Mulenakila Yehova

“Uku e kutemwa Lesa, ukuti tubake amafunde yakwe; kabili amafunde yakwe tayaba cisendo.”—1 YOH 5:3.

1, 2. (a) Mulandu nshi abantu abengi muno nshiku bashifwaila ukulanakila bambi? (b) Bushe ca cine ukuti abakaana ukunakila bambi baicitila fye ifyo abene balefwaya? Londololeni.

MUNO nshiku abantu abengi tabafwaya ukunakila bambi. Caba kwati batila: “Nshifwaya umuntu nangu umo ukunjeba ifya kucita.” Lelo, bushe ca cine ukuti aba bantu bacita fye ifyo abene balefwaya? Awe nakalya! Abengi bakonkelesha fye ificita abantu abengi aba mu “bwikashi buno.” (Rom. 12:2) Kanshi aba bantu tabaicitila fye ifyo abene balefwaya, lelo nge fyasosele umutumwa Petro, “basha ba kubola.” (2 Pet. 2:19) Benda “umwabela ubwikashi bwa cino calo, umwabela kateeka wa maka ya mu lwelele,” Satana Kaseebanya.—Efes. 2:2.

² Uulemba ifitabo umo aitakishe ukuti: “Nshileka abafyashi bandi nelyo bashimapepo nangu abakalamba ba ku calici . . . nangu fye ni Baibolo ukunjeba ifyo mfwile ukumona ukuti e fyalungama.” Ca cine ukuti abantu bamo abatutungulula nalimo kuti baba abankalwe ica kutila te kuti balinge no kubanakila. Lelo bushe ici e cingalenga tuletontonkanya ukuti tatulingile ukunakila uuli onse? Nga twabelenga fye imitwe ya malyashi ayaba mu nyunshipepala tulamona ukuti abantu abengi tabafwaya ukunakila ababatungulula. Nomba ca bulanda ukumona abengi balekaana ukunakila ababatungulula nangu cingati pali ino nshita e lyo abantu balekabila sana aba kubatungulula.

Ifyo Tumona Intungulushi

3. Bushe Abena Kristu ba kubalilapo balangile shani ukuti tabalekonka fye fyonse ifyo bakateka balebeba ukwabula ukumona nga nafilungama?

³ Fwe Bena Kristu twalipusana sana na bantu ba muli cino calo. Ici tacipilibula ukuti tucita fye fyonse ifyo batweba ukwabula no kumona nga fili fye bwino. Lelo, limo limo tulakaana ukucita ifyo bambi batweba nangu cingati e batutungulula. Ifi fine e fyo na Bena Kristu ba kubalilapo balecita. Ica kumwenako fye, ilyo abatumwa babaleseshe ukushimikila, tabanakile ku fyo shimapepo mukalamba ne ntungulushi shali mu cilye ca Sanhedrini shabebele. Tabalekele ukucita icalungama pa kuti fye banakile bakateka abantunse.—Belengeni Imilimo 5:27-29.

4. Malyashi nshi ayaba mu Malembo ya ciHebere ayalanga ukuti abantu ba kwa Lesa tabalecita ifyo abantu abengi balefwaya ukuti bacite?

⁴ Na babomfi ba kwa Lesa abaliko ilyo Yesu ashilaisa pano calo nabo bene e fyo balecita. Ica kumwenako fye, Mose ‘alikeene ukwitwa umwana wa mwana mwanakashi wa kwa Farao, asalile ukucushiwa pamo na bantu ba kwa Lesa,’ nangu cingati ukucite fyo kwalengele imfumu ukukalipa nga nshi. (Heb. 11:24, 25, 27) Ilyo muka Potifari alemupatikisha ukulaala nankwe, Yosefe alikeene nangu cingati alishibe ukutila ulya mwanakashi kuti amubepesha ubufi pa kuti bamukande. (Ukute. 39:7-9) Daniele “apangile mu mutima wakwe ukukanaikowesha ku fya maliila ya mfumu” nangu cingati alishibe ukuti cali no kwafya ukulenga umukalamba wa bacilolo ba kwi sano lya mu Babiloni ukusumina ukucita ifyo Daniele alefwaya. (Dan. 1:8-14) Aya malyashi twalandapo yalanga ukuti abantu ba kwa Lesa aba ku kale bapampamine pa kucita icalungama te mulandu ne fyo balepitamo. Tabanakile ku fyo bambi balefwaya ukuti bacite pa kuti fye babatemwe. Ifi fine e fyo na ifwe tufwile ukucita.

