Bacitile Cene pa Mulandu wa Kutemwa

MUKAMFWILWA wa cileela, uwa busumino mu Canada alekusha abana bakashana abacaice bane pamo nga Abena Kristu ba cine. Baeluda mu cilonganino bamwene ukuti iŋanda yakwe yalekabila ukuwamya kukalamba. Takwete fyonse indalama nelyo ukulamuka ukwa kuibombelo mwine uyo mulimo. E co mu kumfwana ne cishinte icaimikwa pali 1 Timote 5:9, 10, baeluda mu kushilimuka batantike ukuti bengamubombelako umulimo. Shani?

Amapekanyo yalicitilwe ukuti uyu mukamfwilwa na bana bakwe bakafumepo pa nshiku shisano. Ukucila pa bantu 80 mu cilonganino balyafwilishe no mutima wabo onse, ukupeelako ifibombelo, indalama, ne nshita. Mu kwangufyanya fye lintu ulupwa lwafuminepo, bakabomba bacincila bamaŋenye pa ŋanda kwati ni nshimu. Icibumba conse ica ku nse caliwamishiwe. Ifibumba fyalimashililwe no kupentwa. Pa nshi palikuushilwe no kushingulwa cipya cipya. Amatailoshi yapya aya pa nshi na kapeti fyalibikilwe. Umulimo onse uwa fya malaiti malaiti ne fya kukobekako amalaiti fyaliwamishiwe. Ne fipuna fye ifyali ifyasapuka fyalipyanikishiwepo. Umulimo wapwililila uwa kukuulululamo no kuwamya wapwishishiwe mu nshiku fye shisano!

Icongo ca kucincimuka ne mibombele fyacilimwishe abena mupalamano. Umwina mupalamano wa myaka ya bukulu 80 alikuntilwe nga nshi ku kubombesha kwa baNte ica kuti aishile na bulasho wa kupentelako no kuuminina pa kuti afwilisheko kupenta. Abaingishe ncito umo uwa aba bakabomba ba kuitemenwa basangwilileko ica kufuminamo icushi ica pa citofu ca kwipikilapo. Abene ba ncito bambi bapeeleko amakabati aya mu cikini ayapya. Umwaume umo alyebekeshiwe nga nshi ica kuti afwaile ukusambilila ifyafulilako pa lwa Nte sha kwa Yehova. Mu kuswatuka apokelele ulupapulo lwa Kuti Waikala Kuli Pe na pe Muli Paradise Pe Sonde.

Ukusunguka ukwine kwine kwalimoneke pa mpumi sha kwa mukamfwilwa na bana bakwe abanakashi lintu babwelele. Kwali ukulukushe filamba, inseko, no kukumbatana—akashita akashingalabwa aka kutemwa kwa Bwina Kristu no kukuntwa. Mu cituntulu, ukutemwa kwa cine cine no kwangwako ku filundwa fya cilonganino ifili mu kukabila fyaba cishibilo ca buKristu bwa cine, pantu Paulo alembele ati: “E ico cena, lyonse ilyo twaba ne nshita, tubombe icisuma kuli bonse, no kucishamo ku ba bwananyina bwa mu citetekelo.”—Abena Galatia 6:10.