Ukunakila Kwabamo Buseko ku Bulashi
“Mwaumfwile ku mutima.”—ABENA ROMA 6:17.
1, 2. (a) Mupashi nshi uli uwamonekesha mu calo ilelo, kabili cinshi caba e ntulo ne fya kufumamo fya uko? (b) Ni shani fintu ababomfi baipeela aba kwa Yehova balanga ukuti balipusanako?
“UMUPASHI uulebomba nomba mu bana ba bucintomfwa” mu kutulumusha uli uwamonekesha ilelo. Waba mupashi wa bucaibela bushalamwa, uutuntuka kuli Satana, “kateka wa bucibinda bwa mu lwelele.” Uyu mupashi, uyu ‘umwela,’ nelyo imibele ya mutima iyapulamo iya kaso no kubulwe cumfwila, utuninkisha ‘ubulashi,’ nelyo amaka, pa ciputulwa cikalamba ica mutundu wa muntu. Uyu e mulandu umo untu icalo cilepitila mu cainikwa ubwafya bwa bulashi.—Abena Efese 2:2.
2 Mu kubamo insansa, ababomfi baipeela aba kwa Yehova ilelo tabesusha bapwapwa babo aba ku mupashi no yu ‘mwela’ wakowela, nelyo umupashi wa bucipondoka. Balishiba ukuti ‘ubukali bwa kwa Lesa buleisa pa bana ba bucintomfwa.’ Umutumwa Paulo alundapo kuti: “E ico mwiyampana na bo.” (Abena Efese 5:6, 7) Ukucila, Abena Kristu ba cine balatukuta ‘ukwisulamo Umupashi wa [kwa Yehova],’ kabili bapokelela “amano ayafuma mu muulu,” ayaba aya “musangwela, e lyo ya mutende, ya mutembo, ya bupete.”—Abena Efese 5:17, 18; Yakobo 3:17.
Ukunakila kwa Kuitemenwa Kuli Bumulopwe bwa kwa Yehova
3. Cinshi caba e lufungulo ku kunakila kwa kuitemenwa, kabili lisambililo nshi likalamba lintu ilyashi lya kale litusambilisha?
3 Ulufungulo ku kunakila kwa kuitemenwa lwaba kwishiba ubulashi bwakwate nsambu sha mwi funde. Ilyashi lya kale ilya mutundu wa muntu lilanga ukuti ukukaana bumulopwe bwa kwa Yehova takuleta insansa. Ukukaana kwa musango yo takwaletele insansa kuli Adamu na Efa, nelyo fye kuli kasongelekanya wa kupondoka kwabo, Satana Ciwa. (Ukutendeka 3:16-19) Mu mibele yakwe iya ndakai iyabotelela, Satana ali ne “cipyu cikalamba” pantu naishiba ukuti inshita yakwe naipipa. (Ukusokolola 12:12) Umutende ne nsansa ifya mutundu wa muntu, ee, ifya bubumbo bonse, fyashintilila pa kwishiba mu bubumbo bonse bumulopwe bwalungama ubwa kwa Yehova.—Ilumbo 103:19-22.
4. (a) Musango nshi uwa kunakila ne cumfwila fintu Yehova afwaya ababomfi bakwe ukulangisha? (b) Ni ku lwa cinshi tulingile ukuba abashininwa, kabili ni shani fintu kemba wa malumbo alumbulula ici?
4 Nalyo line, pa mulandu wa mibele yakwe iyashikatala mu nshila ya cipesha amano, Yehova tekushiwa ne cumfwila catalalila. Wa maka, e kwena, wa maka icine cine! Lelo te wa culukusu. Aba ni Lesa wa kutemwa, kabili afwaya ifibumbwa fyakwe ifya mucetekanya ukumumfwila mu kuitemenwa, ukufuma ku kutemwa. Afwaya bene ukunakila kuli bumulopwe bwakwe pa mulandu wa kuti balasala no mutima onse ukuibika abene pe samba lya bulashi bwakwe ubwalungama kabili ubwakwate nsambu sha mwi funde, ukushininwa ukuti takwingabako nangu cimo icacilapo kuwama kuli bene ukucila pa kumfwila wene kuli pe na pe. Umusango wa muntu Yehova afwaya mu kubumbwa kwakwe konse wakanako ukuyumfwa kwa kwa kemba wa malumbo uwalembele ukuti: “Amalango ya kwa Yehova yafikapo, yabweseshamo umweo; ukushimika kwa kwa Yehova kwa cishinka, kulengo wapelwa amano ukubo wa mano; ifya kulangulula fya kwa Yehova fyalitambalala, filengo mutima ukusamwa; ifunde lya kwa Yehova lyalisanguluka, libuutusha pa menso; akatiina ka kuli Yehova kalisanguluka, kaiminina ndi pe; ifya bupingushi fya kwa Yehova fya cine, fyalungama fyonse fine.” (Ilumbo 19:7-9) Ukucetekela kwabulo kushako mu kulinga no kulungama kwa bumulopwe bwa kwa Yehova—iyi ifwile ukuba e mibele yesu iya mutima nga ca kuti tulefwaya ukwikala mu calo cipya ica kwa Yehova.
