“Bushe Umutima Obe Untu Walungama Kuli Ine?”

“Twende bonse, umone no kupimpa kwandi kwa kubombela Yehova.”—2 ISHAMFUMU 10:16.

1, 2. (a) Ni shani fintu imibele ya mipepele iya mu Israele yaile ilebipilako? (b) Mu 905 B.C.E., kwaluka nshi ukukalamba kwali no kucitikila Israele mu kwangufyanya?

UMWAKA wa 905 B.C.E. wali ni nshita ya kwaluka kukalamba mu Israele. Mupepi fye ne myaka 100 ku numa, Yehova alengele ubufumu bwaikatana ubwa kwa Israele ukwakanika pa mulandu wa busangu bwa kwa Solomone. (1 Ishamfumu 11:9-13) Ubufumu bwa ku kapinda ka kulyo, Yuda, lyene bwatekelwe no mwana wa kwa Solomone Rehoboamu e lyo ubufumu bwa ku kapinda ka kuso, Israele, bwatekelwe na Yeroboamu, umwina Efraimu. Ku ca bulanda, ubufumu bwa ku kapinda ka kuso bwakwete intendekelo yabipa. Yeroboamu talefwaya abantu bakwe ukuya ku bufumu bwa ku kapinda ka kulyo ku kupepa kwi tempele, ukutiina ifyo kuti batendeka ukutontonkanya pa lwa kubwelela ku ng’anda ya kwa Davidi. E co aleteleko ukupepa kwa mutepa wa ng’ombe mu Israele na muli fyo aimike ukupepo tulubi ukwatwalilileko fye na mwi lyashi lya kale lyonse ilya bufumu bwa ku kapinda ka kuso.—1 Ishamfumu 12:26-33.

² Ifintu fyalibipileko lintu Ahabu, mwana Omri, abele mfumu. Umukashi wakwe umwina fyalo, Yesebele, asumbwile ukupepa Baali kabili aipeye bakasesema ba kwa Yehova. Te mulandu no kusoka kwa kukanapita mu mbali ukwa kwa Eliya, Ahabu tacitilepo nelyo cimo ku kulesha umukashi wakwe. Nangu cibe fyo, mu 905 B.C.E., Ahabu alifwile, kabili Yehoramu, umwana wakwe umwaume, e watendeke ukuteka. Nomba yali ni nshita ya kusangulula icalo. Elisha, uwapyene Eliya, aebele umukalamba wa bashilika, Yehu, ukuti Yehova ali no kumusuba ku kuba imfumu ikakonkapo iya kwa Israele. Mulimo nshi aali no kubomba? Ukwipaya aba mu ng’anda ya kwa Ahabu ababembu no kulandula umulopa wa bakasesema abo Yesebele aipeye!—2 Ishamfumu 9:1-10.

3, 4. Ni shani fintu Yehonadabu alangishe ukuti ‘umutima wakwe wali uwalungama ku mutima wa kwa Yehu’?

³ Yehu aumfwilile ikambisho lya kwa Lesa no kwipaya Yesebele imbifi, pa numa ya ico atendeke ukusangulula Israele ukupitila mu kwipaya aba mu ng’anda ya kwa Ahabu. (2 Ishamfumu 9:15–10:14, 17) Lyene akumene no wali ku lubali lwakwe. “Akumenye Yehonadabu mwana Rekabu aleisa ku kumukumanya. Yehu amuposeshe, no kutila kuli wene, Bushe umutima obe untu walungama kuli ine, ifyo umutima wandi walungama kuli iwe? Yehonadabu atile, E fyo uli. Yehu atile, Nge fyo uli, ulete ukuboko kobe. Yehonadabu amutambike ukuboko kwakwe, na Yehu amuninike pali wene pe celeta, no kutila, Twende bonse, umone no kupimpa kwandi kwa kubombela Yehova. E fyo amulengele ukutentema mwi celeta lyakwe.”—2 Ishamfumu 10:15, 16.

