‘Angweni Sana ku Fyo Mumfwa’

“E ico tufwile ukwangwo kucila ifyo twaumfwa, epali twasensenunwako.”—ABAHEBERE 2:1.

1. Langilileni ifyo ukupumfyanishiwa kwingaleta akayofi.

ABANTU nalimo 37,000 balafwa mu masanso ya pa musebo cila mwaka mu United States mweka fye. Incenshi shilanda ati te kuti kube imfwa ishingi isha musango yu nga ca kuti banamutekenya balepoosako amano ilyo bali pa musebo. Banamutekenya bamo bapumfyanishiwa ku fishibilo fya mu musebo ne fipampa nelyo ku kubomfya foni wa kwenda na o. Kwaliba na banamutekenya abalya ilyo baleensha. Muli iyi mibele yonse, ukupumfyanishiwa kuti kwaleta akayofi.

2, 3. Kufunda nshi Paulo afundile Abena Kristu abaHebere, kabili mulandu nshi ukufunda kwakwe kwabelele ukwalinga?

² Mupepi ne myaka 2,000 iyapitapo ilyo takulaba motoka, umutumwa Paulo alandile pa kupumfyanya kumo ukwaleleta utuyofi ku Bena Kristu ba ciHebere bamo. Paulo akomaile pa cishinka ca kuti Yesu Kristu uwabuushiwe apeelwe icifulo cacila bamalaika bonse, pantu aikeele ku kwa kulyo kwa kwa Lesa. Umutumwa lyene atile: “E ico tufwile ukwangwo kucila ifyo twaumfwa, epali twasensenunwako.”—AbaHebere 2:1.

³ Mulandu nshi Abena Kristu abaHebere balekabila ‘ukwangwo kucila ifyo baumfwa’ ulwa kwa Yesu? Pantu imyaka nalimo 30 yali naipita ukutula apo Yesu afumine pe sonde. Apo Shikulwibo talipo, Abena Kristu abaHebere bamo batendeke ukusensenunwa ukufuma ku citetekelo ca cine. Balepumfyanishiwa ku buYuda, uko balepepa kale.

Balekabila Ukwangwa Ukucila

4. Mulandu nshi pambi Abena Kristu abaHebere bamo balefwaila ukubwelela ku buYuda?

⁴ Mulandu nshi Umwina Kristu uuli onse engafwaila ukubwelela ku buYuda? Kwena, imipepele umwabela Amalango yalesanshamo ifintu fyalemoneka. Abantu balemona uko bashimapepo baleoca amalambo no kumfwe cena ca fyaleocewa. Lelo, mu mbali shimo Ubwina Kristu bwalipuseneko. Abena Kristu bakwete Shimapepo Mukalamba, Yesu Kristu, lelo imyaka 30 yali naipita ukutula apo afumine pe sonde. (AbaHebere 4:14) Balikwete itempele, lelo umwashila mwa ili tempele mwali ni mu muulu mwine. (AbaHebere 9:24) Ukupusana no kusembululwa kwalecitwa umwabela Amalango, ukusembululwa kwa Bena Kristu kwali “kwa mutima, kwa mupashi.” (Abena Roma 2:29) E co ku Bena Kristu abaHebere, Ubwina Kristu napamo bwatendeke ukumoneka ngo bwa fintu fishimoneka.

5. Bushe Paulo alangile shani ukuti imipepele Yesu atendeke yalicilile ilya yaliko umwabela Amalango?

⁵ Abena Kristu abaHebere balekabila ukwiluka icintu cacindama sana pa lwa mipepele Kristu atendeke. Yashintilile sana pa citetekelo te pa kumona, lelo yacilile Amalango yapeelwe muli kasesema Mose. Paulo alembele ukuti: “Umulopa wa mbushi no wa ng’ombe shilume ne mito ya mutepa wa ng’ombe, pa kukanwa pa bakowela, nga fishisha ku kulengo kusanguluka kwa mubili: pali bufi umulopa wa kwa Kristu, uwaituulile uwabula akalema kuli Lesa mu Mupashi wa muyayaya, ukasangulula bakampingu wenu ku milimo yafwa no kumulosha mu kubombela Lesa wa mweo.” (AbaHebere 9:13, 14) Cine cine, ukwelela kwabako ukupitila mu kutetekela mwi lambo lya cilubula ilya kwa Yesu Kristu kwalicila mu nshila ishingi ukwelela kwaliko ukupitila mu kupeela amalambo umwabela Amalango.—AbaHebere 7:26-28.

6, 7. (a) Mibele nshi yalengele cibe ice pamfya ukuti Abena Kristu abaHebere ‘bangwe ukucila ifyo baumfwa’? (b) Lintu Paulo alembeele kalata abaHebere, inshita yasheleko kuli Yerusalemu yalepele shani? (Moneni utulembo twa pe samba.)

⁶ Kwali umulandu na umbi Abena Kristu abaHebere balekabila ukwangwa sana ifyo baumfwile pali Yesu. Alisobele ukuti Yerusalemu ali no konaulwa. Yesu atile: “Inshiku shikakufikila, ilyo abalwani bobe bakakushingulushe camba, no kukushinga, no kukucandila konse konse, no kufuntula iwe na bana bobe abali muli iwe, kabili tabakashe muli iwe ilibwe limo pa libiye; pantu tawaishibe nshita Lesa akwishile cipempu.”—Luka 19:43, 44.

⁷ Ni lilali ici cali no kucitika? Yesu tasokolwele ubushiku ne nshita. Lelo, alandile fi: “Ilyo mukamona Yerusalemu naushingwa ku milalo, e lyo ishibeni ukuti ukupomonwa kwa uko nakupalama. E lyo abali mu Yudea bafulumukile ku mpili; na bali mu kati ka uko bafumemo; na bali mu mapanga beingilamo.” (Luka 21:20, 21) Muli ilya myaka 30 ukutula apo Yesu alandile aya mashiwi, Abena Kristu bamo mu Yerusalemu balekele ukuba abapamfiwa kabili balipumfyanishiwe. Cali kwati bapumfyanishiwe ilyo baali pa musebo. Nga tabaalwile ukutontonkanya kwabo, baali no kuponenwa na kayofi. Ubonaushi bwa Yerusalemu bwalipaleme, nampo nga balitontonkenyepo nangu iyo!a Tulesubila ukuti ukufunda kwa kwa Paulo kwali kusoka ku Bena Kristu baleshipula lwa ku mupashi mu Yerusalemu.

“Ukwangwo Kucila” Lelo

8. Mulandu nshi tulingile “ukwangwo kucila” icine ca mu Cebo ca kwa Lesa?

⁸ Nga Bena Kristu ba mu mwanda wa myaka uwa kubalilapo, tufwile “ukwangwo kucila” Icebo ca kwa Lesa. Mulandu nshi? Pantu na ifwe tulolenkene no bonaushi, te bwa luko fye lumo, lelo ubwa bwikashi bonse. (Ukusokolola 11:18; 16:14, 16) Kwena, tatwaishiba ubushiku nelyo inshita lintu Yehova ali no kucite ci. (Mateo 24:36) Na lyo line, tulemonako ukufishiwapo kwa kusesema kwa Baibolo ukulangilila bwino ukuti tuleikala mu “nshiku sha kulekelesha.” (2 Timote 3:1-5) E co, tufwile ukuibaka ku cili conse icingatupumfyanya. Tufwile ukwangwa Icebo ca kwa Lesa no kutwalilila ukuba abapamfiwa. Ni lyo fye tulecite ci e lintu ‘tukapusuka kuli ifi fyonse ifikesapona.’—Luka 21:36.