“Imbila Nsuma” Ukufuma mu Ukusokolola

“Namwene malaika umbi alepupuka mu kati ka muulu, akwete imbila nsuma ya muyayaya ya kubila ku baikala pe sonde.”—UKUSOKOLOLA 14:6.

1. Ilyo Inte sha kwa Yehova balisumina mu kuti ibuuku lya Ukusokolola lyalipuutwamo, mulandu nshi bashabela “cakaniko cilanda pa kupwa kwa calo”?

UKUPUSANA ne milandu bapeelwa, Inte sha kwa Yehova tababa “cakaniko cilanda pa kupwa kwa calo” nelyo “akabungwe ka mipepele akalanda fye pa bushiku bwa bupingushi.” Lelo balisumina ukuti ibuuku lya Ukusokolola lyaba lubali lwa Cebo ca kwa Lesa icapuutwamo. Ca cine, mu Ukusokolola mwaliba ubukombe bwa bupingushi ku babifi. Lelo ilyo baleshimikila ku cintubwingi, ababomfi ba kwa Lesa balanda sana pe subilo lishaiwamina ilyaba mu Baibolo, ukusanshako ilyaba mu Ukusokolola. E ico, tabalundapo nelyo ukufumyako ifili fyonse ku cebo ca kusesema icisangwamo.—Ukusokolola 22:18, 19.

Bakabila ba Mbila Nsuma

2. Malembo nshi yamo ayo Inte sha kwa Yehova shibomfya ilingi mu mulimo wa shiko uwa kushimikila?

² Umulandu wa mu Malembo untu Inte sha kwa Yehova shiloshako sana uulenga shilebomba ubutumikishi bwa shiko waba mu mashiwi ya kwa Yesu ayatila: “Ne mbila nsuma iyi ya bufumu ikabilwa ku fyalo fyonse ku kubo bunte ku nko shonse; e lyo impela ikesa.” (Mateo 24:14) Kabili “imbila nsuma iyi ya bufumu” cinshi? Ba Nte abengi kuti bayasuka ukupitila mu kwambula ifikomo fya mu Ukusokolola ifipandwa 20 na 21 ifilanda pa Ukuteka kwa Myaka Ikana Limo Ukwa kwa Kristu no buteko bwakwe ubwa Bufumu no bwikashi bwa bantunse umo imfwa, ukuloosha no kucululuka ‘fishakabeko kabili iyo.’—Ukusokolola 20:6; 21:1, 4.

3. Ubutumikishi bwa pa cintubwingi ubwa Nte sha kwa Yehova bwapalana no mulimo wa kwa nani?

³ Pamo nga bakabila ba iyi mbila nsuma, Inte sha kwa Yehova e mo inkombe ya ku muulu iya mampalanya iyakwata umulimo walondololwa na mu Ukusokolola ilandila. “Namwene malaika umbi alepupuka mu kati ka muulu, akwete imbila nsuma ya muyayaya ya kubila ku baikala pe sonde, na ku luko lonse no mukowa no lulimi na bantu.” (Ukusokolola 14:6) “Imbila nsuma ya muyayaya” isanshamo ukubilisha kwa kuti “ubufumu [nelyo ubuteko] bwa pe sonde” ‘buli bwa kwa Shikulwifwe, no bwa kwa Kristu wakwe’ no kuti “inshita” naifika “iya konaula abaleonaule calo.” (Ukusokolola 11:15, 17, 18) Bushe iyo te mbila nsuma cine cine?

Ifyo Ukusokolola Kwatukwatila

4. (a) Fishinka nshi ifya kutendekelako ifya cine fyalondololwa mu cipandwa ca kubalilapo ica Ukusokolola? (b) Cinshi cikabilwa ku bafwaya ukunonkelamo mu mbila nsuma?