Ukunakila Kwabamo Buseko ku Mfumu Iyesu
5. Ni shani fintu Yesu alambwilwe pa cumfwila cakwe, kabili cinshi cintu mu kuitemenwa tusumina?
5 Kristu Yesu umwine wine aba ca kumwenako casumbukisha ica kunakila kuli Wishi wa ku muulu. Tubelenga ukuti “aipetamike no kubo wa kunakila ukufika na ku mfwa, awe ukufika ku mfwa ya pa capindama.” Paulo alundapo kuti: “E ico na Lesa amusansabike, no kumupeele shina ilyacila amashina yonse; ukuti kwi shina lya kwa Yesu ikufi lyonse likafukame, ilya mu muulu ne lya pano nse ne lya pa nshi ya calo, no lulimi lonse lukasose, ukuti, Yesu Kristu e Shikulu; kube ubukata kuli Lesa Shifwe.” (Abena Filipi 2:8-11) Ee, mu buseko tulafukama pa ntanshi ya Ntungulushi yesu kabili Imfumu ileteka, Kristu Yesu.—Mateo 23:10.
6. Ni shani fintu Yesu ashininkisha ukuba inte kabili katungulula wa bantu na bantu, kabili ni shani fintu “Bukateka” bwakwe bukatwalilila pa numa ya bucushi bukalamba?
6 Ulwa kwa Kristu nge Ntungulushi yesu, Yehova aseseme ukuti: “Moneni, namupeele ukube nte ku bantu na ’bantu, cilongoshi kabili mushika wa bantu na ’bantu.” (Esaya 55:4) Ukupitila mu butumikishi bwakwe ubwa pe sonde na pa kutungulula umulimo wa kushimikila ukufuma mu muulu pa numa ya mfwa yakwe no kubuushiwa, Yesu aliilanga umwine ukuba “inte ya cishinka kabili iya cine” iya kwa Wishi ukulola ku bantu ba nko shonse. (Ukusokolola 3:14; Mateo 28:18-20) Amabumba ya nko aya musango yo nomba yaleimininwako mu mpendwa shileingilishiwako kwi “bumba likalamba,” abakapusunsuko “Bucushi bukalamba” pe samba lya butungulushi bwa kwa Kristu. (Ukusokolola 7:9, 14) Lelo ubutungulushi bwa kwa Yesu tabupwila apo. “Bukateka” bwakwe bukaba bwa myaka ikana limo. Ku bantunse ba cumfwila, akekalila kwi shina lyakwe ilya “Kabilo wa cipesha amano, Mulungu impalume; Wishi wa nshita pe, Cilolo wa mutende.”—Esaya 9:6, 7; Ukusokolola 20:6.
7. Nga ca kuti tulefwaya Kristu Yesu ukututungulula ku “tumfukumfuku twa menshi ya mweo,” cinshi tufwile ukucita ukwabulo kushingashinga, kabili cinshi cikatulenga ukuba abatemwikwa kuli Yesu na Yehova?
7 Nga ca kuti tulafwaya ukunonkelamo ukufuma ku “tumfukumfuku twa menshi ya mweo” uko Umwana wa mpaanga, Kristu Yesu, aletungulula abantunse ba mitima yalungama, tufwile ukwabulo kushingashinga ukushininkisha ku nshila yesu iya ncitilo ukuti mu buseko tulanakila ku bulashi bwakwe nge Mfumu. (Ukusokolola 7:17; 22:1, 2; linganyako Ilumbo 2:12.) Yesu alondolwele ukuti: “Nga mwantemwa kuti mwabaka amafunde yandi. Uukwete amafunde yandi no kuyabaka, wene ninshi e wantemwa; no wantemwa akatemwikwa kuli Tata, na ine nkamutemwa.” (Yohane 14:15, 21) Bushe ulafwaya ukutemwikwa kuli Yesu na kuli Wishi? Lyene ba uwanakila ku bulashi bwabo.
