Ifipusho Ukufuma ku Babelenga
Pali 1 Petro 4:3, tubelenga ukuti Abena Kristu bamo kale baendele mu “kupepa utulubi kuntu kwabindwa.” Bushe ukupepa utulubi konse fye takwabindwa na Lesa?
Ca cine, kuli Lesa, ukupepa utulubi konse fye kwalibindwa. Abafwaya ukuti abasenamine tabafwile ukupepa utulubi.—1 Abena Korinti 5:11; Ukusokolola 21:8.
Lelo kwena cilemoneka kwati umutumwa Petro alandile pa musango umbi uwa kupepa utulubi. Cimo ico engalandile fyo pantu mu fyalo ifingi ifya ku kale, ukupepa utulubi kwaliseekele kabili ubuteko na bo tabwabikileko na mafunde yalebinda kwene. E kutila amafunde ya calo tayabindile ukupepa utulubi ukwa musango yo. Na kuba ukupepa utulubi kumo kwali fye lifunde lya buteko nelyo ilya calo. E co kanshi, ilyo bamo bashilaba Abena Kristu baendele mu ‘kupepa utulubi ukushabindilwe ne funde.’ (New World Translation, uwa mu 1950) Ku ca kumwenako, kuti twalanda na pa Mfumu ya Babele Nebukadnesari iyaimike icilubi ca golde, lelo ababomfi ba kwa Yehova Shadraki, Meshaki, na Abednego balikeene ukupepako.—Daniele 3:1-12.
Na kabili kuti twatila, mu ntambi ishingi isha kupepa utulubi mwali ne micitile imo iyapusene sana na mafunde ya cifyalilwa nelyo imibele isuma iyo umuntu uwakwata kampingu wa cifyalilwa engaba na yo. (Abena Roma 2:14, 15) Umutumwa Paulo alandile pali bamo abalecita ‘ifishili fya cifyalilwa’ kabili “ifya nsoni,” ifyo ilingi line fyalecitwa mu ntambi sha mipepele. (Abena Roma 1:26, 27) Abalecitako imisango ya kupepa utulubi ukwabindwa tabalekonka ifunde lya cifyalilwa ca buntunse. (Abena Roma 2:14, 15) Kanshi calilingile fye ukuti abasangwike Abena Kristu baleke iyo micitile yabola.
Na kabili, ukupepa utulubi kwa musango yo ukwaseekele ku bashali baYuda kwalibindilwe na Yehova Lesa. Kwali kupule funde.a—Abena Kolose 3:5-7.
[Futunoti]
a Amashiwi ya ciGriki aya pali 1 Petro 4:3 nga kuyakonka fye yalola mu kuti “ukupepa utulubi uko ifunde lyabinda.” Aya mashiwi yapilibulwa muli ba Baibolo balekanalekana aba ciNgeleshi ukuti “ukupepa utulubi ukushasuminishiwa,” “ukupepa utulubi uko ifunde lyabinda,” na “ukupepa utulubi ukwa kupule funde.”