⁴ Yehonadabu (nelyo, Yonadabu) taali umwina Israele. Nangu cibe fyo, mu kumfwana ne shina lyakwe (ilipilibula “Yehova Nasuminisha,” “Yehova Musuma,” nelyo “Yehova ni Kapekape”) aali ni kapepa wa kwa Yehova. (Yeremia 35:6) Mu kushininkisha, alefwaisha ‘ukumona ukupimpa kwa kwa Yehu ukwa kubombela Yehova.’ Bushe twaishiba shani? Kwena ukukumana ne mfumu yasubwa iya kwa Israele takwali ca kupumikisha fye. Yehonadabu “aleisa ku kumukumanya,” kabili ici cali ni pa nshita lintu Yehu ali naipaya kale Yesebele na bambi aba mu ng’anda ya kwa Ahabu. Yehonadabu alishibe ifyalecitika lintu asumine ukuya na Yehu mwi celeta lyakwe. Calimoneke fye apabuuta ukuti aali ku lubali lwa kwa Yehu—na Yehova—muli uku kukansana kwa pa kati ka kupepa kwa bufi no kwa cine.

Yehu wa Nomba na Yehonadabu wa Nomba

5. (a) Kwaluka nshi kuli no kucitikila abantu bonse mu kwangufyanya? (b) Yehu Mukalamba nani, kabili ni bani bamwimininako pe sonde?

⁵ Ilelo, ifintu fili no kwaluka sana mu kwangufyanya ku bantu bonse nga fintu fyaalwike ku numa mu Israele mu 905 B.C.E. Inshita naipalama nomba iyo Yehova akasangulula isonde lyonse ku bubi bonse ubufuma mu kusonga kwa kwa Satana, ukusanshako ne mipepele ya bufi. Bushe Yehu wa nomba nani? Ni Yesu Kristu, untu amashiwi ya busesemo yaloshako aya kuti: “Kakilo lupanga lobe pe tanta lyobe, we mpalume, bukatebebe bobe no bucindami bobe. Mu bucindami bobe tentema no kushuka, pa mulandu wa cishinka no kufuuka no bulungami.” (Ilumbo 45:3, 4) Abemininako Yesu pe sonde baba ni “Israele wa kwa Lesa,” Abena Kristu basubwa “ababaka amafunde ya kwa Lesa, no kukwato bunte bwa kwa Yesu.” (Abena Galatia 6:16; Ukusokolola 12:17) Ukutula 1922 aba bamunyina basubwa aba kwa Yesu balisoka mu kushipa pa lwa kwisa kwa bupingushi bwa kwa Yehova.—Esaya 61:1, 2; Ukusokolola 8:7–9:21; 16:2-21.

6. Ni bani bafumine mu fyalo ku kwaafwa Abena Kristu basubwa, kabili ni shani fintu baba nga baingila mwi celeta lya kwa Yehu Mukalamba?

⁶ Abena Kristu basubwa tababa beka. Nga fintu fye Yehonadabu aishile mu kukumanya Yehu, abengi mu fyalo balisa mu kwaafwa Yesu, Yehu Mukalamba, na bamwimininako pe sonde mu kupepa kwa cine. (Sekaria 8:23) Abo Yesu eta ‘impaanga shakwe shimbi,’ mu 1932 baishibikwe nga Yehonadabu wa nomba kabili balaalikwe ‘ukunina mwi celeta’ lya kwa Yehu wa nomba. (Yohane 10:16) Ni shani bacitile co? Bacitile co ukupitila mu ‘kubaka amafunde ya kwa Lesa’ no kubombela pamo na basubwa mu “kukwato bunte bwa kwa Yesu.” Muli shino nshiku, ici cisanshamo ukushimikila imbila nsuma iya Bufumu bwaimikwa ubwa kwa Lesa Imfumu iyaba ni Yesu. (Marko 13:10) Mu 1935 aba ba “Yonadabu” baishibikwe nge “bumba likalamba” ilya pa Ukusokolola 7:9-17.

