Ku Kushipikisha Kwenu Lundeniko Ukuipeelesha kwa Bukapepa

“Ku citetekelo cenu lundeniko . . . ukushipikisha, na ku kushipikisha lundeniko [ukuipeelesha kwa, NW] bukapepa.”—2 PETRO 1:5, 6.

1, 2. (a) Ukutendeka muli ba 1930, cinshi cacitike ku Nte sha kwa Yehova mu fyalo fyali pe samba lya kulama kwa ciNazi, kabili mulandu nshi? (b) Ni shani fintu abantu ba kwa Yehova babombele pe samba lya uku kusungwa kwakaluka?

CALI ciputulwa ca nshita icafitula mu lyashi lya kale ilya mwanda wa myaka walenga 20. Ukutendeka muli ba 1930, amakana ya Nte sha kwa Yehova mu fyalo fyali pe samba lya kulama kwa ciNazi mu lufyengo baliketwe no kupooswa mu nkambi sha kucushiwilwamo. Mulandu nshi? Pa mulandu wa kuti baali abapama ku kutwalilila abashibuulamo ulubali kabili bakeene ukwawila Hitler. Ni shani fintu basungilwe? “Takwaliko ibumba limbi ilya bafungwa . . . ilyasansalikwe ku bukalushi bwa bashilika ba SS muli ulya musango nga fintu Abasambi ba Baibolo [Inte sha kwa Yehova] basansalikwe. Bwali bukalushi ubwaishibikilwe ku kulungulusha kwa ku mubili no kwa muntontonkanya ukwabule mpela, umusango untu takuli ululimi mu calo ulwingaulumbulula.”—Karl Wittig, uwali kale umulashi wa kamfulumende wa mu Germany.

² Ni shani fintu Inte shabombele? Mu citabo cakwe The Nazi State and the New Religions: Five Case Studies in Non-Conformity, Dr. Christine E. King alandilepo kuti: “Ni ku kulwisha fye Inte [mu kucilanya na mabumba yambi aya butotelo] e ko kamfulumende yafililwe ukutunguluka.” Ee, Inte sha kwa Yehova nge bumba bali abashansha, nelyo cingati ku myanda ya ba muli bene, ici capilibwile ukushipikisha ukufika ku cipimo ca mfwa.

3. Cinshi calenga Inte sha kwa Yehova ukushipikisha ifya kwesha fyatapata?

³ Cinshi calenga Inte sha kwa Yehova ukushipikisha ifya kwesha fya musango yo te mu Germany wa ciNazi mweka lelo ukushinguluka icalo conse? Shibo wa ku muulu alibaafwa ukushipikisha pa mulandu wa kuipeelesha kwabo ukwa bukapepa. “Yehova aishibo kupokolola abantu ba kuipeelesha kwa bukapepa ku ca kwesha,” e fyalondolola umutumwa Petro. (2 Petro 2:9, NW) Mu kubangilila muli kalata umo wine, Petro aali napanda amano Abena Kristu ati: “Ku citetekelo cenu lundeniko . . . ukushipikisha, na ku kushipikisha lundeniko ukuipeelesha kwa bukapepa.” (2 Petro 1:5, 6) E co ukushipikisha kwalisuntinkanishiwa mu kupalamisha no kuipeelesha kwa bukapepa. Na kuba, pa kushipikisha ukufika ku mpela, tufwile ‘ukukonkelela ukuipeelesha kwa bukapepa’ no kukulangisha. (1 Timote 6:11, NW) Lelo cinshi mu cituntulu caba ukuipeelesha kwa bukapepa?

Cintu Ukuipeelesha kwa Bukapepa Kwaba

4, 5. Ukuipeelesha kwa bukapepa cinshi?

