Beni ne Mimwene Yalungama iya Nkumbu sha kwa Lesa
DOKOTA aali uwa cikuuku kabili uwayangwako nga nshi. Ukulingana no kupingula kwakwe ukwawamisha, umulwele wakwe alekabila sana sana ukulepulwa nga bengapususha ubumi bwakwe. Lintu ashimunwike no kwimya umulandu wa kukuushishamo umulopa, dokota alipapile. Lintu alondolwele ukuti pa milandu ya butotelo taali na kunakila ku kulepula uko kwasanshishemo ukukuushishamo umulopa, dokota alisungwike cibi. Afwailishe mu matontonkanyo yakwe ku kusanga inshila ya kwafwilamo umulwele. Mu kulekelesha, atontonkenye ukuti alisangile inshila imo. Atile: “Nawishiba, nga ca kuti tawapokelele ukukuushishamo kwa mulopa, uli no kufwa. Taulefwaya ico, bushe te ifyo?”
“Kwena iyo,” e fyasosele umulwele.
“Lelo, mu kupalako, nga ca kuti wapokelela ukukuushishamo, uli no kutoba ifisumino fyobe ifya butotelo, ifyaba na fyo fine ifyakatama kuli iwe. Cisuma, kutika ku mitubululo yandi. Mulandu nshi te kuti upokelele ukukuushishamo umulopa na muli ifyo ukupususho bumi bobe. Lyene ukuyebelela kuli Lesa ukuti nubembuka, no kulapila. Muli iyo nshila, uli no kusungililwa mu butotelo bobe na mo.”
Uyu dokota wa mapange yasuma atontonkenye ukuti aali nasanga icasuko capwililika. Aali uwaibukila ukuti umulwele wakwe asumine muli Lesa wa nkumbu. Mu kushininkisha, aka kali kashita kalinga ku kushukila inkumbu sha kwa Lesa! Lelo bushe ukupanda amano kwa kwa dokota kwalimo ukupelulula nga fintu kwaumfwikilwe?
Bushe Tulatala Atupelululapo Muli iyi Nshila?
Inshita shimo shimo kuti pambi twaisanga tulepelulula mu nshila dokota apelulwililemo. Nakalimo tulatiinishiwa ku kupuuka kushaenekelwa ukwa kukaanya pa sukulu nelyo pa ncito. Nelyo kuti pambi twaisanga fwe bene mu mibele ya kulenge nsoni umo tuli pe samba lya kutitikisha ku kucita icintu cimo icicena kampingu wesu. Lintu twapumikishiwa, kuti pambi twakongamina ku kusanga inshila yayanguka iya kufuminamo no kucita cintu twaishiba ukuti calilubana, ukupanga ukulomba ukulekelelwa pa numa.
Nelyo limbi abantu umo umo kuti pambi batunkwa ku kukongama kwabo kwine ukwalubana. Ku ca kumwenako, umulumendo kuti pambi aisango mwine mu mibele umo atunkwa mu kukosa ukucita bucisenene. Ukucila ukulwisha ulunkumbwa lwalubana, kuti pambi anakilako, ukupanga ukuwamya imilandu na Lesa pa numa. Bamo balifika fye no kwalepesha ku kucita ulubembu lwabipisha te mulandu no kwishiba ukuti napamo kuti batamfiwa ukufuma mu cilonganino ca Bwina Kristu. Mu kumonekesha bapelulula ukuti, ‘Nkaleka inshita inono ukupitapo. Lyene nkalapila no kubweshiwa.’
Iyi mibele yonse ikwete ifintu fibili ifyapalana. Ica kubalilapo, abantu balanakilako ukucila ukulwisha ukucita icalungama. Ica bubili, bayumfwa ukuti pa numa balufyanya, Lesa ukwabulo kutwishika akabalekelela nga ca kuti fye bamwipusha.
Mimwene Nshi Iyalungama?
