Icipandwa 2
Tasheni Yehova Pantu E Lesa Wine Wine Eka
1. Lesa wine wine eka nani?
BAIBOLO itila nangu ca kuti kwaba abengi abamonwa nga balesa, “kuli ifwe kwaba Lesa umo fye, Shifwe.” (1 Abena Korinti 8:5, 6) Uyo “Lesa umo” ni Yehova, Kalenga wa fintu fyonse. (Amalango 6:4; Ukusokolola 4:11) Yesu amwitile ati “Lesa wandi, kabili Lesa wenu.” (Yohane 20:17) Asuminishe amashiwi Mose asosele pa kubala aya kuti: “Yehova e Lesa [wa cine]: takuli umbi kabili kano wene.” (Amalango 4:35) Yehova alikulisha ukucile fintu fyonse ifipepwa, pamo nge filubi, abantunse abamonwa aba mushilo, nelyo umulwani wakwe Satana Kaseebanya, “umulungu wa nshita ino.” (2 Abena Korinti 4:3, 4) Ukupusanako ne fi fyonse, Yehova e “Lesa wine wine eka,” nga filya fine fye Yesu amwitile.—Yohane 17:3.
2. Ilyo tulesambilila pa lwa kwa Lesa, bushe imikalile yesu ifwile ukuba shani?
2 Abantu abatasha kabili abasambilila pa mibele yawamisha iya kwa Lesa, na fintu aacita ne fyo akatucitila, balapalama kuli wene. Ilyo ukutemwa batemwa Yehova kulekula, balafwaisha ukumutasha. Mu nshila nshi? Inshila imo kwebako bambi pa lwa wene. Abena Roma 10:10 batila, “Ku mutima umuntu atetekela no kulungamikwa, kabili ku kanwa alumbula no kupusuka.” Inshila imbi kumupashanya mu nsoselo na mu micitile. Abena Efese 5:1 batila, “Mube abapashanya Lesa, nga bana abatemwikwa.” Pa kuti tucite fyo bwino sana, tukabila ukwishiba bwino untu Yehova aba.
3. Mibele nshi iya kwa Lesa iyapulamo?
3 Muli Baibolo fye onse, mwaba amashiwi ayengi ayalanda pa mibele yapulamo iya kwa Lesa. Imibele yakwe ine (4) iyapulamo mano, ubupingushi, amaka, no kutemwa. ‘Kuli wene e kwaba amano.’ (Yobo 12:13) “Imibele yakwe yonse bupingushi.” (Amalango 32:4) Aba na “maka ayengi.” (Esaya 40:26) “Lesa kutemwa.” (1 Yohane 4:8) Lelo, pali iyi mibele ya kwa Lesa ine, ni ili kwi iyapulamo, iilangilila umusango untu Lesa aba iyacila pa mibele yakwe imbi?
“Lesa Kutemwa”
4. Pa mibele ya kwa Lesa ni ili kwi yamulengele ukubumba ububumbo bonse ne fya mweo fyonse?
4 Tontonkanyeni pa calengele Yehova ukubumba ububumbo bonse ne fibumbwa fya mupashi na bantunse ifya mucetekanya. Bushe mano yakwe atemwa maka? Iyo, pantu nangu Lesa abomfeshe ifyo, te fyamulengele ukutendeka ukubumba. Kabili ubupingushi bwakwe tabwalekabilwa pa kutila apeeleko na bambi ica bupe ca bumi. Lelo, ukutemwa kwakulisha Lesa akwata kwamulengele ukuti alenge na bambi ukuipakisha insansa sha kuba ifibumbwa fya mucetekanya. Kutemwa kwamulengele ukuba no bufwayo bwa kuti abantu ba cumfwila bakekale umuyayaya muli Paradise. (Ukutendeka 1:28; 2:15) Ukutemwa kwamulengele ukuteyanya ukuti ukusenukwa abantu basenukwa pa mulandu wa bupulumushi bwa kwa Adamu kukafumishiwepo.
5. Ukulingana na Baibolo, Yehova aba cipasho ca mibele nshi, kabili mulandu nshi?
5 Kanshi, pa mibele yonse iyo Lesa akwata, iyapulishamo kutemwa. E fyo aaba fye. Nangu ca kuti imibele akwata pamo nga amano, ubupingushi, na maka fyalicindama, Baibolo tayatala aisoso kuti Yehova aba cimo pali ifi. Lelo pa kutemwa pena yalanda ukuti aba kutemwa. Cine cine, Yehova e cipasho ca kutemwa. Uku kutemwa kwashintilila pa fishinte fimo, te pa kukuntukilwa fye. Ifishinte apo ukutemwa kwa kwa Lesa kwashintilila cine no bulungami. Uku e kutemwa kwapulishamo pa kutemwa konse, nga mulya mwine Yehova Lesa umwine akulangila. Ukutemwa kwa musango yo cilangililo ca kukanakwata bukaitemwe nangu fye panono kabili lyonse kumonekela mu kucitapo fimo ifilanga uko kutemwa.
