Endeleni mu Kutetekela, Te mu Kumona!

“Twendela mu kutetekela, te mu kumona.”—2 ABENA KORINTI 5:7.

1. Cinshi cilanga ukuti umutumwa Paulo ale-endela mu kutetekela, te mu kumona?

CILI ni mu mwaka wa 55 C.E. Imyaka nalimo 20 naipita ukutula apo umwaume we shina lya Sauli, uwalepakasa Abena Kristu, aishibile icine. Nangu napapite myaka iingi icitetekelo cakwe muli Lesa cili fye icakosa ndi. Nangu ca kuti tamona ifyaba mu muulu na menso yakwe, aba ne citetekelo icakosa nga nshi. Ilyo umutumwa Paulo alembele kalata ku Bena Kristu basubwa, abakwate subilo lya kwikala ku muulu, atile: “Twendela mu kutetekela, te mu kumona.”—2 Abena Korinti 5:7.

2, 3. (a) Bushe tulanga shani ukuti tule-endela mu kutetekela? (b) Ukwendela mu kumona kwalola mwi?

² Pa kwendela mu kutetekela tukabila ukucetekela umupwilapo ukuti Yehova fye e wingatutungulula. Tufwile ukushininkisha ukuti alishiba bwino ifyo twatemwa. (Amalumbo 119:66) Ilyo tulepingulapo ifya kucita, tulatontonkanya na pa “fintu ifishimoneka.” (AbaHebere 11:1, Diocese of Mbala Bible) Ifi fisanshamo no bulayo bwa “myulu ipya ne calo cipya.” (2 Petro 3:13) Ukwendela mu kumona kwena kupilibula ukulakonkelela ifyo tumona na menso yesu. Ukwendela mu kumona kwalibipa pantu kuti kwalenga twalaba ukucita ukufwaya kwa kwa Lesa.—Amalumbo 81:12; Lukala Milandu 11:9.

³ Nampo nga tuli ba mu “mukuni unono,” abasalwa ukuyaikala ku muulu, nelyo aba mu “mpaanga shimbi,” abakwata isubilo lya kwikala pano isonde, tulingile ukumfwila ukufunda kwa kwendela mu kutetekela te mu kumona iyo. (Luka 12:32; Yohane 10:16) Natumone ifyo ukumfwila uku kufunda kwapuutwamo kwingatulenga ukukaana ifya “kuipakisha kwa pa kashita fye ukwa lubembu,” ifyo kwingatulenga ukukanawila mu citeyo ca kutemwa ifikwatwa, ne fyo kwingatulenga ukulaibukisha ukuti impela ya buno bwikashi naipalama. Kabili twalalanda na pa fyo ukwendela mu kumona kwabipa.—AbaHebere 11:25.

Ukukaana “Ukuipakisha kwa pa Kashita fye Ukwa Lubembu”

4. Cinshi Mose asalilepo ukucita, kabili mulandu nshi?

⁴ Tontonkanyeni pa fyo Mose, mwana Amramu, aali no kwikala. Apo akushiwe pamo na bana ba mfumu ya ku Egupti, nga alikwete ubulashi, icuma, na maka. Nalimo nga atontonkenye ukuti: ‘Nalisambilishiwa bwino amano ya bena Egupti, kabili nalikwata amaka no bulashi. Nga ca kuti natwalilila ukwikala kwi sano, kuti na bomfya icifulo candi ku kupususha bamunyinane abaHebere abatitikishiwa.’ (Imilimo 7:22) Mu nshita ya ico, Mose asalilepo “ukucushiwa pamo na bantu ba kwa Lesa.” Mulandu nshi? Cinshi calengele ukuti Mose akaane fyonse ifyo ali no kunonka mu Egupti? Baibolo ilondolola ukuti: “Ni ku citetekelo e ko [Mose] ashilile Egupti, lelo tatiinine icipyu ca mfumu, pantu atwalilile ukushangila ngo umona Uushimoneka.” (AbaHebere 11:24-27) Ukutetekela ukuti Yehova alalambula bonse abalungama e kwalengele ukuti Mose akaane ukuipakisha ukwa pa kashita fye ukwa lubembu.