⁴ Nauni wa ciGreek uwabomfiwa pa “kuipeelesha kwa bukapepa” (eu·seʹbei·a) kuti pambi apilibulwa mu kukonke shiwi pamo nga “ukushinshimuna bwino.”a (2 Petro 1:6, Kingdom Interlinear) Alangilila ukuyumfwa kwa cikabilila ukwa kufuma ku mutima ukulola kuli Lesa. Ukulingana na W. E. Vine, adjective (ishiwi lya kulondolola) eu·se·besʹ, mu kukonke shiwi ilipilibula “ukushinshimuna bwino,” limininako “amaka ayo, ukutungululwa no mwenso wa mushilo uwa kuli Lesa, yalumbululwa mu ncitilo ya kuipeelesha.”—2 Petro 2:9, Int.

⁵ Inumbwilo “ukuipeelesha kwa bukapepa” kanshi ilosha ku kushinshimuna nelyo ukuipeelesha kuli Yehova ukutusesha ukucita icili ica kutemuna kuli wene. Ici cicitwa nelyo fye mu kulolenkana ne fya kwesha fyayafya pa mulandu wa kuti twalitemwa Lesa ukufuma ku mutima. Kukakatila kwa bucishinka, ukwa pa lwesu kuli Yehova uko kulumbululwa mu nshila twikalilamo ubumi bwesu. Abena Kristu ba cine bacincishiwa ukupepa ukuti bengatungulula “ubwikashi bwa kutekanya kabili ubwa mutelelwe [mu kuipeelesha kwa bukapepa ukwakumanina, NW].” (1 Timote 2:1, 2) Ukulingana na bakalemba ba madikishonari J. P. Louw na E. A. Nida, “mu ndimi ishingi [eu·seʹbei·a] muli 1 Tim 2.2 kuti pambi mu kulingisha yapilibulwa pamo nga ‘ukwikala nga fintu Lesa engafwaya ifwe ukwikala’ nelyo ‘ukwikala nga fintu Lesa atweba ukuti tulingile ukwikala.’”

6. Kulundana nshi kwabako pa kati ka kushipikisha no kuipeelesha kwa bukapepa?

⁶ Kuti nomba twatesekesha mu kuwaminako ukulundana pa kati ka kushipikisha no kuipeelesha kwa bukapepa. Pa mulandu wa kuti twikala nga fintu Lesa engafwaya ifwe ukwikala—mu kuba no kuipeelesha kwa bukapepa—tuiletela ulupato lwa calo, ulo ukwabulo kusengauka luletako ifya kwesha fya citetekelo. (2 Timote 3:12) Lelo takwabako inshila twingakuntilwamo ku kushipikisha ifya kwesha fya musango yo nga ca kuti tacali ni pa mulandu wa kukakatila kwa pa lwesu kuli Shifwe wa ku muulu. Mu kulundapo, Yehova alankula ku kuipeelesha kwa kufuma ku mutima ukwa musango yo. Elenganya fye fintu cingamulenga ukuyumfwa ukulolesha mwi samba ukufuma mu myulu no kumona abo, pa mulandu wa kuipeelesha kwabo kuli wene, baletukuta ukumutemuna te mulandu ne misango yonse iya kukaanya. Te ca kupapa akongamina ku “kupokolola abantu ba kuipeelesha kwa bukapepa ku ca kwesha”!

7. Mulandu nshi ukuipeelesha kwa bukapepa kufwile ukulundulwilwa?

⁷ Nangu cibe fyo, tatufyalwa no kuipeelesha kwa bukapepa, nelyo tatunonka kwene mu kuicitikilako fye ukufuma ku bafyashi ba bukapepa. (Ukutendeka 8:21) Mu cifulo ca ico, kulingile ukulundululwa. (1 Timote 4:7, 10) Tufwile ukubombela pa kulunda ukuipeelesha kwa bukapepa ku kushipikisha kwesu na ku citetekelo cesu. Ici, e fyasosa Petro, cikabila “ukubombesha kwa mukoosha.” (2 Petro 1:5, NW) Ni shani, lyene, fintu twinganonka ukuipeelesha kwa bukapepa?

Ni Shani Fintu Tunonka Ukuipeelesha kwa Bukapepa?