6. Cinshi citulenga ukupashanya Lesa, nangu ca kuti alikulisha ukutucila?
6 Ni yi mibele ishaiwamina iya kutemwa e itulenga ukupashanya Lesa wa musango yo. Ifwe pa kuba abantu yaweyawe, abashapwililika kabili abalufyanya, kuti napamo twatontonkanya ukuti tatwakatale atupashanya Lesa bwino. Lelo natumone ica kumwenako na cimbi ica kutemwa kukalamba ukwa kwa Yehova: Alishiba umo twapelebela kabili tenekela ifwe ukucite fintu fyapwililika. Alishiba ukuti pali nomba twaba abashapwililika icine cine. (Amalumbo 51:5) E mulandu wine Amalumbo 130:3, 4 yalandila ukuti: “Amampuulu nga mwayamwensekesha, mwe Yehova, mwe Shikulu, nani uwingeminina? Pantu kuli imwe kwabo kulekelela abalapila.” Cine cine, Yehova ni “Lesa wa nkumbu kabili uusenamina, uukokolo kukalipa, kabili uwafulisho luse.” (Ukufuma 34:6) “Imwe, mwe Shikulu, muli basuma, mulekelela abamufwaya.” (Amalumbo 86:5) Ifyo ayo mashiwi yasansamusha! Te pa busuma ukubombela uyu Lesa wawamisha no kuimwena ifyo asunga abantu mu kutemwa no luse!
7. Bushe ukutemwa kwa kwa Yehova kuti kwamonekela shani mu fyo abumba?
7 Ukutemwa kwa kwa Yehova kuti kwamonekela na mu fyo abumba. Shi tontonkanyeni pa fintu ubwingi ifyo Yehova atupeela ukuti tuleipakisha, ifintu pamo nge mpili shayemba, imitengo, imimana, na babemba. Alitupeela ifya kulya ifya misango yalekanalekana iya kupapusha ifyumfwika bwino ilyo tulelya kabili ifitulenga ukuba no bumi. Kabili alitupeela na maluba yalekanalekana ayashaifulila ayayemba kabili ayanunkila ukubikapo ne nama isho mwingatemwa ukutamba. Apangile ifintu ifya kusansamusha abantunse, nangu ca kuti tacakabilwe ukuti abapangile ifyo fintu. Ca cine, tatwingaipakisha ububumbo bwakwe mu kukumanina, pantu twikala muli cino calo icibifi kabili tucili abashapwililika. (Abena Roma 8:22) Lelo shi baleni elenganyeni fye ifyo Yehova akatucitila mu Paradise! Kemba wa malumbo atulaya ati: “Ni mwe mufumbatule minwe yenu, no kwikusha conse ica mweo ifyo cilefwaya [ifyalinga].”—Amalumbo 145:16.
8. Ca kumwenako nshi capulamo ica kutemwa Yehova atutemwa?
8 Kutemwa nshi ukwapulamo Yehova aalanga ku bantu? Baibolo ilondolola aiti: “Lesa atemenwe aba pano isonde ukutemwa kwa kuti apeele Umwana wakwe uwafyalwa eka, ukuti onse uumutetekela eonaika, lelo abe no mweo wa muyayaya.” (Yohane 3:16) Bushe busuma bwa muntu bwalengele Yehova ukucite ci? Abena Roma 5:8 baasuka ati: “Lesa asokolola ukutemwa kwakwe kwine pa kuti, ilyo twali tucili ababembu, Kristu alitufwilile.” Cine cine, Lesa atumine Umwana wakwe uwapwililika pe sonde ku kupeela ubumi bwakwe icilubula ce lambo ku kutulubula ku kusekwa kwa lubembu ne mfwa. (Mateo 20:28) Ici calengele ukuti abantu abatemwa Lesa babe pa nshila ya kunonka ubumi bwa muyayaya. Tuletasha apo ukutemwa kwa kwa Lesa kwatanunukila kuli bonse abafwaya ukucita ukufwaya kwakwe, pantu Baibolo itwebo kuti: “Lesa taba na kapaatulula ka bantu, lelo uwa mu luko lonse uwamutiina no kubombo kulungama asekelelwa kuli wene.”—Imilimo 10:34, 35.