5. Bushe ica kumwenako ca kwa Mose citukoselesha shani?

⁵ Ilingi line na kuli ifwe kulaba inshita ilyo tukabila ukutontonkanya no kupingula ifya kucita pa milandu iyapala iyi: ‘Bushe mfwile ukuleka imisango imo nelyo ukucita fimo ifyapusana ne fishinte fya mu Baibolo? Bushe nkengile incito iyo nkalafola indalama ishingi lelo iikalancilikila ukulunduluka ku mupashi?’ Ica kumwenako ca kwa Mose ciletukoselesha ukukanaba nga ba mu calo abashisala bwino ifya kucita; lelo, tulingile ukutetekela amano ya “Uushimoneka,” Yehova Lesa uwishiba ifya ku ntanshi. Ukupala Mose, natucindamike bucibusa bwesu na Yehova ukucila icili conse ico twinganonka muli cino calo.

6, 7. (a) Bushe Esau alangile shani ukuti asalilepo ukwendela mu kumona? (b) Cinshi tusambililako ku fyacitikile Esau?

⁶ Cilanyeni Mose na Esau, umwana wa kwa Isaki. Esau asalilepo ukuipakisha kwa pa kashita fye akanono. (Ukutendeka 25:30-34) Apo Esau ‘alisuulile ifyashila,’ akabushenye insambu shakwe isha bubeli “mu cilyo cimo.” (AbaHebere 12:16) Afililwe ukutontonkanya pa fyo ukushitisha ububeli kwali no kukuma bucibusa bwakwe na Yehova nelyo ifyo ico asalilepo ukucita cali no kukuma ubufyashi bwakwe. Esau alipofwile ku mupashi. Asuulile ubulayo bwa kwa Yehova ubwacindama, kabili alemona kwati tabwacindeme. Esau ale-endela mu kumona te mu kutetekela iyo.

⁷ Na lelo line, tulasambililako ku fyacitikile Esau. (1 Abena Korinti 10:11) Nga tulefwaya ukucite fintu fimo, nampo nga fintu fyacindama nelyo ifishacindama, tatulingile ukubelelekwa ku malyashi ya muli cino calo, ayatila ino ine e nshita ya kukwata ifyo ulefwaya. Tulingile ukuipusha ukuti: ‘Bushe ico nasalapo kucita cilelangilila ukuti nshicindamike ifya ku mupashi nge fyo Esau acitile? Bushe ukukwata ifyo ndefwaya ino nshita kwalalenga ukuti mfilwe ukubika amano ku fya ku mupashi? Bushe ifyo nasalapo ukucita kuti fyakuma bucibusa bwandi na Yehova ne cilambu ica ku ntanshi? Bushe ca kumwenako nshi ndeimika kuli bambi?’ Nga ca kuti ifyo tupingulapo ukucita filangilila ukuti twalicindamika ifya ku mupashi, Yehova akatupaala.—Amapinda 10:22.

Ukusengauka Iciteyo ca Kutemwisha Ifikwatwa

8. Kusoka nshi uko Abena Kristu ba mu Laodikea bapokelele, kabili mulandu nshi kwacindamina kuli ifwe?

⁸ Ku mpela ya mwanda wa myaka uwa kubalilapo, Yohane apokelele ukusokolola ukufuma kuli Yesu Kristu mu bukata bwakwe. Yesu apeele ubukombe ku cilonganino cali mu Laodikea, ku Asia Minor. Alebasoka pa kutemwisha ifikwatwa. Nangu ca kuti Abena Kristu ba mu Laodikea bali abakankaala, ku mupashi bali abapiina. Mu nshita ya kuti batwalilile ukulaendela mu kutetekela, balekele ifikwatwa ukubapofwisha ku mupashi. (Ukusokolola 3:14-18) Ifi fine e fyo caba na muno nshiku. Ifikwatwa filanasha icitetekelo cesu no kutulenga ukuleka ‘ukubutuka ulubilo’ lwa ku bumi. (AbaHebere 12:1) Nga tatucenjele, ‘ukwangala kwa mikalile ino’ kuti kwatendeka ukutabilila ifya ku mupashi ukufikila ‘fyatabililwa umupwilapo.’—Luka 8:14.

