ISAMBILILO 51
Kuti Mwacita Shani pa Kuti Mulelanda Ifingalenga Yehova Alasekelela?
Ilyo Yehova atubumbile alitupeele ica bupe icisuma, e kutila amaka ya kulanda. Bushe alabikako amano ku fyo tubomfya ici ica bupe ico atupeela? Ee alabikako amano! (Belengeni Yakobo 1:26.) Bushe kuti twabomfya shani ica bupe ca kulanda mu nshila iingalenga Yehova alasekelela?
1. Bushe tufwile ukulabomfya shani ica bupe ca kulanda?
Baibo itweba ukuti “mulekoseleshanya kabili mulekuulana.” (1 Abena Tesalonika 5:11) Bushe namwishibako bamo abengakabila ukubakoselesha? Finshi mwingacita pa kuti mubakoseleshe? Mulebeba ukuti balicindama kuli imwe. Nalimo kuti mwabeba ifyo mwatemwa sana pali bena. Bushe kuli ilembo ilyo mulemona ukutila kuti lyakoselesha bamo abo mwaishiba? Kwena kwaliba amalembo ayengi ayo mwingabomfya. Lelo muleibukisha ukuti inshila mwalandilamo kuti yakoselesha umuntu nelyo iyo. Kanshi lyonse mule-esha ukuba abafuuka kabili aba cikuuku ilyo mulelanda.—Amapinda 15:1.
2. Finshi ifyo tushilingile ukulanda?
Baibo itila: “Mwilaleka amashiwi ayabola yalefuma mu tunwa twenu.” (Belengeni Abena Efese 4:29.) Kanshi ici cilepilibula ukuti tatulingile ukulalanda ifyabipa nelyo ukweba abantu amashiwi ayengabakalifya. Na kabili tatufwile ukubepesha abantu ubufi, no kulanda ifyabipa pali bena.—Belengeni Amapinda 16:28.
3. Cinshi cingatwafwa ukulalanda ifingakoselesha abantu banensu?
Ilingi line ifyo tulanda filanga ifyaba mu mutima wesu e lyo ne fyo tutontonkanyapo. (Luka 6:45) Kanshi tulingile ukulaesha na maka ukulatontonkanya pa fintu ifisuma, e kutila ifyalungama, ifyasanguluka, ifyatemwikwa, e lyo ne fyo abantu batasha. (Abena Filipi 4:8) Pa kuti tuletontonkanya pali ifi fintu, tulingile ukulasala bwino ifya kuleseshamo icitendwe e lyo ne fibusa. (Amapinda 13:20) Na kabili tulingile ukulatontonkanishisha libela pa fyo twalalanda e lyo ne nshila twalalandilamo. Moneni ifyo amashiwi yenu yengalenga abantu bambi baumfwa bwino nelyo baumfwa ububi. Baibo itila: “Ifyo muntu alanda ukwabula ukutontonkanyapo filasaula kwati lupanga, lelo ululimi lwa wa mano lulaposha.”—Amapinda 12:18.
SAMBILILENI NA FIMBI
Moneni ifyo mwingacita pa kuti mulelanda ifingalenga Yehova alesekelela kabili ifingakoselesha abantu.
4. Mulebika amano ku fyo mulefwaya ukulanda e lyo ne nshila mwalalandilamo
Bonse fye inshita shimo tulalanda ifintu ifilenga twaisalanguluka pa numa. (Yakobo 3:2) Belengeni Abena Galatia 5:22, 23, lyena lanshanyeni aya mepusho:
Mibele nshi pali iyi iyo mwingapepelapo iingamwafwa ukulalanda ifingalenga Yehova alasekelela? Bushe iyi imibele kuti yamwafwa shani?
Belengeni 1 Abena Korinti 15:33, lyena lanshanyeni ici cipusho:
Bushe ifya kuleseshamo icitendwe ne fibusa musala kuti fyalenga mwaba ne milandile ya musango nshi?
Finshi fingalenga mulelanda ifyabipa nelyo ifisuma?
Belengeni Lukala Milandu 3:1, 7, lyena lanshanyeni ici cipusho:
Ni lilali cingaba bwino ukwikala tondolo nelyo ukulolela inshita iisuma iya kulanda?
5. Mulelanda ifisuma pa bantu banenu
Kuti twacita shani pa kuti tatusaalwile abantu ilyo tulelanda, nelyo pa kuti tatulandile amashiwi ayengalanga ukuti tatwaba ne cikuuku? Tambeni VIDIO, lyena lanshanyeni amepusho yakonkapo.
Cinshi munyinefwe alefwaila ukuleka ukulanda ifyabipa pa bantu bambi?
Finshi acitile pa kuti aleke?
Belengeni Lukala Milandu 7:16, lyena lanshanyeni ici cipusho:
Finshi tufwile ukulaibukisha nga twatunkwa ukulanda ifyabipa pa bantu?
Belengeni Lukala Milandu 7:21, 22, lyena lanshanyeni ici cipusho:
Bushe ifi ifikomo kuti fyamwafwa shani ukukanakalipa bwangu nga ca kuti umuntu alanda amashiwi ayabipa pali imwe?
6. Muleba ne cikuuku ilyo mulelanda na balupwa wenu
Yehova afwaya tuleba ne cikuuku e lyo no kutemwa ilyo tulelanshanya na balupwa wesu. Tambeni VIDIO, lyena lanshanyeni icipusho cakonkapo.
Finshi fingamwafwa ukuba ne cikuuku ilyo mulelanda na balupwa wenu?
Belengeni Abena Efese 4:31, 32, lyena lanshanyeni ici cipusho:
Milandile ya musango nshi iingalenga aba mu lupwa baikatana?
Yehova alilandile ifyo aleumfwa pa Mwana wakwe Yesu. Belengeni Mateo 17:5, lyena lanshanyeni ici cipusho:
Kuti twapashanya shani Yehova ilyo tulelanda na ba mu lupwa??
Mulefwayako inshila sha kutashishamo abantu bambi
ABANTU BAMO BATILA: “Ine ndalanda nshisakamana nangu cimo. Uo cakalipa lwakwe.”
Bushe ukucita ifi kwaliba fye bwino? Mulandu nshi mwalandila ifyo?
IFYO MUSAMBILILE
Ifyo tulanda kuti fyakoselesha abantu nelyo ukubakalifya. Kanshi tulingile ukutontonkanyapo bwino pa fyo twalalanda, inshita twalalanda, e lyo ne nshila twalalandilamo.
Ukupitulukamo
Kuti mwabomfya shani ica bupe ca kulanda ku kwafwa abantu?
Mashiwi ya musango nshi ayo mushilingile ukulanda?
Finshi fingatwafwa ukulaba aba cikuuku lyonse no kulakoselesha abantu mu fyo tulanda?
ISHIBILENIPO NA FIMBI
Finshi tulingile ukucita pa kuti tulelanda ifingakoselesha abantu?
Sambilileni ifingamwafwa ukukanalanda ifyabipa.
“Bushe Ukulanda Amashiwi ya Musalula Kwalibipa?” (Icipande ca pa jw.org)
Moneni ifyo mwingacita pa kuti tamutunkilwe ukutendeka ukucita ulwambo.
Moneni ifyo Yehova ayafwile umwaume umo ukuleka ukulanda ifyabipa.