Bakangalila mu Buseko Balomfwila
8, 9. (a) Cinshi cintu Kristu apayanya ku kukuulilila icilonganino, kabili ni mu mbali nshi aba baume balingile ukuba ifya kumwenapo ku mukuni? (b) Ni shani fintu ukunakila kwa bakangalila ba Bwina Kristu kwapashanishiwa mwi buuku lya Ukusokolola, kabili ni shani fintu balingile ukufwaya “umutima wa kuumfwa” lintu balebomba pa milandu ya bupingushi?
8 “Ulukuta lunakila kuli Kristu.” Pamo nga Kangalila wa ciko, alipayanye “fya bupe ku bantu” “ku kukuula” icilonganino. (Abena Efese 4:8, 11, 12; 5:24) Aba baume bakalamba lwa ku mupashi balyebwa ‘ukucema umukuni uwaba kuli bene,’ te ‘kuumyo lupaka pa baseekeshiwa kuli bene, kano ukube ca kumwenako ku mukuni.’ (1 Petro 5:1-3) Umukuni waba wa kwa Yehova, na Kristu e “mucemi musuma” wa uko. (Yohane 10:14) Apantu bakangalila mu kulinga benekela ukubombela pamo kwa kuitemenwa ukufuma ku mpaanga shintu Yehova na Kristu babiika mu kusakamana kwabo, abene bene balingile ukuba ifya kumwenako fishaiwamina ifya kunakila.—Imilimo 20:28.
9 Mu mwanda wa myaka uwa kubalilapo, bakangalila basubwa baimininweko mu mampalanya nga ababa “mu,” lupi lwa kwa Kristu ulwa ku kulyo, ukulangilila ukunakila kwabo kuli wene pamo ngo Mutwe wa cilonganino. (Ukusokolola 1:16, 20; 2:1) Tacacepako ilelo, bakangalila mu kati na nkati ka filonganino fya Nte sha kwa Yehova balingile ukunakila ku butungulushi bwa kwa Kristu no ‘kuinashisha pe samba lya kuboko kwa maka ukwa kwa Lesa.’ (1 Petro 5:6) Lintu bafwaikwa ukubomba pa milandu ya bupingushi, ukupala Solomone mu kati ka myaka yakwe iya busumino, balingile ukupepa kuli Yehova ukuti: “Peni umubomfi wenu umutima wa kuumfwa ukuti apingule abantu benu, no kucetekanyo busuma no bubi.” (1 Ishamfumu 3:9) Umutima wa cumfwila ukasesha eluda ukufwaya ukumona ifintu nga fintu Yehova na Kristu Yesu bafimona pa kuti ukupingulapo ukwacitwa pe sonde kwingapala mu kupalamisha nga nshi kuli kulya ukucitilwe mu muulu.—Mateo 18:18-20.
10. Ni shani fintu bakangalila bonse balingile ukutukuta ukupashanya Yesu mu nshila asungilemo impaanga?
10 Bakangalila benda na baeluda ba mu filonganino mu kupalako bakatukuta ukupashanya Kristu mu nshila asungilemo impaanga. Ukukanapala abaFarise, Yesu tapampamike amafunde ayengi ayali ayakosa ukukonka. (Mateo 23:2-11) Atile ku bapale mpaanga: “Iseni kuli ine, bonse mwe bacucutika kabili abafinwa, na ine nalamupeelo kutusha. Sendeni ikoli lyandi no kusambilila kuli ine, pa kuti ndi wafuuka kabili uwapetama umutima; e lyo mwalasango kutusha ku mitima yenu; pantu ikoli lyandi lyalyanguka, ne cisendo candi calipepuka.” (Mateo 11:28-30) Ilintu cili ica cine ukuti Umwina Kristu umo na umo afwile “ukusende cipe cakwe umwine,” bakangalila balingile ukwibukisha ica kumwenako ca kwa Yesu no kwaafwa bamunyinabo ukuyumfwo kuti icipe cabo ica cishingamo ca Bwina Kristu ‘calyanguka,’ “calipepuka,” kabili caba buseko ukucisenda.—Abena Galatia 6:5.
