Bushe Muleibukisha?

Bushe mwalitontonkanyapo sana pali bamagazini ba Ulupungu lwa kwa Kalinda aba nomba line? Nga ni fyo, kanshi mwalaba aba buseko ukwibukisha ifyakonkapo:

◻ Mulandu nshi icifundisho ca kulingilwa kabela cishabelamo ukupelulula?

Nga ca kuti Lesa alishibile kabela no kulingila libela ukubembuka kwa kwa Adamu, lyene kuti twatila Yehova e watendeke ulubembu lintu abumbile umuntu no kuti e waletele ububifi bonse ubwa bantunse no kucula. Lelo ici tacingomfwana ne cishinka ca kuti Yehova aba ni Lesa wa kutemwa uwapata ububifi. (Ilumbo 33:5; Amapinda 15:9; 1 Yohane 4:8)—4/15, amabula 7, 8.

◻ Mu kufikilisha Esaya 2:2-4, cinshi ico abantu ukufuma mu nko ishingi balecita?

Ilintu balekonkomokela ku ng’anda ya kupepelamo iya kwa Yehova, balatalukako ku ‘kusambilila ubulwi’ pa mulandu wa kuti balicetekela ukuti imilalo ya mu muulu iya kwa Lesa iyalaswa yonaule bonse abashatemwa umutende e ingabacingilila.—4/15, ibula 30.

◻ Impalume ishalumbulwa pali Yoele 3:10, 11 ni bani?

Muli Baibolo, Lesa wa cine mupepi ne miku 280 etwa “Yehova wa milalo.” (2 Ishamfumu 3:14) Iyi milalo mabumba ya bamalaika ba mu muulu abaiteyanya lyonse ukucita ico Yehova abakambisha.—5/1, ibula 23.

◻ Cinshi twingasambililako kuli Yehova lintu aebele Yobo ukupepelako abamubembukile? (Yobo 42:8)

Ilyo Yobo ashilapuupuutulwa, Yehova amwebele ukupepelako abamubembukile. Ici cilangilila ukuti ilyo imembu shesu tashilalekelelwa, Yehova afwayo kuti tulekelele abatubembukila. (Mateo 6:12; Abena Efese 4:32)—5/1, ibula 31.

◻ Cinshi ico Paulo apilibwile lintu alandile ukuti: “Lekeni ukushipikisha kubombe umulimo wa kuko uwafikapo”? (Yakobo 1:4)

Ukushipikisha kulacitapo cimo, kulabomba “umulimo.” Umulimo wa kuko wa kutulenga ukuba abafikapo mu mbali shonse. E ico, icitetekelo cesu cileshiwa no kulopololwa ilyo twaleka ifya kwesha ukuipwila fye ifine ukwabula ukwesha ukuli konse ukwa kubomfya inshila shishili sha mu malembo pa kuti tufipwishe mu kwangufyanya.—5/15, ibula 16.

◻ Mulandu nshi Lesa aakokwele fi ukupwisha amafya ya bantu?

Ifyo tumone nshita, te fyo Yehova aimona. Kuli Lesa wa muyayaya, inshita iyapitapo ukufuma apo Adamu abumbilwe ukufika nomba tayakumana nangu fye mulungu umo. (2 Petro 3:8) Lelo te mulandu no mo tumwena inshita, ubushiku bumo na bumo ubupita butupalamika ku bushiku bwa kwa Yehova ubwa kwebelwa.—6/1, amabula 5, 6.

◻ Cinshi cikunta Inte sha kwa Yehova?

Ukusambilisha kwa kwa Yehova kwaliletako abantu abaibela, abasambilishiwa ukutemwana e lyo no kutemwa abanabo nge fyo baitemwa. (Esaya 54:13) Ukutemwa e kukunta Inte sha kwa Yehova ukutwalilila ukushimikila te mulandu na bantu ukukanayangwako nelyo ukupakaswa. (Mateo 22:36-40; 1 Abena Korinti 13:1-8)—6/15, ibula 20.

◻ Bushe Yesu aloseshe mwi pa kusoso ukuti: “Pilikiteni ukwingila pa mwinshi wa kamfyemfye”? (Luka 13:24)

Aloseshe mu kuti tufwile ukushomboka, nelyo ukuibikilishako. Na kabili ifyebo fyakwe filangilila ukuti bamo kuti limbi bafwaya “ukwingila pa mwinshi” lintu fye cingabawamina, pa musenselo wa panono untu batemwa. E co ifwe umo umo kuti twaipusha atuti, ‘Bushe ndabomba mu mukoosha no kucincila?’—6/15, ibula 31.

◻ Ni shani fintu abakabuushiwa ‘bakapingulwa ku fyalembelwe mu mabuuku aya, umwabele milimo yabo’? (Ukusokolola 20:12)

Aya mabuuku tayali fintu fyasungwa ifya ncitilo shabo isha kale; lintu bafwile, umulandu wa membu shintu bacitile lintu baali abomi walipwile. (Abena Roma 6:7, 23) Nangu cibe fyo, abantunse abakabuushiwa bakaba bacili mu lubembu lwa kwa Adamu. Cifwile ukuba kanshi ukuti aya mabuuku yakatantika amakambisho ya bulesa yantu bonse bakafwaikwa ukulakonka pa kuti bakamwenemo sana mwi lambo lya kwa Yesu Kristu.—7/1, ibula 22.

◻ Cinshi twingasambililako mu mulumbe wa kwa Yesu pa lwa mwina Samaria umusuma? (Luka 10:30-37)

Umulumbe wa kwa Yesu ulangililo kuti umuntu uwatambalala mu cine cine tanakila fye ku mafunde ya kwa Lesa lelo alapashanya ne mibele yakwe. (Abena Efese 5:1) Na kabili ulangililo kuti aba luko lumbi, intambi shimbi, na ba mipepele imbi kuti baba abena mupalamano besu. (Abena Galatia 6:10)—7/1, ibula 31.

◻ Ni mu mbali nshi shitatu isho mwe bafyashi mwingeshibilamo abana benu no kubatungulula?

(1) Afweni abana benu ukusale ncito ya ku mubili iyalinga; (2) bakansheni ukwishiba ifya kubombela pa kukanshika kwa mu nkuntu pa sukulu na ku ncito; (3) balangeni ifya kwikusha ukukabila kwabo ukwa ku mupashi.—7/15, ibula 4.

◻ Mulandu nshi Lesa atushiishe mu “bushiku bwa cinelubali”? (Ukutendeka 2:1-3)

Lesa tatushiishe pa mulandu wa kuti alinakile. Mu cifulo ca ico, alitushiishe ku milimo ya pe sonde ku kuleka ifyo abumbile filunduluke no kukwata ubukata, pa kuti fimuletele ilumbo no mucinshi.—7/15, ibula 18.

◻ Ni mu nshila nshi shitatu isho twingalangilamo ubulungi?

Intanshi, ifwe bonse tufwile ukukonka ifipimo fya kwa Lesa ifya mibele isuma. (Esaya 1:17) Ica cibili, tucito bulungi nga twasunga bambi mu nshila tufwaya Yehova ukutusungilamo. (Ilumbo 130:3, 4) Ica citatu, tulangisho bulungi bwa bukapepa nga twaibimba mu mulimo wa kushimikila mu mukoosha. (Amapinda 3:27)—8/1, amabula 14, 15.