8. Ukulingana no mutumwa Petro, cinshi caba e lufungulo ku kunonka ukuipeelesha kwa bukapepa?

⁸ Umutumwa Petro alondolwele ulufungulo ku kunonka ukuipeelesha kwa bukapepa. Atile: “Ukusenamina no mutende fifushiwe kuli imwe mu kwishiba Shikulwifwe. Ifyo amaka yakwe ya bulesa yaba aya kutufumpile fintu fyonse ifyalola ku mweo na [ku kuipeelesha kwa, NW] bukapepa mu kwishibo watwitile ukuti twise mu bukata bwakwe no bulumba bwakwe.” (2 Petro 1:2, 3) E co pa kulunda ukuipeelesha kwa bukapepa ku citetekelo no kushipikisha kwesu, tufwile ukukula mu kwishiba kwalungikwa, uko e kuti, ukwakumanina, nelyo ukwa mupwilapo, ukwa kwa Yehova Lesa na Yesu Kristu.

9. Ni shani fintu pambi cingalangililwa ukuti ukukwata ukwishiba kwalungikwa ukwa kwa Lesa na Kristu kubimbamo icacila pa kwishiba fye bantu baba?

⁹ Cinshi cipilibula ukukwata ukwishiba kwalungikwa ukwa kwa Lesa na Kristu? Mu kumfwika, cibimbamo icacila pa kwishiba fye bantu baba. Ku kulangilila: Kuti pambi walishiba untu umwina mupalamano wa pa mwinshi ukonkelepo aba kabili pambi kuti fye wamuposha na mwi shina. Lelo bushe kuti wamwashimisha icipendo cikalamba ica ndalama? Nakalya kano nga ca kuti mu cituntulu walishibe umusango wa muntu aba. (Linganyeniko Amapinda 11:15.) Mu mano yamo yene, ukwishiba Yehova na Yesu mu kulungika, nelyo mu kukumanina, kupilibula icacila pa kusumina fye ukuti e ko baba no kuba uwaibukila ulwa mashina yabo. Pa kuba abaitemenwa ukushipikisha ifya kwesha pa mulandu wabo nelyo fye ku cipimo ca mfwa, tufwile mu cituntulu ukubeshiba mu kubamo isenge. (Yohane 17:3) Cinshi cintu ici cibimbamo?

10. Ukukwata ukwishiba kwalungikwa ukwa kwa Yehova na Yesu kubimbamo ifintu nshi fibili, kabili mulandu nshi?

¹⁰ Ukukwata ukwishiba kwalungikwa, nelyo ukwa mupwilapo, ukwa kwa Yehova na Yesu kubimbamo ifintu fibili: (1) ukufika ku kubeshiba nga abantu—imibele yabo, ukuyumfwa kwabo, ne nshila—kabili (2) ukupashanya ica kumwenako cabo. Ukuipeelesha kwa bukapepa kubimbamo ukukakatila kwa kuyumfwa kwa ku mutima, ukwa pa lwesu kuli Yehova kabili kumonekela ku nshila twikalilamo ubumi bwesu. E ico, pa kunonka kwene tufwile ukufika ku kwishiba Yehova pa lwesu no kuba ababeleshanya mu kukumanina no kufwaya kwakwe ne nshila shakwe ukufika pantu twingapesha nga abantunse. Pa kwishiba Yehova mu cine cine, uyo mu cipasho cakwe e mo twabumbilwe, tufwile ukubomfya ukwishiba kwa musango yo no kutukuta ukuba nga wene. (Ukutendeka 1:26-28; Abena Kolose 3:10) Kabili apantu Yesu mu kupwililika apashenye Yehova mu co asosele no kucita, ukwishiba Yesu mu kulungika ca kwaafwa cakatama mu kulundulula ukuipeelesha kwa bukapepa.—AbaHebere 1:3.

11. (a) Ni shani fintu twinganonka ukwishiba kwalungikwa ukwa kwa Lesa na Kristu? (b) Mulandu nshi cabela icacindama ukwetetula pa co tubelenga?