⁴ Icipandwa ca kubalilapo ice buuku lya Ukusokolola cilanda pali Yehova nga “Alifa kabili Omega, . . . uulipo, uwalipo, uukabapo, uwa maka yonse.” Kabili cilanda pa Mwana wakwe, Yesu Kristu, nge “nte ya cishinka,” “ibeli lya babuuka ku bafwa,” kabili “kateka wa shamfumu sha pano nse.” Cilanda na pali Yesu ngo “watutemwa, uwatukakwilile na mu membu shesu ku mulopa wakwe.” (Ukusokolola 1:5, 8) E co, ku ntendekelo fye, Ukusokolola kulondolola icine cacindama icingalenga umo ukupusuka. “Abaikala pe sonde” tabakanonkelemo mu mbila nsuma iyo babashimikila kano banakila bumulopwe bwa kwa Yehova, ukutetekela mu mulopa wapongolwelwe uwa kwa Yesu no kusumina ukuti Yehova alimubuushishe no kuti Kristu nomba e Kateka Lesa asonta.—Amalumbo 2:6-8.

5. Mulimo nshi Kristu akwata mu fipandwa 2 na 3 ifya Ukusokolola?

⁵ Ifipandwa fibili ifyakonkapo filanda pali Yesu Kristu nga Kangalila wa kutemwa uwa ku muulu uwangalila ifilonganino fya basambi bakwe pe sonde. Umufungilo walembeelwe ku filonganino 7 ifya Bena Kristu ifyali mu Asia Minor mu mwanda wa myaka uwa kubalilapo C.E. wakwete inkosho no kufunda ifyo fingatwafwa na lelo. Ubukombe bwaletumwa ku filonganino ilingi bwaletendeka na mashiwi pamo nga “naishibe milimo yobe” nelyo “naishibo kucushiwa kobe.” (Ukusokolola 2:2, 9) Kristu alishibe ifyalecitika mu filonganino fya basambi bakwe. Atashishe ifilonganino fimo pa kutemwa fyakwete, fimo pa citetekelo, fimo pa kubombesha mu butumikishi, fimo pa kushipikisha, kabili fimo pa busumino mwi shina lyakwe ne cebo. Ifilonganino fimbi alifyebawile pa mulandu wa kuti fyalekele ukutemwa Yehova no Mwana wakwe, nelyo fyaponene muli bucisenene, ukupepo tulubi, nelyo mu fyakaniko fya busangu.

6. Icimonwa calembwa mu cipandwa calenga bune cilenga abantu ukumfwikisha cinshi?

⁶ Icipandwa calenga bune cakwata icimonwa citiinya ica cipuna ca bufumu ica ku muulu ica kwa Yehova Lesa. Cakwata icitontonshi ca bukata bwa kubapo kwa kwa Yehova ne mitantikile ya kuteka kwa ku muulu iyo akabomfya. Bakateka bapeelwa ubufumu, abo ifipuna fyabo ifya bufumu fyashinguluka icipuna ca bufumu cikalamba ica mu bubumbo bonse, bashinshimuna Yehova no kubilisha ukuti: “Mwaliwamina, mwe Shikulwifwe Lesa wesu, ukupokelelo bukata no mucinshi na maka; pantu ni mwe mwalengele ifintu fyonse: kabili mulandu wa kufwaya kwenu fyabeleleko no kulengwa.”—Ukusokolola 4:11.

7. (a) Cinshi malaika akambisha abaikala pe sonde ukucita? (b) Cinshi caba ulubali lwacindama ulwa mulimo wesu uwa kusambilisha?

⁷ Bushe ifi fyebo filakuma abantu ilelo? Ee, ukwabula no kutwishika. Nga ca kuti balefwaya bakabeko ilyo Ubufumu bwa Myaka Ikana Limo bukalateka, balingile ukumfwila ifyo ‘malaika alepupuka mu kati ka muulu’ abilisha ukuti: “Tiineni Lesa, no kumupeelo mucinshi, pa kuti naiise nshita ya bupingushi bwakwe.” (Ukusokolola 14:6, 7) Imifwaile iikalamba imo iya mulimo wa kusambilisha Baibolo uwa Nte sha kwa Yehova ya kwafwa “abaikala pe sonde” ukwishiba no kupepa Yehova, ukwishiba ukuti e Kalenga, no kunakila mu kuitemenwa kuli bumulopwe bwakwe ubwalungama.

