“Amaka yacila pa ya Lyonse”
KUCULA kwakula shani Umwina Kristu engashipikisha? Ilelo, Abena Kristu ukushinguluka icalo balolenkana no bupiina, icimfulumfulu ca ndupwa, ukushutikwa kwa nkuntu, ukulwala, inkondo, no kupakaswa. Bushe cilimo ukupelulula ukwenekela bene ukusunga bumpomfu te mulandu na conse ici? Umutumwa Paulo atile calimo kupelulula. Alembele ukuti: “Ndi na maka aya kucite fintu fyonse mu ulenkoselesha.”—Abena Filipi 4:13.
Ilyashi lya kale lyalanga ukuti ubukose ukufuma kuli Yehova mu cine cine bwaliba ubwakumanina ku fintu fyonse. Ku ca kumwenako, mu kati ka kuteka kwa ciNazi mu Germany, Inte sha kwa Yehova baculile ukupakaswa kwatapata. Bushe balishipikishe? Icitabo Les Bibelforscher et le nazisme (Abasambi ba Baibolo no buNazi) cisoso kuti: “Te mulandu no kupumwa konse, ifintiinya, ne fibindo, te mulandu no kulengwe nsoni kwa pa lwalala, ukubikwa mu cifungo no kulindikwa mu nkambi sha kucushiwilwamo, Abasambi ba Baibolo [Inte sha kwa Yehova] tababalile abaisuminisha abene ‘ukusambilishiwa cipya cipya.’”
Mu nkambi sha kucushiwilwamo, Inte baishibikilwe ku tupimfya twa nsalu pa maboko ya malaya yabo kabili balipaatwilweko ku kululunkanishiwa kwaibela. Bushe ici calibabongolwele? Uwasambilila ifya mitontonkanishishe ya muntu Bruno Bettelheim amwene ukuti “tabalangile fye umucinshi wa buntunse uwasumbukisha uushili wa lyonse ne mibele isuma, lelo bamoneke ukuba abacingililwa ku cakukumanya cimo cine ica mu nkambi ico mu kwangufyanya caonawile abantu abalangulwikwe ukuyobeka apakalamba mu mibele ya bambi ku fibusa fyandi ifyundapa ukufulunganishiwa kwa muntontonkanya na ne mwine.”
Ee, balikwete ‘ubukose kuli fyonse.’ Mulandu nshi? pa mulandu wa kuti bashintilile pali Yehova. Paulo asosele ukuti: “Tuli ne cuma ici mu fipe fye bumba, ukuti amaka yacila pa ya lyonse yabe ya kwa Lesa te yafuma kuli fwe bene.” (2 Abena Korinti 4:7, NW) Nga ca kuti wakumanya imibele ya ca kwesha, lolesha mu kucetekela kuli Yehova ku kwaafwa. Pa kukoshiwa ku maka yacila pa ya lyonse ayo apayanya, ukaba na maka ya kushipikisha.—Luka 11:13.