¹¹ Ni shani, nangu cibe fyo, twinganonka ukwishiba kwalungikwa ukwa musango yo ukwa kwa Lesa na Kristu? Pa kusambilila mu mukoosha Baibolo ne mpapulo shashimpwa pali Baibolo.b Nangu cibe ifyo, nga ca kuti isambililo lya pa lwesu ilya Baibolo lili no kufumamo ukunonka kwesu ukwa kuipeelesha kwa bukapepa, cili icakatama ukuti tusendeko inshita ku kwetetula, e kutila, ukubelebesha, nelyo ukuba no mute, pa fintu tubelenga. (Linganyeniko Yoshua 1:8.) Mulandu nshi ici cabela icacindama? Ibukisheni ukuti ukuipeelesha kwa bukapepa kwaba kuyumfwa kwa cikabilila ukwa kufuma ku mutima, ukulola kuli Lesa. Mu Malembo, ukwetetula mu kubwekeshabwekeshapo kulundanishiwa no mutima wa mampalanya—umuntu wa mu kati. (Ilumbo 19:14; 49:3; Amapinda 15:28) Lintu twabelebesha mu kubamo kutasha pa cintu tubelenga, cilakonkolokela pa nshi ku muntu wa mu kati, muli ifyo ukukunta ukuyumfwa kwesu, ukwikata inkuntu shesu, no kusonga ukutontonkanya kwesu. Ni lyo fye lyeka e lintu isambililo lingakosha ukulambatila kwa pa lwesu kuli Yehova no kutusesha ku kwikala mu nshila iitemuna Lesa nelyo fye mu kulolenkana ne mibele ya kusonsomba nelyo ifya kwesha fyayafya.

Ukubomfya Ukuipeelesha kwa Bukapepa pa Ŋanda

12. (a) Ukulingana na Paulo, ni shani fintu Umwina Kristu engabomfya ukuipeelesha kwa bukapepa pa ŋanda? (b) Mulandu nshi Abena Kristu ba cine basakamanina abafyashi balekota?

¹² Ukuipeelesha kwa bukapepa kulingile ukubomfiwa mu kutendekelako pa ŋanda. E fyasosa umutumwa Paulo ati: “Nga mukamfwilwa akwata abana atemwa beshikulu, basambilile ukuti ica kubalilapo kucita aba ŋanda yabo iine umwabela [ukuipeelesha kwa, NW] bukapepa, kabili ukubweseshapo ubufubo ku bafyashi babo; pantu ici casekelelwa ku cinso ca kwa Lesa.” (1 Timote 5:4) Ukusakamana abafyashi balekota, nga fintu Paulo asosa, kwaba kulumbulula kwa kuipeelesha kwa bukapepa. Abena Kristu ba cine balapayanya ukusakamana kwa musango yo te kufuma fye ku kuyumfwa kwa kuti ni ncito lelo pa mulandu wa kutemwa abafyashi babo. Icacila pali ico, nangu ni fyo, baleshiba ubucindami ubo Yehova abiika pa kusakamana ulupwa lwa umo. Balishiba bwino ukuti ukufutatila abafyashi babo mu nshita ya kukabila kuti kwalingana no ‘kukaana icitetekelo ca Bwina Kristu.’—1 Timote 5:8.

13. Mulandu nshi pambi ukubomfya ukuipeelesha kwa bukapepa pa ŋanda kwingabela ukusonsomba kwine kwine, lelo kwikusha nshi kufuma mu kusakamana abafyashi ba umo?

¹³ Ca cine, tacaba lyonse icayanguka ukubomfya ukuipeelesha kwa bukapepa pa ŋanda. Ifilundwa fya lupwa kuti pambi baba abapaatukana pa ntamfu shalepa nga nshi. Abana bakalamba kuti pambi balekusha indupwa shabo shine kabili kuti pambi baleshomboka mu fya bunonshi. Umusango nelyo icipimo ca kusakamana ifikabilwa ku mufyashi kuti fyacena ubutuntulu busuma ubwa ku mubili, ubwa muntontonkanya, no bwa mu nkuntu ubwa abo balepayanya ukusakamana. Nangu ni fyo, kuti kwabako ukwikushiwa kwa cine cine mu kwishiba ukuti ukusakamana abafyashi ba umo takubweseshapo fye “ubufubo” lelo na kabili kulasekesha Umo “kuli uyo indupwa shonse mu muulu na pano nse shiinikwako amashina.”—Abena Efese 3:14, 15.