Umwana wa Mpaanga Uwawamino Kucindikwa

8. (a) Kristu alondololwa shani mu fipandwa 5 na 6? (b) Cinshi bonse abakutika ku mbila nsuma bengasambilila kuli ici cimonwa?

⁸ Ifipandwa fibili ifyakonkapo, 5 na 6, filanda pali Yesu Kristu ngo Mwana wa mpaanga uwawamino kwisula umufungilo wafikakatikilo 7, na muli fyo mu mampalanya asokolola ificitika mu nshiku shesu. (Linganyeniko Yohane 1:29.) Kuli uyu Mwana wa mpaanga uwa cimpashanya, amashiwi ya ku muulu yatila: “Mwawamino kubuulo mufungilo, no kukakatule fikakatikilo fya uko; ico mwaipaiwe, kabili mwashitiile Lesa mu mulopa wenu aba mu mikowa yonse na ba ndimi, na bantu na bantu, na ba nko; kabili mwabacita kuli Lesa wesu ukube shamfumu kabili bashimapepo, kabili bakaba no bufumu pe sonde.” (Ukusokolola 5:9, 10) Ici cimonwa citusambilisha ukuti ukupitila mu mulopa wapongolwelwe uwa kwa Kristu, abantunse bamo aba misango yonse betwa ku kuba nankwe mu muulu no ‘kuba no bufumu pe sonde.’ (Linganyeniko Ukusokolola 1:5, 6.) Impendwa yabo iinono yalisokololwa ku ntanshi mu Ukusokolola.

9. Kristu alondololwa shani mu cipandwa 6?

⁹ Mu cimonwa na cimbi, Kristu alandwapo ngo wapeelwa icilongwe uwanina pali kabalwe wabuuta, “alecimfya kabili ku kuyacimfya.” Ku ca nsansa, akacimfya ububifi bonse ubwimininwako na ba pali bakabalwe bambi batatu aba mu Ukusokolola, abo imibutukile yabo iyabipa yaleta inkondo, ifipoowe, ne mfwa ku bantunse ukutula mu mwaka waibela uwa 1914. (Ukusokolola 6:1-8) Umulimo waibela uwa kwa Kristu, Umwana wa mpaanga uwa kwa Lesa, mwi pusukilo lya bantunse na mu kufishiwapo kwa mifwaile ishaiwamina iya kwa Yehova lyashi likalamba mu mulimo wa kusambilisha Baibolo uwa Nte sha kwa Yehova.

10. (a) Fyebo nshi ifyacindama fisangwa mu cipandwa 7? (b) Finshi Kristu alandile pa bapokelela Ubufumu?

¹⁰ Icipandwa 7 cakwata imbila nsuma icine cine. Ni mwi buuku lya Ukusokolola lyeka umo tusanga impendwa yabo Yesu aitile ati “umukuni unono” uyo Wishi wa Mwana wa mpaanga apeela Ubufumu. (Luka 12:32; 22:28-30) Aba balikakatikwa kuli Yehova Lesa ukupitila mu mupashi wakwe. (2 Abena Korinti 1:21, 22) Umutumwa Yohane, uwapokelele Ukusokolola ashininkisha ukuti: “Naumfwile ne mpendwa ya bakakatikwe, amakana umwanda umo na makana amakumi yane na makana yane [144,000].” (Ukusokolola 7:4) Iyi mpendwa yashininkishiwa mu cipandwa ca ku ntanshi nge mpendwa yonse iya “balubwilwe mu bantu” ku kuteka no Mwana wa mpaanga pa Lupili lwa Sione ulwa ku muulu. (Ukusokolola 14:1-4) Ilyo amacalici ya Kristendomu yafilwa ukulondolola bwino no kushinina abantu pa lwa iyi mpendwa, umo uwasoma Baibolo E. W. Bullinger alanda pali iyi mpendwa ukuti: “Cishinka cayanguka: impendwa yaishibikwa yalipusana ne mpendwa ishaishibikwa iya muli ici cine cipandwa.”

