‘Waishibe Ukufuma ku Bwaice’

UKULINGANA no kufwailisha kwa fya sayansi ukwa nomba line, ukulanda no tunya kulambukila apakalamba ukulunduluka kwa bongobongo wabo, kabili e po na maka yabo aya kutontonkanya, ukupelulula, no kupikulula amafya fitampila. Ici cabe ca cine maka maka mu mwaka wa kubalilapo mu bumi bwa kanya. International Herald Tribune ishimike fyo bakasapika nomba basumine ukuti “impendwa ya mashiwi akanya koomfwa cila bushiku e cintu cacindamisha icipima ukucenjela, ukucita bwino ku sukulu, no kulamuka mu bwikashi ku nshita ya ku ntanshi.”

Nangu cibe fyo, amashiwi yafwile ukufuma ku muntu. Cipalile kwati televishoni nelyo radio te kuti fibomfiwe nge fya kupyanikapo.

Uwasoma sayansi ya fya mitontonkanishishe pa Yuniversiti ya Washington mu Seattle, ku U.S.A. atile: “Nomba natusango kuti ukulundana kwa mishipashipa ya mongololo na bongobongo kupangwa ku bunya sana mu bumi no kuti bongobongo wa kanya alolela ukukumanya fimo ifingapima fintu uku kulundanya kwingabomba. Ni nomba line fye twishibe fintu uku kulundanya kwamba ku bunya sana, lyonse ili tatwaishibe. Ku ca kumwenako, ilyo utunya twaba ne myeshi fye 6 ninshi natusambilila ukutamantamako amashiwi yamo aya lulimi lulanda abafyashi.”

Uku kusapika kuletwishika ukutontonkanya kwaseeka ukwa kuti utunya tulakula na mano cikulu fye mwatutemwa sana. Kulekomaila na pa bucindami bwa lubali lwa bafyashi mu kukula kwa mwana.

Ici citwibukisha ulwa mashiwi ya muli kalata wapuutwamo untu umutumwa Paulo alembele kuli Timote ayatila: “Ukufuma ku bwaice waishibe amalembo ya mushilo ayaba na maka ya kukulengo wa mano ayalosha ku kupusuka mu kutetekela Kristu Yesu.” (2 Timote 1:5; 3:15) Ukwabulo kutwishika amalembo ya mushilo yantu nyina wasumina na nakulu balelanda kuli Timote ukufuma ku bwaice, yalimwafwile apakalamba mu kulunduluka ukwisaba umubomfi umusuma icine cine.—2 Timote 1:5; 3:15.