14, 15. Shimika ica kumwenako ica kusakamana kwa bukapepa pa lubali lwa bana ku mufyashi.

¹⁴ Languluka ica kumwenako ca kukumbamo mu cine cine. Ellis na basano aba bamunyina bakwe ne nkashi balolenkana no kusonsomba kwayafya mu kusakamana wishibo pa ŋanda. “Mu 1986 tata aculile ku lupumo, ulwamushile uwalwala ubulebe umupwilapo,” e fyalondolola Ellis. Abana mutanda balakanamo mu kusakamana ukukabila kwa kwa shibo, ukutendekela pa kumusamba ukufika ku kushininkisha ukuti alepilibulwa lyonse pa busanshi pa kuti takwete ifilonda pa mulandu wa kulalilila. “Tulabelenga kuli wene, ukulanda kuli wene, ukumulishisha inyimbo. Tatuli abashininkisha nampo nga alibo waibukila ulwa cicitika ukushinguluka wene, lelo tumusunga kwati fye alibo waibukila mu kukumanina icili conse.”

¹⁵ Mulandu nshi abana basakamanina shibo nga fintu bacita? Ellis atwalilila ukuti: “Pa numa ya mfwa ya kwa nyinefwe mu 1964, Tata alitukushishe pa lwakwe eka. Pa nshita ilya twali mu mutande wa myaka ya bukulu ukufuma pali 5 ukufika kuli 14. Alebapo ku kutwaafwa lilya; nomba tuli pano ku kwaafwa wene.” Mu kumfwika, tacaba icayanguka ukupayanya ukusakamana kwa musango yo, kabili abana balafuupulwa pa nshita shimo shimo. “Lelo twalibukilo kuti imibele ya kwa tata yaba ni mpika ya pa kashita kanono,” e fyasosa Ellis. “Tulolesha ku ntanshi ku nshita lintu shifwe akabweshiwa ku butuntulu bwa bumi ubusuma kabili kuti twalundanishiwa cipya cipya na nyinefwe.” (Esaya 33:24; Yohane 5:28, 29) Mu kushininkisha, ukusakamana kwa kuipeelesha ukwa musango yo ku mufyashi kufwile ukukafya umutima wa Umo uukambisha abana ukucindika abafyashi babo!c—Abena Efese 6:1, 2.

Ukuipeelesha kwa Bukapepa no Butumikishi

16. Cinshi cilingile ukuba e mulandu ukalamba uwa co tucita mu butumikishi?

¹⁶ Lintu twapokelela ubwite bwa kwa Yesu ku ‘kumukonka mu kutwalilila,’ twisa pe samba lya kutumwa kwa bulesa ku kushimikila imbila nsuma iya Bufumu no kupanga abasambi. (Mateo 16:24, NW; 24:14; 28:19, 20) Mu kumfwika, ukukwata ukwakanamo mu butumikishi kukakililwako kwa Bwina Kristu muli ishi “nshiku sha kulekelesha.” (2 Timote 3:1) Nangu ni fyo, inkuntu yesu iya kushimikila no kusambilisha ifwile ukucila pa kuyumfwa kwa kuba fye nge ncito nelyo ukukakililwako. Ukutemwa kwashika ukwa kuli Yehova kufwile ukuba e mulandu ukalamba ku co tucita no bwingi tucita mu butumikishi. “Ku bwingi bwa fya mu mutima e fyo akanwa kasosa,” e fyasosele Yesu. (Mateo 12:34) Ee, lintu imitima yesu yasempauka mu kuba no kutemwa kwa kuli Yehova, tuyumfwa abakuntwa ku kucitilo bunte pa lwa wene kuli bambi. Lintu ukutemwa kwa kuli Lesa kuli e ca kukunta cesu, ubutumikishi bwesu buba kulumbulula kwabamo bupilibulo ukwa kuipeelesha kwa bukapepa.

