukumupeela ifisuma. (Mal. 1:6) Twali-ipeela kuli ena ku kucita ukufwaya kwakwe pantu twalimutemwa. Kanshi lyonse pa mpela ya bushiku nelyo pa mpela ya mweshi, nga natwishiba ukuti natupeela ‘ifisabo ifyabalilapo ukupya,’ e kutila ukubombela Yehova no mweo wesu onse, ninshi tukalasansamuka. (Amapi. 3:9) Lelo nga tuleumfwa ukutila kuti twabombesha ukucila pa fyo tulebomba nomba, tulingile ukumona ifyo twingacita pa kuti tulebombesha.—Rom. 2:15.
3. Mulandu nshi cishawamina ukulailinganya ku bantu bambi?
3 “Te Kuilinganya ku Muntu Umbi Iyo”: Te kuti ciwame ukulailinganya ku bantu bambi nangu ukulinganya ifyo tulebomba ku fyo twalebomba kale ilyo twakwete sana amaka. Ifintu filaaluka e lyo twalipusana mu fyo twacenjelamo. Ukuilinganya kuli bambi ilingi line, kulenga twalacimfyanya nelyo ukutendeka ukuimona kwati tatwacindama. (Gal. 5:26; 6:4) Yesu talelinganya abantu ku bantu bambi. Lelo aletasha abantu abalebomba ukulingana na papelele amaka yabo.—Marko 14:6-9.
4. Finshi twingasambilila ku mulumbe wa kwa Yesu uwa matalanti?
4 Mu mulumbe wa kwa Yesu uwa matalanti, ababomfi bonse balibapeele amatalanti ‘ukulingana na maka yabo.’ (Mat. 25:15) Ilyo shikulwibo abwelele no kufwaya ukwishiba ifyo babombele, alitashishe balya ababombele ukulingana na papelele amaka yabo kabili balisansamukile pamo na shikulwibo. (Mat. 25:21, 23) Na ifwe nga tulebombesha mu mulimo wa kubila pa Bufumu, Lesa kuti atupaala kabili twakulasansamuka!