9. Bushe ukuteka imitima ku fyo tukwete no kucindamika ifya kulya fya ku mupashi kutucingilila shani?

⁹ Pa kuicingilila ku mupashi, tukabila ukuteka imitima ku fyo twakwata ukucila ukulafwaya ukubomfya sana cino calo no kuitutila ifyuma. (1 Abena Korinti 7:31; 1 Timote 6:6-8) Tulaipakisha ukuba muli paradaise wa ku mupashi nga tule-endela mu kutetekela, te mu kumona iyo. Nga tulelya ifya ku mupashi, tulacincishiwa ‘ukwaula utupundu pa mulandu wa kusekelela mu mitima.’ (Esaya 65:13, 14) Na kabili, tulatemwa ukwampana na bakwata ifisabo fya mupashi wa kwa Lesa. (Abena Galatia 5:22, 23) Ala calicindama ukuti twikushiwe no kupembesulwa ku fyo Yehova atupekanishisha ku mupashi!

10. Mepusho nshi tulingile ukuipusha?

¹⁰ Amepusho tulingile ukuipusha ya kuti: ‘Bushe ifikwatwa fyacindama shani mu mikalile yandi? Bushe ifikwatwa fyandi ndefibomfya ku kwangala nelyo ku kutungilila ukupepa kwa cine? Finshi filenga ukuti ndeikushiwa sana? Bushe kubelenga Baibolo no kulongana pamo na Bena Kristu banandi, nelyo kwangala njipakisha pa mpela ya mulungu? Bushe ilingi pa mpela ya mulungu nja fye mu kwangala mu nshita ya kuti ndeya mu mulimo wa kubila nangu ukucitako ifintu fimbi ifyayampana no kupepa kwasanguluka?’ Ukwendela mu kutetekela kupilibula ukuba abapamfiwa mu mulimo wa Bufumu, no kutetekela sana amalayo ya kwa Yehova.—1 Abena Korinti 15:58.

Ukulaibukisha Ukuti Impela Naipalama

11. Ukwendela mu kutetekela kutulenga shani ukulaibukisha ukuti impela naipalama?

¹¹ Ukwendela mu kutetekela kutulenga ukukaana amatontonkanyo ya bumubili aya kuti impela ya buno bwikashi ili ukutali nangu tayakatale aisa. Ukupusanako na bantu abatwishika kabili abapumya ukusesema kwa mu Baibolo, twalibukila ukuti ifilecitika mu calo fifikilisha ifyo Icebo ca kwa Lesa casobele ukuti fikalacitika muno nshiku. (2 Petro 3:3, 4) Ku ca kumwenako, bushe imitima ne misango ya bantu abengi tailetulenga ukushininkisha ukuti tuleikala mu “nshiku sha kulekelesha”? (2 Timote 3:1-5) Tulamona na menso yesu aya citetekelo ukuti ifilecitika mu calo ndakai fyali-ibela ku fyalecitika kale. Fipanga “icishibilo ca kubapo [kwa kwa Kristu] ne ca mpela ya bwikashi.”—Mateo 24:1-14.

12. Bushe amashiwi ya kwa Yesu ayaba pali Luka 21:20, 21 yafikilishiwe shani mu mwanda wa myaka uwa kubalilapo?

¹² Tontonkanyeni pa cacitike mu mwanda wa myaka uwa kubalilapo icapalana sana ne cicitika muno nshiku. Ilyo Yesu ali pe sonde, asokele abakonshi bakwe ukuti: “Ilyo mukamona Yerusalemu nashingwa ku milalo ya fita, lyene ishibeni ukuti ukupomonwa kwakwe nakupalama. Lyene abali mu Yudea batendeke ukufulumukila ku mpili, na bali mu kati ka uko bafumemo.” (Luka 21:20, 21) Pa kufikilisha uku kusesema, mu 66 C.E., ifita fya bena Roma ifyaletungululwa na Cestius Gallus fyashingile Yerusalemu. Lelo tapakokwele ifita fyalibwekelemo, ukupeela icishibilo ne shuko ku Bena Kristu abali mu Yerusalemu pa kuti “batendeke ukufulumukila ku mpili.” Mu 70 C.E., abena Roma balibwelele na kabili, basanshile umusumba wa Yerusalemu no konaula itempele lya uko. Josephus alembele ukuti abaYuda ukucila pali milioni umo balifwile, kabili 97,000 balisendelwe muli bunkole. Ubupingushi bwa kwa Lesa bwalishile pali bulya bwikashi bwa baYuda. Abale-endela mu kutetekela no kumfwila ukusoka kwa kwa Yesu bena balipuswike bulya bonaushi.