11. (a) Ni mbila nsuma nshi isangwa mu cipandwa 7? (b) Finshi “ibumba likalamba” lisubila?

¹¹ Ni mpendwa nshi ishaishibikwa iyo Bullinger alelandapo? Mu cikomo 9, umutumwa Yohane alembele ukuti: “Ilyo papitile ifi naliloleshe, moneni, kwali ibumba likalamba ilishingapendwa ku muntu nangu umo, abafuma ku luko lonse ne mikowa ne misango ya bantu na bantu na ba ndimi.” (Ukusokolola 7:9) Ni bani baba mwi bumba likalamba, baiminina shani kuli Lesa, kabili cikaba shani kuli bene ku ntanshi? Icasuko ca mu Ukusokolola ni mbila nsuma ku baikala pe sonde. Tubelenga ukuti: “Aba e bafuma mu Bucushi bukalamba, kabili basambile amalaya yabo, no kuyabuutusha mu mulopa wa Mwana wa mpaanga.” Ukupitila mu kutetekela mu mulopa wapongolwelwe uwa kwa Kristu, bakacingililwa mu “Bucushi bukalamba.” Kristu ‘akabatungulula ukuya pa tumfukumfuku twa menshi ya mweo; kabili Lesa akafuute filamba fyonse ku menso yabo.’ (Ukusokolola 7:14-17) Iminshipendwa ya bantu ilelo kuti baba pe bumba lishaikulila ilikapusuka impela ya buno bwikashi bwabipa. Pamo nga bekashi ba Mfumu Yesu Kristu mu Kuteka kwakwe Ukwa Myaka Ikana Limo, bakatungululwa na wene ku mweo wa muyayaya pe sonde. Bushe iyo te mbila nsuma?

“Ifya Bupingushi Fyakwe fya Cine Kabili fya Bulungami”

12, 13. (a) Ifipandwa 8 ukufika ku 19 fyakwata fyebo nshi? (b) Mulandu nshi aba bafumacumi bashilingile ukupelenganishiwa ku kusesema kwa musango yu?

¹² Ifipandwa 8 ukufika ku 19 e fyalenga sana ukuti ibuuku lya Ukusokolola, lishibikwe nge lisobela utuyofi tutiinya. Fyakwata ifyebo fya bupingushi ifyaluma (ifimininwako no kuwelesha kwa ntandala, ifinkunka, inweno sha cipyu ca kwa Lesa) ku fintu fyalekanalekana ifya bwikashi bwa kwa Satana. Icikapingulwa intanshi mipepele ya bufi (“Babele Mukalamba”), lyene aba bupolitiki bashinakila Lesa, abemininwako ne fiswango.—Ukusokolola 13:1, 2; 17:5-7, 15, 16.a

¹³ Ifi fipandwa filanda pa kusangululwa kwa ku muulu, no kupooswa kwa kwa Satana ne fibanda fyakwe pe sonde. Ifi fipandwa e fyeka ifilondolola bwino umulandu mwi sonde mwabela amacushi yashaifulila ukutula mu 1914. (Ukusokolola 12:7-12) Kabili filondolola mu mampalanya ubonaushi bwa bwikashi bwabipa ubwa pe sonde ubwa kwa Satana. (Ukusokolola 19:19-21) Bushe abantu ba bufumacumi balingile ukupelenganishiwa ku fintu fya musango yu? Iyo, pantu ilyo Lesa akulapingula, uwa ku muulu abilisha ukuti: “Aleluya, ipusukilo no bukata na maka fya kwa Lesa wesu, ico ifya bupingushi fyakwe fya cine kabili fya bulungami.”—Ukusokolola 19:1, 2.

