Cinshi Cintu Icilola Cisokolola?

LOLESHA mu cilola. Cinshi ulemona? Inshita shimo shimo, ukuceba mu cilola kulasokolola ifiko fya kulenge nsoni mu mimonekele yobe ifyo wingatemwa ukuwamya ilyo bambi tabalafimona.

Baibolo yapala fye icilola. Kuti yatwaafwa ukuimona fwe bene mu bufumacumi, icingatucilikila ku kuininikisha—nelyo ukuisuula—mu menso ya kwa Lesa. (Mateo 10:29-31; Abena Roma 12:3) Mu kulundapo, Baibolo kuti yasokolola ifiko mu mashiwi yesu, incitilo, nelyo imibele ya mutima iyo tulekabila ukuwamya. Lintu ici cacitika, bushe kuti wasuula cintu icilola casokolola?

Kalemba wa Baibolo Yakobo asoso kuti: “Pa kuti umuntu nga aba koomfwa wa cebo, kabili te kacita wa ciko, wene apalo muntu uulolekeshe cinso cakwe ca cifyalilwa mu cilola; pantu acilolekesha, afumapo, ilyo line alabo musango aba.”—Yakobo 1:23, 24.

Mu kupusanako, Yakobo alondolola umuntu umbi, “uulolesha mu malango ayatuntulu aya buntungwa, no kwikalililamo.” (Yakobo 1:25) Ishiwi lya ciGreek ilyapilibulwa “uulolesha” lipilibula ukufukamako nelyo ukwinamako pa kuti wingalolesha bwino. “Kwalicila pa kucebapo fye” e fisosa Theological Dictionary of the New Testament. Ishiwi lilangilila ukusapika kwasakamanishisha ukwa cipe cafiswa. “Kulabako icintu cimo icacindama ico uulelolesha afwaya ukumona, nangu cingati kuti caba icayafya kuli wene ukucimona no kumwensekesha ubupilibulo bwa ciko pa nshita imo ine,” e fyalemba kabebeta wa Baibolo R. V. G. Tasker.

E ico bushe ukaibebeta mu cilola ca Cebo ca kwa Lesa kabili lyene ukumfwana na cintu cifwaya? Yakobo atwalilila ukuti: “Uushaba koomfwa wa cilafi lelo ni kacita wa mulimo, uyu akabo wapaalwa mu kucita kwakwe.”—Yakobo 1:25.