ISAMBILILO 46
Mulandu Nshi Mulingile Ukusalilapo Ukuipeela no Kubatishiwa?
Kuti mwaipeela kuli Yehova nga mwapepa no kumulaya ukuti e o mukalapepa fye eka, no kuti ukucita ukufwaya kwakwe e ko mukalabikako sana amano ukucila ifintu fimbi. (Amalumbo 40:8) Nga mwaipeela kuli ena, lyena kuti mwabatishiwa pa kulanga abantu ukuti mwali-ipeela. Ukuipeela kuli Yehova e cintu icacindamisha ico twingasalapo ukucita, kabili icingalenga ifintu ukwaluka mu bumi bwesu. Finshi fingalenga mwalafwaya ukuipeela kuli Yehova?
1. Cinshi cilenga umuntu aipeela kuli Yehova?
Ukutemwa Yehova e kulenga twaipeela kuli ena. (1 Yohane 4:10, 19) Baibo ilanda ukuti: “Mulingile ukutemwa Yehova Lesa wenu no mutima wenu onse, no mweo wenu onse, no kutontonkanya kwenu konse, na maka yenu yonse.” (Marko 12:30) Tulanga ukuti twalitemwa Lesa mu fyo tulanda na mu fyo tucita. Nga filya fine ukutemwa kulenga umwaume no mwanakashi baupana, ukutemwa Yehova nako e kulenga twaipeela kuli ena no kubatishiwa.
2. Bushe Yehova apaala shani abaipeela kuli ena no kubatishiwa?
Nga mwabatishiwa mukaba mu lupwa lwa kwa Yehova ulwa nsansa. Ici cikalenga mukamone ifingi ifilanga ukuti alimutemwa, kabili bucibusa bwenu na ena bukakoselako. (Belengeni Malaki 3:16-18.) Nga mwabatishiwa Yehova akaba Shinwe, kabili mukaba mu lupwa lwa mwi sonde lyonse umwaba bamunyinefwe na bankashi abamutemwa kabili abatemwa Yehova. (Belengeni Marko 10:29, 30.) Kwena kwaliba ifyo mulingile ukucita pa kuti mufikepo ukubatishiwa. Mufwile ukusambilila pali Yehova, ukumutemwa, e lyo no kucetekela Umwana wakwe. Lyena kuti mwasalapo ukuipeela kuli Yehova. Nga mwacita ifi twalandapo kabili mwabatishiwa no kubatishiwa, mukaba ne shuko lya kuba ne nsansa umuyayaya. Icebo ca kwa Lesa citila: “Icalingana ne ci e cilemupususha pali ino nshita, e kutila ulubatisho.”—1 Petro 3:21.
SAMBILILENI NA FIMBI
Moneni ico cicindamine ukuti musalepo ukuipeela kuli Yehova no kubatishiwa.
3. Bonse tufwile ukusalapo uo tukalabombela
Mu nshiku sha kale, abena Israele bamo baletontonkanya ukutila kuti balepepa Yehova pa nshita imo ine balepepa na lesa wa bufi Baali. Lelo Yehova atumine kasesema Eliya pa kuti abalungike. Belengeni 1 Ishamfumu 18:21, lyena lanshanyeni ici cipusho:
Finshi abena Israele balingile ukusalapo?
Nga filya cali ku bena Israele, na ifwe tufwile ukusalapo uo tukalabombela. Belengeni Luka 16:13, lyena lanshanyeni aya mepusho:
Cinshi twingalandila ukutila te kuti tupepe Yehova pa nshita imo ine no kupepa umuntu umbi nelyo icintu?
Kuti twalanga shani Yehova ukuti e o tufwaya fye ukulapepa?
4. Muletontonkanya sana pa fyo Yehova amutemwa
Yehova alitupeela ifintu ifingi ifisuma. Finshi twingapeela Yehova? Tambeni VIDIO.
Finshi fimo ifyo Yehova acita ifilanga ukuti alimutemwa? Belengeni Amalumbo 104:14, 15 na 1 Yohane 4:9, 10, lyena lanshanyeni aya mepusho:
Finshi mwatemwa sana pa fyo Yehova atupeela?