Bushe ici cilalangisha ukutesekesha kwalinga ukwa nkumbu sha kwa Lesa? Cisuma, tontonkanya pa lwa shilya nkumbu pa kashita kanono. Yesu atile: “Lesa atemenwe aba pano isonde ukutemwa kwa kuti apeele Umwana wakwe uwafyalwa eka, ukuti onse uumutetekela eonaika, lelo abe no mweo wa muyayaya.” (Yohane 3:16) Umutumwa Yohane alondolwele ifyo isho nkumbu shibomba lintu atile: “Ndelembe fi fintu kuli imwe ukuti mwibembuka; lelo ngo muntu abembuka, natukwato Bukota kuli Shifwe, Yesu Kristu umulungami.” (1 Yohane 2:1) E co, nga ca kuti pa mulandu wa kukanapwililika twawila mu lubembu, kuti twaisa kuli Lesa mwi pepo no kupaapaata ukulekelelwa pa cishinte ce lambo lya kwa Yesu.
Bushe ici, nangula ni fyo, cilepilibula ukuti te mulandu nampo nga twabembuka nelyo iyo, kulila fye twaipusha ukulekelelwa pa numa? Napacepesha. Ibukisha amashiwi ya kubalilapo muli kulya kwambula: “Ndelembe fi fintu kuli imwe ukuti mwibembuka.” Amashiwi yalundwapo aya kwa Yohane muli cilya cikomo yalangisha ukutantika kwa kwa Yehova ukwabamo ukutemwa mu kubomba no kukanapwililika kwesu. Nangu ni fyo, tuli no kwesha na maka yonse ukusengauka ukubembuka. Nga te ifyo ninshi tulelanga umusaalula wabipisha ku kutemwa kwa kwa Lesa, ukupala abo Yuda alosesheko ababomfeshe ukusenamina kwa kwa Lesa nge ca kuleseshamo bucilende.—Yuda 4.
Ukumona inkumbu sha kwa Lesa nge ca kutwanka te mulandu na cintu twacita kucefya inkumbu sha kwa Lesa no kucilenga ukumoneka kwati ulubembu talwabipa nge fyo. Ubu bufi ubwafiita fititi. Umutumwa Paulo aebele Tito ati: “Ukusenamina kwa kwa Lesa kwamoneke ku kuletela abantu bonse ipusukilo, pa kutufunda ukuti tube abakaana ukubulapepa ne fya lunkumbwa fya pano isonde, kabili tube no mweo wa kutekanya, kabili uwa bulungami, kabili umwabela bukapepa mu bwikashi buno bwa nomba.”—Tito 2:11, 12.
Paulo alangishe ukutesekesha kwakwe ukwa nkumbu sha kwa Lesa mu nshila atulukwishe ukulwisha ukukanapwililika kwakwe kwine. Atile: “Ntuutaulo mubili wandi, no kuuteko busha; epali, ilyo nabila kuli bambi, nabo wakaanwa ne mwine.” (1 Abena Korinti 9:27) Paulo tacisendele fye mu kwanguka ukuti aali uwakakililwako ukubembuka mu nshita mu nshita. Nga ifwe?
Imimwene ya kwa Yesu
Pa kashita kamo, Yesu alangishe ifyo amwene imfundo ya kusuusuka ku calungama no kwalukila ku nshila yayanguka ku kuleuka ukucula. Lintu atampile ukweba abasambi bakwe pa lwa mfwa yakwe iya bulilambo iyaleisa, Petro aeseshe ukumupanda amano, ukusoso kuti: “[Beni aba cikuuku kuli mwe bene, NW], mwe Shikulu. Ici tacakamuponene.” Ukwankulako kwa kwa Yesu? “Kabiye ku numa yandi, we Satana: uli ca kupunwisha kuli ine; pa kuti tauleangwe fya kwa Lesa, kano ifya bantu.”—Mateo 16:22, 23.