5. Bushe ifyo tumona intungulushi fyapusana shani ne fyo abantu ba muli cino calo bashimona?

⁵ Ifi twapampamina pa kucita icalungama te kutila ninshi ni fwe bamunshebwa; kabili te kutila twaba nga balya abapondokela ubuteko pa mulandu fye wa kuti tabatemenwe imitekele. Lelo, twasalapo ukulanakila Yehova ukucila ukunakila umuntu uuli onse. Nga ca kuti amafunde ya bantu yalepinkana na mafunde ya kwa Lesa, tacitukosela ukwishiba ifyo tulingile ukucita. Nga filya fine fyacitile abatumwa, na ifwe tunakila Lesa ukucila ukunakila abantu.

6. Mulandu nshi cawamina nga nshi ukulaumfwila amafunde ya kwa Yehova lyonse?

⁶ Cinshi calenga ukuti tulenakila Lesa? Tumfwila amashiwi yaba pa Amapinda 3:5, 6 ayatila: “Tetekela Yehova umutima obe onse, na ku kwiluka kobe we mwine wishintililako; uko konse wenda umwishibe, na o akatambalike nshila shobe.” Twasumina ukuti nga tulekonka fyonse ifyo Lesa atweba ukucita, ifintu fikatuwamina ku ntanshi. (Belengeni Amalango 10:12, 13.) Na kabushe, Yehova ailondolwele ku bena Israele ukuti nine “uukusambilisho kuti ucenjele, uukwensha mu nshila iyo ufwile ukuyamo.” Kabili alundilepo no kuti: “Iye, nga wapeepeka ku mafunde yandi! lyene umutende obe nga waba ngo mumana, no bulungami bobe nga mabimbi ya bemba.” (Esa. 48:17, 18) Twalicetekela aya mashiwi. Twalishininkisha ukuti nga tuleumfwila amafunde ya kwa Lesa, ni fwe tunonkelamo.

7. Cinshi tufwile ukucita nga tatwishibe bwino bwino umulandu Lesa atupeelela ifunde limo ilyaba mu Cebo cakwe?

⁷ Tulanakila Yehova no kumumfwila nangu ni lintu tushishibe bwino bwino umulandu atupeelela amafunde yamo ayaba mu Cebo cakwe. Icilenga tulemumfwila te kutila ni co tukonka fye ifyo aletweba ukwabulo kutontonkanyapo; lelo ni pa mulandu wa kuti twalimucetekela. Ukunakila no kumfwila amafunde ya kwa Yehova kulanga ukuti twalitetekela ukuti e waishiba bwino ifingatuwamina. Na kabili ukumfwila amafunde yakwe kulanga ukuti twalimutemwa pantu umutumwa Yohane alembele ukuti: “Uku e kutemwa Lesa, ukuti tubake amafunde yakwe.” (1 Yoh. 5:3) Lelo kuliko na fimbi ifyo tufwile ukucita ifilanga ukuti twaliba ne cumfwila kuli Yehova.

Ukukansha Ukulingulula Kwesu

8. Bushe ‘ukukansha ukulingulula’ kwesu kwayampana shani no kulaumfwila amafunde ya kwa Yehova?

⁸ Baibolo itweba ukuti tufwile ‘ukukansha ukulingulula kwesu ku kulekanya icalungama ne cabipa.’ (Heb. 5:14) Kanshi ubuyo bwesu te kulaumfwila fye amafunde ya kwa Lesa ukwabula no kulatontonkanya pa mulandu yabelako; lelo, tufwaya ukuba na mano ya “kulekanya” ifyo amafunde ya kwa Yehova yatila e ‘fyalungama ne fyabipa.’ Tufwaya ukumona ubusuma bwaba mu kumfwila amafunde ya kwa Yehova pa kuti na ifwe tukasose nge fyasosele kemba wa malumbo uwatile: “Amalango yenu yali mu mutima wandi.”—Amalu. 40:8.