7. Ni shani fintu Abena Kristu ilelo balangisha ukuti ‘umutima wabo untu walungama’ ku mutima wa kwa Yesu?

⁷ Ukutula muli ba 1930, ibumba likalamba na bamunyina abasubwa balilangisha mu bukose ukuti baba ku lubali lwa kupepa kwa cine. Mu fyalo fimo ku Kabanga ka ku Bulaya na ku Masamba, ku Far East, na mu Afrika, abengi balifwila icitetekelo cabo. (Luka 9:23, 24) Mu fyalo fimbi, balibikwapo mu fifungo, ukusanswa, nelyo ukupakaswa mu nshila imbi. (2 Timote 3:12) Mwandi citetekelo capulamo balangisha! Kabili Lipoti wa Mwaka wa Mulimo uwa 1997 alangilila ukuti bacili no mupampamina wa kubombela Lesa, cibe cibe. ‘Umutima wabo untu walungama’ ku mutima wa kwa Yesu. Ici calangililwe mu 1997, lintu bakasabankanya ba Bufumu 5,599,931 mupepi fye na bonse “baYonadabu,” bapoosele amaawala yonse pamo 1,179,735,841 mu mulimo wa kucitilo bunte kuli Yesu.

Bacili Baleshimikila mu Kupimpa

8. Ni shani fintu Inte sha kwa Yehova balangisha ukupimpa kwabo ukwa kupepa kwa cine?

⁸ Yehu aishibikwe ukuti aleensha iceleta lyakwe bushilu bushilu—ukulangilila ukuti aali uwapimpa mu kupwishishisha umulimo wakwe. (2 Ishamfumu 9:20) Yesu, Yehu Mukalamba, alondololwa ukuti ukupimpa ‘kwalimulya.’ (Ilumbo 69:9) Lyene, te ca kupapa ukuti Abena Kristu ba cine ilelo baishibikilwa ku kupimpa kwabo. Mu cilonganino na ku cintubwingi, ‘babile cebo mu kucincila mu nshita iyene ne nshita iishiyene.’ (2 Timote 4:2) Ukupimpa kwabo kwalangililwe maka maka mu kubangilila kwa 1997 pa numa lintu icipande mu Ubutumikishi Bwesu Ubwa Bufumu cakoseleshe abengi ukubombako bupainiya bwa kwafwilisha. Mu calo cimo na cimo icipimo ca mpendwa ya bapainiya ba kwafwilisha calimikwe. Ukwankulako kwali shani? Mwandi kwali ukwaibela! Amaofesi ayengi yalicilile pa mpendwa yaimikwe. Ecuador yaimike icipimo ca 4,000 lelo mu March bapainiya ba kwafwilisha bali 6,936. Mu Japan ababombeleko bonse pamo baali 104,215 muli ilya myeshi itatu. Mu Zambia, umo icipimo caimikwe cali 6,000, mu March ababombeleko umulimo wa bupainiya bwa kwafwilisha baali 6,414; mu April baali 6,532; kabili mu May baali 7,695. Mwi sonde lyonse, icipimo ca bapainiya ba kwafwilisha na ba nshita yonse bonse pamo cali 1,110,251, ukwingilishiwako ukwa maperesenti 34.2 ukucila umwaka wa 1996!

9. Mu kulunda ku mulimo wa ku ng’anda ne ng’anda, ni mu nshila nshi shimbi umo Inte sha kwa Yehova shisangila abantu ku kubashimikila imbila nsuma?

⁹ Umutumwa Paulo aebele abakalamba ba ku Efese ukuti: “Nshakwindile ukulondolola kuli imwe conse ica kumwafwa, no kumusambilisha pa bantu na mu ŋanda ne ŋanda.” (Imilimo 20:20) Inte sha kwa Yehova ilelo shipashanya ica kumwenako ca kwa Paulo no kushimikila imbila nsuma mu kupimpa ku ng’anda ne ng’anda. Nangu cibe fyo tacayanguka ukusanga abantu mu mayanda yabo. E co, “umusha wa cishinka kabili uwashilimuka” akoselesha bakasabankanya ba Bufumu ukutununuka abantu ku fifulo fya makwebo, mu musebo, mu naamba, mu maparka ya cintubwingi—ukuli konse kuntu abantu bengasangwa. (Mateo 24:45-47) Ifyafumamo fisuma.