17. Ni shani fintu pambi twingalundulula inkuntu yalungama ku butumikishi?

¹⁷ Ni shani fintu twingalundulula inkuntu yalungama ku butumikishi? Belebesheni mu kubamo kutasha pa milandu itatu iyo Yehova atupeela iya kumutemenwa. (1) Twalitemwa Yehova pa mulandu wa co kale kale atucitila. Takwabako kutemwa kwacilapo aali no kulangisha ukucila pa kupayanya icilubula. (Mateo 20:28; Yohane 15:13) (2) Twalitemwa Yehova pa mulandu wa cintu aletucitila pali nomba. Twalikwata ukupama kwa kulanda na Yehova, uwasuka amapepo yesu. (Ilumbo 65:2; AbaHebere 4:14-16) Ilyo twapeela icifulo ca ntanshi ku mabuseko ya Bufumu, tulaipakisha ifikabilwa fya bumi. (Mateo 6:25-33) Tulapokelela ukupayanya kushiputuka ukwa ca kulya ca ku mupashi icitwaafwa ukubomba ne mpika tulolenkana na sho. (Mateo 24:45) Kabili twakwate paalo lya kuba ulubali lwa bumunyina bwa Bwina Kristu ubwa mu kusaalala kwa calo ubo mu cine cine butupaatula ukufuma ku calo cashala. (1 Petro 2:17) (3) Na kabili twalitemwa Yehova pa mulandu wa co acili no kutucitila. Pa mulandu wa kutemwa kwakwe, ‘twalikata ku mweo uwabo mweo wine wine’—ubumi bwa muyayaya mu nshita ya ku ntanshi. (1 Timote 6:12, 19) Lintu twalanguluka ukutemwa kwa kwa Yehova mu cifulo cesu, mu kushininkisha imitima yesu ikatusesha ku kukwata ukwakanamo kwa kuipeelesha mu kwebako bambi pa lwa wene ne mifwaile yakwe iyaumo mutengo! Bambi tabafwile ukulatweba ifya kubomba nelyo icipimo ca kubomba mu butumikishi. Imitima yesu ikatusesha ku kucita ico twingacita.

18, 19. Cipindami nshi nkashi acimfishe pa kuba na maka ya kwakanamo mu butumikishi?

¹⁸ Nelyo fye mu kulolenkana ne mibele ya kusonsomba, umutima uwakumbwamo no kuipeelesha kwa bukapepa ukakuntwa ku kulanda. (Linganyeniko Yeremia 20:9.) Ici cilelangwa mu mulandu wa kwa Stella, umwanakashi wa Bwina Kristu uwa nsoni nga nshi. Lintu mu kubalilapo atendeke ukusambilila Baibolo, atontonkenye ukuti, ‘Te kuti nje ukufuma ku ŋanda ne ŋanda!’ Alondololo kuti: “Nali lyonse uwatalalila nga nshi. Te kuti ntununuke bambi ku kutendeka ukulanshanya.” Ilyo atwalilile ukusambilila, ukutemwa kwakwe kuli Yehova kwalikulile, kabili alundulwile ukufwaisha kwabilima ku kulanda kuli bambi pa lwa wene. “Ndeibukisha ukweba kafundisha wandi uwa Baibolo ukuti, ‘Ndafwaisha nga nshi ukulanda, lelo te kuti fye nande, kabili ico mu cituntulu cilansakamika.’ Nshakatale ndaba ico anjebele: ‘Stella, ba uwa kutootela pa kuti ulafwaya ukulanda.’”