9. Kuti twacita shani pa kuti kampingu yesu ilekonka ifishinte fya kwa Yehova, kabili mulandu nshi ukucitila ifi kwacindamina?

⁹ Nge fyo cali kuli kemba wa malumbo, pa kuti na ifwe twiluke ifyo amafunde ya kwa Lesa yacindama, tufwile ukulatontonkanya pa fyo tubelenga mu Baibolo. Ica kumwenako fye, nga twasambilila fimo ifyo Yehova afwaya ukuti tulecita, tufwile ukuipusha ukuti: ‘Mulandu nshi ili funde nelyo ici cishinte ciwamine? Mulandu nshi ciwamine ukuti ndekonka ifi nasambilila? Fintu nshi ifyabipa ifyacitikile abantu abashakonkele uku kufunda kwa kwa Lesa?’ Nga ca kuti kampingu yesu ilekonka ifishinte fya kwa Yehova muli uyu musango, ninshi tukalacita ifintu ukulingana no kufwaya kwakwe. Tukaba na mano ya ‘kukutuluka icabo kufwaya kwa kwa Yehova’ kabili tukalaumfwila ifyo amafunde yakwe yatweba ukucita. (Efes. 5:17) Kwena ukucita ifi takwayanguka.

Satana Afwaya Ukuti Twilanakila Lesa

10. Ni mwi umo Satana afwaya ukuti twilanakila amafunde ya kwa Lesa?

¹⁰ Ukutula fye na kale, Satana afwaya ukuti twilanakila Lesa. Bucipondoka bwakwe bulamoneka mu nshila ishapusanapusana. Ica kumwenako fye, tontonkanyeni pa fyo abantu bamona icupo ico Lesa atendeke. Abantu bamo basalapo ukulaikala pamo ukwabula ukuupana, ilyo bambi bena bafwaya ukupwisha ifyupo fyabo. Abantu ba musango yu tabacindike cupo, lelo batontonkanya ngo mwanakashi uupanga amafilimu, uwatile: “Umuntu te kuti akwate fye umwina mwakwe umo.” Lyena asosele no kuti: “Nshamonapo umuntu uwaba ne cishinka ku mwina mwakwe nelyo uufwaya ukuba uwa cishinka ku mwina mwakwe.” Ilyo umwaume uupanga amafilimu atontonkenye pa fyupo fyakwe ifyapwa, na o atile: “Imona kwati tabatupangile ukulaikala no mwina mobe umo fye mpaka ne mfwa.” E co tulingile ukuipusha ukuti: ‘Bushe ndanakila amafunde ya kwa Yehova ayalanda pa cupo, nelyo na ine mona kwati icupo ca pa nshita fye iinono nge fyo abantu ba muli cino calo batontonkanya?’

11, 12. (a) Mulandu nshi abacaice cingabafisha ukunakila amafunde ya kwa Yehova? (b) Shimikeni icacitike icilanga ukuti ukukanaumfwila amafunde ne fishinte fya kwa Yehova kwalibipa.

¹¹ Bushe uli wacaice uubombela Yehova? Nga ulabombela Yehova, ninshi na iwe wine limbi waba pa bantu abo Satana afwaisha ukuti baletontonkanya ukutila amafunde ya kwa Yehova tayawama. “Ulunkumbwa lwa bwaice” no mutitikisha wa banobe kuti fyalenga walatontonkanya ukuti amafunde ya kwa Lesa yalyafya. (2 Tim. 2:22) Wikasuminisha ica musango yu ukucitika. Uleesha na maka ukumona ubusuma bwaba mu kulaumfwila amafunde ya kwa Lesa. Ica kumwenako fye, Baibolo ikweba ukuti “fulumuko bulalelale.” (1 Kor. 6:18) Kanshi ufwile ukuipusha aya mepusho yatila: ‘Mulandu nshi ili funde lyawamina? Bushe kuti nanonkelamo shani nga ndeumfwila ili funde?’ Nalimo walishibapo bamo abashaumfwilile ifunde lya kwa Lesa kabili abaculile icibi pa mulandu wa kucita icabipa. Bushe baliba ne nsansa pali ino nshita? Bushe ubumi bwabo bwaliba bwino sana ukucila ifyo bwali ilyo balebombela Yehova? Bushe balisanga icingalenga baba ne nsansa ico ababomfi ba kwa Lesa bashaishiba?—Belengeni Esaya 65:14.