14, 15. (a) Impela ya buno bwikashi bwabipa ikesa shani mu bulungami? (b) Mulandu nshi ulu lubali lwa Ukusokolola lulingile ukulengela abantu ba bufumacumi ukusekelela?

¹⁴ Yehova takalete ubwikashi bwa bulungami ukwabula ukufumya pe sonde abalelyonaula. (Ukusokolola 11:17, 18; 19:11-16; 20:1, 2) Lelo, takwaba umuntu uli onse nelyo ubuteko bwa bupolitiki ubwakwata insambu nelyo amaka ya kucite ci. Ni Yehova fye eka, ne Mfumu yakwe iyo asonta kabili Kapingula, Yesu Kristu, ebengacite ci mu bulungami.—2 Abena Tesalonika 1:6-9.

¹⁵ Abaume na banakashi “abateta no kulila pa fya muselu fyonse ifilecitwa” balingile ukusekelela pa mulandu wa kuti nga fintu Ukusokolola kulangilila bwino, Yehova ali no konaula buno bwikashi bwabipa. (Esekiele 9:4) Ici cilingile ukubalenga ukumona ifyo cipamfishe ukumfwila ubwite bwa kwa malaika uuli ne mbila nsuma, uubilisha ukuti: “Tiineni Lesa . . . pa kuti naiise nshita ya bupingushi bwakwe; pepeni uwacitile umuulu ne calo.” (Ukusokolola 14:7) Lekeni abantu ba musango yu bapepe no kubombela Yehova pamo ne Nte shakwe, “ababaka amafunde ya kwa Lesa, no kukwato bunte bwa kwa Yesu.”—Ukusokolola 12:17.

Ukuteka kwa Myaka Ikana Limo Ukushaiwamina

16. (a) Mulandu nshi amacalici ya mu Kristendomu yakaanina ukusubila mu Myaka Ikana Limo? (b) Mulandu nshi Inte sha kwa Yehova shasuminina ukuti ipepo lya cilangililo likaasukwa?

¹⁶ Ifipandwa 20 na 22 ifye buuku lya Ukusokolola fyakwata ifishinka fya mu Malembo ifyatulenga ukusubila mu Myaka Ikana Limo. Ici e ciputulwa fye ceka ica mu Baibolo icilanda pa nshita ya myaka ikana limo iikaba e ntendekelo ya nshita ya nsansa iya ciyayaya mu muulu na pe sonde. Amacalici ya Kristendomu yalikaana ukusubila mu Myaka Ikana Limo. Apo amacalici yafunda ukuti abalungami baya ku muulu na babifi ku helo, tayasumina muli paradise wa pe sonde. Ipepo lya cilangililo, ililomba ukuti ‘ukufwaya kwa kwa Lesa kucitwe pano nse nga mu muulu,’ talipilibula icili conse ku cinabwingi ca ba mu macalici ya Kristendomu. (Mateo 6:10) Lelo te fyo caba ku Nte sha kwa Yehova. Balisumina ukwabula ukutwishika ukuti Yehova Lesa tacitile isonde ilya “cimfulumfulu,” lelo “ku kwikalwamo.” (Esaya 45:12, 18) E co, ukusesema kwa kale, ipepo lya cilangililo, ne subilo lyaba mu Ukusokolola ilya Myaka Ikana Limo filasuminishanya fyonse. Ilyo Akalateka pa Myaka Ikana Limo, Kristu akashininkisha ukuti ukufwaya kwa kwa Yehova kwacitwa pe sonde, nga fintu kucitwa ku muulu.