¹⁹ Mu kwangufyanya, Stella aisangile umwine alecitilo bunte ku mwina mupalamano wakwe uwa pa mwinshi wakonkelepo. Lyene abuulile icali kuli wene ulutampulo lwakulisha—alyakene mu butumikishi bwa ku ŋanda ne ŋanda pa muku wa kubalilapo. (Imilimo 20:20, 21) Ebukisho kuti: “Nalilembele imipeelele yandi. Lelo nali uwatiinishiwa nga nshi ica kuti nelyo cingati nalikwete yene pa ntanshi yandi, naali uwa mwenso nga nshi ku kulolesha pa fyalembwa fyandi!” Nomba, pa numa ya myaka ukucila pali 35, Stella acili uwa nsoni mu cifyalilwa. Nalyo line, alitemwa ubutumikishi bwa mwi bala kabili alatwalilila ukukwata ukwakanamo kwabamo bupilibulo muli bwene.

20. Ca kumwenako nshi cilanga ukuti nelyo fye kupakasa nelyo ukubikwa mu cifungo takwingesala utunwa twa Nte sha kwa Yehova ishaipeelesha?

²⁰ Nelyo fye kupakasa nelyo ukubikwa mu cifungo tafingesala utunwa twa Nte sha kwa Yehova ishaipeelesha. Langulukeni ica kumwenako ca kwa Ernst na Hildegard Seliger aba ku Germany. Pa mulandu wa citetekelo cabo, bonse babili bapoosele ukucila pa myaka 40 mu nkambi sha kucushiwilwamo isha ciNazi na mu fifungo fya ciKomyunisiti. Nelyo fye ni mu cifungo, bali aba mupampamina mu kucitilo bunte ku bafungwa bambi. Hildegard aibukishe ukuti: “Abalashi ba cifungo bamwene ine ngo wali ukucilisha uwa busanso, pa mulandu wa kuti, nga fintu umulinshi umo umwanakashi asosele, nalandile pa lwa Baibolo akasuba konse. E co nabikilwe mu kalyati ka mu kayanda ka pa nshi.” Pa numa mu kupelako bapeelwe ubuntungwa bwabo, Munyina na Nkashi Seliger bapeeleshe inshita yabo yonse ku butumikishi bwa Bwina Kristu. Bonse babili babombele mu busumino ukufikila imfwa yabo, Munyina Seliger mu 1985 no mukashi wakwe mu 1992.

21. Cinshi tufwile ukucita pa kulunda ukuipeelesha kwa bukapepa ku kushipikisha kwesu?

²¹ Pa kusambilila mu mukoosha Icebo ca kwa Lesa no kusendako inshita ku kwetetula mu kubamo kutasha pa co tusambilila, tukakula mu kwishiba kwalungikwa ukwa kwa Yehova Lesa na Yesu Kristu. Ici, mu kukonkapo, cikafumamo ukunonka kwesu icipimo cakumanina ica iyo mibele yaumo mutengo—ukuipeelesha kwa bukapepa. Ukwabula ukuipeelesha kwa bukapepa takwabako inshila ya kushipikishishamo ifya kwesha fyalekanalekana ifisa pali ifwe nga Abena Kristu. E co shi natukonke ukupanda amano kwa mutumwa Petro, ukutwalilila ‘ukulunda ku citetekelo cesu ukushipikisha na ku kushipikisha kwesu ukulundako ukuipeelesha kwa bukapepa.’—2 Petro 1:5, 6.

[Amafutunoti]

Cinshi Cili E Casuko Cobe?

◻ Ukuipeelesha kwa bukapepa cinshi?

◻ Kulundana nshi kwabako pa kati ka kushipikisha no kuipeelesha kwa bukapepa?

◻ Cinshi caba e lufungulo ku kunonka ukuipeelesha kwa bukapepa?

◻ Ni shani fintu Umwina Kristu engabomfya ukuipeelesha kwa bukapepa pa ŋanda?

◻ Cinshi cifwile ukuba e mulandu ukalamba uwa co tucita mu butumikishi?

[Icikope pe bula 18]

Ukushipikisha no kuipeelesha kwa bukapepa fyalilangilwe ku Nte sha kwa Yehova ishali mu cifungo mu nkambi ya kucushiwilwamo iya ciNazi pa Ravensbrück