¹² Tontonkanyeni pa mashiwi yasosele Umwina Kristu we shina lya kuti Sharon, atile: “Pa mulandu wa kukanaumfwila ifunde lya kwa Yehova ilyakaanya ubulalelale nalyambula akashishi kaleta ubulwele bwa AIDS. Ilingi line ndatontonkanya pa fyo nali ne nsansa pa myaka iingi ilyo nalebombela Yehova.” Sharon alilwike ukuti alilufyenye ukukanaumfwila amafunde ya kwa Yehova no kuti alingile ukulamona amafunde ya kwa Lesa ukuti yalicindama sana. Amafunde ya kwa Yehova yalatucingilila. Sharon afwile ilyo papitile fye imilungu 7 ukutula apo alembele amashiwi yali pa muulu. Ifyapitilemo Sharon filanga ukuti Satana takwata ifintu ifisuma ifyo engapeela abantu abailekelesha no kutendeka ukulakonka imibele yabipa iyakwata abantu ba muli cino calo. Apo ni “wishi wa bufi,” alalaya ifilayo ifingi, lelo alafilwa ukufikilisha, nge fyo afililwe ukufikilisha ifyo alaile Efa. (Yoh. 8:44) Ukwabula no kutwishika calicindama ukunakila amafunde ya kwa Yehova.

Tatufwile Ukuba ba Mano Kuikwatila

13. Mulandu nshi umo uo tulingile ukusengaukila ukuba ba mano kuikwatila?

¹³ Pa kuti tulenakila amafunde ya kwa Yehova, tufwile ukusengauka ukuba ba mano kuikwatila. Icilumba kuti calenga twalamona kwati tatukabila uuli onse ukulatutungulula. Ica kumwenako fye, nga tuli ne cilumba kuti tulekaana ukufunda kwa bantu abo Lesa asala ukulatungulula abantu bakwe. Lesa ateyanya ukuti kube umusha wa cishinka kabili uwashilimuka pa kuti alepekanya ifya kulya fya ku mupashi pa nshita yalinga. (Mat. 24:45-47) Tufwile ukusumina ukuti Yehova abomfya umusha wa cishinka kabili uwashilimuka pa kusakamana abantu bakwe muno nshiku. Kanshi tulingile ukuba aba cishinka nga filya fine abatumwa ba kwa Yesu bali. Ilyo abasambi bamo bakalipe no kuleka ukulamukonka, Yesu aipwishe abatumwa ukuti: “Bushe na imwe mulefwaya ukuya?” Petro ayaswike ukuti: “Mwe Shikulu, ni kuli nani twingaya? Ni mwe muli ne fyebo fya bumi bwa muyayaya.”—Yoh. 6:66-68.

14, 15. Mulandu nshi tulingile ukumfwila ukufunda kwa mu Baibolo?

¹⁴ Ukunakila Yehova kusanshamo no kumfwila ukufunda ukwa mu Cebo cakwe. Ica kumwenako fye, umusha wa cishinka kabili uwashilimuka alatusoka ukuti tulingile ukuba ‘abalola kabili abatekanya.’ (1 Tes. 5:6) Uku kufunda kwalicindama sana pantu abantu abengi muli shino nshiku sha kulekelesha ‘bali-itemwa kabili balitemwa indalama.’ (2 Tim. 3:1, 2) Bushe na ifwe kuti twaba ne yi mibele iseekele muli cino calo? Ee na ifwe bene kuti twakwata iyi mibele. Ukukonkelela ubuyo bushili bwa kubombela Lesa kuti kwalenga twaleka ukubika amano kuli bucibusa bwesu na ena, nelyo kuti twalafwaisha ukunonka sana. (Luka 12:16-21) Kanshi nacicindama sana ukumfwila ukufunda kwa mu Baibolo no kusengauka imikalile ya kuisekesha iiseekele nga nshi muli cino calo ca kwa Satana!—1 Yoh. 2:16.