9. Bushe icishinka ca kuti Yehova alitupeela Umwana wakwe ku kube cilubula pali ifwe cifwile ukutulenga ukucita cinshi?
9 Bushe icishinka ca kuti Yehova alitupeela Umwana wakwe ku kube cilubula ca pali ifwe, icalenga no kuti twiswilwe inshila ya ku bumi bwa muyayaya, cifwile ukutulenga ukubomfya shani ubumi bwesu pali nomba? Cifwile ukulenga ukutemwa twatemwa uyu Lesa wa cine Yehova ukushika. Kabinge, cifwile ukutulenga ukufwaya ukukutika kuli Yesu, uwimininako Lesa. “[Yesu] afwilile bonse ukuti abali no mweo beikalila abene, lelo bekalile uwabafwilile.” (2 Abena Korinti 5:15) Mwandi tulasekelela ukukonka mu makasa ya kwa Yesu, pantu ali ca kumwenako cisuma mu kupashanya ukutemwa ne nkumbu sha kwa Yehova! Ici cimoneka mu fyo Yesu alandile ku bafuuka ati: “Iseni kuli ine, bonse mwe bacucutika kabili abafinwa, na ine nalamupeelo kutusha. Sendeni ikoli lyandi no kusambilila kuli ine, pa kuti ndi wafuuka kabili uwapetama umutima; e lyo mwalasango kutusha ku mitima yenu; pantu ikoli lyandi lyalyanguka, ne cisendo candi calipepuka.”—Mateo 11:28-30.
Ukulango Kutemwa Kuli Bambi
10. Ni nshila nshi shimo twingalangilamo ukutemwa ku Bena Kristu banensu?
10 Kuti twalanga shani ukuti twaba no musango wa kutemwa Abena Kristu banensu nga ulya Yehova na Yesu bakwata kuli ifwe? Shi moneni inshila ubwingi twingalangilamo ukutemwa: “Ukutemwa kulatekanya, kucite congwe. Ukutemwa takwikatwa kalumwa, takucita mataki, takutuumikwa, takucita cishiyene, takuifwaila ifya kuko, takufiishiwa ku mutima, takulinga cabipa; ukutemwa takusekelela pa cishilungeme, lelo kusekelela pamo ne cine; kushipikisha fyonse, kutetekela fyonse, kucetekela fyonse, kushishimisha fyonse. Ukutemwa takupwa.”—1 Abena Korinti 13:4-8; 1 Yohane 3:14-18; 4:7-12.
11. Ni bani bambi tulingile ukutemwa, kabili kuti twabatemwa shani?
11 Ni bani bambi tulingile ukutemwa, kabili kuti twabatemwa shani? Yesu atile: “E ico kabiyeni, kalengeni aba nko shonse ukuba abasambi, mulebabatishisha mwi shina lya kwa Tata ne lya Mwana ne lya Mupashi wa mushilo: mulebasambilisha ukubaka fyonse ifyo namwebele.” (Mateo 28:19, 20) Ici cisanshamo ukushimikilako abo abashilati babe Abena Kristu banensu imbila nsuma ya calo cipya ica paradise icileisa. Yesu alangile apabuuta ukuti ukutemwa kwesu takulingile ukulangwa fye ku basumina ifyo twasuminamo, pantu atile: “Pantu nga mwatemwa [fye] abamutemwa, muli ne cilambu nshi? Bushe abasangushi tabacite fyo fine? Kabili nga muposhanya na bamunyinenwe beka, mwacita cinshi icacilako? Bushe na Bena fyalo tabacite fi?”—Mateo 5:46, 47; 24:14; Abena Galatia 6:10.
‘Endeleni Mwi Shina lya kwa Yehova’
12. Mulandu nshi ishina lya kwa Lesa lyalingila fye wene eka?
12 Icintu na cimbi icacindama mu kutasha Lesa wa cine caba kwishiba, ukulalumbula, no kulasambilishako bambi ishina lyakwe ilyaibela, Yehova. Kemba wa malumbo alandile ico umutima wakwe walefwaisha ati: “Ku kuleka beshibe ukuti imwe mweka, ishina lyenu Yehova, mwapulamo pano isonde ponse.” (Amalumbo 83:18) Ishina Yehova lyalola mu kuti “Ailenga Ukuba.” E Wapulamo uwimika ubufwayo bwakwe kabili lyonse alabulengo kufishiwapo ukwabulo kufilwa. Kabili ni Lesa wa cine fye e wingalinga ukukwata ilyo ishina, pantu abantunse tabengashininkisha ukuti amatukuto yabo kuti yafishiwapo. (Yakobo 4:13, 14) Ni Yehova eka fye e wingasosa ukuti icebo cakwe ‘cikashuka’ muli ico acitumina. (Esaya 55:11) Abengi balacincimushiwa ilyo bamona ishina lya kwa Lesa mu maBaibolo yabo umuku wa kubalilapo no kusambilila umo lyalola. (Ukufuma 6:3) Lelo uku kwishiba kuti kwabanonsha fye nga ca kuti ‘baleendela mwi shina lya kwa Yehova . . . umuyayaya.’—Mika 4:5.