Ukwebaula Petro kwakosa ukwa kwa Yesu kwalangishe mu kulengama ukuti Yesu alikeene ukusende nshila yayanguka iyo yasanshishemo ukupusana no kufwaya kwa kwa Lesa. Icalembwa cilangisha ukuti akonkele inshila yalungama ukwabula ukupungaila, ukupita mu kululunkanishiwa lyonse kuli Satana. Ku mpela alipumiwe, ukupumwa icabipisha, kabili aculile imfwa ya kulenga ukushikitika. Nangu ni fyo, tasuuswike, kabili pa mulandu wa ici aali na maka ya kupeela ubumi bwakwe nge cilubula pali ifwe. Mu kushininkisha tashipikishe fyonse ifi pa kuti ifwe ‘tube aba cikuuku kuli fwe bene’ lintu amafya nelyo amatunko yaimako!
Ulwa kwa Yesu casoswa aciti: “Watemwo bulungami, no kupato bupulumushi.” (AbaHebere 1:9) Ukubuula inshila yayanguka iya kufuminamo ilingi line kusanshamo ubupulumushi. E co, nga ca kuti mu cine cine twalipata ubupulumushi—nga fintu Yesu abupatile—lyonse tukakaana ukusuusukako. Mwi buuku lya Amapinda, Yehova atila: “We mwana wandi, ube uwa mano, ulenge umutima wandi ukusamwa, ukuti njasuke ku ulenseebanya.” (Amapinda 27:11) Ubulungami bwa kwa Yesu ubwashikatala lelo ubwabulo kusuusuka bwaletele ukusekelela kukalamba ku mutima wa kwa Yehova. Na ifwe kuti twapeela Yehova ukusekelela kwapalako nga ca kuti twakonka inshila ya kwa Yesu iya bumpomfu.—1 Petro 2:23.
Ukushipikisha Kulakansha
Umutumwa Petro alembele ati: “E mo mwangila, nelyo mulengwo bulanda inshita inono (nga e fyo cifwile ukuba) ku fya kwesha ifingi, ukuti bucishinka bwa citetekelo cenu, icafinisha ukucila golde (uonaika nelyo waeshiwa ku mulilo), cisangwe ukulola ku kutasha no lulumbi no mucinshi pa kusokololwa kwa kwa Yesu Kristu.” (1 Petro 1:6, 7) Pa mulandu wa kuti tatwapwililika kabili twikala pa kati na nkati ka calo ca kwa Satana, lyonse tukalalolenkana na mesho na matunko. Nga fintu Petro alangisha, ifi kuti fyabomba imifwaile isuma. Fyesha icitetekelo cesu, ukulangisha nampo nga calinaka nelyo calikosa.
Na kabili fibomba ku kutukansha. Yesu “asambilile icumfwila kuli ifyo aculileko.” (AbaHebere 5:8) Na ifwe bene kuti twasambilila icumfwila, pamo pene no kushintilila pali Yehova, nga ca kuti twashipikisha pe samba lya bwesho. Kabili iyi nshila ya kusambililamo ikatwalilila ukufikila yapwishishiwa, nga fintu Petro asosele ati: “Lesa . . . akamulengo kuti mube abapwililila, akamwikasha, akamukosha.”—1 Petro 5:10.
Nga ca kuti, nangu ni fyo, twasuusuka pe samba lya bwesho, tuilangisha fwe bene ukuba aba bukuuwe nelyo abanaka, abashakwata ukutemwa kwakosa ukwa kuli Yehova no kwa bulungami nelyo abashakwata ukuilama. Ubunake ubuli bonse ubwa musango yo bubika ukwampana kwesu na Lesa mu busanso bwabipisha. Mu cine cine, amashiwi ya kusoka aya kwa Paulo kuti pambi yaba aya cine kuli ifwe: “Nga twaba ababembuka itolo apo twapokelelo kwishibe Cine, takwashala na kabili ilambo lya pa membu.” (AbaHebere 10:26) Fintu cacilapo ukuwama ukukanabembuka mu kutendekelapo ukucila ukunakila ku bunake no kukolomona ubusanso bwa kulufya ifilolelo fyonse ifya bumi!