Ukunakila kwa Teokratiki
11. (a) Ni shani fintu pambi umuntu engacindika bumutwe kabili nalyo line ukukanaba mu cituntulu uwa teokratiki? Langilila. (b) Cipilibula cinshi ukuba mu cine cine uwa teokratiki?
11 Teokrasi kutekwa na Lesa. Isanshamo icishinte ca bumutwe icalumbululwa pali 1 Abena Korinti 11:3. Lelo cipilibula icacila pali ico. Umuntu kuti pambi amoneka ukulanga umucinshi kuli bumutwe kabili nalyo line ukukanaba uwa teokratiki mu mano yakumanina aye shiwi. Ni shani cingaba ifi? Ku kulangilila, demokrasi ni kamfulumende wa bantu, kabili uwa budemokrasi alondololwa ngo “muntu uwasumina mu mabuyo ya demokrasi.” Umuntu kuti pambi aitunga ukuba uwa demokrasi, ukubuulamo lubali mu kusala, no kuba fye politishani wacincila. Lelo nga ca kuti, mu mibele yakwe iya cinkumbawile, alatoba umupashi wa demokrasi ne fishinte fyonse ifyo isanshamo, bushe kuti casoswa ukuti aliba mu cine cine uwa demokrasi? Mu kupalako, pa kuba mu cine cine uwa teokratiki, umuntu afwile ukucite fyacila pa kunakila kuli bumutwe mu mashiwi fye. Afwile ukupashanya inshila sha kwa Yehova ne mibele. Afwile mu cituntulu ukutungululwa na Yehova mu nshila iili yonse. Kabili apantu Yehova alibika mu Mwana wakwe ubulashi bwakumanina, ukuba uwa teokratiki na kabili cipilibula ukupashanya Yesu.
12, 13. (a) Cinshi, maka maka, cintu ukuba uwa teokratiki kusanshamo? (b) Bushe ukunakila kwa teokratiki kusanshamo ukumfwila amafunde ayengi? Langilila.
12 Ibukisha, Yehova afwaya ukunakila kwa kuitemenwa ukukuntwa no kutemwa. Iyo e nshila yakwe iya kutekelamo ukubumbwa konse. Aba e cipasho cine cine ica kutemwa. (1 Yohane 4:8) Kristu Yesu aba “kubeeka kwa bukata bwa kwa Lesa, ne cipasho ca musango wakwe.” (AbaHebere 1:3) Afwaya abasambi bakwe aba cine ukutemwana. (Yohane 15:17) E co ukuba uwa teokratiki kusanshamo te kuba fye uwanakila lelo na kabili ukuba uwa kutemwa. Umulandu kuti pambi wasupawilwa nge fyakonkapo: Teokrasi kuteka kwa kwa Lesa; Lesa kutemwa; muli fyo teokrasi kuteka kwa kutemwa.
13 Eluda kuti atontonkanya ukuti pa kuba uwa teokratiki, bamunyina balingile ukumfwila imisango yonse iya mafunde. Baeluda bamo balipanga amafunde ukufuma mu mitubululo iipeelwa ku nshita ne nshita no “musha wa cishinka kabili uwashilimuka.” (Mateo 24:45) Ku ca kumwenako, inshita imo calitubulwilwe ukuti pa mulandu wa kwishiba mu kwanguka bamunyina mu cilonganino, kuti pambi cabe cisuma lyonse ukukanaikala pa cipuna cimo cine mu Ŋanda ya Bufumu. Ici cafwaikwe ukuba mitubululo ibomba, te funde lyaumina kumo. Lelo baeluda bamo kuti pambi bakongamina ku kwalwila cene mwi funde no kuyumfwa ukuti abo abashilekonka cene tabali ba teokratiki. Nalyo line, kuti pambi kwabako imilandu isuma iingi iyo munyina nelyo nkashi pambi engasoobwelapo ukwikala pa ncende imo. Nga ca kuti eluda talangulwikepo mu kubamo kutemwa ifintu fya musango yo, bushe umwine wine ali mu cine cine uwa teokratiki? Pa kuba aba teokratiki, “Fyonse ifyo mucita, ficitilwe mu kutemwa.”—1 Abena Korinti 16:14.
Ukubomba no Buseko
14, 15. (a) Ni shani fintu eluda engapusula bamunyina bamo nelyo bankashi ubuseko bwabo mu kubombela Yehova, kabili mulandu nshi ici cishingabela buteokratiki? (b) Ni shani fintu Yesu alangishe ukuti alatesekesha ukutemwa ukulumbululwa ku mulimo wesu, ukucila ku bwingi? (c) Cinshi cintu baeluda balingile ukulangulukapo?