13. Calola mwi ukwishiba ishina lya kwa Yehova no kwendela mwi shina lyakwe?
13 Amalumbo 9:10, yalanda pa lwe shina lya kwa Lesa ayati: “Kuti bamutetekela abaishibe shina lyenu.” Ici tacipeleela fye pa kwishiba ishina Yehova, icishipilibula ukuti ninshi umo capwa nacetekela na muli wene. Ukwishiba ishina lya kwa Lesa kwalola mu kuti twaumfwikisha no kutasha Yehova pa musango untu uyu Lesa aba, ukucindika ubulashi bwakwe, ukumfwila amafunde yakwe, no kumutetekela muli fyonse. (Amapinda 3:5, 6) No kwendela mwi shina lya kwa Yehova kwalola mu kuti tufwile ukuipeela kuli wene no kumwimininako nga umo uwa muli bakapepa bakwe, no kuleka imikalile yesu cine cine yalingana no kufwaya kwa kwa Lesa. (Luka 10:27) Bushe ifi e fyo mulecita?
14. Nga tulefwaya ukubombela Yehova umuyayaya, cinshi cimbi cikabilwa ukucilo kumubombela fye pa mulandu wa kuti twalyebwa ukucite fyo?
14 Nga tulefwaya ukubombela Yehova umuyayaya, tatulingile ukumubombela fye pa mulandu wa kuti twalyebwa ukucite fyo. Umutumwa Paulo akonkomeshe Timote, uwabombeele Yehova pa myaka iingi ati: “Uleikansha we mwine ukuba no kuipeelesha kuli bukapepa ngo buyo bobe.” (1 Timothy 4:7, NW) Ukuipeelesha kufuma ku mutima uwaisulamo ukutasha pa muntu uo umo aleipeelako. “Ukuipeelesha kuli bukapepa” kwaba kulango mucinshi na katiina kene kene kuli Yehova. Kulangilila ifyo twamutemwisha pa mulandu wa mucinshi ukalamba twakwata kuli wene na pa mulandu wa mibele yakwe. Kutulenga ukufwaya ukuti umuntu onse alecindikisha ishina lyakwe. Tufwile ukulundulula ukuipeelesha kuli bukapepa mu mikalile yesu nga ca kuti tulefwaya ukulaendela mwi shina lya kwa Yehova, Lesa wa cine eka, umuyayaya.—Amalumbo 37:4; 2 Petro 3:11.
15. Kuti twalanga shani ukuipeelesha kwesu ukwapaatulwa kuli Lesa?
15 Pa kuti tubombele Lesa bwino bwino, tufwile ukupepa fye wene eka, apo wene ni “Lesa uufwaya kuli ifwe ukuipeelesha kwapaatulwa.” (Ukufuma 20:5, NW) Te kuti tutemwe Lesa kabili pa nshita imo ine ukutemwa na cino calo cibifi, ico umulungu wa ciko ni Satana. (Yakobo 4:4; 1 Yohane 2:15-17) Yehova alishiba bwino bwino umusango wa muntu cila umo umo aleesha ukuba. (Yeremia 17:10) Nga cine cine twalitemwa ubulungami, alamone co kabili akatwafwa ukushipikisha amesho tupitamo cila bushiku. Akatulengo kucimfya ububifi ubuli mpanga yonse muno calo pa kututungilila no mupashi wakwe uwa mushilo uwa maka. (2 Abena Korinti 4:7) Kabili akatwafwa na mu kubakilila isubilo lyesu ilyashininkishiwa ilya bumi bwa muyayaya pe sonde lya paradise. Kwena ici cilolelo cishaiwamina twakwata! Tufwile ukutasha nga nshi pali ici cilolelo no kubombela Lesa wa cine, Yehova mu kuitemenwa, uulenga ukuti tukakwate ubumi bwa muyayaya.
16. Cinshi mwingafwaya ukucita, capamo ne mintapendwa ya bambi?
16 Imintapendwa ya bantu mwi sonde lyonse baliba aba nsansa ukwiitaba ku bwite bwa kwa kemba wa malumbo uwalembele ati: “Aleni na ine tutashe Yehova, no kutondela pamo ishina lyakwe.” (Amalumbo 34:3) Yehova alemulaalika ukuba pali cinkupiti wa bantu uulekula mu nko shonse abaletasha no kutonda Yehova.
Ukulanshanya kwa Kupitulukamo
• Bushe Yehova muntu wa musango nshi? Tumwenamo shani mu kwishiba bwino bwino imibele yakwe?
• Kuti twaafwa shani bambi ukusambilila icine pa lwa kwa Lesa?
• Cipilibula nshi ukwishiba Yehova no kwendela mwi shina lyakwe?
[Ifikope pe bula 14]
Pa mulandu wa kutemwa kwakwe ukukalamba, Yehova ‘akafumbatule minwe yakwe no kwikusha conse ica mweo ifyo cilefwaya’