17. Amashiwi ya kuti “imyaka ikana limo” yasangwa imiku inga mu Ukusokolola icipandwa 20, kabili cinshi yalandapo ?

¹⁷ Amashiwi ya kuti “imyaka ikana limo” yasangwa imiku 6 mu fikomo 7 ifya kubalilapo mu Ukusokolola icipandwa 20 kabili iyi miku 6 ilanda pa myaka ikana limo iya cine cine, te pa mintapendwa ya myaka iishaishibikwa, nga fintu abalandapo aba mu Kristendomu bengafwaya ifwe ukusumina. Finshi fikacitika mu Myaka Ikana Limo? Intanshi, Satana bakamupoka amaka muli iyo nshita yonse. (Ukusokolola 20:1-3; linganyeniko AbaHebere 2:14.) Mwandi iyo ni mbila nsuma!

18. (a) Mulandu nshi Imyaka Ikana Limo ingetilwa “ubushiku” bwa bupingushi? (b) Cinshi cikacitika pa mpela ya myaka ikana limo?

¹⁸ Apo “ubupingushi” bupeelwa “abakateka pamo nankwe [Kristu] imyaka ikana limo,” iyi nshita yaba, na kuba, “bushiku” bwa bupingushi ubwa myaka ikana limo. (Ukusokolola 20:4, 6; linganyeniko Imilimo 17:31; 2 Petro 3:8.) Abafwa bakabuushiwa kabili bakapingulwa mu mulinganya umwabele milimo yabo, nelyo incitilo, muli ilya nshita pamo na bakapusuka “ubucushi bukalamba.” (Ukusokolola 20:12, 13) Pa mpela ya myaka ikana limo, Satana akakakulwa pa nshita inono ku kuleka abantunse bakeshiwe umuku wa kulekelesha, pa numa ya ico wene ne fibanda fyakwe, pamo na bali bonse abakapondoka abakamukonka bakonaulwa ku ciyayaya. (Ukusokolola 20:7-10) Abantunse abakashipikisha ubu bwesho bakalembwa amashina ku ciyayaya mwi “buuku lilya lya Mweo” kabili bakaba no bumi bwa nsansa ku ciyayaya, ukubombela no kupepa Yehova mu paradise pe sonde.—Ukusokolola 20:14, 15; Amalumbo 37:9, 29; Esaya 66:22, 23.

19. (a) Mulandu nshi twingashininkishisha ukuti amalayo yashaiwamina ayaba mwi buuku lya Ukusokolola yakafishiwapo ukwabula ukutwishika? (b) Finshi fikalandwapo mu cipandwa cikonkelepo?

¹⁹ Iyi e mbila nsuma yaba mu Ukusokolola. Te filayo fya fye ifya bantu. Umutumwa Yohane alembele ukuti: “Uwaikala pa cipuna ca bufumu atile, Moneni, ifintu fyonse nafilenge fipya. Kabili atile, Lemba: pantu ifyebo ifi fya cishinka kabili fya cine.” (Ukusokolola 21:5) Cinshi tulingile ukucita pa kuti tukamoneko ukufishiwapo kwa iyi mbila nsuma? Ibuuku lya Ukusokolola lyakwata ukufunda ukwingi ku bafwaya ukutemuna Lesa. Ukumfwila ukufunda kwa musango yu kukatuletela insansa ishingi, pali nomba na ku ciyayaya, nga fintu icipande cikonkelepo cili no kulangilila.

[Futunoti]

Ifishinka fya Kupitulukamo

◻ Fishinka nshi ifikalamba ifyaba mu Ukusokolola ifipandwa 4 ukufika ku 6 fyaba lubali lwacindama ulwa mbila nsuma?

◻ Ni mbila nsuma nshi iisangwa mu Ukusokolola icipandwa 7?

◻ Mulandu nshi aba bufumacumi bashilingile ukupelenganishiwa ku bukombe bwa bupingushi ubusangwa mu Ukusokolola?

◻ Ni mu nshila nshi Imyaka Ikana Limo ikabela “bushiku” bwa bupingushi?

[Icikope pe bula 10]

Yesu Kristu Imfumu akafumya pe sonde inkondo, ifipoowe, ne mfwa