10, 11. Ni shani fintu bakasabankanya mu fyalo fibili balangisha ukuitendekelako kusuma mu kusanga abantu abashingasangwa pa ng’anda?

¹⁰ Mu Copenhagen, Denmark, ibumba linono ilya bakasabankanya bashimikila mu misebo ku nse ya citesheni ce shitima. Ukufuma mu January ukufika mu June, bashalike ba magazini 4,733, bashimikile ku bantu abengi, no kubwelela ku bengi abo bashimikile. Bakasabankanya abengi muli cilya calo balitendeka ukutwalila aba mu fifulo fya bukwebo bamagazini lyonse. Itauni limo lyalikwata umushiika uukalamba ukwisa amakana ya bantu ku kushishanya cila Cisano. E co icilonganino calitantika ukushimikila ku mushiika lyonse. Mu cifulo cimo amasukulu yalatandalilwa ne Nte ishisenda impapulo ishilinga maka maka bakafundisha ba ku masukulu.

¹¹ Na ku Hawaii na ko kwaliba ukubombesha kwa kushimikila ku bashisangwa pa mayanda. Ukwa kushimikila kwaibela kusanshako ififulo fya cintubwingi (imisebo, amaparka, ukwa kusungila ba motoka, ne fitesheni fya ba basi), mu tauni, amatuuka, ne fibansa fya ndeke, ukushimikila pali lamya, ifya kwendelamo fya cintubwingi (ukushimikila muli ba basi), na ku makoleji. Ifilonganino fishininkisha ukuti baNte abapeelwa ukwa kubombela ku cifulo cimo na cimo bali ni mpendwa yalinga no kuti abapeelwe icifulo ca kubombelako bakanshiwa bwino. Imilimo yateyanishiwa bwino iyapala iyi yaba mu fyalo ifingi. Icafumamo ca kuti, abantu balefwaisha ukwishiba icine baleshimikilwa. E calengo kuti tulesanga abalefwayo kwishiba icine abo pambi nga tatwasangile mu butumikishi bwa ku ng’anda ne ng’anda.

Ukuba Abashangila

12, 13. (a) Ni nshila nshi Satana abomfeshe ku kulwisha Inte sha kwa Yehova mu 1997? (b) Ni mu nshila nshi umo ukukubanya kwa bufi kwabwelele abene mu calo cimo?

¹² Mu fyalo ifingi mu 1997, Inte sha kwa Yehova shali finakabupalu fya kukubanya kwabipisha ukwalesumbulwa ne mifwaile iifwile yali ya kubatwala ku cilye ca milandu. Lelo balishangile! (Ilumbo 112:7, 8) Baibukishe ipepo lya kwa kemba wa malumbo ilya kuti: “Abatusauka bankantaika ukubepa, ine ndesunge fya kulangulula fyenu umutima onse.” (Ilumbo 119:69) Ubu bufi bwa cintubwingi bushininkisho fye ubwa Bena Kristu ba cine ukuba abapatwa nga fintu Yesu aseseme. (Mateo 24:9) Inshita shimo bwalibabwelela. Umwaume ku Belgium abelengele icipande ca musaalula pa lwa Nte sha kwa Yehova mu nyunshipepala ifuma cila bushiku iyaishibikwa bwino. Ukufulunganishiwa ne fyebo fya museebanya, ubushiku bwa pa Mulungu ubwakonkelepo asangilwe ku kulongana pa Ng’anda ya Bufumu. Apekenye ukusambilila Baibolo ne Nte kabili alitendeke no kulunduluka lubilo lubilo. Kale, uyu mwaume ali cilundwa ca kabungwe ka bampulamafunde. Isambililo lyakwe ilya Baibolo lyamwaafwile ukusangulula ubumi bwakwe, icintu ico abantu bamwene. Mu kushininkisha, uwalembele icipande ca museebanya talembeele ukuti umo akasanguke Nte!