14 Ukuba uwa teokratiki na kabili cipilibula ukubombela Yehova no buseko. Yehova ni “Lesa wa nsansa.” (1 Timote 1:11, NW) Afwaya bakapepa bakwe ukumubombela mu buseko. Abo bapampamina pa mafunde balingile ukwibukisho kuti pa kati ka fipoope fintu Israele aali ‘no kwangwo kucita’ paali icakonkapo ica kuti: “Mukalesamwa ku cinso ca kwa Yehova Lesa wenu muli conse ico mwatambikako iminwe yenu.” (Amalango 12:1, 18) Conse cintu tulecita mu mulimo wa kwa Yehova cilingile ukuba buseko, te cisendo. Bakangalila kuti bacite fingi ku kulenga bamunyina ukuyumfwa aba nsansa ukucita icili mu maka yabo mu kubombela Yehova. Mu kupusanako, nga ca kuti baeluda tabali abasakamana, kuti bapusula bamunyina bamo ubuseko bwabo. Nga ca kuti, ku ca kumwenako, balacito kulinganya, ukutasha abo abafikile nelyo ukucila avareji wa cilonganino mu maawala ayapooselwe mu kucitilo bunte kabili mu manshoko ukulalengulula abo abashafikile pali yene, ni shani fintu abo bengayumfwa abo pambi bakwete umulandu wa cine cine uwa kucitila lipoti inshita yacepako? Bushe ici te kuti cibalenge mu kukanafwaikwa ukuyumfwa aba mulandu no kubapusula ubuseko bwabo?
15 Amaawala yanono yantu bamo bengapeelesha ku kucitilo bunte kwa pa cintubwingi kuti pambi yaimininako ukubombesha kwakulilako ukucila amaawala ayengi yantu bambi bapoosa mu kushimikila, mu cilolwa ca mushinku wa bwaiceko, ubutuntulu bwa bumi ubwawaminako, ne mibele imbi. Muli uku kuloshako, baeluda tabali na kubapingula. Mu cituntulu, ni kuli Yesu e ko Wishi aapela “amaka ku kucito bupingushi.” (Yohane 5:27) Bushe Yesu alilengulwile mukamfwilwa mubusu pa mulandu wa kuti ica bupe cakwe caliko pe samba lya avareji? Iyo, aali uwaibukila ulwa cintu tulya tumakobili tubili mu cituntulu twamusendele. Twali e “fyonse ifyo akwete, conse ica miliile yakwe.” We kutemwa kwashika ukwa kuli Yehova kuntu twaiminineko! (Marko 12:41-44) Bushe baeluda balingile ukuba abaibukila mu kucepako ku kubombesha kwabamo kutemwa ukwa abo ifyabo fyonse fili mu mpendwa pe samba lya “avareji”? Ukukuma ku kutemwa kwa kuli Yehova, ukubombesha kwa musango yo kuti pambi kwacila pali avareji!
16. (a) Nga ca kuti bakangalila babomfya ifipendo mu malyashi yabo, mulandu nshi balekabila ukwiluka no kushikatala kusuma? (b) Ni shani fintu bamunyina bengacilapo kwafwiwa ukwingilishako umulimo wabo?
16 Bushe uku kulandapo nomba kulingile ukwalwilwa mwi “funde” lipya ukuti ifipendo—nelyo amaavareji—tafilingile ukulumbulwa? Iyo te fyo! Icishinka cili ca kuti bakangalila balingile ukuba abashikatala pa kukoselesha bamunyina ukutanununa ubutumikishi bwabo no kubaafwa ukucita pantu bengapesha mu kuba no buseko. (Abena Galatia 6:4) Mu mulumbe wa kwa Yesu uwa matalanti, shikulu ashiliile ifikwatwa fyakwe ku basha bakwe “kuli onse umwabelele amaka yakwe yene.” (Mateo 25:14, 15) Baeluda mu kupalako balingile ukulanguluka pa fya kucitikako ifya kwa kasabankanya wa Bufumu umo umo. Ici cifwaya ukwiluka. Kuti pambi caba ukuti bamo mu cituntulu balekabila ukukoseleshiwa ukucite fyafulilako. Kuti pambi batasha ukwaafwa ukulola ku kuteyanya imibombele yabo mu kuwaminako. Apantu limbi e fyo cingaba, nga bengaafwiwa ukucita apo bengapesha mu kuba no buseko, ubo buseko mu kupalishako bukabakosha ukutanununa imibombele yabo iya Bwina Kristu uko cingacitika.—Nehemia 8:10; Ilumbo 59:16; Yeremia 20:9.
