Bushe Walitala Aukolekapo Umulilo mu Mutengo?
MU KUSHININKISHA IYO, e fyo wasosa. Lelo lolela! Napamo walikolekapo. Kutika ku mashiwi ya musambi Yakobo: “Ululimi, cilundwa cinono ca mubili, kabili lutakisha apakalamba. Moneni ifyo wakula umutengo uo umulilo unono ubilimya.”—Yakobo 3:5.
Ululimi cilundwa cacindama ica milandile, lelo fintu lwabomfiwa bubi bubi! Abantu babomfya ululimi ku kubepa no kucita ubukwakwa. Kuli lwene balalengulwilako bambi mu kukaluka, ukonaula ukushimikwa kwabo, no kubafinsha. Bakasongelekanya ba mpokota babomfya ululimi ku kusonga bumwaluka. Adolf Hitler abomfeshe ulwakwe ku kulonganika uluko ku bulwi—‘umulimo wa mu mutengo’ icine cine!
Nelyo fye ni abo abakwata amapange yasuma kuti balenga ‘utumililo twa mu mutengo.’ Bushe walitala ausosapo icintu cimo kabili ilyo line watontonkanya ukuti kanshi nga tawacicisosa? Nga ni fyo, ninshi uleumfwikisha cintu Yakobo apilibwile lintu atile “ululimi takuli muntu uwingalubelesha.”—Yakobo 3:8.
Nangu ni fyo, kuti twaesha ukubomfya ululimi lwesu bwino. Ukupala kemba wa malumbo, kuti twapampamina pa kutila: “Ndesakamane mibele yandi, ukuti nibembuka ku lulimi lwandi.” (Ilumbo 39:1) Ukucila ukulengulula bambi mu kukaluka, kuti twaesha ukubakuulilila. Ukucila ukucito bukwakwa pa lwa bantu, kuti twalanda bwino pa lwa bene. Ukucila ukufinsha nelyo ukucenjesha, kuti twalanda icine no kufunda. Lintu twakuntwa ku mutima usuma, ululimi kuti lwasosa amashiwi yawamisha aya kundapa. Yesu abomfeshe ululimi mu nshila ya kusungusha ku kusambilisha umutundu wa muntu pa lwe pusukilo.
Mu cine cine, “imfwa no mweo fili ku maka ya lulimi.” (Amapinda 18:21) Bushe ululimi lobe lulete mfwa nelyo lupeelo bumi? Bushe lulakoleka ‘umulilo wa mu mutengo’ nelyo lulashimya wene? Kemba wa malumbo apepele kuli Lesa ati: “Lekeni ululimi lwandi lubuule ulwimbo lwa cebo cenu, pantu amafunde yenu yonse bulungami.” (Ilumbo 119:172) Nga ca kuti twalundulula imibele ya mutima iya kwa kemba wa malumbo, na ifwe bene kuti twabomfya ululimi lwesu ku busuma.
[Abatusuminishe Ukubomfya Icikope pe bula 32]
Icikope ca U.S. Forest Service