¹³ Bamo abantu aba bufumacumi mu Belgium balilanda pa bwelu mu kulwisha ukukubanya kwa bucenjeshi. Umo uwa bene aali ni minista kale uwasumine ukuti alekumbwa Inte sha kwa Yehova pa fyo shapwishishisha. Kabili cilolo wa mu buteko alembele ukuti: “Ukupusanako ku fyebo fya bufi ifyasalanganishiwa pa nshita shimo, [Inte sha kwa Yehova] tashimoneka kuli ine ngo kuba isha busanso ku Buteko. Bekashi abatemwa umutende, abololoke, kabili abacindika ababa mu bulashi.” Cine cine, amashiwi ya mutumwa Petro yalibamo amano aya kuti: “Mwende bwino mu Bena fyalo; ukuti, umo bamupontelela kwati muli ncitatubi, bacindike Lesa mu bushiku bwa cipempu pa kuloleshe milimo yenu isuma.”—1 Petro 2:12.

Impendwa Yaibela iya Basangilwe ku Cibukisho

14. Malipoti nshi yamo aya kucincimusha aya basangilwe ku Cibukisho mu 1997?

¹⁴ Caliba icalinga ukuti abacitilo bunte kuli Yesu bafwile ukumona Icibukisho ca mfwa yakwe nge cintu cikalamba mu mwaka. Mu 1997, abasangilwe kuli ci Cibukisho pa March 23 baali 14,322,226. Abantu 1,400,000 e bapulilemo ukucila mu 1996. (Luka 22:14-20) Mu fyalo ifingi abasangilwe ku Cibukisho balicilile sana pa mpendwa ya bakasabankanya ba Bufumu, ukulangilila ifyo kuti kwaba ukwingilishiwako kukalamba ku ntanshi. Ku ca kumwenako, mu Haiti, mu 1997 mwali icipimo ca pa muulu ica bakasabankanya 10,621, e lyo abasangilwe ku Cibukisho baali 67,259. Kuti mwamona lipoti wa pa mwaka pa mabula 18 ukufika ku 21 no kumona ubwingi bwa fyalo fimbi ifyakwete abasangilweko abengi ukulinganya ku mpendwa ya bakasabankanya.

15. Mu fyalo fimo, bamunyina bacimfishe shani amafya yakalamba pa kuti basefye Icibukisho?

¹⁵ Kuli bamo, ukusangwa ku Cibukisho takwali cintu cayanguka. Mu Albania balibindile ukuti takwali uwakwenda ukutendeka pa 19:00 hrs pa mulandu wa cimfulumfulu ca bana calo. Mu mabumba yanono ayaali 115 mu calo conse, Icibukisho catendeke pa 17:45 hrs. Akasuba kawile pa 18:08 hrs, ukwishibisha intendekelo ya Nisani 14. Ifimpashanya fyapishiwe mupepi na pa 18:15 hrs. Mu fifulo ifingi ipepo lya kwisalila lyapepelwe pa 18:30 hrs, kabili na basangilweko babutukile ku mayanda ilyo icibindo ca nshita tacilatendeka. Lelo, abasangilwe ku Cibukisho baali 3,154 ukulinganya ku cipimo ca pa muulu ica bakasabankanya 1,090. Mu calo cimo mu Afrika, icimfulumfulu ca bana calo calengele ukwafya ukuyafika ku Ng’anda ya Bufumu, e ico baeluda babili bapingwilepo ukuyakumana mu ng’anda ya kwa eluda walenga butatu ku kupekanya ukuti ukusefya kube mu mabumba yanono. Pa kuti bafike ku ng’anda, baeluda babili baali no kwabuka icimufoolo cipisha amenshi. Nangu cibe fyo, muli cilya cifulo mwali ukulwa, kabili abapika imfuti balepika fye uuli onse uwaleesha ukwabuka umufoolo. Eluda umo ayabwike lubilo lubilo ukwabula ukumupika. Eluda wa bubili aleyabuka lintu aumfwile imfuti yalila. Aiposele panshi no kwamfwila ukwali bwino ninshi impoolopoolo shilemupita pa mutwe. Ukukumana kwa baeluda kwalitungulwike, ne fyo icilonganino calekabila fyalibombelwepo.

