Ukulango Kutemwa ku Balekabila

ABENA Kristu bakwato mulimo wa kusakamana bamunyina na bankashi abalekabila. (1 Yohane 3:17, 18) Umutumwa Paulo alembele ukuti: “Tubombe icisuma kuli bonse, no kucishamo ku ba bwananyina bwa mu citetekelo.” (Abena Galatia 6:10) Nomba line, munyina umo uwabombela Yehova mupepi ne myaka 40, alisansamushiwe na bamunyina ba Bwina Kristu ilyo alelwalika umukashi wakwe na pa numa ya mfwa iyaishilekonkapo. Alemba ukuti:

“Mupepi ne myeshi ibili nshaleya ku ncito, pantu naleteensha umwina mwandi pa ng’anda mu nshita ya kulwala kwakwe. Ifyo napeemwine lintu ifibusa ifya mu cilonganino mu kuitemenwa fyaishile mu kutwaafwa! Twapokelele indalama ishingi isha bupe—shalekonkwapo na makardi yaleti: ‘ubwafwilisho bwa kukumanisha ifipooswa,’—ukulipila inkongole sha cila mweshi, ifyakusonkela, ne fipooswa fimbi.

“Imilungu ibili ilyo umwina mwandi talafwa, kangalila wesu uwa muputule aishiletutandalila ku kutukoselesha. Alitutambisheko amasilaidi yantu icilonganino cali no kutamba ku mpela ya mulungu. Twalikutikeko ukulongana pali lamya wesu—ukusanshako fye no kukumana kwa mulimo uwa mwi bala ukwaletungululwa na kangalila wa muputule. Kuli kumo ukwa uku kukumana, aebele bonse abasangilweko ukuposha umwina mwandi capamo nge bumba abati ‘mwapoleni.’ Muli fyo, nelyo fye talemonana na bantu, tatalile omfwapo ukutalalilwa.

“Mwi awala limo pa numa ya mfwa yakwe, mupepi na baeluda bonse balishile ku mwandi. Pali bulya bushiku bweka fye, bamunyina na bankashi ukucila pali 100 balishile mu kuloosha. Lintu ifilyo fyapayanishiwe pe tebulo kuli bonse abasangilweko, cali fye nge ‘cisungusho.’ Teti nkumeko ukulumbula ifya bupe fyonse, amashiwi ya cililishi, ifyebo fya kusansamusha, na mapepo aya kumpepelako. Fintu baali abakukoselesha kuli ine! Nasukile naeba bamunyina ukuti baleke ukupayanya ifilyo no kwafwilisha ukuwamya mu ng’anda!

“Ni kwi kumbi ku nse ya kuteyanya kwa kwa Yehova uko twingasanga imibombele ya musango uyu iya nkumbu, iya kulangulukila, kabili iya kutemwa? Ilelo abengi bakwata ifibusa fya cine ifya mpendwa fye. Ifwe, Yehova alitupaala mu kuba no lupwa ulushaikulila nga nshi ulwa bamunyina na bankashi aba ku mupashi!”—Marko 10:29, 30.