Bushe Ukatwalilila Ukwenda mu Cine?
“NSHIKWETE ukusekelela ukwacisha pali uku, pa . . . abana bandi baleenda mu [cine].” (3 Yohane 4) Ifyo e fyasosele umutumwa Yohane mupepi na ku kupwa kwa bumi bwakwe ubwalepa. Ukushipikisha kwatwalilila ukwa ‘bana bakwe,’ abo asambilisheko ‘icine,’ kwamuletele ukusekelela. Yehova na o wine alasekelela lintu bakapepa bakwe batwalilila mu cine. Ifyo alingile ukuba uwasekelela ilelo ukumona ukuteyanya kukalamba, ukufika ku mpendwa ya mamilioni, ukukonka iyo inshila ya mano!—Amapinda 27:11.
Nangu cibe fyo, ilintu abantu ba kwa Lesa pamo nge bumba mu kukanasela balambatikwa ku cine, Abena Kristu bamo umo umo balabwelele numa nelyo ukusha ukupepa kwasanguluka. Ici tacili icishingenekelwa, apantu icintu cimo cine calicitike mu mwanda wa myaka uwa kubalilapo. (2 Timote 4:10; AbaHebere 2:1) Nangu ni fyo, icishinka ca kuti bamo balabwelele numa cebekesha pa kukabila kwa bonse ukusakamana pa lwa bumupashi bwabo bwine. Paulo akoseleshe Abena Kristu bonse ukuti: “Muilinge mwe bene.” (2 Abena Korinti 13:5) Umwina Kristu umo umo alingile ukuipusha umwine ubwipusho bwa kuti: ‘Ni shani fintu ningaba uwashininkisha ukuti nkatwalilila ukwenda mu cine?’
Abengi balibwelele numa nelyo fye ukuleka ukwenda mu cine pa mulandu wa kuti balifuupwilwe—napamo ku mpika sha butuntulu bwa bumi nelyo ukupunkana kwa buntu. Bambi balibwelele numa pa mulandu wa kuti balipumfyanishiwe. Balefwaya ukuipakisha fimo ifya fisabo fya iyi micitile ya fintu ilintu iciliko. Ni shani fintu twingasengauka ukubwelele numa? Ku kwasuka, natulanguluke ica kumwenako cintu Yesu atushilile.
Konkeni ca Kumwenako ca kwa Yesu
Yesu alilolenkene ne mpika ishingi ishayafya. Aali no kubomba no kupunkana kwa buntu pa kati ka bakonshi bakwe, pamo pene no kushipikisha ulupato no kupumiwa kwa balwani bakwe. Na kabili aali no kucincintila amesho ya ici calo. Mu cine cine, alitambikwe ifyuma no kulumbuka pa cipimo ico abanono babala abeshiba. (Mateo 4:8-11; Yohane 6:14, 15) Nalyo line, Yesu atwalilile ukwenda mu cine. Cinshi camwafwile ukucita ici?
Umutumwa Paulo atweba lintu alemba ukuti: “Tubutuke no mukoosha ulubilo ulwabikilwa ifwe, ukutonta amenso kuli Yesu, kelenganya kabili kawaminisha wa citetekelo cesu, uyo, pa mulandu wa kusekelela ukwabikilwe pa ntanshi yakwe, ashipikishe ku capindama, ukusuule nsoni, no kwikala ku kulyo kwa cipuna ca bufumu ca kwa Lesa.” (AbaHebere 12:1, 2) Mu mulandu wa kwa Yesu, ukusunga mu muntontonkanya “ukusekelela ukwabikilwe pa ntanshi yakwe,” ifilambu fyasumbuka ifyalelolela wene, fyamwafwile ukutwalilila ukwenda mu cine. Uku “kusekelela ukwabikilwe pa ntanshi yakwe” kwali ukwacindama ukucila ukufuupulwa kwa pa kashita kanono nelyo ukupumfyanya uko kuntu aali no kulolenkana na ko.
Ukusunga mu muntontonkanya icilambu kuti kwatwaafwa ukushipikisha, nga fintu fye kwacitile kuli Yesu. (Ukusokolola 22:12) Ukulangilila, tontonkanya pa lwa muyendo uuleenda mu nshila ya mpili iyayafya. Afunshika no kufupulwa. Ulutampulo ululi lonse luli kubombesha, kabili inshila ilemoneka ukukanapela. Lyene afika pa mulu wa lupili no kumona akatalamukila itauni lintu aleyako. Mu kupumikisha ukuya kwamoneka ukwayanguka panono. Ukumona kwalengama ukwa cifulo cintu aleyako kwamwafwa ukulaba ukunaka kwakwe. Umwina Kristu mu kupalako akacisanga ukuba icayanguka ku kutwalilila ukwenda mu cine nga ca kuti asungilila icifulo cintu aleyako mu kulengama mu muntontonkanya.
Pashanyeni Umutumwa Paulo
Na umbi uwashipikishe nga nshi icali no kumufuupula aali mutumwa Paulo. Aali no kubomba na malekano no kupunkana kwa buntu pa kati ka bamunyina, pamo pene no kushipikisha impika ya butuntulu bwa bumi iyabipisha, ukupakaswa, ubucushi bwa ku mubili, ne mpika nangu fye ukukaanya mu kati ka filonganino. (1 Abena Korinti 1:10; 2 Abena Korinti 10:7-12; 11:21-29; 12:7-10) Mulandu nshi Paulo tafuupwilwe ukufika ku cipimo ca kutompoka? Alondolola ukuti: “Ndi na maka aya kucite fintu fyonse mu ulenkoselesha.” (Abena Filipi 4:13) Taeseshe ukusenda ifisendo fyakwe eka. Ukucila, Paulo aloleshe kuli Yehova ku kumutungilila.—Ilumbo 55:22.