“Abafuma ku Luko Lonse ne Mikowa . . . na ba Ndimi”

16. Ni shani fintu umusha wa cishinka kabili uwashilimuka apekanya ukuti imbila nsuma yananishiwe pa kati ka mabumba ya ndimi ayanono?

¹⁶ Umutumwa Yohane asosele ukuti ibumba likalamba likafuma “ku luko lonse ne mikowa ne misango ya bantu na bantu na ba ndimi.” (Ukusokolola 7:9) E co, Ibumba Litungulula lipekanya ukuti ifitabo fileba mu ndimi shafulilako—ukusanshako fye ne shilandwa ne mikowa inono na mabumba yanono aya bantu. Ku ca kumwenako, ku Mozambique, trakiti wa Ubumi mu Calo Cipya Ica Mutende alifumine mu ndimi shisano mu kulunda ku ndimi shimbi. Mu Nicaragua, broshuwa wa Ipakishe Ubumi pe Sonde kuli Pe na Pe! afumine mu lulimi lwa Miskito—ulupapulo lwa Watch Tower Society ulwa kubalilapo muli lulya lulimi. Abalanda ululimi lwa Miskito abengi bapokelele broshuwa no buseko pa kumona ulupapulo mu lulimi lwabo. Mu 1997 Sosaite yasuminishe ifitabo mu ndimi 25 mu kulundapo ku ndimi shimbi kabili yapulintile bamagazini ukucila pali bilioni umo.

17. Libumba nshi ilya lulimi lwaafwilishiwe mu Korea, kabili ni shani fintu batepu wa vidio baafwilisha apakalamba aba bantu?

¹⁷ Mu Korea abalanda ululimi na lumbi balibafwile. Umwaka wa 1997 e mwaka wa kubalilapo mu Korea ukukwata ukulongana kwa lulimi lwa kubomfya ifishibilo. Mu Korea mwaba ifilonganino 15 ifibomfya ululimi lwa kubomfya ifishibilo ifyakwata bakasabankanya 543, lelo 1,174 e basangilwe kwi bungano, na babatishiwe baali 21. Ku kwaafwa bankomamatwi abashingomfwikisha ifyebo fisoswa nelyo ifyalembwa, impapulo shilesabankanishiwa pali tepu wa vidio mu ndimi shibomfya ifishibilo ishapusanapusana 13. E co, bankomamatwi baleafwiwa “ukubelenga” no kusambilila imbila nsuma, ne fyafumamo fisuma. Mu United States, kale calesenda imyaka isano pa kuti nkomamatwi abatishiwe. Nomba, apo amavidio ayengi yaliba mu Lulimi lwa kubomfya Ifishibilo ulwa ku Amerika, kuli ba nkomamatwi bamo, nomba cibasendela fye umwaka umo ukuti babatishiwe.

‘Ukwikala mwi Celeta’

18. Pa numa ya kukumanya Yehonadabu, cinshi cintu Yehu atendeke ukucita?

¹⁸ Ku numa mu 905 B.C.E., lintu Yehonadabu ailundile kuli Yehu, Yehu atendeke ukonaula ukupepa kwa bufi. Alaalike bonse bakapepa ba kwa Baali ukuti: “Shisheni ukulongana kwa mikupe kuli Baali.” Lyene atumine mu calo conse ku kushininkisha ukuti takuli kapepa wa kwa Baali uushele. Ilyo amabumba yalekonkomokela mwi tempele lya kwa lesa wa bufi, Yehu ashininkisha ukuti takuli kapepa wa kwa Yehova uwalimo. Mu kupelako, Yehu no mulalo wakwe baipeye bakapepa ba kwa Baali. “E fyo Yehu afitile Baali mu bena Israele.”—2 Ishamfumu 10:20-28.