Bushe ifi fyalenga mwalaumfwa shani pali Yehova?
Umuntu nga atupeela ica bupe ico twatemwa sana, tulafwaisha ukulamulanga ukuti tulatasha pa ca bupe atupeele. Belengeni Amalango 16:17, lyena lanshanyeni ici cipusho:
Nga mwatontonkanya pali fyonse ifyo Yehova amucitila, finshi mufwaisha ukumupeela?
5. Yehova akamupaala nga nshi nga mwaipeela kuli ena
Abantu abengi bamona kwati ukulumbuka, ukwingila incito iisuma, nelyo ukukwata indalama e kwingalenga baba ne nsansa. Bushe ca cine ifi kuti fyalenga baba ne nsansa? Tambeni VIDIO, lyena lanshanyeni amepusho yakonkapo.
Nangu ca kuti umwaume twatamba muli vidio alitemenwe ukuteya bola, cinshi calengele aleke ukuteya?
Alisalilepo ukuipeela kuli Yehova, ukucila ukubika sana amano kuli bola. Bushe mulemona ukutila ifyo asalilepo ukucita fyali fye bwino? Cinshi mwa-asukila ifyo?
Ilyo umutumwa Paulo ashilaba Umwina Kristu, alecita ifyali no kulenga alumbuka. Alisambilile amafunde ya baYuda kuli kasambilisha uwalumbwike. Lelo alilekele ukucita ifyali no kulenga alumbuka pa kuti abe Umwina Kristu. Bushe Paulo alyumfwile ububi pa fyo asalilepo ukucita? Belengeni Abena Filipi 3:8, lyena lanshanyeni aya mepusho:
Mulandu nshi Paulo alemwena ifyo akwete ilyo ashilaba Umwina Kristu ukuti fyali “fisooso fye”?
Finshi anonkele ilyo aishileba Umwina Kristu?
Bushe kuli ico mwingacita ico mwingalinganya ku kubombela Yehova?
Ilyo Paulo aishileba Umwina Kristu, alinonkele ifintu ifingi ukucila ifyo ashiile
ABANTU BAMO BATILA: “Nalishiba ukuti ici e cine, nomba te kuti nkumemo ukulacita fyonse ifyo umuntu alingile ukulacita nga aipeela kuli Lesa.”
Bushe muletontonkanya ukuti ukuipeela kuli Yehova cintu icisuma ico twingacita?
IFYO MUSAMBILILE
Ukutemwa Yehova e kulenga tuleipeela kuli ena no kubatishiwa.
Ukupitulukamo
Mulandu nshi Yehova afwaila ukuti tumutemwe no mutima wesu onse e lyo no kulamubombela?
Bushe Yehova apaala shani abasalapo ukuipeela kuli ena no kubatishiwa?
Bushe kuti mwatemwa ukuipeela kuli Yehova?
ISHIBILENIPO NA FIMBI
Moneni icalengele kemba wa nyimbo umo e lyo no waleteya bola basalepo ukuipeela kuli Yehova.
Finshi Ifyo Nkacita mu Bumi Bwandi?—Ifyo Cali Ilyo Bali Imisepela (6:54)
Belengeni na fimbi ifingalenga mwasalapo ukuipeela kuli Yehova.
“Mulandu Nshi Mufwile Ukuipeelela Kuli Yehova?” (Ulupungu lwa kwa Kalinda, January 15, 2010)
Tambeni vidio ya lwimbo pa kuti mumone ifyo abasalapo ukuipeela kuli Yehova baba ne nsansa.
Pa kuti mumone icalengele umwanakashi umo atontonkanye sana pa co ali no kubikako sana amano, belengeni ilyashi litila “Pa myaka iingi, naleyipusha ati, ‘Cinshi twabela pano calo?’”
“Baibolo Ilaalula Abantu” (Ulupungu lwa kwa Kalinda, November 1, 2012)