13, 14. (a) Finshi fili no kucitika nomba line? (b) Mulandu nshi tulingile ukubela abalola ilyo ukusesema kwa mu Baibolo kulefikilishiwa?

¹³ Icapalako cili no kucitika muno nshiku. Ifipani fyaba mu United Nation fikafwilishako ukuleta ubupingushi bwa kwa Lesa. Kwati fye ni filya ifita fya bena Roma ifya mu mwanda wa myaka uwa kubalilapo fyalefwaya ukusunga Pax Romana (Umutende wa bena Roma), e fyo na United Nations ifwaya ukusunga umutende pali nomba. Nangu ca kuti ifita fya bena Roma fyalyeseshe ukusungilila umutende mu calo pali ilya nshita, e fyaishileonaula na Yerusalemu. Ukupalanako ne fikacitika muno nshiku, ukusesema kwa mu Baibolo kulangilila ukuti ifita fya ba United Nations fikamona kwati imipepele ileleta icimfulumfulu kabili fikema no konaula Yerusalemu wa muno nshiku, e kuti Kristendomu, ukusanshako ne mipepele yonse iya muli Babiloni Mukalamba. (Ukusokolola 17:12-17) Ca cine, imipepele ya bufi yonse iya muli cino calo ilepalamina ku konaulwa.

¹⁴ Ukonaulwa kwa mipepele ya bufi e kukaba intendekelo ya bucushi bukalamba. Pa mpela ya bucushi bukalamba, utubungwe tonse utwa bwikashi bwabipa tukonaulwa. (Mateo 24:29, 30; Ukusokolola 16:14, 16) Ukwendela mu kutetekela kulatulenga ukuba abalola ilyo ukusesema kwa mu Baibolo kulefikilishiwa. Tatubepwa ukutila Lesa abomfya utubungwe twapangwa na bantu pamo nga United Nations ku kuleta umutende no mutelelwe. E ico, kanshi, imikalile yesu ilingile ukulanga ukuti twalishininkisha ukutila ‘ubushiku ubukulu ubwa kwa Yehova, nabupalama.’—Sefania 1:14.

Ububi Bwaba mu Kwendela mu Kumona

15. Nangu ca kuti abena Israele balemona ifyo Lesa alebapaala, citeyo nshi bawililemo?

¹⁵ Ifyacitikile Abena Israele ba ku kale filanga ububi bwaba mu kwendela mu kumona. Ukwendela mu kumona kulanenuna icitetekelo. Nangu ca kuti abena Israele balimwene uko ifinkunka 10 fyaseebenye imilungu ya bena Egupti na fintu Lesa abapuswishe pali Bemba Wakashika mu cipesha amano, babulilwe icumfwila no kupanga umutepa wa ng’ombe uo batendeke ukupepa. Ico tabatekenye, balinakile ukulolela Mose, bamwene ukuti “akokola ukutentemuka ulupili.” (Ukufuma 32:1-4, NW) Ukukanatekanya kwalengele ukuti batampe ukupepa akalubi ako balemona na menso. Basaalwile Yehova pa kwendela mu kumona kabili icafuminemo ca kuti “abaume nalimo amakana yatatu,” balipaiwe. (Ukufuma 32:25-29) Ala na muno nshiku mwine cilabipa sana nga ca kuti Umwina Kristu asalapo ukucita icilelanga ukuti tatetekela Yehova kabili tasubila ukuti akafikilisha amalayo yakwe!

16. Bushe ukumoneka kwa ku nse kwanenwine shani abena Israele?

¹⁶ Ukumoneka kwa ku nse kwalinenwine abena Israele mu nshila na shimbi. Ukwendela mu kumona kwalengele ukuti baletutuma abalwani babo. (Impendwa 13:28, 32; Amalango 1:28) Uku kubulwe citetekelo kwalengele no kuti balesuusha amaka Lesa apeele Mose no kulailishanya pa fyo baleikala. Ne cafuminemo ca kuti batemenwe ifyo baleikala mu calo ca Egupti icaletungululwa ne fibanda ukucila ifyo bali no kwikala mu Calo ca Bulayo. (Impendwa 14:1-4; Amalumbo 106:24) Ala mwandini Yehova afwile alibipilwe ilyo amwene umusaalula abantu bakwe bakwete ku Mfumu yabo iishimoneka!