19. Mu kumona ifilalilile abantu ku ntanshi, mupashi nshi tufwile ukulangisha, kabili mulimo nshi tufwile ukobelwamo mu mukoosha?

¹⁹ Ilelo, ubupingushi bwa mu kupelako ubwa mipepele yonse iya bufi buli mupepi. Abena Kristu balebilisha imbila nsuma ku bantu bonse mu kutungululwa na bamalaika, balebakoselesha ukutiina Lesa no kuitalusha ku mipepele ya bufi. (Ukusokolola 14:6-8; 18:2, 4) Abalanda bakoseleshiwa ukunakila ku Bufumu bwa kwa Lesa ubo uwabikwa pa cipuna ca Bufumu na Yehova ni Yesu Kristu. (Ukusokolola 12:10) Pali iyi nshita ya kucincimusha, tatufwile ukulenga ukupimpa kwesu ukunenuka ilyo tuli abashangila ku kupepa kwa cine.

20. Cinshi mukapampamina ukucita mu mwaka wa mulimo uwa 1998?

²⁰ Inshita imo, lintu Imfumu Davidi yatitikishiwe apakalamba, yapepele ukuti: “Washikimano mutima wandi, mwe Lesa, washikimano mutima wandi; ndeimba, kabili ndelumba. Ndemutootela mu bantu na bantu, mwe Shikulu.” (Ilumbo 57:7, 9) Lekeni na ifwe tube abashikimana. Mu mwaka wa mulimo uwa 1997, te mulandu na mafya ayengi, kwali ukupunda kukalamba ukwa kulumbanya ubukata bwa kwa Yehova Lesa. Lekeni ukupunda kwapalako, ukwacilapo ubukulu, kucitwe muli uno mwaka wa mulimo. Na kabili natutwalilile ukulumbanya Yehova te mulandu ne fyo Satana engesha ukucita ku kutufuupula nelyo ukutulwisha. E co, tukalangilila ukuti umutima wesu ukatwalilila ukuba uwalungama ku mutima wa kwa Yehu Mukalamba, Yesu Kristu, kabili tukankulako no mweo wesu onse ku kukonkomesha kwapuutwamo ukwa kuti: “Samweni muli Yehova, no kwanga, mwe balungama; kabili auleni, mwe batambalalo mutima bonse.”—Ilumbo 32:11.

Bushe kuti Mwalondolola?

◻ Kwaluka nshi kwaliko mu Israele mu 905 B.C.E.?

◻ Yehu wa nomba nani, kabili ni shani fintu “ibumba likalamba” lyalangilila ukuti ‘umutima wa liko untu walungama’ no mutima wakwe?

◻ Fipendo nshi ukufuma kuli lipoti wa pa mwaka ifilangilila ukupimpa kwa Nte sha kwa Yehova mu mwaka wa mulimo uwa 1997?

◻ Te mulandu ne co Satana engacita ku kutulwisha, mupashi nshi tukalanga mu mwaka wa mulimo uwa 1998?

[Charti pe bula 18-21]

LIPOTI WA MWAKA WA MULIMO UWA 1997 UWA NTE SHA KWA YEHOVA UWA MU CALO CONSE

(Moneni muli magazini)

[Icikope pe bula 15]

Impendwa ya basangilwe ku Cibukisho iyaibela ilelangilila ifyo kuti kwaba ukwingilishiwako kukalamba

[Icikope pe bula 16]

Fintu Yehonadabu aafwilishe Yehu, e fyo “ibumba likalamba” ilelo lyafwilisha Yehu Mukalamba, Yesu Kristu, na bamunyina basubwa