Intulo ya bulesa iya bukose intu Paulo aitilepo ku kumwafwa ukushipikisha na kabili yalibako ilelo. Baibolo isosa ukuti: “[Yehova] apeela amaka ku wapomponteka, no kufusho kucincila ku ushakosoboka. Abalumendo kuti bapomponteka no kufunshika, na bapungwe kuti bawe cipupu; lelo abalolela Yehova bapepemuka amaka, banina na mapindo nga bakapumpe, babutuka no kukanafunshika, benda no kukanapomponteka.” (Esaya 40:29-31) Nga ca kuti twalolesha kuli Yehova ku kutupeela ubukose ukupitila mwi sambililo lya pa lwesu, ukusangwa ku kulongana, imibombele ya Bwina Kristu iyapimpa, kabili—ukucilisha—ipepo, tukaba na maka ya kushipikisha amesho no kufuupula uko pambi kwingemako ukufuma ku nshita ne nshita.—Ilumbo 1:1-3; Abena Roma 10:10; 1 Tesalonika 5:16, 17; AbaHebere 10:23-25.
Amamilioni Balepekanya Ukwikala mu Paradise
Satana e lesa wa ino micitile ya fintu, umo Abena Kristu baba mu cine cine abeni fye, abalebeshi. (2 Abena Korinti 4:4, NW) E ico, tatulingile ukusunguka nga ca kuti inshita shimo twalolenkana no kufuupula nelyo kupumfyanya. Paulo alembele mwi buku lya AbaHebere ukuti: “Pantu pano tatukwete umusumba wa kwikalilila, lelo tufwayo musumba uuleisa.” (AbaHebere 13:14) Ukwibukisha ukuti isubilo lyesu talyaba muli ici calo cikote lelo muli ico cili no kwisa na kabili kulatwafwilisha ukukanabwelele numa.
Mu nshila shimo, Abena Kristu bapala abantu bendauka abo basha impanga yabo iya cikaya mu kufwailisha ubumi bwawaminako kumbi. Pamo nge funde lya cinkumbawile, ulu luli lutampulo lwayafya ukubuula. Cibimbamo ukulonga nelyo ukusha ifipe fyakwe fyonse no kusoso kuti shalenipo ku mushi abelesha, pamo pene na ku fibusa na bantu bakwe. Na kabili cibimbamo ukuya ku calo iceni, ukwikala pa kati ka bantu pambi abashingamupokelela, no kusambilila ululimi ulupya ne nshila ya bumi iishabeleshiwa. Kwena, abengi bapanga ukusela kwa musango uyo mu kusubila fye ukuwamya imibele yabo iya fikwatwa muli ici calo.
Abo abendauka, nga fintu cili, ukufuma muli iyi micitile ikote iya fintu no kuba ulubali lwa bantu ba kwa Lesa balolenkana no kusonsomba kwapalako. Bapanga ukuteuluka kwa ntambi ku kwikala ukulingana ne fipimo fyasanguluka ifya Cebo ca kwa Lesa, kabili basambilila “ululimi lwine lwine” ulwa cine. (Sefania 3:9; 1 Abena Korinti 6:9-11) Balabombesha, na kabili, ku kubombela Imfumu ikalamba iya Bufumu bwa kwa Lesa, Yesu Kristu. Mu kulundapo, mu milandu iingi abantu babo ne fibusa fya kale balabaputulako, ica kuti, mu nshila imo ine, bali no kusosa ukuti shalenipo kuli bene.
Lelo Abena Kristu balikwata ifingi ifya kunonka ukucila abo bendauka pa milandu ya mu fya ndalama. Ku cintu cimo, besa mu bwikashi ubo bwabatemwa no kubasakamana. (Luka 18:29, 30) Icacilapo kucindama, besa mu kwampana kwapalamisha na Yehova, Lesa wa kubumbwa konse. Balanonka umutende wa muntontonkanya no kucetekela pa lwa nshita ya ku ntanshi nga fintu balolesha ku kufikilishiwa kwa malayo ya kusungusha aya kwa Lesa. (Abena Filipi 4:8, 9) Abo abakwata ukutesekesha kwalinga ukwa ifi fishinka tabakasuminishe ukupumfyanishiwa nelyo ukufuupula ukubabweseshe numa mu kubelelela. Tabakalulwe ukufuma mu musebo wa kamfyemfye uyo utungulula ku bumi.—Mateo 7:13, 14; 1 Yohane 2:15-17.
Sakamana Ubutuntulu bwa Bumi Bobe Ubwa ku Mupashi
Nga ca kuti twasakamana ubutuntulu bwa bumi bwesu ubwa ku mubili pa cishinte ca lyonse, natukwata ishuko lya mu nshita ilyawamisha ilya kucincintila ubulwele. Kabili nangu twalwala, tulapola mu kwangufyanya. Mu kupalako, nga ca kuti twasakamana ubutuntulu bwesu ubwa ku mupashi, ukusungilila icimonwa calengama ica mapaalo tuipakisha nomba kabili nayo ayatupembelela, kabili nga ca kuti twasambilila ukushintilila pa bukose bwa kwa Yehova ukucila pa bwesu fwe bene, tukaba mu cifulo cawaminako ku kubomba ne mpika isho shimako. Te kuti mu kukumanina tusengauke imibele ya kupumfyanya ne ya kufuupula. Lelo nga ca kuti mu kulinga twalisakamana ubutuntulu bwesu ubwa bumi ubwa ku mupashi mu kubangilila kwa nshita, ifintu fya musango uyo tafyakatucimfye.
Ibukisheni, Yehova alasekelela lintu bakapepa bakwe bashipikisha. E co natulete ukusekelela ku mutima wakwe pa kutwalilila ukwenda mu cine.