17. Cinshi calengele ukuti abena Israele bakaane ubutungulushi bwa kwa Yehova mu nshiku sha kwa Samwele?

¹⁷ Na kabili, mu nshiku sha kwa kasesema Samwele, ukwendela mu kumona kwalengele abena Israele abo Lesa asenamine ukuwila mu citeyo. Abantu batendeke ukufwaya imfumu iyo bali no kulamona na menso yabo. Nangu ca kuti Yehova alibalangile ukuti ali ni Mfumu yabo, abena Israele bafililwe ukwendela mu kutetekela. (1 Samwele 8:4-9) Mu buwelewele bwabo bakeene ubutungulushi busuma ubwa kwa Yehova no kusalapo ukuba nge fyalo ifya bashingulwike.—1 Samwele 8:19, 20.

18. Finshi tulesambililako ku bubi bwaba mu kwendela mu kumona?

¹⁸ Fwe babomfi ba kwa Yehova muno nshiku twalicindamika sana bucibusa bwesu na Lesa. Tufwaisha ukwishiba no kucita ifyo tusambilila ku fyacitikile bambi kale. (Abena Roma 15:4) Ilyo abena Israele bale-endela mu kumona, balilabile ukuti Lesa alebatungulula ukupitila muli Mose. Nga tatucenjele, na ifwe bene kuti twalaba ukuti Yehova Lesa na Mose Mukalamba, Yesu Kristu, e batungulula icilonganino ca Bena Kristu muno nshiku. (Ukusokolola 1:12-16) Tulingile ukuibaka no kucenjela sana pa kuti tatulemona ukuteyanya kwa kwa Yehova ukwa pano isonde nge fyo abantu bambi bakumona. Pantu ukutontonkanya nga bantu bambi kuti kwalenga twalailishanya no kusuula abo Yehova alebomfya pamo ne ca kulya ca ku mupashi ico “umusha wa cishinka kabili uwashilimuka” apekanya.—Mateo 24:45.

Natukoselele Ukwendela mu Kutetekela

19, 20. Cinshi mupampaminepo ukucita, kabili mulandu nshi?

¹⁹ Baibolo itila: “Ukushomboka kwesu, te ku mulopa no mubili, lelo ku mabuteko, kuli bamulopwe, kuli bakateeka ba calo aba mfifi ino, ku fimipashi fya bubifi mu mekalo ya mu muulu.” (Abena Efese 6:12) Umulwani wesu umukalamba ni Satana Kaseebanya. Ico afwaya, kupwisha icitetekelo cesu muli Yehova. Akabomfya icili conse pa kuti fye atupumbule mu kubombela Yehova. (1 Petro 5:8) Cinshi cikatucingilila ku kukanabepwa ku kumoneka kwa ku nse ukwa buno bwikashi bwa kwa Satana? Kwendela mu kutetekela, te mu kumona iyo! Ukutetekela no kusubila amalayo ya kwa Yehova kukatubaka ukufuma ku ‘kubunsha icitetekelo cesu.’ (1 Timote 1:19) Kanshi natupampamine ukulaendela mu kutetekela no kusubila amapaalo ya kwa Yehova. Kabili shi natulepepa lyonse pa kuti tukapusuke kuli fyonse ifikacitika ku ntanshi.—Luka 21:36.

²⁰ Twaliba ne ca kumwenako cisuma ica muntu uwaendele mu kutetekela te mu kumona. Baibolo itila: “Kristu aculiile imwe, pa kumushila ica kumwenako ukuti mukonke bwino bwino mu ntampulo shakwe.” (1 Petro 2:21) Icipande cikonkelepo cikalanda pa fyo twingenda nge fyo aendele.

Bushe Muleibukisha?

• Finshi musambilileko ku ca kumwenako ca kwa Mose ne ca kwa Esau pa kwendela mu kutetekela te mu kumona?

• Cinshi cingatwafwa sana ukusengauka ukutemwisha ifikwatwa?

• Bushe ukwendela mu kutetekela kutulenga shani ukukanatontonkanya nga bantu abamona kwati impela ya buno bwikashi ili ukutali?

• Bubi nshi bwaba mu kwendela mu kumona?

[Icikope pe bula 17]

Mose aendele mu kutetekela

[Icikope pe bula 18]

Bushe ukwangala kulamulenga ukukanacita ifya ku mupashi lyonse?

[Icikope pe bula 20]

Bushe ukubika amano ku Cebo ca kwa Lesa kumucingilila shani?