Icakosa Ukucila Golde Mwine Mwine

ABANTU bafwaisha golde pa mulandu wa kuti ilamoneka bwino kabili yalikosa. Umulandu baifwaila sana wa kuti imoneka kwati taileka kubengeshima. Ni pa mulandu wa kuti golde tayonaulwa ku menshi, ku mwela wa oxygen, kuli sulfur, kabili nalimo na ku fintu fye fimbi. Ifingi ifyo bapangila golde ifyo basanga mu mashitima ya pa menshi ayabunda na kumbi filatwalilila ukubeeka na pa numa ya myaka iingi nga nshi.

Lelo, Baibolo itila kwaliba icakosa kabili “icafinisha ukucila golde uonaika nelyo waeshiwa ku mulilo.” (1 Petro 1:7) Golde “waeshiwa,” nelyo uwalopololwa, ku mulilo nelyo kuli fimbi alaba uwasanguluka ukufika ku mapesenti 99.9. Nalyo line, na golde uwalopololwa alonaika, nelyo ukusunguluka, nga abikwa mu menshi ya aqua regia, ayapangwa nga basaakanya ifipimo fitatu ifya asidi wa hydrochloric ne cipimo cimo ica asidi wa nitric. E co, Baibolo yalilungika mu fya sayansi pa kusosa ukuti ‘golde ilonaika.’

Lelo, icitetekelo ca buKristu bwa cine cena “cipeela umweo.” (AbaHebere 10:39, NW) Abantu kuti baipaya umuntu uwakwata icitetekelo cakosa, nga fintu bacitile kuli Yesu Kristu. Lelo abakwata icitetekelo cine cine babalaya ukuti: “Ube uwa cishinka ukufika ku mfwa, na ine nkakupeele cilongwe ca mweo.” (Ukusokolola 2:10) Lesa atwalilila ukwibukisha abafwila mu citetekelo, kabili akababuusha. (Yohane 5:28, 29) Golde te kuti icite ica musango yu nangu ifule shani. E co, icitetekelo calicindama sana ukucila golde. Lelo, pa kuti icitetekelo cicindame muli uyu musango, na co cine cilingile ukweshiwa. Na kuba, Petro atile icacindama ukucila golde “citetekelo caeshiwa, [NW].” Inte sha kwa Yehova kuti batemwa ukumwafwa ukusambilila Baibolo pa kuti mukakwate icitetekelo cakosa muli Lesa wa cine, Yehova, na mu Mwana wakwe, Yesu Kristu, no kutwalilila ifyo fine. Nga fintu Yesu asosele, ici “e mweo wa muyayaya.”—Yohane 17:3.