Bushe Baibo Kuti Yamwafwa Shani?

Bonse twalikwata amepusho pa co twabela pano calo, pa co tuculila, pa co tufwila, na pa fyo ifintu fikaba ku ntanshi. Na kabili tulafwaisha ukwishiba ifya kucita pa kupwisha amafya yamo pamo nga, ukusanga indalama sha kushitamo ifyo tukabila nelyo ukwishiba ifyo twingacita pa kuti tube ne nsansa mu lupwa. Abantu abengi basanga ukuti Baibo tayasuka fye amepusho ayacindama, lelo ilalanda na pa fingabafwa mu mikalile. Bushe kuli abo mwaishiba abo mulemona ukutila kuti banonkelamo mu kusambilila Baibo?

1. Mepusho nshi yamo ayo Baibo yasuka?

Baibo ilasuka amepusho yacindama pamo nga: Bushe ifya mweo fyaishilebako shani? Cinshi twabela pano calo? Mulandu nshi abantu baculila? Cinshi cicitika umuntu nga afwa? Nga ca kuti bonse tulafwaya umutende, cinshi inkondo shafulila mu calo? Bushe isonde likaba shani ku ntanshi? Baibo itukoselesha ukufwaya amasuko kuli aya mepusho, kabili abantu abengi nga nshi balitemwa amasuko basanga mu Baibo.

2. Bushe Baibo kuti yatwafwa shani ukuba ne nsansa?

Mu Baibo mwaliba ifintu ifisuma ifingi ifingatwafwa. Ku ca kumwenako, ilalanda pa fyo aba mu ndupwa bengacita pa kuti babe ne nsansa sha cine cine. Ilatweba ifyo twingacita nga natusakamikwa, e lyo ne fyo twingacita pa kuti tutemwe incito tubomba. Ilyo tukalalanshanya ifili muli cino citabo, mukamona ifyo Baibo isambilisha pali ifi twalandapo e lyo na pa fintu na fimbi. Kuti mwashininkisha ukuti “Amalembo yonse [fyonse ifyaba mu Baibo]” kuti yamwafwa.—2 Timote 3:16.

SAMBILILENI NA FIMBI

Moneni ifyo Baibo ya-afwa abantu, ifyo twingacita pa kuti tutemwe ukulabelenga Baibo, e lyo no mulandu cacindamina ukukwata aba kutwafwa ukumfwikisha ifyaba mu Baibo.

3. Baibo kuti yatutungulula

Baibo yaba kwati ni toci. Nga filya fine toci yafwa umuntu ilyo ale-enda ubushiku, Baibo nayo kuti yatwafwa ukusala bwino ifya kucita, kabili kuti yatweba ne fikacitika ku ntanshi.

Belengeni Amalumbo 119:105, lyena lanshanyeni amepusho yakonkapo:

• Bushe uwalembele aya amalumbo alemona shani Baibo?

• Bushe imwe mumona shani Baibo?

4. Baibo kuti ya-asuka amepusho twakwata

VIDIO: Twalilileni fye Ukuba ne Subilo! (1:48)

• Mepusho nshi ayo umwanakashi uwaciba muli vidio akwete?

• Bushe ukusambilila Baibo kwa-afwile shani uyu mwanakashi?

Baibo ilatukoselesha ukulaipusha amepusho. Belengeni Mateo 7:7, lyena lanshanyeni icipusho cakonkapo:

• Mepusho nshi mwakwata ayo nalimo Baibo ingasuka?

5. Kuti muleipakisha ukubelenga Baibo

VIDIO: Ukubelenga Baibolo (2:05)

• Bushe abacaice abali muli iyi vidio bamona shani ukubelenga?

• Nangu ca kuti tabatemwa ukubelenga, cinshi calenga batemwe ukubelenga Baibo?

Baibo itila ifyebo fyabamo kuti fyatusansamusha kabili kuti fyalenga twaba ne subilo. Belengeni Abena Roma 15:4, lyena lanshanyeni ici cipusho:

• Bushe mwatemwa ukwishiba ukuti ifyaba mu Baibo kuti fyatusansamusha kabili kuti fyalenga twaba ne subilo?

6. Abantu bambi kuti batwafwa ukumfwikisha ifyaba mu Baibo

Nangu ca kuti abantu abengi balabelenga Baibo, basanga ukuti ukulanshanya ifyaba mu Baibo na bantu bambi kulabafwa. Belengeni Imilimo 8:26-31, lyena lanshanyeni ici cipusho:

• Cinshi cingalenga twaumfwikisha ifyaba mu Baibo?—Moneni icikomo 30 na 31.

IFYO MUSAMBILILE

Mu Baibo mwaliba ifingatwafwa mu mikalile yesu, mwaliba amasuko ku mepusho yacindama, mwaliba ne fingasansamusha abantu kabili ifingalenga baba ne subilo.

Ukupitulukamo

• Finshi fyaba mu Baibo ifingatwafwa?

• Mepusho nshi yamo ayo Baibo yasuka?

• Finshi mwingatemwa ukusambilila mu Baibo?

ISHIBILENIPO NA FIMBI

Moneni ifyo Baibo ingatwafwa muno nshiku.

“Ifyebo Fyaba Muli Baibolo Filatwafwa Sana” (Ulupungu lwa kwa Kalinda Na. 1 2018)

Moneni ifyo Baibo ya-afwile umwaume umo uwaletontonkanya pa kuyipaya ukutula ku bwaice.

Ifyo Cali pa Kuti Ntendeke Ukuba ne Nsansa (2:53)

Moneni ifyaba mu Baibo ifingalenga aba mu ndupwa baba ne nsansa.

“Ifintu 12 Ifingafwa Indupwa” (Loleni! Na. 2 2018)

Moneni ifyo Baibo ilungika ifyo abengi baishiba pa uteka cino calo, ifishili fya cine.

Mulandu Nshi Mulingiile Ukusambilila Baibolo? (3:14)

1. Nga ca kuti bantu balembele Baibo, cinshi tulandila ukuti Lesa e mwine wa fyebo fyabamo?

Abalembele Baibo bali nalimo 40, kabili palipitile imyaka nalimo 1,600 pa kuti bapwishe ukuilemba. Batendeke ukuilemba mu mwaka wa 1513 ninshi Yesu talaisa pano isonde, kabili bapwishishe ukuilemba mu mwaka wa 98 ninshi Yesu alibwelelamo ku muulu. Na kabili abalembele Baibo bakwete inkulilo shapusanapusana. Ku ca kumwenako, bamo bali bakankaala kabili balisambilile sana, e lyo bambi bali bapiina kabili tabasambilile. Na lyo line fyonse ifyaba mu Baibo filomfwana. Cinshi calenga? Ni co Lesa e mwine wa Baibo. (Belengeni 1 Abena Tesalonika 2:13.) Abalembele Baibo tabalembele ifyo baletontonkanya. Lelo “umupashi wa mushilo e walengele balande amashiwi ayafumine kuli Lesa.”a (2 Petro 1:21) Lesa abomfeshe umupashi wakwe uwa mushilo ku kulenga abaume ukulemba amashiwi yakwe.—2 Timote 3:16.