Bumpomfu Bwabule Fipangano
Mu nshiku sha kwa kasesema Daniele, abaHebere batatu balitiinishiwe mu kuba ne mfwa ya mu mulilo nga ca kuti tabaali na kutoota ku kalubi. Ukwankulako kwabo? “Nga cabe fi, Lesa uo tupepa ali na maka ya kututuula mwi lungu lya mulilo uulebilima, kabili mu kuboko kwenu, mwe mfumu, kuti atutuula. Lelo nga tacite ifi, cibe icaishibwa kuli imwe, mwe mfumu, ku milungu yenu ifwe tatwapepeko, na ku cimpashanya ca golde ico mwaimike tatwatooteko iyo.”—Daniele 3:17, 18.
Babuulile uko kwiminina pantu bafwaile ukucite calungama. Nga ca kuti catungulwile ku mfwa yabo, ni fyo fine. Ukucetekela kwabo kwali mu kubuuka. Nangu cibe fyo, nga ca kuti Lesa alibatuulile, cili bwino. Lelo ukwiminina kwabo ukwashangila takwali kwa fipangano. E fyo cilingile ukuba lyonse ku babomfi ba kwa Lesa.
Mu kasuba kesu bamo abakaana ukusuusukako balibikwa mu cifungo, ukulungulushiwa, nelyo fye ukwipaiwa. Bambi balipanga amalambo ya fikwatwa, ukusalapo ukutwalilila ukuba ababusu ukucila ukupusula ifishinte fyalungama pa kuti bengaba abakankaala. Cinshi cacitike ku mwanakashi wa Bwina Kristu uulumbwilwe pa kutendeka kwa ici cipande? Alitashishe inkuntu sha kwa dokota isha cikuuku nangu ca kuti shali ishalubana, lelo tasuuswike ku citetekelo cakwe. Mu cifulo ca ico, umucinshi wakwe kwi funde lya kwa Yehova wamutungulwile ku kukaana ukulepula. Mu nsansa, alipolele kwena no kutwalilila uwacincila ukubombela Yehova. Nangu cibe fyo, lintu aiminine mu kushangila, taishibe ifyali no kufumamo, lelo aali uwaipekanya ukushila umulandu onse mu maboko ya kwa Yehova.
Cinshi camwafwile ukutwalilila uwashangila ifyo pe samba lya kutitikisha? Taeseshe ukuimininina, kabili umubomfi wa kwa Lesa uuli onse talingile ukwesha ukucite fyo. Ibukisha, “Lesa aba kuli ifwe icubo kabili ubukose, mu fya kumanama asangwa ukwafwa apakalamba.” (Ilumbo 46:1) Fintu caba icawama ukwalukila kuli Lesa ku kwaafwa ilintu tuli pe samba lya ca kwesha ukucila ukubembuka kabili lyene ukwalukila kuli wene ku nkumbu!
Ee, shi twisenda mu kwanguka inkumbu shikalamba isha kwa Lesa. Ukucila, shi natulundulule ukufwaisha kwine kwine ukwa kucite calungama, nelyo ni lintu twalolenkana na mafya. Ici cikalenga ukwampana kwesu na Yehova ukushika, cikatupeela ukukansha uko tukabila ku bumi bwa muyayaya, no kulangilila umucinshi walinga uwa nkumbu sha kwa Lesa. Imyendele ya mano iya musango yo ikaleta ubuseko ku mutima wa kwa Shifwe wa ku muulu.
[Icikope pe bula 24]
Ukucetekela kwakumanina mu kubuuka kwaafwile abaHebere batatu ukusungilila bumpomfu