Umutende Uwisa Ukufuma mu Kunakila Kwabamo Buseko
17, 18. (a) Ni shani fintu ukunakila kwabamo buseko kwingatuletela umutende no bulungami? (b) Cinshi cingaba icesu nga mu cituntulu twapeepeka ku mafunde ya kwa Lesa?
17 Ukunakila kwabamo buseko kuli bumulopwe bwakwate nsambu sha mwi funde ubwa kwa Yehova kutuletela umutende ukalamba. Kemba wa malumbo atile mwi pepo kuli Yehova: “Umutende wingi ku batemwa amalango yenu; kuli bene takwaba na ca kuipununako.” (Ilumbo 119:165) Pa kumfwila ifunde lya kwa Lesa, tulainonsha fwe bene. Yehova aebele abena Israele ukuti: “E fyo asosa Yehova Umulubushi obe, Wa mushilo wa kwa Israele: Ine ndi Yehova Lesa obe, uukusambilisho kuti ucenjele, uukwensha mu nshila iyo ufwile ukuyamo. Iye, nga wapeepeka ku mafunde yandi! lyene umutende obe nga waba ngo mumana, no bulungami bobe nga ’mabimbi ya bemba.”—Esaya 48:17, 18.
18 Ilambo lya cilubula ilya kwa Kristu lituletela umutende na Lesa. (2 Abena Korinti 5:18, 19) Nga ca kuti twalikwata icitetekelo mu mulopa uulubula uwa kwa Kristu kabili mu kusakamanishisha tulatukuta ukulwisha amabunake yesu no kucito kufwaya kwa kwa Lesa, tulasanga ukwilulukwa ukufuma ku kuyumfwa aba mulandu. (1 Yohane 3:19-23) Icitetekelo ca musango yo, icitungililwa ku milimo, citupeela ukwiminina kwalungama pa ntanshi ya kwa Yehova, ne subilo lya kusungusha ilya kupusunsuko “Bucushi bukalamba” no kwikala kuli pe na pe mu calo cipya ica kwa Yehova. (Ukusokolola 7:14-17; Yohane 3:36; Yakobo 2:22, 23) Ici conse kuti caba cesu ‘nga ca kuti fye twingapeepeka ku mafunde ya kwa Lesa.’
19. Ni pali cinshi pantu insansa shesu nomba ne subilo lyesu ilya bumi bwa muyayaya fyashintilila, kabili ni shani fintu Davidi alumbulwile ukushininwa kwesu ukwa ku mutima?
19 Ee, insansa shesu nomba ne subilo lyesu ilya bumi bwa muyayaya pe sonde lya paradise fyapelama pa kunakila kwesu ukwa buseko ku bulashi bwa kwa Yehova nga Shikulu Mulopwe wa kubumbwa konse. Shi lyonse natuleakanako ukuyumfwa kwa kwa Davidi, uwatile: “Fyenu, mwe Yehova, ubukulu na bumpalume no kuyemba no kupulama na bukatebebe, pantu conse icili mu muulu na pa nshi cenu; ubufumu bwenu, mwe Yehova, kabili mwalitumpuka mwabo mutwe kuli bonse! E ico nomba, mwe Lesa wesu, ifwe tulemutootela, no kutashe shina lyenu ilyalumbuka.”—1 Imilandu 29:11, 13.
Ifishinka fya Kwibukisha
◻ Musango nshi uwa kunakila ne cumfwila fintu Yehova afwaya ababomfi bakwe ukulangisha?
◻ Ni shani fintu Yesu alambwilwe pa cumfwila cakwe, kabili cinshi cintu tufwile ukushininkisha ku ncitilo yesu?
◻ Ni shani fintu bakangalila bonse bengapashanya Yesu mu nshila asungilemo impaanga?
◻ Cinshi cabimbwamo mu kuba uwa teokratiki?
◻ Mapaalo nshi yantu ukunakila kwabamo buseko kutuletela?
[Icikope pe bula 24]
Baeluda bakoselesha umukuni ukucita mu kubamo buseko icili conse icingaba mu maka yabo
[Icikope pe bula 26]
Yehova asekelela muli abo abamumfwila ukufuma ku mutima