¹⁵ Baeluda ababa mu filonganino twabamo e batupeela ica kulya ca ku mupashi ico umusha wa cishinka kabili uwashilimuka apekanya. Baibolo itukonkomesha ukuti: “Umfwileni abalemutungulula no kubanakila, pantu balinda imyeo yenu nga bantu abakalubulula; ukuti bacite ici mu kusekelela, te mu bulanda iyo, pantu nga cabe fi kuti camubipila.” (Heb. 13:17) Bushe ici cilepilibula ukuti baeluda te kuti balufyanye? Awe nakalya! Lesa alamona ifilubo bacita ukucila ifyo fwe bantunse twingamona. Na lyo line, enekela ifwe ukulabanakila. Ukulabombela pamo na baeluda, nangu cingati tabapwililika, kulanga ukuti tulanakila Yehova.

Umulandu Ukuicefya Kwacindamina

16. Bushe kuti twanakila shani Yesu Umutwe wa cilonganino ca Bena Kristu?

¹⁶ Lyonse tufwile ukulaibukisha ukuti Yesu e Mutwe wa cilonganino. (Kol. 1:18) Uyu e mulandu umo uulenga ukuti tulenakila baeluda, ‘ukubacindikisha mu kutemwa.’ (1 Tes. 5:12, 13) E lyo baeluda nabo kuti balanga ukuti balanakila Lesa nga balebika amano ku kusambilisha aba mu cilonganino ifyebo fya kwa Lesa, te kusambilisha fye ifyo abene baletontonkanya. ‘Tabacila mu fyalembwa’ pa kuti belasambilisha ifya mu mitwe yabo.—1 Kor. 4:6.

17. Mulandu nshi ukufwaisha ukulumbuka kwabipila?

¹⁷ Bonse mu cilonganino bafwile ukwishiba ukuti ukufwaya ukulumbuka kwalibipa. (Amapi. 25:27) Nalimo ubu e bwafya bwakwete umusambi umo uo umutumwa Yohane akumenye. Yohane alembele ukuti: “Diotrefe, uwatemwa ukuba uwa ntanshi pali bene, tapokelela no mucinshi conse icifuma kuli ifwe. E ico, nga naisa, nkebukisha imilimo yakwe iyo atwalilila ukucita, pa kutubwabwatila ifyebo fya bubifi.” (3 Yoh. 9, 10) Na ifwe bene kuti twasambililako cimo ku fyacitikile Diotrefe. Tufwile ukufumya amatontonkanyo ya kufwaya ukulumbuka mu mitima yesu. Baibolo itila: “Amatutumuko yatangililo kufunaulwa, no kutuuma kwa mutima kutangililo kuipununa.” Abantu abanakila Lesa tabalingile ukuba na matutumuko pantu ukuba na matutumuko kuti kwalenga baisaseebana.—Amapi. 11:2; 16:18.

18. Cinshi cingalenga ukuti tulenakila Yehova?

¹⁸ Kanshi mube no buyo bwa kulanakila Yehova, no kulaibaka pa kuti tamusangwike ba mano kuikwatila. Libili libili, muletontonkanya sana pe shuko ilikalamba mwakwata ilya kubombela Yehova. Ifi mwaba pa bantu ba kwa Lesa ninshi Yehova umwine e wamukula ukubomfya umupashi wakwe uwa mushilo. (Yoh. 6:44) Te kwesha ukulekelesha bucibusa bwenu na Lesa. Muli fyonse ifyo mulecita muleesha na maka ukulanga ukuti tamuli ba mano kuikwatila lelo mulanakila Yehova.

Bushe Muleibukisha?

• Bushe ukunakila Yehova kusanshamo finshi?

• Bushe ukukansha ukulingulula kwesu kwayampana shani no kulaumfwila amafunde ya kwa Yehova?

• Ni muli finshi umo Satana afwaya ukuti twilanakila amafunde ya kwa Lesa?

• Mulandu nshi ukuicefya kwacindamina nga tulefwaya ukulanakila Yehova?

[Icikope pe bula 18]

“Tufwile ukunakila Lesa nga kateeka ukucila ukunakila abantu”

[Icikope pe bula 20]

Lyonse fye caliwama ukulaumfwila amafunde ya kwa Lesa